WUNASI ekindu ekiwithe hakuhi kilo nguma n’embindi nyisa, aliwe kandi iky’ekindu ekyamathaminywa “ng’ekikaswekaya kutsibu omwa mikolere yakyo omwa buhangwa bwosi”? Ekindu ekyo, bw’obwongo. Kandi kwenene bukaswekaya. Thukabya thukongera eribwighako, ku thukanongera thuthya eritsemera ‘eby’eriswekya’ ebyo Yehova akakolha. (Esy. 139:14) Thalengekania okwa kighuma ky’okwa bingyi ebya bwongo bwethu bukakolha—erithera akasasani.

Erithera akasasani kikamanyisayaki? Edikisyanare nguma yikasoborera yithi “w’amaaka w’eribya nga wunalhangire ebindu bihya-bihya n’ebikatsemesaya, kutse ebya wuthe wathalholhako.” Erisighikira okw’isoborera eri, wanamalhangira kwesi ngoku mughulhu wosi wukabya iwunemukolesya amaaka aya? Ng’eky’erileberyako, wune wathasoma kutse eriowa okwa mwanya mulebe owawuthe wathahikamu? Eribya isiwuli wathahika mugho, mukyanaleka iwalemwa erithera akasasani ng’angabya iniasosire athi? Omwa kwenene, thukabya thukalengekania okwa kindu ekya thuthe thwanga lhangira, eriowa, isithwasi nga kikasiha kithi kutse nga kikabeha kithi, kutse isithwanga kithulhako, aho, thukabya ithuli okw’ithera akasasani.

E Biblia yikathukanganaya yithi thuhangikire omwa kisosekanio kya Nyamuhanga. (Enz. 1:26, 27) Ekyo mbwino sikyangabya ikikamanyisaya kithi na Yehova akanathera akasasani? Kundi mwalhangira ikitholere erithuhira mw’amaaka ayo, kwesi anzire ithwakolesyagho omw’iyitheghererya erisonda liwe. (Omu. 3:11) Thwanga kolesya thuthi ndeke amaaka wethu ayo omw’ikolha ekyo, kandi ni mikoleserye yahi ey’amaaka ayo ey’obukiru eya thutholere ithwayihighulhako?

(1) Erithera akasasani okwa ndambi eyithatholere kutse okwa bithatholere.

Sikibi erithathera akasasani omwa malengekania. Nibya hane bingyi ebikakanganaya ngoku linawithe omughaso. Aliwe, Omugambuli 3:1 hakaleka ithwaligha kwenene ngoku omundu angana kolha ekindu kirebe okwa buthuku obuthatholere kundi hakabugha hathi “hali omughulhu busana n’obuli mwatsi.” Ng’eky’erileberyako, wamalighira amalengekania wawu erighenda okwa bindi kandi iwune omwa mihindano kutse wukayeghesya e Biblia, mbwino aho amaaka wethu w’erithera akasasani inianamathuwathikya? Yesu mwaha erikunga erikalire okwa kabi akanga lhwiririra omw’ingirya omwa malengekania wethu mw’ebithuwene, ng’eby’obutswatswa. (Mt. 5:28) Hane ebindi ebya thwangana hira omwa malengekania aliwe ibikaponesaya Yehova ya kutsibu. Oyukalengekanaya okwa by’obutswatswa, yukanalindwa iniabukolha. Wulhangire wuthi amaaka wawu w’erithera akasasani syali kulhusaya oku Yehova!

(2) Erilengekania wuthi ebindu byangana kuha obutheya obwa kera na kera.

