1-3. (a) Abalere abosi bali omwa mibereki, kandi ekyo thwanga kisosekania naki? (Lebaya ekisasani ekiri okw’itsuka.) (b) Ni kyahi ekikendi wathikya Abakristayo abalere omwa mibere eyi?

THALENGEKANIA wukathegheka erighenda okwa mukonga mulebe ow’embaghane omwa tawuni eyiri haali. Erihikayo wutholere iwaghenda omwa bbasi. Iwune ahali esyobbasi, iwathatsuka eriyibulha-bulha kundi hali bandu bangyi n’esyobbasi nyingyi. Aliwe eky’obutseme, wunasi aho nyine-nyine aho wukaya n’ebbasi eya wutholere erighendamu. Siwanga ghenda omwa yindi bbasi yosi-yosi, kundi wunasi ku yikendi kuthwalha ehandi.

² Engebe yiri ng’olhughendo, kandi inywe balere muli ng’abandu abali ahakabya esyobbasi. Hakanayira omwa ngebe imwabya bindu bingyi ebikayithagha erithwamu n’erisombolha eky’erikolha ebyangana leka iwayibulha-bulha. Aliwe wamabya iwunasi ndeke eyo wukaya, ikikendi kwolhobera erisombolha ndeke. Ni nzira yahi eya wutholere iwakwama?

³ Omwatsi ono akendi subirya ekibulyo ekyo kandi akendi kuhira mw’omuhwa w’erihwerya engebe yawu okw’itsemesya Yehova. Eki kikamanyisaya erighendera okw’ihabulha lya Yehova  omw’ithwamu lyawu lyosi omwa ngebe, bikahika ng’okwa by’esukuru n’eby’omubiiri kutse nga wingire omwa butheke n’eributha abaana. Kandi kikamanyisaya erilhubirira eriberererya ebilhubirirwa by’obunyakirimu, ni bugha ambu, ebilhubirirwa ebikendi kuthunda hakuhi-kuhi na Yehova. Wamalholha embere erihwerya amalengekania wawu w’okw’ikolera Yehova, iwukendi yikethera ngoku akendi kutsumulha n’erikuwathikya.​—Soma Emisyo 16:3.

4. Thukendi kania okuki omo mwatsi ono?

⁴ Ni kibuya erihiraho ebilhubirirwa by’obunyakirimu. Busana naki? Thukendi lebya esyonzumwa isathu. Ey’erimbere n’eyakabiri sikendi kuwathikya erilhangira ngoku erilhubirira eriberererya ebilhubirirwa by’obunyakirimu kikendi leka iwabya nibya munywani mubuya wa Yehova. Eyakasathu yikendi kangania ekikaleka ikyabya kibuya eriyihiriraho ebilhubirirwa ebi iwukine mulere.

5. Ni nzumwa yahi ngulhu eyangaleka iwahiraho ebilhubirirwa by’obunyakirimu?

⁵ Enzumwa ngulhu kutsibu eyangaleka ithwahiraho ebilhubirirwa by’obunyakirimu ly’erisima Yehova busana n’olhwanzo lhwiwe n’eby’abirithukolera. Omuhandiki mughuma w’Esyonyimbo mwabugha athi: “Lyowene ndeke eriha Omwami Mukulhu ewasingya . . . Emibiiri yawu y’amaaka, iwe Mwami Mukulhu, yikanyitsemesaya; ng’imba n’obutseme busana n’ebyo wabirikolha.” (Esyonyimbo 92:1, 4) Thalengekania okwa buli kindu ekya Yehova abirikuha: engebe yawu, erikirirya lyawu, e Biblia, ekithunga, n’amaha w’erisyabyaho kera na kera omwa Paradiso. Wamahiraho ebilhubirirwa by’obunyakirimu, wukakanganaya Yehova ngoku wukasima ebindu byosi ebi kandi ekyo kikakuthunda hakuhi nayu.

