1, 2. (a) Ni byahi ebya Yesu akanaya n’abigha biwe omw’ithumbi athali aholha? (Lebaya ekisasani ekiri okw’itsuka.) (b) Busana naki ni kikulhu eribya ithun’ibukire ekikaleka ithwathulira? (c) Thukendi kania okuki?

OMW’ITHUMBI Yesu athali aholha, mwabya n’omukania muuli n’abakwenda biwe. Mwabakakasya kw’abanzire kutsibu. Kandi mwababwira n’omusyo ow’omuliki w’ebinyu, ogho thwakanayako omo mwatsi owahwere. Yesu abya anzire iniahira omwa bigha biwe mw’omuhwa w’erilholha embere ‘eriyira endundi nene [erihethya ebighuma binene, NW]’ ni bugha ambu, eriyiyinia omw’ithulhughania omwatsi w’Obwami.​—Yoane 15:8.

² Aliwe, Yesu mwabwira abigha biwe butsira ekyo batholere erikolha kisa, aliwe n’ekikaleka ibabya ibatholere erikikolha. Mwababwira esyonzumwa esikaleka ibabya ibatholere erilholha embere erithulira. Ni kikulhu nethu eribya ithun’ibukire ekikaleka ithwabya ithutholere erilholha embere erithulira. Erilengekania okw’eki kikendi thuhira mw’omuhwa ow’eriyiyinia ‘thukaminyisya ebihanda byosi.’ (Matayo 24:13, 14) Omo mwatsi ono, thukendi kania okwa syonzumwa ini esiseghemere okwa Masako  esikaleka ithwathulira. Kandi thukendi kania okwa bihembo bbini ebikalhua oku Yehova ebikathuwathikaya erilholha embere erihethya ebighuma.

3. (a) Erikwamana na Yoane 15:8, ni nzumwa yahi ngulhu eyikaleka ithwathulira? (b) Omwa musyo wa Yesu emizabibu yik’imaniraki, kandi busana naki erilinganisya eri litholere?

³ Enzumwa ngulhu eyikaleka ithwathulira yiri yithi thwanzire eriha Yehova y’olhukengerwa n’erikangania erina liwe ku libuyirire. (Soma Yoane 15:1, 8.) Yesu abere akaha omusyo w’omuliki w’ebinyu, mwasosekania Yehova ng’omulimi, oyukalima emizabibu. Yesu mwabugha athi iyo ya muliki w’ebinyu n’abakamukwama ni mithahi. (Yoane 15:5) Neryo omwa musyo, emizabibu yikimanira ebighuma ebyo abigha ba Yesu bakahethaya, kutse omubiiri w’erithulira ogho bakakolha. Yesu mwabwira abakwenda biwe athi: “Mwamayira endundi nene, Thatha waghe akasikibawa busana n’ekyo.” Emiriki y’ebinyu yamahethya emizabibu eyuwene, kikaleka omulimi iniasikibwa. Kuthya, thwamalengaho ngoku thwangathoka erithulhughania omwatsi w’Obwami, thukasikaya, kutse eriha Yehova y’olhukengerwa.​—Matayo 25:20-23.

4. (a) Thukayira thuthi erina lya Nyamuhanga mwa libuyirire? (b) Wukayowa wuthi busana n’eribya n’olhusunzo olhw’eriyira erina lya Nyamuhanga mwa libuyirire?

