1, 2. (a) Busana naki obukobe n’obwiranda byabya bikakanibwako kutsibu omwa biro bya Paulo? (b) Nindi oyo Paulo abugha athi ya Ngununuko y’obwiranda bw’okwenene?

ABAKRISTAYO abakera babya omwa Buthabali bwe Roma, omwabya abandu ababya bakayisyethera ebilhaghiro, emibere eyabyaho ey’eritswera esyombanza, n’obwiranda obwa babya bawithe. Nomwabine, omwa buthabali obw’amani obo, emibiiri mingyi eyikalire iyikakolhawa n’abakobe. Muhanayira, hakuhi omundu 1 okwa 3 omwa Buthabali bwe Roma amabya ini mukobe. Ahathe erithika-thika, obukobe n’obwiranda yabya myatsi eyikakanibawako kutsibu omwa bandu ba buli kiro, imwamune n’Abakristayo.

² Omukwenda Paulo mwakania okwa bwiranda ngendo nyingyi omwa by’ahandika. Aliwe sy’abya okw’ilengesya erighunzaho ebitsibu by’ekihugho kino, ekindu ekya bangyi okwa buthuku obo babya banzire erikolha. Omwakanya k’ekyo, iyo n’Abakristayo balikyabo mubakolha kutsibu erikangirirya abandu engulhu yuwene y’Obwami bwa Nyamuhanga n’eribawathikya eriminya ngoku ekihongwa kya Kristo Yesu ni ky’obughuli. Paulo mwabwira Abakristayo balikyabo ahali Engununuko  y’obwiranda bw’okwenene. Mwahandika athi: “Nikwa Omukama oyo ni Mulimu; kandi aho Mulimu w’Omukama ali, ho hali obwiranda.”​—2 Abanya Korinto 3:17.

3, 4. (a) Ni byahi ebya Paulo atsuka erikaniako athali abugha ebiri omwa 2 Abanya Korinto 3:17? (b) Ni kyahi ekya thutholere ithwakolha erithunga obwiranda obukalhua oku Yehova?

³ Omwa baruha yiwe eyakabiri ey’ahandikira Abanya Korinto, Paulo mwabugha ekyabya oku Musa akalhua okwa Kithwe Sinai abirilhua embere sy’omulaika wa Yehova. Obusu bwiwe bwabya bukakangabasania! Abaisraeli babere bakalhangira Musa, mububaha, neryo mwaswika obusu bwiwe omwa kitambara. (Eriluayo 34:29, 30, 33; 2 Abanya Korinto 3:7, 13) Paulo mwasoborera athi: “Aliwe omughulhu omundu akabindukira Yehova, ekitambara kikalhusibawaho.” (2 Abanya Korinto 3:16, NW) Paulo amanyisayaki?

⁴ Omo mwatsi owahwere muthukana minya ngoku Yehova, Omuhangiki w’obuli kindu, iyo musa yuwithe obwiranda obwosi, obuthawithe lhubibi. Neryo kwesi kihikire eribugha indi aho Yehova ali hali obwiranda ‘n’aho Mulimu w’Omukama ali.’ Aliwe Paulo mwabugha athi thwamanza erithunga obwiranda obu, thutholere ithwabindukira Yehova. Eki kikamanyisaya ngoku thutholere ithwathunga obughuma obw’ahakuhi nayu. Omo mbwarara, Abaisraeli mubanza erighendera okwa malengekania wabu ng’abandu, butsira awa Yehova. Mubabya nga baswikire ekitambara ky’okwa bulengekania n’emithima yabu. Mubanza erikolesya obwiranda obwa babya ibamabirithunga eriberererya esyongumbu syabu.​—Abaebrania 3:8-10.

5. (a) Omulimu wa Yehova akaha obwiranda obuli buthi? (b) Thukaminya thuthi ngoku omundu anganabya mukobe kutse munya-ngomo kandi iniabya iniane n’obwiranda obwa Yehova akaha? (c) Ni bibulyo byahi ebya thukendi subiryako?

⁵ Obwiranda obwa mulimu wa Yehova akaha bulengire kutsibu obwiranda bw’erilhua omwa bukobe. Omulimu oyo akaha obwiranda bunene kutsibu kwilhaba obwa bandu bangaha. Angana thulhusya omwa bukobe bw’ekibi n’olhuholho n’obukobe bw’eriramya ly’amabehi n’emirwa yalyo. (Abanya Roma 6:23; 8:2) Obu ka ni bwiranda obuwene kutsibu! Nibya n’omukobe kutse oyuli omwa ngomo anganabya n’obwiranda obu. (Enzuko 39:20-23) Mughalha wethu Horst Henschel na Mughalha wethu Harold King mubahirwa omwa ngomo obuli mundu habw’emyaka mingyi busana n’erikirirya lyabu, aliwe mubabya ibane n’obwiranda obu. Wangana balebya bakakania okwa byabalhabamu okwa JW Library. (Lebaya omwa INTERVIEWS AND EXPERIENCES > ENDURING TRIALS.) Hathya leka thusubiraye ebibulyo bibiri. Thwanga kangania thuthi ngoku obwiranda bwethu ni bw’obughuli? Kandi thwanga kolesya thuthi ndeke obwiranda bwethu?

