1. Ni kyahi ekyaleka omukwenda Paulo iniabwira Abakristayo Abaebrania athi basikanaye emithima ‘n’eriyitsinga omw’ekyo’?

OMWA kighonye ky’erimbere, omukwenda Paulo mwahana Abakristayo Abaebrania athi: ‘Thughaniraye ngoku thwang’ibukania oko lhwanzo n’emibiiri eyuwene. Sithuleke erihindana lyethu haghuma ng’emibere y’abandi bandu, nikwa thusikanaye [emithima]. Kandi thuyitsinge omw’ebyo, omughulhu thukalhangira ekiro ky’Omukama kikahika hakuhi.’ (Abaebrania 10:24, 25) Balikyethu bangabya imubayibulya ekyamaleka Paulo iniababwira athi bayitsinge kutse bongere erisikania emithima. Enyuma w’emyaka mike okw’ithano, enzumwa nguma muyalhangirika. Okwa buthuku obo, mubalhangira ngoku ekiro kya Yehova ky’eritswera e Yerusalemu kiri hakuhi. Mubaminya ngoku batholere ibalhua omwa muyi we Yerusalemu ngoku Yesu anabugha. (Luka 21:20-22; Emibiri 2:19, 20) Ekiro kya Yehova ekyo, mukyahika omo mwaka wa 70 Abaroma bakathoghothya e Yerusalemu.

2. Busana naki munabwire, thutholere ithwalengekania kutsibu okw’isikania emithima?

 ² Munabwire, thuli omwa mibere eyiri ng’eyo. Ekiro kya Yehova “kinene n’eky’eryubahya kutsibu” kiri hakuhi. (Yoeli 2:11) Ebinywe by’omuminyereri Zefania nabyo bikahamba okwa buthuku bwethu: “Ekiro kinene ky’Omwami mukulhu kiri hakuhi, kiri hakuhi kandi kikasa lhuba!” (Zefania 1:14) Busana n’eki, thutholere ithwatsomanangana nuku “thwang’ibukania oko lhwanzo n’emibiiri eyuwene.” (Abaebrania 10:24) Thutholere nibya ithwatsomana kutsibu balikyethu, nuku thwanga baghumya omughulhu bakayithagha ekyo.

3. Ni kyahi ekya mukwenda Paulo abugha okw’ighumya? (Lebaya ekisasani ekiri okw’itsuka.)

³ “Eririthoha ly’omuthima w’omundu likamukondomaya; nikwa ekinywe kibuya kikatsemesayagho.” (Emisyo 12:25) Ithwe bosi hakanayira ithwayithagha erighumibwa. Paulo mwakikangania ndeke-ndeke ngoku nabo abawithe olhukwamirwa lhw’erighumya abandi nabo ibobene-bene batholere ibaghumibwa. Mwahandikira balikyethu be Roma athi: “Kusangwa nyibakwire olhukando lhw’eribalholhako, inathoka eribaha emyatsi y’omulimu imwathoka erihangana ndeke. Nyithi ithwathoka erisikania emithima omw’ikirirya lyenyu n’eryaghe ithwe bosi.” (Abanya Roma 1:11, 12) Kwesi, ihakanayira n’omukwenda Paulo iniayithagha erighumibwa.​—Soma Abanya Roma 15:30-32.

4, 5. Ni bahi abo thwanga ghumya munabwire, kandi busana naki?

⁴ Munabwire, thwanganahimba abakakolera Yehova omwa mubiiri w’omughulhu wosi, ng’abatemburi abakakolha buthaleghulha. Abangyi omw’ibo babiriyiferezya ebindu ebyo banzire nuku bangakolha obutemburi. Kwabine bithya n’okwa bamisyonare, abakakolera okwa kyaghanda ky’omuthahulha, abalebererya b’emithimbo n’abakali babu, n’abakakolera okwa sy’ofisi sy’erihindulirako ebitabu. Abosi bakayihayo nuku bakole bingyi omwa mubiiri wa Yehova. Neryo thutholere ithwabaghumya. Hane n’abandi abangyi abanabya omwa mubiiri w’omughulhu wosi abakinanziregho aliwe isibanga thasyathoka. Nabu ibakendi sima thwamabaghumya.

