1, 2. E Biblia muyasangwa yabugha yithiki okw’ikanyirira ly’abandu ba Yehova?

EKITHUNGA ky’abaghombe ba Yehova abathaleghulha, Abema biwe okwa kihugho, ni ky’embaghane kutsibu. Ni kwenene kiri mw’abandu abathahikene, abakanasobaya. Nomwabine bithya, omulimu wa Nyamuhanga anemusondolha ekithunga kiwe omwa kihugho kyosi erikulha-kulhana. Thuthalebya ngoku Yehova abiriwathikya abandu biwe nomwakine indi sibahikene.

² Omwa 1914, ebiro by’enyuma-nyuma bikatsuka, abaghombe ba Nyamuhanga okwa kihugho babya bake buyira. Aliwe Yehova mwatsumulha omubiiri wabu w’erithulira. Emyaka eyakwamako, abandi bandu mub’igha ekwenene ye Biblia, bamabya Bema ba Yehova. Yehova abya iniabirikania okw’ikulha-kulhana eri omw’ibugha athi: “Omuke asyabya kihanda, omuke kutsibu asyabya kihanda kikalire. Ingye Mwami Mukulhu nasyanguhyabyo okwa mughulhu wabyo.” (Isa. 60:22) Ebinywe ebyo byabiribererera omwa biro by’enyuma-nyuma bino. Munabwire, abaghombe ba Nyamuhanga ni banene okwa mughanzo w’abandu abangabya omwa bihugho bingyi.

3. Abaghombe ba Yehova babirikangania bathi olhwanzo?

 ³ Kandi omwa buthuku bwethu buno, Yehova abiriwathikya abandu biwe eryongera erikangania olhwanzo—omubere wiwe mukulhu. (1 Yn. 4:8) Yesu, ng’oyuwaghereraya olhwanzo lhwa Nyamuhanga, mwabwira abigha biwe athi: “Ngabaha ekihano kihya-kihya nyithi, mwanzane . . . Mwamabya n’olhwanzo omughuma busana n’oghundi, abandu bosi basyaminya ku muli bigha baghe.” (Yn. 13:34, 35) Eki mukyalhangirika omughulhu habya amalhwa w’ebihugho bingyi. Ng’eky’erileberyako, abandu nga miliyoni 55 mubakwira omwa Lhuhi lhw’Ekihugho Kyosi Olhwakabiri. Aliwe Abema ba Yehova ibo mubathasangira omw’ithangana eryo. (Soma Mika 4:1, 3.) Ekyo kyabiribawathikya eribya isibali kw’olhubanza lhw’omusasi w’omundu n’omughuma.—Emib. 20:26.

4. Busana naki eriyongera ly’abandu ba Yehova likaswekaya?

⁴ Erikulha-kulhana ly’abandu ba Nyamuhanga linemubya omwa kihugho ekikalire kutsibu kino, ekya Biblia yikabugha yithi kikasondolhawa na Sitani, “nyamuhanga mubi w’ekihugho kino.” (2 Kor. 4:4) Akakolesaya eby’ekipolitiki, n’eby’amakuru. Aliwe syanga kakirya erithulhughania ly’engulhu yuwene. Aliriryo Sitani kundi asi kw’awithe kathambi kake buyira, akalengaho erilhusya abandu okw’iramya ly’ekwenene, kandi akakolesaya nzira nyingyi.—Erib. 12:12.

5. Busana naki okwa mughulhu ono balikyethu bangana thuhithania? (Lebaya ekisasani ekiri okw’itsuka.)

⁵ Ekithunga kya Yehova kikahira omuwatho okwanza Nyamuhanga n’abandu. Yesu mwabugha athi ekyo kikendi syabya. Babere bakamubulya ekihano kikulhu nga ky’ekyahi, mwabugha athi: “Wanze omukama Nyamuhanga wawu n’omuthima wawu wosi, n’ekirimu kyawu kyosi n’obulengekania bwawu bwosi. Ekihano kikulhu kandi eky’erimbere ky’ekyo. Omughambo wakabiri ow’ali nga gho athi: ‘Wanze mulikyenyu ngoku wuyanzire.” (Mt. 22:35-39) Nomwakine, e Biblia yikakanganaya ndeke-ndeke ngoku busana n’ekibi kya Adamu, ithwe bosi sithuhikene. (Soma Abanya Roma 5:12, 19.) Neryo busana n’ekyo, mulikyethu omwa kithunga angana bugha kutse iniakolha ekyanga thuhithania. Eryo iryanganabya irengwako omw’ikangania Nyamuhanga y’olhwanzo n’abandu biwe. Iwe iwukendi kolhaki eki kyamabya? N’abaghombe ba Nyamuhanga ab’omwa buthuku bwa kera mubanabugha kutse erikolha ebikahithanaya abandi, kandi ithwangan’igha bingyi okwa bya Biblia yikababughako okwa mwatsi oyo.