Ebindu by’omubiri binatholere kandi bikawathikaya. Aliwe ithukendibya ithwamathebwa thwamalengekania thuthi by’ebyanga thuha obutheya n’etseme y’okwenene. Omulhume w’amenge  Solomona mwahandika athi: ‘Obutheke bw’omutheke ni muyi wiwe w’amaaka; buli ng’olhuhimbo lhuuli omwa bulengekania bwiwe.’ (Emi. 18:11) Thalengekania ng’omughulhu, hakuhi etawuni eyosi eye Manila omwa Philippines yabogha mw’amaghetse busana n’ekibulha kinene omwa Kwomwenda 2009. Ababya n’ebindu bingyi mubanabalha? Omugaga mughuma oyuwaheraya ebindu bingyi mwabugha athi: “Eribogha ly’amaghetse eri mulyathulingirirania, omw’ikolya ebitsibu n’eriaghalhwa okwa bagaga n’abanakwa.” Kyolhobire erilengekania wuthi mbwino eribya mugaga kyangaha obutheya obw’okwenene. Aliwe okwenene kuli kuthi kwa bithe bithya.

(3) Eribya omwa maghaniryo okwa bithe byangabya nibya.

Yesu mwathukunga athi isithwayilhuhaya omwa “maghaniryo.” (Mt. 6:34) Amaghaniryo w’olhughumerera ni kindu ekikayithagha erikolesya kutsibu amaaka w’erithera akasasani. Neryo kwesi iwangana hwerya amaaka w’obulengekania bwawu okwa bitsibu ebithe byabya kutse ebithendi syabya nibya. Amasako akakanganaya athi amaghaniryo ng’ayo anganaleka omundu iniahwa amani n’erimukondomya. (Emi. 12:25) Ikikikendibya kya mughaso erighendera okw’ihabulha lya Yesu omw’ithendi yihira omwa maghaniryo neryo ithwathwamu eritsomana ebitsibu ebyamasa ekiro ekyo bisa.

(1) Erisangwa walhangira emibere ey’akabi n’eriyihighulha kuyo.

Amasako akathuhabulha athi thubye bagherekania n’erilhangirira emyatsi yo haali. (Emi. 22:3) Omw’ikolesya amaaka wethu w’erithera akasasani, ithwangana lhangira ebyanga lhwiririra omw’ithwamu lyethu thuthe thwathwamu. Ng’eky’erileberyako, wamakokibwa okw’iyayitsemesya n’abandi, amaaka wawu w’erithera akasasani anga kuwathikya athi ndeke nga wunaghende kutse eyihi? Iwukendibya wabirilebya nga ni bandi bahi abakokibirwe, nga ni bangahi abakendi syabyayo, kandi nga likendi syabera hayi kandi kiroki, iwalengekania ibbwa: Eriyitsemesya eryo lyangana syabya lithi? Wangana thera akasasani, neryo kwenene iwalhangira eriyitsemesya eryo irikendibya iriri mw’eritheya emisingyi ye Biblia? Eki ikyangana kuwathikya erisangwa walhangira ekikendi syabya. Erikolesya amaaka wawu aya erithwamu ndeke lyangana kuwathikya eriyihighulha okwa byanga kuhuthalya bunyakirimu.

(2) Erithera akasasani ngoku wanga rwanisya ebitsibu.

Erithera akasasani mwamuli “n’eribya iwangana thoka erimanira n’erirwanisya ekitsibu.” Thuthabugha thuthi mwabirithunga erithendi yitheghererania na mulikyethu omwa kithunga. Wangahikira wuthi mulikyenyu oyo nuku wuhire h’obuholho? Ni bingyi eby’eritsuka  erilengekaniako. Awithe mibereki y’erikanirania n’abandi? Ni buthuku bwahi obutholere erikania okwa kitsibu eki? Nanga kolesya binywe byahi ebitholere kandi omwa mulenge ow’ali athi? Omw’ikolesya ndeke amaaka wawu w’erithera akasasani, iwangana lengekania okwa bya wanga bugha n’erisombolha kw’ekyangana kolha ndeke. (Emi. 15:28) Erirwanisya emibere eyikalire omwa nzira ng’eyi, ikikendi wathikya erihira h’obuholho omwa kithunga. Eryo irikendibya in’ikolesya ndeke amaaka wethu w’erithera akasasani.