⁵ Ni bandi bahi abakayithagha erighumibwa? Thwanganaghumya balikyethu bangyi ababirithwamu erithend’ingira omwa butheke busana n’eribya ibanzire eriowa Yehova n’eribya ibanzire eringira omwa butheke n’oyuli “Mukristayo kwenene.” (1 Abanya Korinto 7:39) Abakali abathahibwe bakaghumibawa bira babu bakababwira bathi babanzire kandi bathi bakasima ebyosi ebya bakakolha. (Emisyo 31:28, 31) Abakristayo abakaghumira eriendereribwa kutse obulhwere nabu bakayithagha erisikibwa emithima. (2 Abanya Tesalonika 1:3-5) Yehova na Yesu bakahumulikanaya abathaleghulha abosi aba.​—Soma 2 Abanya Tesalonika 2:16, 17.

6. Thuk’ighaki okwa lhukwamirwa lhw’abasyakulhu abakanibweko omu Isaya 32:1, 2?

⁶ Soma Isaya 32:1, 2. Thuli omwa mighulhu eyikalire neryo kyolhobire erihwa amani. Yesu Kristo akakolesaya “abanya mwami,” abasyakulhu abatheleghulha abaghalha babu abahakabibwa n’ab’esindi mbuli erithughumya. Abasyakulhu b’ekithunga aba sibali “thabalha” okw’ikirirya lyethu aliwe ‘bakakolha haghuma nethu’ nuku thutseme. Banzire erithuwathikya thubye ithunatsemire  n’eribya ithune bathaleghulha.​—2 Abanya Korinto 1:24.

7, 8. Abasyakulhu banga ghumya bathi abandi omwa bya bakabugha n’omwa mikolere?

⁷ Abasyakulhu bangana gherererya omukwenda Paulo, oyuwabya akalhangira athi akaghumaya balikyabo. Mwahandikira Abakristayo be Tesalonika ababya ibane mwendereribwa athi: “Kusangwa thwabya thubanzire kutsibu, thwabya thwanzire erisangira nenyu, butsira engulhu yuwene iyoyene, nikwa n’esyongebe syethu nibya. Mwabya banze bethu kutsibu.”​—1 Abanya Tesalonika 2:8.

⁸ Abasyakulhu banganasikya emithima y’abandi omwa byabakabugha. Aliwe mbwino mughulhu wosi ekyo kikaghunza? Paulo mwabwira abasyakulhu be Efeso athi: “Litholere imwawathikya abandu bolho, kandi mw’ibuke ebinywa ebyo Mukama Yesu abugha iyowene-wene athi, Erihithya likaletha obutseme kwilhaba erihebwa.” (Emibiri 20:35) Paulo abya inianayitheghekire ‘erihithya n’obutseme n’eriyinubya’ busana n’abalikyabo. Mwakikangania omwa mikolere ngoku anayitheghekire erikolha ekyo angathoka busana nabu. (2 Abanya Korinto 12:15) Kuthya n’abasyakulhu batholere ibaghumya n’erihumulikania abandi omwa byabakabugha n’omwa mikolere. Eki kikakanganaya ngoku kwenene bathutsomene.​—1 Abanya Korinto 14:3.

9. Abasyakulhu banga habulha bathi omwa nzira eyikahimba?

⁹ Erithoka erighumya balikyethu, hanganayira abasyakulhu ibayithagha erithukunga. Abasyakulhu bangana lebya omwa Biblia ibigha ngoku bangakolha eki omwa mibere eyikahimba. Yesu mwahiraho eky’erileberyako ekyuwene omw’ithuma abakwenda omwa bithunga bye Asia Enyike enyuma w’olhuholho lhwiwe n’erilhubuka. Mwakunga erikalire ebithunga bye Efeso, Pergamo, na Tuatera. Aliwe athali akunga, mwatsuka eribasima busana n’ebindu byosi ebibuya ebyo babya bakakolha. (Eribisulirwa 2:1-5, 12, 13, 18, 19) Yesu mwabwira ekithunga kye Laodikia athi: “Ngakunga n’erisuyira abosi abo nyanzire. Neryo wubye n’omuhwa, wubindule omuthima wawu erireka ebibi.” (Eribisulirwa 3:19) Abasyakulhu bethu bakalengaho erigherererya Kristo omwa mibere bakahabuliramu.

