1. Ni bindu nga byahi ebikitha obuba?

 THULEBAYE ebyalholirweko bino. Nestor na mukali wiwe, María, mubanza eriyakolera eyiri obuyithawa bunene. * Erithoka eriberererya ekyo, mubayithagha eryolhobya engebe. Aliwe mubasagha bathi ibangana bulha etseme bamabyaho okwa kasente kake. Biniam abere akabya Mwema wa Yehova omwa kihugho eyo omubiiri wethu ali kw’olhukako, mwaminya ngoku iyo ng’omughuma w’okwa bandu ba Nyamuhanga akendi endereribwa. Ekyo mukyamwitha obuba. Ibbwa kandi mwongera erikwa obuba akalengekania abahughu biwe nga bakendi kolhaki bakaminya ngoku abirighenda omwa yindi dini. Valérie mubamubana mw’ekansa eyikalire, kandi mukyamukalira eribana dokita oyuwangasikya esyonyikirirya siwe esiseghemere okwa Biblia esihambire okwa musasi. Ahathe erithika-thika mwakwa obuba athi angana holha.

2. Busana naki thukayithagha erikolha kutsibu erisingura obuba?

² Wune wathakwa obuba ng’obo? Abangyi omw’ithwe babiribukwa. Thwamathend’igha erirwanisya obuba bwethu, ithwangana thwamu nabi neryo ikyahamba nabi okwa bughuma bwethu na Yehova. Ekyo kya Sitani anzire. Kandi akalengaho erikolesya obuba obwa thuwithe erileka thuthwe ebihano bya Yehova, imwamuli n’eky’erithulhughania engulhu yuwene. (Erib. 12:17) Sitani ni mubi, syalikwa obulighe, kandi awithe amaaka. Aliwe wangana yitheya okw’iyo. Wuthi?

3. Ni kyahi ekikendi thuwathikya erisingura obuba bwethu?

³ Thwamabya ithunalighire ngoku Yehova athwanzire​—ngoku ane okwa lhuhandi lhwethu—​Sitani isyendi thubahisya.  (Esy. 118:6) Ng’eky’erileberyako, omuhandiki w’Esyonyimbo 118 mwabya omwa mibere eyikalire kutsibu. Aby’awithe esyonzighu nyingyi, abandi omw’ibo ini b’ebitsumbi (omulhondo 9, 10). Muhanayira amabya omw’ihangya-hangya linene (omulhondo 13). Kandi abya iniabirithunga erisuyirwa erikalire erilhua oku Yehova (omulhondo 18). Nomubyanabya bithya, omuhandiki w’esyonyimbo oyo mw’imba athi: “Singendi syubaha.” Ni kyahi ekyaleka iniabya inianayowire buholho kandi iniane omwa butheya? Abya inianasi ngoku nomwakine indi Yehova abya iniabirimusuyira, Thatha wiwe w’elhubulha amwanzire kutsibu. Omuhandiki w’esyonyimbo abya inianalighire ngoku nomwangabya omwa mibere eyiri yithi, mughulhu wosi Nyamuhanga wiwe w’olhwanzo abya inianayitheghekire erimuwathikya.​—Esy. 118:29.

4. Ni buba bwahi obwa thwanga singura thwamayikethera ngoku Nyamuhanga athwanzire?

⁴ Thutholere ithwaligha ngoku Yehova athwanzire. Eriligha eryo likendi thuwathikya erisingura obuba bw’emiringo isathu eno, (1) eryubaha thuthi sithwendi thoka eribana ebiyithawa by’eka yethu, (2) eryubaha abandu, na (3) erisagha olhuholho. Balikyethu abakanibweko omwa nungu ey’erimbere mubathoka erisingura obuba bwabu kundi mubaligha ngoku Nyamuhanga abanzire.

5. Ni mibere yahi eyanga leka omuthwe w’eka iniahangya-hangya kutsibu? (Lebaya ekisasani ky’okwa kidipa.)

⁵ Omuthwe w’eka Omukristayo syalilhangira olhukwamirwa lhwiwe lhw’eritsomana eka yiwe kinyamubiri mwa lhw’amasatha. (1 Tim. 5:8) Wamabya iwuli muthwe w’eka, obundi omwa buthuku bw’ekihunzo muwasagha wuthi obundi wangana herya omubiiri wawu. Wangabya imuwasagha wuthi kikendi kukalira eribanira eka yawu y’ebyalya n’ah’erikalha. Kandi wangabya imuwasagha wuthi wamaherya omubiiri wawu, isiwendi thoka eribana owundi. Kutse obundi nga Nestor na María, abakanibweko okw’itsuka, wangabya imuwasagha erikolha esyombinduka omwa mubiiri wawu w’ekihugho wuthi kikendi hamba okwa ngebe yawu. Sitani abirithoka erilemesya abandi omw’ikolesya obuba ng’obo.