⁴ Erina lya Nyamuhanga iryo linabuyirire. Sihali ekyo thwanga kolha eriyiralyo mwa libuyirire kutsibu. Neryo kwesi thukayira thuthi erina lya Nyamuhanga mwalibuyirire thukathulira? Lhangira ekya muminyereri Isaya abugha: ‘Omwami Mukulhu w’emilhondo, iye yo mukandiahulha mo mubuyirire.’ (Isaya 8:13) Thukayira erina lya Nyamuhanga, Yehova, mwa libuyirire, omughulhu thukalhangiralyo mwa likulhu okwa mena wosi, n’omughulhu thukawathikaya abandi eriyitheghererya ngoku libuyirire. (Matayo 6:9) Ng’eky’erileberyako, thukabya thukakangirirya abandu ekwenene eyihambire okwa mibere mibuyanga ya Yehova n’ekighendererwa kiwe busana n’abandu eribyaho kera na kera omwa Paradiso, thukabawathikaya erilhangira ngoku ebindu bibi byosi ebya Sitani abiribugha oku Yehova ni mabehi. (Enzuko 3:1-5) Kandi thukayira erina lya Nyamuhanga mwa libuyirire thukawathikya abandu eriminya ngoku Yehova yutholere “eribana olhukengerwa, n’erisikya, n’obuthoki.” (Eribisulirwa 4:11) Rune, oyuwabirikolha obutemburi habw’emyaka 16 akabugha athi: “Eriminya ngoku nabirihebwa akaghisa ak’eriha obwema okwa Muhangiki w’obuhangwa bwosi kikanyitsemesaya. Kikaleka inanza erilholha embere erithulira.”

5. (a) Ni nzumwa yahi eyiri omu Yoane 15:9, 10 eyangaleka ithwathulira? (b) Yesu mwawathikya athi abigha biwe erilhangira ngoku banga yithaghire eriyiyinia?

⁵ Soma Yoane 15:9, 10. Enzumwa eyakabiri eyikaleka ithwathulha omwatsi w’Obwami ly’eribya ithwanzire Yehova na Yesu. (Mariko  12:30; Yoane 14:15) Yesu mwabwira abigha biwe athi batholere ‘ib’ikalha omo lhwanzo lhwiwe.’ Ni kyahi ekyaleka Yesu iniabugha eki? Kusangwa abya inianasi ngoku abakamukwama bakendi syayithagha eriyiyinia erithoka eribyaho ng’Abakristayo ab’okwenene. Omwa Yoane 15:4-10, Thukalhangira ngoku Yesu mwakolesya ekinywe “er’ikalha” ngendo nyingyi eriwathikya abigha biwe erilhangira ngoku bangayithaghire eriyiyinia.

6. Thukakanganaya thuthi ku thwanzire er’ikalha omo lhwanzo lhwa Kristo?

⁶ Thukakanganaya thuthi ku thwanzire er’ikalha kutse erisighalha omo lhwanzo lhwa Kristo n’erisimwa nayu? Omw’imwowa. Yesu akathubwira athi thukole ebyo nayu akolha. Mwabugha athi: “Nabirikenga ebihano bya Thatha waghe neryo nyikere omo lhwanzo lhwiwe.” Yesu mwathuhiriraho eky’erileberyako.​—Yoane 13:15.

7. Obwowa buhambene buthi n’olhwanzo?

⁷ Yesu mwakikangania ndeke-ndeke ngoku obwowa buhambene n’olhwanzo akabugha athi: “Oyuwithe ebihano byaghe n’erikengabyo, y’oyukanyanza.” (Yoane 14:21) Ebihano bya Yesu bikalhua oku Thatha wiwe, neryo thwamakenga ekihano kya Yesu eky’erithulira, thukabya ithwamakangania ku thwanzire Yehova. (Matayo 17:5; Yoane 8:28) Kandi thukabya thukakangania ku thwanzire Yehova na Yesu, nabo bakalholha embere erithwanza.

8, 9. (a) Ni yindi nzumwa yahi eyikaleka ithwathulira? (b) Ebinywe bya Yehova ebiri omu Ezekieli 3:18, 19 na 18:23 bikathuhiramo bithi omuhwa w’erilholha embere erithulira?