6. Eli mwalemwa athi erikunga abaana biwe?

⁶ Ng’eky’erileberyako, Omuhereri Mukulhu Eli abya awithe baghalha babiri abaghana erighendera okwa mighambo ya Nyamuhanga. E Biblia yithi: ‘Baghalha ba Eli babya bandu bathya-bathya; isibasi Yehova.’ (1 Sam. 2:12) Thatha wabu nomwanakolha kutsibu erikulha-kulhania eriramya ly’okwenene, baghalha biwe babiri mubakolha ebibi ebikalire. Eli mwaminya okw’eki, kandi abya atholere eribakunga, aliwe mwathatsomana. Neryo Nyamuhanga mwaletha okw’eka ya Eli kw’erisuyira erikalire. (1 Sam. 3:10-14) Endambi yangahikire, n’abitsikulhu biwe isibangathasyabya bahereri. Kuwabyaho omwa buthuku bwa Eli, wanga yowire wuthi Eli akaghana eritsomana amalholho wa baghalha biwe? Wangana lekire ekyo ikyakuthwikalya erihika n’okw’ireka erithasyakolera Nyamuhanga?

7. Dawudi mwakolha ilholhoki erikalire, kandi Nyamuhanga mwakolhaki okw’ekyo?

⁷ Yehova abya anzire Dawudi, kyaleka iniabugha athi Dawudi “ni mundu oyo nyanzire.”  (1 Sam. 13:13, 14; Emib. 13:22) Aliwe enyuma w’aho Dawudi mwasingira na Batiseba, neryo amabya mukule. Ekyo kyabya mwira wiwe Uria, iniabirighenda omwa lhuhe. Abere ahika eka habw’akathuku kake, Dawudi mwalengaho erilhangira athi Uria akakesaya na Batiseba nuku kilhangirike nga y’omwinye obukule. Uria mwathaghendera okwa by’Omwami, neryo Dawudi mwaya embiitha y’erimwithisya omwa lhuhe. Ekyo mukyamulhwirira mw’ebitsibu bingyi—iyo n’ab’eka yiwe. (2 Sam. 12:9-12) Aliwe omulhume oyu kundi omwa bindi mwalendera embere sya Nyamuhanga “omw’ihikana ly’omuthima,” Nyamuhanga mwamughanyira. (1 Bam. 9:4) Kuwabyaho okwa buthuku obo, wangayowire wuthi? Mbwino amalholho wa Dawudi angana kuthwikerye?

8. (a) Petero mwalemwa athi erighendera okwa by’abugha? (b) Ni kyahi ekyaleka Yehova inialholha embere erikolesya Petero kandi nibya iniabirisobya?

⁸ Owundi y’omukwenda Petero. Yesu nomw’anabya iniabiri musombolha ng’omughuma w’okwa bakwenda biwe, Petero iniakanabugha kutse iniakolha ebikendi leka iniayikubya bwomo. Ng’eky’erileberyako, omwa mughulhu Yesu abya ahakalire, abakwenda abosi mubamusighania. Petero iyo abya iniabiribugha athi abandi nomubanga musighania, iyo eyihi. (Mk. 14:27-31, 50) Aliwe Yesu abere ahambwa, abakwenda, abosi—na Petero imw’ane—mubamusighania. Petero nibya mwayighana Yesu ngendo nyingyi. (Mk. 14:53, 54, 66-72) Aliwe Petero mwakangania kw’amayikubya bwomo, neryo Yehova amalholha embere erimukolesya. Kuwabya mughuma w’okwa bakwamire Yesu omughulhu oyo, ebya Petero akolha byangana hambire okwa buthaleghulha bwawu oku Yehova?