6. (a) Ebilhubirirwa by’obunyakirimu bikahamba bithi okwa bughuma bwawu na Yehova? (b) Ni bilhubirirwa byahi ebyo wanga yihiriraho iwukine mulere?

⁶ Enzumwa eyakabiri ey’erihiraho ebilhubirirwa by’obunyakirimu ly’eribya kundi wukabya wukabiberererya, wukabya iwukakolera Yehova y’omubiiri mubuya. Eki kikendiongera erikuthunda hakuhi nayu. Omukwenda Paulo mwalhaghanisya athi: “Nyamuhanga syalikolha ekithathunganene. Syang’ibirirwa omubiiri wenyu, n’olhwanzo olho mwakangaya busana nayu.” (Abaebrania 6:10) Isiwabugha wuthi wuli mwana okw’iyihiriraho ebilhubirirwa. Ng’eky’erileberyako, Christine abya w’emyaka 10 akathwamu erisoma mughulhu wosi emyatsi eyihambire okwa ngebe ey’Abema ba Yehova abathaleghulha. Toby abya w’emyaka 12 akayihiriraho ekilhubirirwa ky’erisoma e Biblia eyosi athali abatizibwa. Maxim abya w’emyaka 11 na mwali wabu iya Noemi abya w’emyaka 10 bakabatizibwa. Abosi mubayihiriraho ekilhubirirwa ky’erisyakolera okwa Beteli. Eribya ibanahirire amalengekania w’okwa kilhubirirwa kyabu, mubahira efomu ye Beteli okwa kidongo omwa nyumba yabu. Kandi ibbwa iwe? Mbwino wangana lengekania okwa bilhubirirwa ebyo iwe wangayihiriraho n’erilhubirira eribiberererya?​—Soma Abanya Filipi 1:10, 11.

7, 8. (a) Erihiraho ebilhubirirwa kyangaleka kithi ikyolhoba erithwamu? (b) Ni kyahi ekyaleka omulengwa mughuma iniathwamu erithendi ghenda okwa yunivasite?

⁷ Ni nzumwa yahi eyakasathu eyikaleka ikyabya kibuya erihiraho ebilhubirirwa iwukine mulere? Iwe ng’omulere, wuwithe bingyi by’erithwamu. Wutholere iwathwamu nga wusome esukuru eyiri yithi kutse nga wusyakolha  omubiiri owali athi, n’ebindi bingyi. Erithwamu eri liri ng’amahwa w’esyonzira esyo wukahikako iwune omwa lhughendo. Wamabya iwunasi eyo wukaya, kik’olhoba erithwamu enzira y’erilhabamo. Kuthya, wamabya iwunasi ebilhubirirwa byawu nga ni byahi, ikikendyolhoba erithwamu ndeke. Emisyo 21:5 hathi: “Amalengekania w’ab’omuhwa akaletha bingyi.” Wamathegheka lhuba omw’ihiraho ebilhubirirwa ebyuwene, nawu iwukendi bithoka lhuba. Eki kya Damaris ayilhangirira omughulhu abya atholere erikolha erithwamu likulhu inina mulengwa.  

⁸ Damaris mwalhaba ndeke esukuru, neryo kwaghenda okwa yunivasite eriyasoma ebilhaghiro, angasomere bbule. Omwakanya k’ekyo, omumbesa oyu mwathwamu erikolha omubiiri owathe muyithaghisaya erighenda okwa yunivasite. Busana naki? Kundi iniakine mulere kutsibu, mwathwamu athi akendisyabya mutemburi. Akabugha athi: “Ekyo mukyamanyisya ingye erikolha omubiiri owakanyilighira erikolha biro bike omwa wiki. Aliwe kunayosomera ebilhaghiro okwa yunivaste, nangabere ingathunga sente nene, aliwe isinanga thoka eribana omubiiri w’erikolha biro bike omwa wiki.” Damaris amabirikolha obutemburi habw’emyaka 20. Mbwino akanayowa imwahiraho ekilhubirirwa ekitholere n’erithwamu ndeke omughulhu abya mulengwa? Ee. Aho akakolera, akabana abandu bangyi abasomire eby’ebilhaghiro abakakolha omubiiri ow’angabere iniakakolha kwaghenda okwa yunivasite. Akabugha athi abangyi okw’ibo sibatsemere emibiiri yabu. Damaris akayowa emyaka y’obutemburi eyosi eyi iyabirimuha etseme nene kandi iyabirimuwathikya eriyihighulha okw’ibulha etseme ng’ibo.