⁸ Enzumwa eyakasathu eyikaleka ithwathulira yiri yithi thwanzire erikunga abandu busana n’ekiro kya Yehova ekikasa. Omwa Biblia, Noa akakanibawako ‘ng’omuthuli,’ kutse omuthuliri. (Soma 2 Petero 2:5.) Erighunga ly’Amaghetse lithe lyabya, omwatsi ogho Noa abwira abandu mwangabya imwabya erikunga abandu okw’ithoghothibwa eryabya irikayasa. Busana naki ithwabugha thuthya? Kundi Yesu mwabugha athi: ‘Kusangwa ng’omwa biro ebyo embere w’erighunga ly’amaghetse, mubabya bakalya n’eripulya, mubabya bakahikya n’eriherukania, erihika oko kiro ekyo Noa ingira omo bwathu. Mubathaminya ekyabya erihika aho erighunga ly’amaghetse lyasira n’erithwalha abosi. Erihika ly’omughalha w’omundu ko likendisyabya lithya.’ (Matayo 24:38, 39) Nomwakine indi abandu mubagheghena Noa, iyo omwa buthaleghulha mwathulha omwatsi w’erikunga ogho Yehova abya iniabirimuha.

 ⁹ Munabwire, thukathulha omwatsi w’Obwami er’iha abandu b’akaghisa ak’eriminya ekya Nyamuhanga akendi kolera abandu omwa buthuku obukasa. Nga Yehova, thwanzire abandu ibahulikirira ndeke omwatsi nuku ‘babyeho’ kera na kera. (Ezekieli 18:23) Thukabya thukathulira nyumba okwa nyumba n’ahali abandu bangyi, thukakunga abandu bangyi ngoku thwanga thoka thuthi Obwami bwa Nyamuhanga bukendiasa n’erithoghothya ekihugho kibi kino.​—Ezekieli 3:18, 19; Danieli 2:44; Eribisulirwa 14:6, 7.

10. (a) Ni nzumwa yahi eyiri omu Matayo 22:39 eyikaleka ithwathulira? (b) Paulo na Sila mubawathikya bathi omutheya w’engomo e Filipi?

¹⁰ Enzumwa eyakani eyikaleka ithwalholha embere erithulira ly’eribya ithwanzire abandu. (Matayo 22:39) Olhwanzo olhu lhukathuwathikaya erilholha embere erithulira kundi thunasi ngoku abandu bangana hindulha amalengekania wabu emibere eyabalimu yikahinduka. Ng’eky’erileberyako, omwa tawuni ye Filipi, abahakani mubahira Paulo na Sila omo muliki. Aliwe omo kathi k’ekiro, omusiki mwalhaba owasuka-sukanaya engomo n’erikyungulha esyonyuyi syayo. Omutheya w’engomo mwakwa obuba athi alinga abanya ngomo babiritswa neryo mwanza eriyitha. Aliwe Paulo mwamukakirya n’eribirikira athi: “Siwuyikole nabi!” Omutheya mwabulya athi: “Litholere inakolhaki inathoka erilhamibwa kwehi?” Paulo na Sila mubamubwira bathi: “Wikiriraye Omukama Yesu, wasyalhamibwa.”​—Emibiri 16:25-34.

11, 12. (a) Omwatsi owahambire oko mutheya w’engomo akathweghesayaki okwa mubiiri wethu w’erithulira? (b) Busana naki thwanzire erilholha embere erithulira?

¹¹ Omwatsi owahambire oko mutheya w’engomo akathweghesayaki okwa mubiiri w’erithulira? Wanamalhangira ngoku omutheya w’engomo ahindulha amalengekania wiwe n’erisaba obuwathikya enyuma w’omusiki erilhaba? Kuthya, n’abandi bandu abathe anza erihulikirira omwatsi we Biblia bangana hindulha amalengekania wabu n’erisondya obuwathikya ekindu ekikalire kyamababyako. Ng’eky’erileberyako, abandi bangana yibulha-bulha busana n’eriherya omubiiri kutse erikomolhwa. Abandi banganabya omwa bulighe busana n’eriminya ngoku babirilhwalha obulhwere obukalire kutse busana n’eriholerwa omuhughu. Ebindu ng’ebyo bikabya bikabya, abandu bangana tsuka eribulya ebibulyo ebihambire okwa ngebe, ebibulyo ebyo babya isibali bathalengekaniako. Nibya ibanganayibulya, ‘Ngatholere ingakolhaki erisyalhamibwa?’ Ibangananza erihulikirira omwatsi wethu w’amaha omurundi wabu w’erimbere.