10. Ithwe bosi thwanga ghumania thuthi?

¹⁰ Abasyakulhu sibo basa abatholere erighumya abandi. Paulo mwabwira Abakristayo abosi athi babughe “ebinywe bibuya ebikawathikaya n’erihimba abandu, ebikaha olhukogho.” (Abanya Efeso 4:29) Obuli mughuma w’okwithwe atholere iniabya inianasi ebyo abandi bakayithagha nuku thwanga bawathikya. Paulo mwahandikira Abakristayo Abaebrania athi: “Musikaye ebyalha byolho-byolho n’amarwe aw’akathithimana! Mubye mukakwama enzira eyithunganene, ekirema sikikwe, nikwa kilhamibawe.” (Abaebrania 12:12, 13) Ithwe bosi thwangana ghumania n’erisikania emithima omwa byathukabugha, nomuthwangabya ithuli balere kutsibu.

11. Ni kyahi ekyawathikaya Marthe omughulhu abya omwa buli nga bulighe?

¹¹ Mwali wethu oyukahulhawa mwa Marthe mwanabya omwa buli nga bulighe habw’obuthuku bulebe. * (Lebaya omwatsi ahikwa.) Mwahandika athi: “Kiro kighuma inganemusaba erighumibwa, munasanga mwali wethu oyukulire oyuwanyikanganaya olhwanzo  n’erinyikwira obulighe, nakyo ikyangayithagha okwa ndambi eyo. Kandi mwambwira n’eby’abirilhabamu ebisosene n’ebya nganemulhabamu, neryo munayowa isindi ingyuwene.” Mwali wethu oyo angabya nibya imwathaminya ngoku ebinywe biwe mubyawathikya Marthe!

12, 13. Thwanga kolesya thuthi erihabulha eriri omu Abanya Filipi 2:1-4?

¹² Paulo mwahandikira Abakristayo be Filipi athi: “Kristo akathuma imwahanda emithima kwehi? Kutse olhwanzo lhwiwe lhukakiranaya emithima yenyu kwehi? Kandi omulimu akasangira haghuma nenyu kwehi? Kandi muwithe olhwanzo lhwa Nyamuhanga n’erighanyira liwe kwehi? Byamabya bithya, musulhaye omuthima waghe n’obutseme. Mubye n’amalengekania maghuma, mubye n’olhwanzo lhughuma, mubye n’omuthima mughuma, n’obulengekania bughuma. Simukole mwatsi omo mwagha w’obuthimane, kutse busana n’eriyipipa, nikwa muyikehaye, imukaghanza obuli mundu mwa mubuya kwilhaba inywe. Mutheghaye ebindu by’abandi butsira erilhwira ebyawu bisa.”​—Abanya Filipi 2:1-4.

¹³ Ithwe bosi thutholere ithwasondya esyonzira sy’eriwathikaniraniamu. Thwangana kangania ‘olhwanzo olhukakiranaya,’ ‘omulimu ow’erisangira haghuma,’ na “olhwanzo lhwa Nyamuhanga n’erighanyira liwe” erighumya balikyethu.

14. Enzira nguma y’erighumya abandi ni yahi?

¹⁴ Thukatsema thuk’owa ngoku abo thwawathikaya bakine bathaleghulha. Omukwenda Yoane mwahandika athi: “Sihali ekikatsemesaya eriowa ngoku abaana baghe bakakwama ndeke omwatsi w’ekwenene.”  (3 Yoane 4) Abatemburi bangyi bakatsema bakaminya ngoku omundu mulebe oyo bawathikaya kera eriminya ekwenene akinakolera Yehova buthaleghulha, obundi nibya n’erikolha obutemburi. Neryo abatemburi bamabya nga bamahwa amani, ithwangana b’ibukya ebibuya ebyosi ebyo babirikolha eriwathikya abandi.

