‘Nyamuhanga asyasangulha emisonia yosi okwa meso wabu. Kandi olhuholho silhwendi syasabyaho, erisusumana kutse eririra, kutse eriaghalhwa. Emyatsi y’erimbere iyabirirenga.’​—Eribisulirwa 21:​3, 4, e Biblia eye Kinandi eya 1980.

Wukasika ko wukendi syaghasirwa omwa bya wasyakolha.​—Isaya 65:​21-23.

Ko hathendi syabya bulhwere kutse eriaghalhwa lyosi-lyosi.​—Isaya 25:8; 33:24.

Ko wukendi syabana engebe y’erikotha iwunatsemire n’eka yawu n’abanywani.​—Esyonyimbo 37:​11, 29.

Ee, habw’esyonzumwa ng’ibiri:

• Nyamuhanga awithe amaaka aw’eriberererya eby’akalhagha. Omwa Biblia, Nyamuhanga Yehova iyo musa yukahulhawa mwa ‘Omuthoki w’Ebyosi,’ kundi amaaka wiwe syawithe busubuliro. (Eribisulirwa 15:⁠3) Ni bugha ambu sihali ekyanga mulemesya eriberererya omulhaghe wiwe ow’eryuwania ekihugho kino. Ngoku e Biblia yikabugha, ‘oku Nyamuhanga emyatsi yosi yikathokekana.’​—Matayo 19:⁠26.

• Nyamuhanga anzire kutsibu erisyaberererya emilhaghe yiwe. Ng’eky’erileberyako, Yehova ‘anzire’ kutsibu erisyalhubukya ababiriholha.​—Yobu 14:​14, 15.

  Kandi e Biblia yikakanganaya yithi Mughalha wa Nyamuhanga, Yesu, mwalhamya abalhwere. Ekyaleka iniakolha ekyo niki? Kundi abya anzire. (Mariko 1:​40, 41) Yesu mwagherererya ndeke emibere ya Thatha wiwe ey’erianza eriwathikya abali n’obwagha.​—Yoane 5: 19.

  Neryo kwesi thwangana kakasya ngoku Yehova na Yesu banzire ithwabana etseme obuthuku obukasa!​—Esyonyimbo 72:​12-14; 145:16; 2 Petero 3:9.