¹² Neryo thwamalholha embere erithulira buthaleghulha, ithukendi hika okwa bandu omughulhu banayitheghekire eriligha omwatsi w’erihumulikania ogho thukabalethera. (Isaya 61:1) Charlotte, oyuwamabirighunza myaka 38 inina mutemburi, akabugha athi: “Munabwire abandu baherire. Bakayithagha akaghisa ak’erihulikirira engulhu yuwene.” Ejvor, oyuwamabirighunza myaka 34 inina mutemburi, akabugha athi: “Munabwire, abandu bali omwa birengekanio binene kwilhaba kera. Omo kwenene nganzire eribawathikya. Ekyo kikanyihira mw’omuhwa w’erithulira.” Ahathe erithika-thika, erianza abandu ni nzumwa mbuya ey’erilholha embere erithulira!

13, 14. (a) Ni kihembo kyahi ekiri omu Yoane 15:11? (b) Thwangabana thuthi obutseme obuli ng’obwa Yesu awithe? (c) Obutseme bukathuwathikaya buthi omw’ithulira lyethu?

¹³ Omw’ithumbi athali aholha, Yesu kandi  mwahulha ebihembo ebyanga wathikirye abakwenda biwe erilholha embere erihethya ebighuma. Ebihembo ebi ni byahi, kandi byanga thuwathikya bithi?

¹⁴ Ekihembo ky’obutseme. Mbwino okw’ithwe erithulira ni muheke? Eyihi nahake. Yesu abere abiribugha omusyo w’omuliki-riki w’ebinyu, mwabugha athi thwamathulira ithukendibya n’obutseme bwiwe. (Soma Yoane 15:11.) Ekyo kikathokekana kithi? Wibuke ngoku omwa musyo wa Yesu, iyo mwayisosekania n’omuliki w’ebinyu n’abigha biwe ng’emithahi. Emithahi yikabana amaghetse n’ekirisya iyinalyasighalha iyinamathikene n’omuliki. Kuthya, nethu ithukendi bana etseme nga Yesu ithunalyabya bughuma nayu n’erikwama ndeke olhughobe lhwiwe. Neryo ithukendibya n’obutseme obw’awithe, obukasa busana n’erikolha erisonda lya Nyamuhanga. (Yoane 4:34; 17:13; 1 Petero 2:21) Hanne, oyuwabirikolha obutemburi habw’emyaka eyilhabire oku 40, akabugha athi, “Obutseme obwa ngabana nabirilhua omw’ithulira bukaleka inanza erilholha embere omwa mubiiri wa Yehova.” Obutseme ibukendi thuha akaghalha k’erilholha embere erithulira, abandu bangyi nomubanga ghana erihulikirira.​—Matayo 5:10-12.

15. (a) Ni kihembo kyahi ekiri omu Yoane 14:27? (b) Obuholho bukathuwathikaya buthi erilholha embere erihethya ebighuma?

¹⁵ Ekihembo ky’obuholho. (Soma Yoane 14:27.) Erigholho Yesu athali aholha, mwabwira abakwenda biwe athi: ‘Ngabaha obuholho bwaghe.’ Obuholho bwa Yesu bwanga thuwathikya buthi erilholha embere erithulira? Thukabya thukalholha embere erithulira, thukayowa buholho kundi thukaminya ku thwamatsemesya Yehova na Yesu. (Esyonyimbo 149:4; Abanya Roma 5:3, 4; Abanya Kolosai 3:15) Ulf, oyuwamabirikolha obutemburi habw’emyaka 45, akabugha athi, “Erithulira likaleka ingalhuha, aliwe likaleka engebe yaghe iyathekana n’eribya n’ekighendererwa.” Thukasima kundi thwabiribana obuholho kundu!

16. (a) Ni kihembo kyahi ekiri omu Yoane 15:15? (b) Abakwenda banga sighere bathi inina banywani ba Yesu?