9. Busana naki thukayisyethera abalere bethu?

⁹ Omwa kihugho kyosi esyongumi n’esyongumi sy’abalikyethu abalere banemukolha ndeke kutsibu kandi batholere erisimwa. Engebe yabu yithimbire okwa bunywani bwabu na Yehova n’ebilhubirirwa byabu by’obunyakirimu. Abalere aba bakatsemera ndeke ngebe kandi ibabya ibane mwigha erighendera okwa busondoli bwa Yehova omwa buli mwatsi, imwamuli eby’esukuru, omubiiri, n’engebe y’amaka. Solomona mwabugha athi: “Wikiriraye Omwami Mukulhu n’omuthima wawu wosi.” Mwongerako athi: “Omo syonzira syawu syosi wumwahule, nayu asyathunganania esyonzira syawu.” (Emisyo 3:5, 6) Abalere, Yehova abanzire kutsibu! Muli b’obughuli embere siwe, kandi akendi batheya, iniabasondolha, n’eribatsumulha.

10. (a) Ni kyahi ekyangaleka omubiiri w’erithulira iniabya mughuma w’okwa bindu ebyo thukalhangira mwa by’omughaso? (b) Wanga minya wuthi erisoborera ndeke ebya wikirirye?

¹⁰ Wamahwerya engebe yawu okw’itsemesya Yehova, iwukendianza erimukaniryako abandi. Yesu Kristo mwabugha athi “engulhu yuwene yitholere iyathulhughanibwa.” (Mariko 13:10) Neryo kwesi omubiiri w’erithulira ni w’erikolha omwa byalhuba kandi atholere  iniabya mughuma w’okwa bindu ebyo thukalhangira mwa by’omughaso. Wangana hiraho ekilhubirirwa ky’erithasyongera erithulira kutsibu? Wangana kolha obutemburi? Kandi ibbwa wamabya isiwuli tsemera ndeke erithulira? Kandi wanga minya wuthi erisoborera ndeke ebya wikirirye? Ebindu bibiri bino bikendi kuwathikya: Thegheka ndeke, kandi isiwaleka eribwira abandi ebyawasi oku Yehova. Iwukendi sweka wukalhangira ku wukatsemera erithulira.

11, 12. (a) Wanga yithegheka wuthi eribwira abandi oku Yehova? (b) Mughalha wethu omulere mwakolesya athi akaghisa ak’erikania oku Yehova okwa sukuru?

¹¹ Thatsuka omw’ithegheka eky’erisubirya okwa bibulyo ebyo abawukasoma nabu banga bulya, ng’eky’erileberyako, “Busana naki wikirirye Nyamuhanga?” Omwatsi “Nganalighe Engangirirya y’Ebindu Eriyibuthukira?” omwa brokyuwa eya Ebibulyo 10 Ebya Balere Bakabulhaya n’eby’Erisubirya, angana kuwathikya iwe erithegheka eky’erisubirya.​— Soma 1 Petero 3:15.