(3) Erighasirwa omwa ndegheka yawu ey’erisoma e Biblia n’eriyeghesya.

Ni kikulhu erisoma e Biblia buli kiro. Aliwe s’ikwama kyasoma buyira. Thutholere ithwayitheghererya erisomo eriri omwa bya thwamasoma n’erilhangira ngoku thwanga likolesya omwa ngebe yethu. Erisoma e Biblia litholere iryaleka ithwongera eriyitheghererya emikolere ya Yehova. Erikolesya amaaka wethu w’erithera akasasani lyangana thuwathikya erikolha ekyo. Lithi? Thalengekania okwa kitabu Gherereraya Erikirirya Lyabu. Erisoma emyatsi eyirimu iryangan’ongera amaaka wethu w’erithera akasasani omw’ithuwathikya eribya nga thunalhangire ebyabya omwa buthuku bw’oyukakanibawako. Wukabya nga wunalhangire eyo babya, nga wunowire emirenge, n’eribya nga wunemubeherwa ebiriho n’eriminya eriyowa ly’abawukasomako. Eki kikaleka ithwabana awandi masomo mangyi n’ebikahimba omwa myatsi ye Biblia eyo thwabya thukalengekania thuthi thunasi ndeke. Erikolesya amaaka wethu aya omwa nzira eyi thukasoma e Biblia n’eriyeghesya ithukendi ghasirwa kutsibu.

(4) Erikulha-kulhania omubere w’erikwira abandi b’obulighe.

Erikwira owundi y’obulighe ni mubere owuwene ow’eribya nga thun’owire obulhumi bw’owundi omwa muthima wethu. Kundi Yehova na Yesu bawithe omubere oyu, thutholere ithwabagherererya. (Eri. 3:7; Esy. 72:13) Thwanga kulha-kulhania thuthi omubere oyu? Erikangania omubere oyu wa ndeke thutholere ithwakolesya amaaka wethu w’erithera akasasani. Thwanganabya isithuli thwathabya omwa mibere eya mulikyethu alimu. Aliwe iwangana yibulya: ‘Kunabya iningye ngali omwa mibere eyi, nangabere ininga yowa indi? Nangayithaghireki?’ Erithera akasasani thukasubirya ebibulyo ebyo, ikikendi thuwathikya erithasyongera erikwira abandi b’obulighe. Ithukendi ghasirwa ng’Abakristayo thwamakangania omubere w’erikwira abandi b’obulighe, ng’omw’ithulira n’omw’ikolangana lyethu n’abandi Bakristayo.

(5) Erithera akasasani engebe nga yikendi syabya yithi omwa kihugho kihya-kihya.

Amasako ali mwa bingyi ebikakanganaya engebe nga yikendi syabya yithi omwa kihugho ekya Nyamuhanga abirilhagha. (Isa. 35:5-7; 65:21-25; Erib. 21:3, 4) Ebitabu byethu bikanabera eryasira mw’ebisasani ebyuwene ebikakanganaya ebikendi syabya. Busana naki? Ebisasani bikaleka ithwathoka erithera akasasani ithunemutsemera emighisa eyabirilhawa eyi. Yehova oyuwathuhira mw’amaaka w’eribya iwangana thera akasasani, yuwasi ndeke omughaso munene w’amaaka aya. Thwamakolesya amaaka ayo omw’ilengekania okwa milhaghe yiwe ikikendi leka ithwayikethera ngoku yikendi syabererera n’erisighalha ithune bathaleghulha ithunemughumira ebitsibu ebya thukabana munabwire.

Busana n’olhwanzo, Yehova abirithuha amaaka w’eribya ithwangana thera akasasani omwa malengekania. Amaaka ayo angana thuwathikya erimukolera ndeke omwa ngebe yethu ey’obuli kiro. Kwesi ka thukanganaye ku thukasima oyuwathuha ekihembo eki omw’ikikolesya ndeke obuli kiro.