9. Busana naki wutholere iwayikethera ngoku mughulhu wosi Nyamuhanga ni w’obulingirirania?

⁹ Ebyo ni by’erileberyako bike ebya bandu abakolha ebyahithanaya abandi. Hane ebindi ebya kera n’ebya munabwire eby’abandu abanabya ibanemukolera Yehova aliwe ibakolha ekindu ekith’uwene neryo ibathwikalya  abandi. Aliwe ekikulhu kiri kithi, iwe iwukendi kolhaki kyamakubyako? Iwunemwendi lighira ebisobyo byabu erikuthwikalya neryo iwasighania Yehova n’abandu biwe, obo imwamuli n’ab’omwa kithunga kyenyu? Kutse iwunemwendi linda, erilhangira ngoku Yehova akabaha obuthuku bw’eriyisubamu kutse erilhungulha emyatsi omwa nzira eyitholere? Hakanayira n’abandi ibakolha amalholho awakalha-kalire kandi ibaghana eriyisubamu Yehova iniabiryanza eribaghanyira. Omwa mibere ng’eyi, iwunemwendibya n’amaha ngoku abakolha-nabi ng’abo Yehova akendi syabatswera, obundi ng’eribalhusya omwa kithunga?

10. Yesu iyo abya inianasi kyahi, Yuda na Petero nomubanamukolha nabi?

¹⁰ Omwa Biblia mune abaghombe ba Nyamuhanga abasighalha ibane bathaleghulha abandi ba kubo nomubanakolha amalholho awakalha-kalire. Ng’eky’erileberyako, Yesu abere abirighunza erithumbi eryosi inianemusaba Thatha wiwe, mwasombolha abigha biwe 12. Yuda Iskariota abya mughuma wa kubo. Yuda abere amughoberya, Kristo mwathalighira obughobya obo bukatsandya obughuma bwiwe na Thatha wiwe, Yehova; kuthya na Petero erimuyighana, mulithaleka ekyo kikabya. (Lk. 6:12-16; 22:2-6, 31, 32) Yesu abya inianasi ngoku si Yehova oyulyamusoberaya kutse abaghombe abosi. Yesu mwalholha embere erikolha omubiiri wiwe nomwakine indi abandi bigha biwe mubamukolha nabi. Yehova mwamuhemba omw’imulhubukya, ekindu ekyamukyungulira enzira y’eribya Mwami w’Obwami bwa Nyamuhanga.—Mt. 28:7, 18-20.

11. E Biblia muyasangwa yabugha yithiki okwa baghombe ba Yehova omwa buthuku buno?

¹¹ Eriyikethera erya Yesu abya awithe omu Yehova n’abandu biwe, lyabya lighumire kandi na munabwire ku likine lithya. Kandi kwenene, thukabya thukalhangira ebya Yehova anemukolha erilhabira omwa baghombe biwe omwa biro by’enyuma-nyuma bino, thukasweka. Sihali bandi bandu abakathulhughanaya ekwenene omwa kihugho kyosi, kyan’ekithunga kya Yehova, kundi ikyo kisa ky’akasondolha. Isaya 65:14 hakabugha okwa mibere y’obunyakirimu ey’abandu ba Nyamuhanga hathi: “Lebaya! Abaghombe baghe basyutha obwogho bw’obutseme bw’omuthima.”

12. Thutholere ithwalhangira thuthi ebisobyo by’abandi?

¹² Abaghombe ba Yehova bakatsema busana n’ebibuya ebya bakakolha busana n’erisondolhwa na Yehova. Aliwe abali omwa busondoli bwa Sitani bali ng’abakalira, emibere y’ekihugho yikayongera eritsanda. Ikikendibya ky’obukiru eritsweba Yehova kutse ekithunga kiwe busana n’ebisobyo by’abake b’okwa baghombe biwe. Thutholere ithwasighalha ithune bathaleghulha oku Yehova n’esyondegheka siwe n’erigha ngoku thutholere ithwalhangira ebisobyo by’abandi.

13, 14. (a) Busana naki thutholere ithwaghumisirizania? (b) Ni mulhaghe wahi owathutholere ithwabya ithun’ibukire?

¹³ Thwanga kolhaki omughuma w’okwa baghombe ba Nyamuhanga amabugha kutse erikolha ekyanga thuhithania? Omusingyi owuwene ow’erikwama w’ono: “Siwanguhe omo kirimu kyawu erihithana, kusangwa erihithana likere omo kikuba ky’abakiru.” (Omu. 7:9) Thutholere ithw’ibuka ngoku ithwe bosi thuli haali kutsibu, myaka nga 6,000 erilhua okw’ihikana eryabya omwa Edeni. Abandu abathahikene sibangabya bathethasobya. Neryo kwesi isikyendibya kibuya erithwalha balikyethu ng’abandu abahikene n’erileka ebisobyo byabu bikathughunza kw’etseme eya thukabana busana n’eribya omwa kithunga kya Yehova  omwa biro by’enyuma-nyuma bino. Ibbwa ekyangabya ky’akabi kutsibu ly’erilighira ebisobyo by’abandi erithuthwikalya, ithwasighania ekithunga kya Yehova. Wamakolha ekyo, iwukendibya iwamaherya olhusunzo lhw’erikolera Nyamuhanga n’amaha w’erisyabya omwa kihugho kihya-kihya.