¹⁶ Ekihembo ky’obunywani. Yesu abere abiribwira abakwenda biwe ngoku anzire ibatsema, mwabasoborera ekikaleka ikyabya kikulhu ibo erikangania olhwanzo olhuthe mw’eriyikukumirira. (Yoane 15:11-13) Neryo mwabugha athi: “Ngabahulha mo bira.” Ni kihembo ky’obughuli eryahulhwa mwa banywani ba Yesu! Aliwe abakwenda banga sighere  bathi inina banywani biwe? Yesu mwabugha athi: ‘Nabiribahira eriyathunda endundi.’ (Soma Yoane 15:14-16.) Ni bugha ambu, athi, mulhole embere erithulira. Myaka ng’ibiri athe ababwira ekyo, Yesu mwabwira abigha biwe athi: ‘N’omughulhu mukaghenda, muthulegho muthi, Obwami bw’elhubulha buli hakuhi.’ (Matayo 10:7) Kyaleka, omw’ithumbi athali aholha, Yesu iniahira omwa bigha biwe mw’omuhwa w’eriyiyinia omwa mubiiri w’erithulira. (Matayo 24:13; Mariko 3:14) Ni kwenene, Yesu abya inianasi ngoku sikyangabya kyolho eriberererya ekihano kiwe eki. Aliwe bangakolirekyo n’erisighalha inina banywani biwe. Bathi? Busana n’obuwathikya bw’ekindi kihembo.

17, 18. (a) Ni kihembo kyahi ekiri omu Yoane 15:7? (b) Ekihembo ekyo mukyawathikya kithi abigha ba Yesu? (c) Ni bihembo byahi ebikathuwathikaya munabwire?

¹⁷ Ekihembo ky’emisabe erisubwamu. Yesu mwabugha athi: “Mubulhaye ekinduki ekyo mwanzire, neryo mwasyakolerwakyo.” (Yoane 15:7, 16) Omulhaghe wa Yesu angabya imwaghumya abakwenda! * (Lebaya omwatsi ahikwa.) Abakwenda mubathayitheghererya ndeke ngoku Yesu akisiya iniaholha. Aliwe olhuholho lhwiwe si lhwangamanyisirye indi bakendibya butsira buwathikya. Yehova abya inianayitheghekire erisubirya emisabe yabu n’eribawathikya omwa mubiiri wabu w’erithulira. Kandi mwakolha ekyo. Buthuku buke Yesu aliholire, abakwenda mubalemba-lemba Yehova bathi abahe obuthubaha, kandi Yehova mwasubirya emisabe yabu.​—Emibiri 4:29, 31.

¹⁸ Kwabine bithya namunabwire. Thukabya thukayiyinia omwa mubiiri w’erithulira, thukasighalha ithune banywani ba Yesu. Kandi thwangana kakasya ngoku Yehova anayitheghekire erisubirya emisabe yethu thukamusaba obuwathikya omughulhu kikathukalira erithulira. (1 Abanya Korinto 4:7) Thutsemire kutsibu eribya Yehova iniakasubiraya emisabe yethu na Yesu eribya ini munywani wethu. Ebihembo ebikalhua oku Yehova ebi bikathuha amaaka w’eribana endundi.​—Yakobo 1:17.

19. (a) Busana naki thukalholha embere erithulira? (b) Ni kyahi ekikathuwathikaya erighunza omubiiri owa Nyamuhanga abirithuha?

¹⁹ Omo mwatsi ono, thwamabirigha okwa syonzumwa ini esikaleka ithwalholha embere erithulira: eriha olhukengerwa oku Yehova n’erikangania erina liwe ku libuyirire, erikangania ku thwanzire Yehova na Yesu, erikunga abandu, n’erikangania ku thwanzire abandu. Thwamabirigha n’okwa bihembo bbini: obutseme, obuholho, obunywani, n’emisabe yethu erisubwamu. Ebihembo ebi bikathuha amaaka w’erighunza omubiiri owa Nyamuhanga abirithuha. Yehova akatsema kutsibu akalhangira thukakolha kutsibu erilholha embere erihethya ebighuma!