6. Abaisraeli mubakangania bathi ngoku sibathasima obwiranda obwa Yehova abya iniamabiribaha?

⁶ Thwamahebwa ekihembo ky’obughuli, thukasima kutsibu oyulyathuhakyo. Aliwe  ibbwa, Abaisraeli mubathasima obwiranda obwa Yehova abaha. Enyuma w’amezi make Yehova alibalhusirye omwa bukobe mwe Misiri, mubatsuka eriyighomba ebyalya ebya babya bakalyayo. Mubayineghenia okwa mana, ebyalya ebya Yehova abya akabaha. Nibya mubanza erisuba e Misiri! Okw’ibo, ‘amahere, amatango, ebyobe, epwaro, amatungulu, n’ehayi [obutungulu-sumu]’ by’ebyabya by’omughaso munene kwilhaba obwiranda obwa Yehova abya iniabiribaha nuku bamuramaye. Sikiriswekaya Yehova eribya imwabahithanako. (Emiganzo 11:5, 6, 10; 14:3, 4) Eki kikathweghesaya erisomo likulhu.

7. Paulo mwaghendera athi okw’ihabulha liwe eriri omwa 2 Abanya Korinto 6:1, nethu thwanga kikolha thuthi?

⁷ Paulo mwakunga Abakristayo abosi okw’ibya n’omubere w’erithendi sima obwiranda obwa Yehova abirithuha erilhabira omu Mughalha wiwe, Yesu Kristo. (Soma 2 Abanya Korinto 6:1.) Paulo syabya ahikene, abya mukobe w’ekibi n’olhuholho, kandi eki mukyaleka iniayowa nabi. Kandi mwabugha athi: “Wasingya oku Nyamuhanga busana n’Omukama wethu Yesu Kristo!” Ni kyahi ekyaleka iniabugha ekyo? Paulo akasoborera Abakristayo balikyabo athi: “Kusangwa omughambo w’omulimu owakathuha engebe busana n’erimathikana na Kristo Yesu, abirinyiboholha okwa mughambo w’ebibi n’olhuholho.” (Abanya Roma 7:24, 25; 8:2) Nga Paulo, sithutholere thuk’ibirirwa ngoku Yehova abirithulhusya omwa bukobe bw’ekibi n’olhuholho. Embanulho yikaleka ikyathokekana ithwe erikolera Nyamuhanga wethu n’obunyamuthima-thima obuhenirye, kandi eki kikathuha etseme y’okwenene.​—Esyonyimbo 40:8.

8, 9. (a) N’ikunga lyahi erya mukwenda Petero aha erihambire okw’ikolesya obwiranda bwethu? (b) Omundu angakolesya athi obwiranda bwiwe omwa nzira eyithatholere?

⁸ Isithwasubulira okw’ibugha thuthi thukasima Yehova, aliwe kandi thutholere ithwayitheya okw’ikolesya nabi obwiranda bwethu. Ng’eky’erileberyako, omukwenda Petero  mwathukunga okw’ikolesya obwiranda bwethu ng’enzira y’eriyihambulya erikolha ebithuwene. (Soma 1 Petero 2:16.) Erikunga eri likathw’ibukaya ebyahika okwa Baisraeli omo mbwarara. Namunabwire, nethu thukayithagha erikunga eri, obundi nibya kwilhaba naho. Sitani n’ekihugho kiwe bakahulhukaya bindu bingyi ebyanzibirwe ng’eby’eryambalha, erirya, erinywa, n’eby’eriyitsemesya. Abakathererera eby’erighulya bakakolesaya ababuya okwa busu nuku thulengekanaye thuthi thutholere ithwaghulha ebindu ebya thuthe yithagha nibya. Ekihugho kyangana thuthebya ithwakolesya obwiranda bwethu bwa nabi.

