Ebibulyo Erilhua Omwa Basomi
“Omuwatho” na “ekiminyisyo” ebya obuli Mukristayo omuhakabibwa akathunga erilhua oku Nyamuhanga bikamanyisayaki?—2 Kor. 1:21, 22.
Kera, embuka eyiri kw’ekiminyisyo iyikahimathirawa okw’ibumba kutse okwa nimba erihamya okwa kihandiko
Omuwatho: Ekitabu kighuma kikasoborera kithi ekinywe ky’Ekigiriki ekya hindulhawa mwa “omuwatho” omwa 2 Abanya Korinto 1:22 kyabya “kinywe ekikakolesibawa omwa by’ekisubure” ekikamanyisaya “erithuha ly’erimbere, omutsimbo, ekya wukendi sangwa wahayo, okwa syosente esyosi esikayithaghisibawa erighulha ekindu, neryo ikyaleka ekindu ekyo ikyabya ikinabikirwe ng’ekyawu, kutse erileka omukoli iniakakasya kw’amahebwa omubiiri.” Neryo okwa bahakabibwa, erithuhwa eryosi, kutse olhuhembo lhwabu, lisoborerwe omwa 2 Abanya Korinto 5:1-5 ngoku ly’eryambalha omubiri w’elhubulha owathehonda. Omwa lhuhembo lhwabu mwamuli n’erihebwa obuthaholha.—1 Kor. 15:48-54.
Omwa Kigiriki kya munabwire, ekinywe ekyo kikana kolesibawa erimanyisya embeta y’erikangania omukali ku wukendi syamuthahya. Aho kikabya ibbwa ikyamakolha ndeke okwa bakendi syabya baghuma b’okwa muheruki wa Kristo.—2 Kor. 11:2; Erib. 21:2, 9.
Ekiminyisyo: Kera, ekiminyisyo ikikakolesibawa erikangania ngoku niwe mwinye kindu, okwenene kw’omwatsi, kutse endaghano. Neryo okwa bahakabibwa, omulimu abuyirire akabya ng’owamabahirako “ekiminyisyo,” ekikaleka ibahighulhwa ng’ekindu ekyo Nyamuhanga abiriyighulira. (Efe. 1:13, 14) Aliwe ekiminyisyo eki kikabya isikihwererere eribohwa ndeke omuhakabibwa athali ahika okwa ndambi y’eriholha iniane muthaleghulha kutse obulighe bunene bukayatsuka.—Efe. 4:30; Erib. 7:2-4.