¹² Bwira abanya sukuru balikyenyu ngoku bangana yibanira emyatsi okwa jw.org. Ekyo kya Luca akolha. Omwa kilasi abandu babya ibanemukania okwa madini muthina-muthina. Luca mwalhangira ekitabu ekikakolesibawa ikikabugha ebithahikire okwa Bema ba Yehova. Nomwakine indi Luca mwakwa engitsi, mwasaba omusomesya ng’angana mulighira erisoborera ekikaleka ebindu ebyo ibyabya ibiwire. Omusomesya mwamulighira erisoborera eby’ikirirye, kandi mwathoka erikangania ekilasi yosi omuthahulha wethu we Intaneti. Omusomesya mwaha obuli mundu y’omubiiri w’erikolera eka eriyalebya evidiyo Singura ab’Omwagha Isiwuthalhwa Nabo. Wukalengekanaya Luca mwatsema bungahi akakania oku Yehova okwa sukuru?

13. Busana naki sithutholere thukabikyako thwamabana ebyanga thulemesya?

 ¹³ Wamabana ebikakulemesaya, isiwahwa amani, ambi iwalholha embere eriberererya ebilhubirirwa byawu. (2 Timoteo 4:2) Ekyo kya Katharina akolha. Abya w’emyaka 17 akayihiriraho ekilhubirirwa ky’erithulira obuli mundu oyo bakakolha nayu. Omughuma w’okw’ibo mwabya akamusubirya kithya-kithya. Aliwe mwathibirirwa ekilhubirirwa kiwe. Emibere yiwe mibuya muyatsemesya owundi mukoli, iya Hans. Mwatsuka erisoma ebitabu byethu, am’igha e Biblia, n’eribatizibwa. Katharina mwathaminya eki kundi okwa buthuku obo abya iniabirihuma. Neryo ihamabirilhaba myaka 13, iniane okwa muhindano n’ab’eka yabu, mwasweka akalhangira Hans iyukalhabaya omukania w’abandu bosi! Mwatsema eribya imwathalhuhirira okwa kilhubirirwa kiwe eky’erithulira abo akakolha nabu.

14, 15. (a) Thutholere ithw’ibukaki abandi bamathuhathikana erikolha ebyo bakakolha? (b) Wanga kolhaki erisighalha iwuna ghumire abandi bamakuhathikana?

¹⁴ Omwatsi ono amabirikuhira mw’omuhwa w’erithwamu erihwerya engebe yawu okw’itsemesya Yehova n’erihiraho ebilhubirirwa by’obunyakirimu. Aliwe abalere bangyi ab’emyaka yawu banzire eriyitsemesya. Kandi obundi bangana bugha bathi wukole ebyo bakakolha. Endambi yikendi hika, iwayithagha erikangania abandi ngoku okw’iwe ni ky’omughaso eriberererya ebilhubirirwa byawu. Isiwalighira abandi bakaleka wuk’ibirirwa ebilhubirirwa ebi. Ku wabya ahakabya esyobbasi aha thulyakanayako okw’itsuka ly’omwatsi ono, iwune mwendi ghenda omwa bbasi yosi-yosi, wuthi kundi abandu abalimo bane muyitsemesya? Eyihi, nahake!

¹⁵ Neryo wanga kolhaki erisighalha iwunaghumire, abandi bamakuhathikana erikolha ebyo bakakolha? Yihighule okwa mibere eyanga leka ikyakukalira erirwanisya akahathikano. (Emisyo 22:3) Lengekanaya okwa byanga lhwiririra omw’ikolha ebindu ebithahikire. (Abanya Galatia 6:7) Kandi omw’iyikehya ligha ngoku wukayithagha erihabulha eryuwene. Hulikirira ebya babuthi bawu n’abalikyethu abakulire bunyakirimu bakakubwira.​—Soma 1 Petero 5:5, 6.

