“OLHUKERI lhw’abalikyethu Abakristayo mulhwanyihambako kutsibu,” Lisa athya. * Aby’akakania okwa kyaleka inianza ekwenene. Kubyanabya bithya n’oku Anne, oyuwabugha athi, “Olhukeri lhw’Abema ba Yehova mulhwanyihambako kwilhaba ebyo bakakangiriraya.” Lino bali bethu babiri aba bakatsemera erisoma e Biblia n’erighanirya kuyo, aliwe olhukeri lho lhwabahambako kutsibu.

Thwanga kangania thuthi olhukeri olhukahamba okwa mithima y’abandi? Thukanaye okwa syonzira ibiri: ebya thukabugha n’ebya thukakolha. Neryo thukendi lebya nga ni bahi abo thutholere erikangania olhukeri.

Omukali omughenge oyukanibweko omwa Emisyo esura 31 awithe “ebihano by’obubuya [“omughambo w’olhukeri,” NWT]” okwa lhulimi lhwiwe. (Emi. 31:26) Akalighira “omughambo” oyu erisondolha omulenge owakakolesaya n’eby’akabugha. N’abathatha bakakolha ndeke eribya ‘n’omughambo’ oyu okwa lhulimi lhwabu. Ababuthi bangyi banasi ngoku ebinywe by’eritsuruma byangana hamba nabi okwa mwana wabu. Ababuthi bamabugha omwa mipuru, omwa mulenge owathe mw’olhwanzo, omwana wabu iniangana ghana eribahulikirira. Neryo eryongera eribya abakatsemesaya kandi abakakanaya ndeke, ababuthi batholere ibalengaho erikania omwa lhukeri.

Mbulha wuli mubuthi kutse eyihi, wang’igha wuthi erikania omwa lhukeri? Thukabana eky’erisubirya omwa kitsweka ky’erimbere ekye Emisyo 31:26: ‘Akathanda obuno bwiwe omo menge.’ Ekyo mwamuli erisombolha ebinywe ebya thwanga bugha n’erikolesya ndeke omulenge. Ikikendi thuwathikya eriyibulya thuthi, ‘Mbwino ebya nga ya bugha bikendi hithania abandi, kutse bikendi letha h’obuholho?’ (Emi. 15:1) Kwesi ni ky’amenge, eritsuka erilengekania imuwabugha.

Owundi musyo akabugha athi: “Hali oyukabugha buthalengekania ng’eritsimitha ly’omuyali.” (Emi. 12:18) Thwamalengekania okwa bya thukabugha n’omulenge owathukakolesaya nga byanga hamba bithi okwa bandi, ithwanga thoka eriyitheya okw’ibugha ekyosi-kyosi ekikawa okwa buno. Kwesi, erighendera okwa “mughambo w’olhukeri” kikendi thuwathikya eriyikakirya okw’ikolesya ebinywe ebikalire n’omulenge w’obutsurumi. (Efe. 4:31, 32) Omo mwanya w’amalengekania n’emibughire eyithuwene, ithukendi subyamo ebinywe by’olhukeri n’omulenge owuwene. Omw’eki, Yehova mwahiraho eky’erileberyako ekyuwene akahumulikania omughombe wiwe oyukwire obuba ya Eliya. Omumalaika oyuw’imanira Yehova mwakania omwa “mulenge muke owahehere.” (1 Bam. 19:12) Nomwabine, eribya w’olhukeri, sikirisubulira okw’ikania omwa lhukeri. Thutholere ithwakolha n’omwa lhukeri. Thuthi?

Thukagherereraya Yehova omw’ibugha ebinywe by’olhukeri n’omw’ikolha omwa lhukeri. (Efe. 4:32; 5:1, 2) Lisa, oyothulyakanayako okw’itsuka, mwakania okwa lhukeri olho Abema bakakanganaya. “Kitsumbukirania eka yethu yabere yikakakwa erihuma, baghalha bethu babiri n’abakali babu mubusa okwa mibiiri yabu  erisyathuwathikya eriboha ebindu. Nibya okwa buthuku obo, nabya isind’igha e Biblia!” Emikolere y’olhukeri eyo muyaleka Lisa iniongera erilebya ndeke ekwenene.

Anne, oyothulyakanayako okw’itsuka, nayu mwasima olhukeri olho Abema bamukanganaya. Akabugha athi: “Busana n’emibere y’ekihugho, munasa mw’erithika-thika linene. Mukyanyikalira eriyikethera abandu.” Mwongerako athi: “Nabere nabana Abema, munathika-thikira ebilhubirirwa byabu. Iningayibulhaya, ‘Busana naki ibanyitsomana bathya?’ Aliwe olhukeri lhw’okwenene lhw’oyuwabya akanyeghesya e Biblia mulhwaleka ingamuyikethera.” Ni bibuya byahi ebyalhwiririramu? “Enyuma waho, munatsuka erihira amalengekania w’okwa byanabya ng’igha.”