15. Ni kyahi ekya thwangakolha erighumya abakakolha buthaleghulha?

¹⁵ Abalebererya bangyi b’omuthimbo babiribugha bathi ibo n’abakali babu bakaghumibawa bakabana akabaruha akakabasima enyuma w’eribungira ekithunga. Kwabine bithya n’okwa basyakulhu, abamisyonare, n’abanya Beteli, abosi abakakolera Yehova buthaleghulha. Thwamabaha ewasingya, ithwangana yisanga ithwabiribaghumya kutsibu.

16. Ni bindu byahi ebyolho-byolho ebyanga ghumya omundu?

¹⁶ Kandi ibbwa kyamabya ikikakukalira eribwira abandi ngoku wukayowa busana nabu? Omo kwenene, sikikalire kutsibu erighumya abandi. Lengesaya erisenyenyerya ndeke omundu mulebe. Nayu amathendi senyenya, ikyangana kangania indi awithe ekitsibu kandi akayithagha omundu w’erikania nayu. Iwangana bahumulikania omw’ibahulikirira.​—Yakobo 1:19.

17. Ni kyahi ekya ghumaya mughalha wethu omulere?

¹⁷ Mughalha wethu omulere iya Henri mwapona kutsibu ab’okw’iyo bangyi bakaleka erikolera Yehova. Omughuma w’okw’aba abya ini thatha wiwe, oyuwabya musyakulhu w’ekithunga. Omulebererya w’omuthimbo  mwalhangira Henri isyatsemire neryo mwamuthwalha bamayanywa haghuma ekawa. Mwahulikirira Henri ya ndeke akamubwira eriyowa liwe. Henri mwaminya ngoku iyo erisighalha muthaleghulha y’enzira nguma nyisa y’eriwathikya ab’okw’iyo erisuba omwa kwenene. Kandi mwahumulikana akasoma Esyonyimbo 46, Zefania 3:17, na Mariko 10:29, 30.

18. (a) Omwami Solomona mwahandika athiki okw’ighumya? (b) Omukwenda Paulo mwabugha athi ithwakolhaki?

¹⁸ Thwang’ighaki okwa ebya Marthe na Henri balhabamu? Ithwe bosi thwangana humulikania n’erighumya mughalha wethu kutse mwali wethu. Omwami Solomona mwahandika athi: “Ekinywe omo mughulhu owene ni kibuya kingahi! Ekyakakalha ky’ameso kikatsemesaya [kutse, ameso awatsangire] omuthima; n’engulhu yuwene yikanenehaya amakuha.” (Emisyo 15:23, 30) Wangana lengekania okwa mundu mulebe oyo wasi oyuhwere amani kutse oyuli omwa bulighe? Busana naki iwuthakolha akandu kake ng’erimusomera omwatsi omwa Kaleberyo kutse okwa muthahulha wethu? Kandi, Paulo mwakangirirya athi eriimba haghuma esyonyimbo sy’Obwami kyangana leka ithwayowa ndeke. Mwahandika athi: “Mukangiriranaye, n’erihana obuli mundu mulikyabu omo menge wosi. Mwimbe esyonyimbo, esyonyimbo sy’eripipa, n’esyonyimbo sy’eriramya, mwimbire Nyamuhanga n’omuthima w’ewasingya.”​—Abanya Kolosai 3:16; Emibiri 16:25.

19. Busana naki erighumya abandi likendyongera eriyithaghisibwa, kandi thutholere ithwakolhaki?

¹⁹ Thunemuseghera hakuhi-kuhi n’ekiro kya Yehova, erisikania emithima kikendyongera eriyithaghisibwa kutsibu. (Abaebrania 10:25) Ithukenditsema thwamakolha ngoku Paulo ahabulha athi: “Musibikanaye, n’erihimbana, ngoku mukanakolha.”​—1 Abanya Tesalonika 5:11.