16. Eky’erileberyako kya Christoph kikakanganaya kithi ngoku ni kikulhu eriyikehya?

¹⁶ Eriyikehya mulyawathikya Christoph eriligha erihabulhwa. Imwanamabiribatizibwa, mwatsuka eribya akaghenda omwa nyumba y’erikolera mw’ebisasayizi mughulhu wosi. Eyo, abandi balere mubamukokya eringira omwa timu y’eby’amasatha. Mwakikaniryako omusyakulhu, n’omusyakulhu amamubwira athi alengekanaye okwa bitsibu ebyanga lhwiririramu, ng’eribyamo amalingwatha. Christoph mwathwamu eringira omwa timu y’eby’amasatha ayo. Aliwe habere halhaba buthuku, mwalhangira ngoku amasatha aya ni w’ekinyanganga kutsibu kandi ku ni by’akabi. Kandi mwathasyakania n’abasyakulhu, mubamuhabulha erilhua omwa Biblia. Christoph akabugha athi, “Yehova mwanyithumira abahabuli babuya, kandi munamuhulikirira, nomwakine indi mukyanathwalha buthuku.” Wunayikehirye ndeke eriligha erihabulhwa?

17, 18. (a) Yehova akasunzira abalere baki munabwire? (b) Wanga yibalya wuthi okw’iyikubya bwomo busana n’erithwamu lyawu erya wakolha? Iha ekyalholirweko.

¹⁷ E Biblia yikabugha yithi: “Iwe mulhwana, wutsemere obulhwana bwawu, n’omuthima wawu akutsemesaye omwa bulhwana bwawu.” (Omugambuli 11:9) Yehova anzire  iwatsema omwa bulere bwawu. Omo mwatsi ono, wamabiriminya ngoku enzira nguma y’eritsema ly’erilhandamirira ebilhubirirwa byawu by’obunyakirimu n’erighendera okwa busondoli bwa Yehova omwa mitheghekere yawu yosi n’erithwamu lyawu. Wamatsuka ekyo kyalhuba, iwukendi lhangira lhuba ngoku Yehova akakusondolha, erikutheya, n’erikutsumulha. Thalengekania okwa mahano wosi aw’akakuha omwa Kinywe kiwe n’erighendera okw’ihabulha lino: “Wibuke nibya Omuhangiki wawu, omwa biro by’obulhwana bwawu.”​—Omugambuli 12:1.

¹⁸ Abalere bakakulha lhuba-lhuba. Eky’obulighe, abangyi bakayikubaya bwomo busana n’eribya imubayihiriraho ebilhubirirwa ebithuwene kutse eribya imubathabihiraho ibakine balere. Aliwe wamahwerya amalengekania wawu okwa bilhubirirwa byawu by’obunyakirimu, iwukendi syabya wabirikulha, iwukendi syatsemera erithwamu lyawu. Mirjana kw’akayowa athya. Iniakine mulengwa, abya asi ndeke eby’amasatha. Mubamubirikira okwa misathu y’amalingwatha aw’ebihugho muthina-muthina. Aliwe iyo, mwathwamu erikolera Yehova mughulhu wosi. Hamabirilhaba myaka 30, Mirjana na mwira wiwe ibane omwa mubiiri w’omughulhu wosi. Akabugha athi abandu abanzire ebitsumbi, erisikibwa, obuthoki, n’obugaga sibatsemire nahake. Kandi akabugha athi ebilhubirirwa ebyuwene ly’erikolera Nyamuhanga n’eriwathikya abandu erimuminya.

19. Busana naki ni kibuya erihwerya amalengekania w’okwa bilhubirirwa by’obunyakirimu iwukine mulere?

¹⁹ Omo kwenene abalere mukasimawa kutsibu busana n’erithwamu erihwerya engebe yenyu omw’ikolera Yehova nomwakine indi munemubana ebitsibu. Mwabirihiraho ebilhubirirwa by’obunyakirimu, kandi mukalhangira omubiiri w’erithulira ini kindu ky’omughaso munene omwa ngebe yenyu. Kandi, simulighire ekihugho kikaleka muk’ibirirwa ebilhubirirwa byenyu. Mutholere imwakiminya ngoku erikolha lyenyu kutsibu si ryabusa. Munawithe baghalha benyu n’abali benyu ababanzire kandi bane enyuma syenyu. Neryo “wuhire emibiiri yawu oko Mwami Mukulhu, neryo eriyisunza lyawu lyasyahanganibwa.”