⁹ Erihano lya Petero lihambire n’okwa myatsi mikulhu-mikulhu y’engebe ng’esukuru, omubiiri, kutse ebya thukasombolha erikolha. Ng’eky’erileberyako, abalere bakahathikanawa erihiraho akaghalha kanene nuku basyalighawa okwa syoyunivasite esyuwene kutsibu. Abandu bangyi bakababwira bathi bamaghenda okwa yunivasite, ibakendi syabana emibiiri eyuwene, ibabana esyosente nene, n’erisikibwa. Abandu abo bangana bakangania emyatsi eyikabya nga yikakanganaya yithi abakaghenda okwa yunivasite bakabana sente nene kwilhaba abakathwamu eriyasomerera omubiiri bakanaghunza esukuru ey’ahisi okwa yunivasite. Abalere bangana lhangira ekirengekanio ky’erighenda okwa yunivasite nga kyuwene bakanza erithwamu ebikendi syahamba okwa ngebe yabu. Aliwe ni kyahi ekya ibo n’ababuthi babu batholere ib’ibuka?

10. Thutholere ithw’ibukaki thukathwamu okwa bithuhambireko?

¹⁰ Abandi banganayowa bathi kundi emyatsi eyo yibahambireko ibo basa, bawithe obwiranda bw’erisombolha ekyosi-kyosi ekyo banzire obunyamuthima-thima bwabu bwamabalighira. Ibangana lengekania okwa binywe bya Paulo bino: “Busana naki obwiranda bwaghe bukatswerawa busana n’obunyamuthima bw’owundi mundu kwehi?” (1 Abanya Korinto 10:29) Nomwakine indi thuwithe obwiranda bw’erisombolha esukuru eya thwangasoma n’emibiiri y’erikolha, thutholere ithw’ibuka ngoku obwiranda bwethu bunawithe olhubibi kandi ngoku hane ebikalhwiririra omw’ithwamu lyethu. Ky’ekyaleka Paulo iniabugha athi: “Emyatsi yosi yanganakolhwa, nikwa emyatsi yosi siyirighasaki. Emyatsi yosi yanganakolhwa, nikwa emyatsi yosi siyirihimba.” (1 Abanya Korinto 10:23) Kwesi, nomwakine indi thuwithe obwiranda bw’erithwamu okwa bithuhambireko, ekya thwanzire si kya kikulhu.

11. Ni kyahi ekyaleka Yehova iniathulhusya omwa bukobe?

¹¹ Petero abere akathukunga okw’ikolesya nabi obwiranda bwethu, mwabugha athi enzira eyitholere ey’eribukolesya ly’eribya “bakobe ba Nyamuhanga.” Yehova abirikolesya Yesu erithulhusya omwa bukobe bw’ekibi n’olhuholho nuku thumukolere.

12. Ni ky’erileberyako kyahi ekya Noa n’eka yiwe bathuhiriraho?

¹² Enzira mbuya ey’erikoleseryamu obwiranda bwethu ly’erikolesya obuthuku bwethu n’akaghalha kethu erikolera Yehova n’omuhwa. Eki ikikendi thutheya okw’ithendi hira ebilhubirirwa by’ekihugho n’esyongumbu syethu by’embere omwa ngebe. (Abanya Galatia 5:16) Thalengekania okwa kya Noa  n’eka yiwe bakolha. Babya omwa kihugho ky’obutsindi n’obutswatswa. Aliwe mubathayingirya omwa bilhubirirwa n’emibiiri y’abandu ababya babathimbireko. Mubathwamu eriyihwerya omwa mubiiri ogho Yehova abya iniabiribaha. Mubahimba obwathu, bamasorokya ebyalya byabu n’eby’ebisoro, n’eribwira abandu okw’Ighunga ly’Amaghetse. “Neryo Noa mwakolha athya, ngoku Nyamuhanga amuhana.” (Enzuko 6:22) Ekyo mukyaleka Noa n’eka yiwe ibalhama ekihugho ekyo kikaheribwa.​—Abaebrania 11:7.

13. Yehova abirithulhaghira erikolhaki?

¹³ Ni kyahi ekya Yehova abirithuhana erikolha munabwire? Ithwe ng’abigha ba Yesu, thunasi ngoku Nyamuhanga abirithuhana athi thuthulire. (Soma Luka 4:18, 19.) Munabwire, Sitani abirilibania obulengekania bw’abangyi kandi sibaliminya ngoku ni bakobe b’edini y’amabehi, eby’ekinyamubiri, n’eby’ekipolitiki. (2 Abanya Korinto 4:4) Nga Yesu, thuwithe olhusunzo lhw’eriwathikya abandi eriminya n’eriramya Yehova, Nyamuhanga w’obwiranda. (Matayo 28:19, 20) Sikyolho erithulira. Omwa yindi myanya, abandu sibatsomene eriminya Nyamuhanga, nibya n’abandi bakanahithana thukabathulira. Aliwe kundi Yehova abirithulhaghira athi thuthulire, thutholere ithwayibulya, ‘Nangana kolesya obwiranda bwaghe erikolha bingyi omwa mubiiri wa Yehova?’