Lhangira ngoku emikolere ey’olhukeri ey’abalikyethu omwa kithunga muyahamba kutsibu oku Lisa na Anne, kandi ngoku ekyo mukyaleka ibanza eriminya ekwenene. Olhukeri olho ekithunga kyabakanganaya mulhwaleka ibatsuka eriyikethera Yehova n’ekithunga kiwe.

Abandi bangana kolesya ebinywe by’olhukeri n’eritsangira abandi busana n’eyo bakulire. Emibere eyuwene ng’eyo eyikakanganibawa busana n’ekalikya kutse busana n’eyo thukulire yikasimawa. Aliwe thwamakangania olhukeri busana n’ebyo, olhukeri lhwa Nyamuhanga ilhwanganabya ilhwathuthekanganaya.​—Thasyalebaya na Emibiri. 28:2.

Olhukeri lhwa Nyamuhanga olhw’okwenene ni lhughuma lhw’okwa mikolere y’omulimu wiwe abuyirire. (Gal. 5:22, 23) Kwesi thukayithagha omulimu abuyirire erithoka eribya n’olhukeri. Ekyo kikahambangana n’eriyisunza lyethu ly’erianza erigherererya Yehova na Yesu. Kandi, ithwe ng’Abakristayo thwanzire ithwatsomana abandi. Busana n’ekyo, olhwanzo olhwa thuwithire Yehova Nyamuhanga n’olhwa thuwithire abandu lhukathuhira mw’omuhwa. Neryo olhukeri olhwa thuwithe akabya mubere ow’amaaka owakalhua okwa muthima kandi ogho Nyamuhanga akaligha.

Kyangana thwolhobera erikangania olhukeri okwa babirithukangania olhukeri kutse abo thwasi. (2 Sam. 2:6) Enzira nguma ly’eribasima. (Kol. 3:15) Aliwe ibbwa thwamayowa omundu mulebe nga syatholere erikanganibwa olhukeri?

Thalengekania oku kino: Yehova abirithuhiriraho eky’erileberyako ekyuwene kutsibu eky’erikangania olhukogho, kandi Ekinywe kiwe kikathukanganaya erisomo likulhu erihambire okw’ikangania omubere oyu. Ekinywe “olhukogho” kikakolesibawa mirundi mingyi omwa Masako w’Ekigiriki. Olhukogho ly’erikangania omundu y’olhukeri nibya isyatholere erikanganibwalho. Nyamuhanga akakanganaya athi olhukeri?

Thalengekania okwa syomiliyoni n’esyomiliyoni sy’abandu abo Yehova abiribya iniane mukangania olhukeri lhwiwe omw’ibaha ebyo bakayithagha erithoka eribyaho. (Mt. 5:45) Erithwalira haghuma, Yehova mwakangania abandu b’olhukeri nibya isibali bamuminya. (Efe. 2:4, 5, 8) Ng’eky’erileberyako, mwahayo ekyuwene kutsibu, Mughalha wiwe, ekyusa busana n’abandu bosi. Omukwenda Paulo mwahandika athi Yehova mwahayo endongolya kundi “olhukogho lhwa Nyamuhanga ni lhunene.” (Efe. 1:7) Eryongera okw’ekyo, nomwakine indi thukasobaya n’eriponesya Yehova, akalholha embere erithusondolha n’erithukangirirya. Obusondoli n’ebinywe biwe biri ‘ng’obunyenye bw’embulha.’ (Ebi. 32:2) Ahathe erithika-thika sithwanga thoka erimuthuha busana n’olhukeri lhwosi olho akathukanganaya. Kandi okwenene kuli kuthi obuthuku bwethu obukasa buseghemere okwa lhukeri lhwa Yehova.​—Thasyalebaya na 1 Petero 1:13.

Ahathe erithika-thika, olhukeri lhwa Yehova lhuwene kandi lhukathuhira mw’omuhwa. Busana n’ekyo, omwakanya k’erisombolha ab’erikangania olhukeri, thutholere ithwalengaho erigherererya Yehova omw’ikangania abandi b’olhukeri obuli kiro. (1 Tes. 5:15) Thwamakangania olhukeri mughulhu wosi, thukabya ng’omuliro ow’eryothako omwa mbeho nene. Thukahumulikanaya abahughu bethu, abaramya balikyethu, abo thukakolha nabu, abo thukasoma nabu, n’abataka.

Thalengekania okwa b’omw’eka yenyu kutse ab’omwa kithunga abanga ghasirwa busana n’ebinywe n’emikolere yawu y’olhukeri. Omwa kithunga kyenyu mwanganabya imune omundu oyukayithagha obuwathikya bw’eriyonza omuyi wiwe kutse eyindi mibiiri y’obuli kiro ng’erimughendera omwa kathali. Eryongera okw’ekyo, wameya omundu omw’ithulira oyukayithagha obuwathikya, mbwino wangana muwathikya omwa nzira ndebe?

Omw’igherererya Yehova, ambi mughulhu wosi “omughambo w’olhukeri” iniasondolha ebya thukabugha n’ebya thukakolha.