¹⁴ Erithoka erilholha embere ithune n’etseme n’amaha wethu, thutholere ithwabya ithun’ibukire omulhaghe wa Yehova ow’akahumulikanaya ono: “Lebaya! Ngahangika olhubulha lhuhya-lhuhya n’ekihugho kihya-kihya; n’emyatsi y’erimbere siyendi syasyibukwa, kutse erihika okwa muthima.” (Isa. 65:17; 2 Pet. 3:13) Isiwalighira ebisobyo by’abandi bikaleka wukathalha okwa mighisa ng’eyi.

15. Yesu mwabugha athi thutholere ithwakolhaki abandi bamasobya?

¹⁵ Aliwe kundi sithuli thwahika omwa kihugho kihya-kihya, thutholere ithwaminya Nyamuhanga ng’anzire ithwakolha thuthi abandi bamabugha kutse erikolha ebyanga thuhithania. Ng’eky’erileberyako, omusingyi w’eryibuka w’owa Yesu abugha ono: “Mwamabuyira abandu amalholho agho babiribakolha, Thatha wenyu w’elhubulha asyababuyira nibya; nikwa mwamathendi buyira abandi b’amalholho bakabakolera, Thatha wenyu w’elhubulha syendi syababuyira amalholho agho mwabirikolha.” Wibuke kandi ngoku Petero abere akabulya ng’atholere iniabuyira “ngendo sirinda,” Yesu mwasubirya athi: ‘Sindithakubwira nyithi ngendo sirinda, nikwa esyongendo 77.’ Hano Yesu akanganaya ngoku thutholere ithwabya ithunayitheghekire erighanyira mughulhu wosi; ekyo kya thutholere ithwatsuka erilengekaniako omundu amathusoberya.—Mt. 6:14, 15; 18:21, 22.

16. Ni ky’erileberyako kyahi ekyuwene ekya Yozefu ahiraho?

¹⁶ Yozefu mwathuhirira h’eky’erileberyako ekyuwene ngoku thwanga lhangira ebisobyo by’abandi. Abandi baghalha bobu Yozefu mubamukwa erihale kundi thatha wabu abya amwanzire. Neryo mubamughulya omwa bukobe. Habere habirilhaba myaka mingyi, ebibuya ebya Yozefu akolha Emisiri mubyaleka iniayirwa mo wakabiri okwa muthabali w’ekihugho ekyo. Neryo omughulhu enzalha yawa, baghalha bobu Yozefu mubasa e Misiri bakasyaghulha ebyalya aliwe mubatha muminyerera. Yozefu angana kolesirye obuthoki bwiwe erithuhulya ebya baghalha babu bamukolhako. Aliwe mwathwamu erilengesya baghalha babu nga babiribindulha amalengekania wabu mabi. Abere alhangira kwenene ibabirihinduka, Yozefu mwayiminyikalya kubo. N’enyuma w’aho mwabugha athi: “Simubahe. Ngendi balembera n’abaana benyu.” E Biblia yithi: “Mwakiraniabo, mwabugha nabu ebibuya.”—Enz. 50:21.

17. Ni kyahi ekya wutholere iwakolha abandi bamasobya?

¹⁷ Kandi ni ky’amenge eryibuka ngoku nethu thwanganabya ithunemusoberya abandi kundi nethu sithuhikene. Thwamaminya ngoku thwabirisoberya abandi, e Biblia yikathuhabulha yithi ithwabana oyo thulyasoberaya n’erilengaho erisubanamu. (Soma Matayo 5:23, 24.) Kundi thukatsema abandi bamathughanyira ebisobyo byethu, nethu ekyo kya thunatholere ithwakolha. Abanya Kolosai 3:13 hathi: “Mughanyirane, mubuyirane omughulhu owundi awithe omwatsi oko wundi. Ngoku Omukama ababuyira, nenyu ku mwanga buyira abandi ba muthya.” Kandi 1 Abanya Korinto 13:5 hathi, “Olhwanzo silhuli tsungirira ekibi.” Thwamabya thukaghanyira abandi, Yehova iniakendi syathughanyira. Kwenene, ambi abandi bamathusoberya, ithwe ng’Abakristayo thutholere ithwagherererya emibere eya Thatha wethu w’olhukeri akathukanganaya thwamamusoberya.—Soma Esyonyimbo 103:12-14.