OMUBIIRI wethu w’erithulira ni w’omughaso munene kutsibu. Aliwe sib’abosi abathukathulira indi bakalhangira ekyo. Abandu nomubakana kanganaya erianzisibwa omwa mwatsi we Biblia, mughulhu mungyi sibalilhangira ini kikulhu erigha nethu e Biblia.

Eki mukyabya oku Gavin, oyuwatsuka eribya akasa okwa mihindano yethu; aliwe mwaghana bakanza erigha nayu e Biblia. Akabugha athi: “Sinabya ngasi kutsibu eby’Amasako, aliwe mundanza erikikangania. Iningasagha indi inangana thebwa, kandi iningayowa nga sinanga thoka.” Wangabugha wuthiki? Mbwino Gavin abya isyakiri w’eritsandirya kw’obuthuku? Eyihi! Thalebya ngoku e Biblia yangahamba okwa mundu. Kera, Yehova mwabwira abandu biwe athi: “Eribugha lyaghe libombe ng’ekime, ng’obunyenye bw’embulha oko bithi.” (Ebi. 31:19, 30; 32:2) Emibere y’ekime yik’imanira ndeke emibere thwanga wathikiryamu ndeke abandu b’emisindo yosi omw’ithulira.—1 Tim. 2:3, 4.

Ekime kikayithondolhaya. Ekime kikatsuka lyolho-lyolho, ikyayibomba ithondi okw’ithondi erilhua okwa kyuka ekiri omwa kyanya. Ebinywe bya Yehova ‘mubyayibomba ng’ekime’ kundi iniakakanaya n’abandu biwe omwa bwolho-bwolho, omw’iyithondolya, kandi omw’ibatsomana. Thukabya ithwamagherererya Yehova thwamasikya amalengekania w’abandi. Thukahira omwa bandu mw’omuhwa w’eriyirengekanirya nuku bayithwiremu ekihikire. Thwamakangania eritsomana ng’eri, abandu bakayitheghereraya ebya thukabugha n’omubiiri wethu iniuwana.

Ekime kikaheheraya. Omubiiri wethu w’erithulira akaheheraya abandi omughulhu thukaghaniraya ngoku thwanga kulha-kulhania erianzisibwa ly’abandi. Gavin, oyo thulyakanayako ahighulhu mubathamukaka eriligha erigha e Biblia. Omwakanya k’ekyo, mughalha wethu Chris oyuwamutsuka, mwasondekania esindi nzira esy’erikania nayu okwa Biblia omwa nzira eyanga leka iniayowa buholho. Chris mwasoborera Gavin ngoku e Biblia yinawithe omuthwe owa yikakanayako kutsibu-tsibu, kandi ngoku amaminyagho iniakendi yitheghererya emihindano ey’akabera eryasako eyo. Kandi Chris mwathasya musoborera ngoku iyo, amaminyereri we Biblia w’aleka iniaminya ngoku e Biblia yihikire. Eki mukyaleka ibakania bingyi okw’ibererera ly’amaminyereri. Gavin mwatsemera erikanirania eri neryo amaligha erigha e Biblia.

Ekime kikatheghaya engebe. Omwa Israeli mukanabya emighulhu y’omwisi, ihangana lhaba mezi manene embulha isiyiri yathawa. Aho engebe y’ebirimwa yikatheghibawa n’ekime. Yehova mwalhaghulha athi omwa buthuku bwethu mwangabere ekiri nga kyanda, ni bugha ambu, abandu eribya n’enyotha ‘ey’eriowa ebinywe bya Yehova.’ (Amo. 8:11) Mwalhaghanisya athi abathuliri abahakabibwa bakendisyabya “ng’ekime ekikalhua oko Mwami Mukulhu” bakathulha engulhu y’Obwami ibanemuwathikibwa ‘n’ab’esindi mbuli.’ (Mika 5:7; Yn. 10:16) Mbwino thukana lhangira omwatsi wethu w’engulhu yuwene y’Obwami ini kaheheru k’obunyakirimu ako Yehova akaha abandu?

Ekime ni mughisa erilhua oku Yehova. (Ebi. 33:13) Omubiiri wethu w’erithulira anganabya mughisa okwa bakathuhulikirira. Gavin mwabana omughisa oyo. Omw’igha e Biblia, mwabana eby’erisubirya okwa bibulyo biwe byosi. Mwakulha-kulhana amahika okw’ibatizibwa, kandi lino iyo na mukali wiwe Joyce, banemukolha haghuma omw’ithulhughania engulhu yuwene y’Obwami.

Erilengekania okwa kime nalyo lyangana thuhira mw’omuhwa ow’erilhangira erithulira lyethu mwa ly’omughaso. Kithi? Erithondi lighuma ilyolyene siriwithe ekyo lyanga kolha, aliwe amathondi manene kutsibu aw’akayisorokeraya haghuma w’akatsapaya ekithaka. Kuthya nethu, omundu aha bwiwe, iniangana yowa omubiiri wiwe w’erithulira nga syawithe aho akahika. Aliwe, erisanga-sangania omubiiri w’abaghombe ba Yehova abosi kikaleka obwema ibwahebwa okwa ‘bihanda byosi.’ (Mt. 24:14) Abathukathulira banemwendi lhangira erithulira lyethu ini mughisa owakalhua oku Yehova? Ikikendibya omwatsi ogho thukathulha amabya ng’ekime—n’ibugha ambu eribya iniane mw’eriyithondolya, iniana hehere, kandi iniangana theya engebe!