14, 15. Abangyi omwa bandu ba Yehova babirithwamu erikolhaki? (Lebaya ekisasani ekiri okw’itsuka.)

¹⁴ Kikatsemesaya eriminya ngoku abandu ba Yehova bangyi babiriminya ngoku enduli y’omughulhu ono yiri hakuhi-kuhi neryo babirithwamu eryolhobya esyongebe syabu n’eritsuka obutemburi. (1 Abanya Korinto 9:19, 23) Abandi bakakolha obutemburi ibane ewabu, n’abandi ibahumira omwa bithunga ebikayithagha obuwathikya. Omo myaka ithanu eyihwere, abandu abalhabire oku 250,000 babiritsuka obutemburi, na lino hali abatemburi b’omughulhu wosi abalhabire omu 1,100,000. Ka kikatsemesaya abandu bangyi eribya ibanemukolesya obwiranda bwabu erikolera Yehova omwa mibere eyi!​—Esyonyimbo 110:3.

¹⁵ Ni kyahi ekya bawathikaya erikolesya ndeke obwiranda bwabu? Thalengekania oku John na Judith, ababirikolera omwa bihugho bingyi habw’emyaka 30 eyihwere. Bakabugha bathi omughulhu Esukuru y’Abatemburi yatsuka omwa 1977, ababya omwa sukuru eyo mubahirwa mw’omuhwa w’erihuma n’eriyakolera ahali obuyithawa. Erihika okwa kilhubirirwa ekyo, John na Judith mubayithagha ery’olhobya engebe. Neryo John mwabya akahindulikania emibiiri. Erighunzerera mubayathulira omwa kindi kihugho. Ni kyahi ekya bawathikaya erisingura ebitsibu ng’erigha owundi mubughe, eribeghera emibere ey’ehandi n’emibere mihyaka ng’ey’omwisi n’ekihuhiriro? Mubasaba Yehova y’obuwathikya n’erimuyikethera. Bakayowa bathi busana n’erikolera  Yehova habw’emyaka yosi eyi? John akabugha athi: “Munayowa inabiriyihwerya omwa mubiiri owuwene kutsibu kwilhaba eyindi yosi. Munayowa ingali bughuma ndeke na Yehova, ngoku omwana anganabya bughuma ndeke na thatha wiwe ow’olhwanzo. Hathya ngayitheghererye ndeke ebinywe ebiri omu Yakobo 4:8: ‘Muyithunde hakuhi na Nyamuhanga, nayu akendiyithunda hakuhi nenyu.’ Munaminya ku nabiribana ekyo nabya ingasondya, ekighendererwa ekyuwene omwa ngebe.”

16. Abangyi babirikolesya bathi ndeke obwiranda bwabu?

¹⁶ Abandi, nga John na Judith, bangana kolha obutemburi habw’obuthuku buuli. Abandi busana n’emibere eyabalimu, bangana kolha obutemburi habw’obuthuku buke. N’abandi ibo bakanayihayo eriwathikya okwa mibiiri y’obuhimbe omwa kihugho kyosi. Ng’eky’erileberyako, balikyethu nga 27,000 mubasa erisyawathikya okwa buhimbe bw’ekyaghanda kikulhu e Warwick, New York. Abandi habw’esyoyenga ibiri, abandi habw’amezi, n’abandi habw’omwaka kutse kwilhaba aho. Abangyi omwa balikyethu abo mubayithalya okwa bindu birebe nuku bawathikaye e Warwick. Ibo ni by’erileberyako bibuyanga eby’abo ababirikolesya obwiranda bwabu eripipa n’eriha olhukengerwa oku Yehova, Nyamuhanga w’obwiranda!

17. Thukendi syathungaki thwamakolesya ndeke obwiranda bwethu lino?

¹⁷ Thukasima eribya ithwabiriminya Yehova n’eribya ithuwithe obwiranda obukasa busana n’erimuramya. Thukikanganaye omw’ithwamu lyethu ngoku obwiranda obu ni bw’obughuli embere syethu. Omwakanya k’eribukolesya nabi, thubukolesaye erikolera Yehova ngoku thwanga thoka. Aho ithukendibana emighisa eyo Yehova alhagha omughulhu obuminyereri buno bukendi syabererera: “Ebihangikwa ebi byasyaboholhwa omwa bukobe bw’emyatsi y’erihonda, eringira omwa bwiranda n’olhukengerwa lhw’abaana ba Nyamuhanga.”​—Abanya Roma 8:21.