6. Sitani anzire ithw’ikirirya thuthiki?

⁶ Sitani akalengaho erileka thw’ikiriraye thuthi Yehova syathutsomene kandi thuthi thukayilhwako ithw’ibene bikahika okw’ibana ebiyithawa by’eka yethu. Busana n’ekyo, ithwangana ghunzerera thuthi thukayithagha erikolha ngoku thwanga thoka eryamakirira omubiiri wethu, nomukyangabya ikikendi leka ithwagheghena emisingyi ye Biblia.

7. Yesu akathukakasaya athiki?

⁷ Yesu, oyuwasi Thatha ya ndeke kwilhaba mundu wosi-wosi, akathukakasaya ngoku Nyamuhanga wethu ‘anasi ebithuli bwagha, isithulithwamusaba.’ (Mt. 6:8) Kandi Yesu anasi ngoku Yehova akabya inianayitheghekire erithuha ebiyithawa byethu. Ithwe ng’Abakristayo thuli b’omw’ihiika lya Nyamuhanga. Thwangana kakasya ngoku iyo ng’Omuthwe w’eka, Yehova akendi sikya omusingyi owali omu 1 Timoteo 5:8.

8. (a) Ni kyahi ekyanga thuwathikya erisingura obuba bw’eribugha thuthi sithwendi thoka eribana ebiyithawa by’eka yethu? (Matayo 6:31-33) (b) Ngoku kikanganibwe omwa kisasani, thwanga gherererya thuthi abathahenie abane mulethera mwali wethu y’ebyalya?

⁸ Thwamaligha ngoku Yehova athwanzire kandi ngoku anzire esyofamile syethu, ithukendi ligha ngoku thukendi bana ebya thukayithagha. (Soma Matayo 6:31-33.) Yehova anzire erithuha ebya thukayithagha, ka  ni w’olhwanzo kandi mwenge! Abere akahangika ekihugho, mwathasubulira okw’ithuha ebyangaleka ithwabyaho lisa. Busana n’olhwanzo musulya omwa kihugho mw’ebindu ebikathutsemesaya kutsibu. (Enz. 2:9) Nomwakine indi hanganayira ithwabya ithukabana ebikaleka ithwabya ithunemughenderaho, thukakolha ndeke thukahwerya amalengekania w’okw’ebyo. Yehova syali athalemwa erithuha ebya thukayithagha. (Mt. 6:11) Thutholere ithwabya ithun’ibukire ngoku eby’ekinyamubiri byosi-byosi ebya thwanga yithalyako lino sibyang’ingana n’ebya Nyamuhanga wethu w’olhwanzo angathuha, lino n’omwa buthuku obukasa. Ekyo kya Nestor na María baminya.​—Isa. 65:21, 22.

9. Eky’erileberyako kya Nestor na María kyanga kweghesyaki?

⁹ Nestor na María babya ibabiritsemera engebe eyuwene e Colombia. Bakabugha bathi: “Muthwalengekania okwa ky’eryolhobya engebe yethu n’erikanyirirya omubiiri wethu w’erithulira, aliwe muthwasagha thuthi ithukendi bulha etseme omw’ibyaho okwa kasente kake.” Ni kyahi ekyabawathikaya erisingura obuba bwabu? Mubalengekania okwa syonzira nyingyi esyo Yehova abiribakanganiryamu olhwanzo. Mubaligha ngoku mughulhu wosi akendi batsomana, neryo mubaleka emibiiri yabu eyabyako esyosente esyuwene. Mubaghulya okuwabu n’erighenda omwa kitsweka kirebe ekiri mw’obuyithawa bw’abathuliri b’Obwami omwa kihugho ekyo. Bakayowa bathi busana n’erithwamu lyabu? Nestor akabugha athi: “Thwabiriyilhangirira okwenene kw’ebiri omu Matayo 6:33. Sithuli thwathabulha kindu kyosi-kyosi ky’ekinyamubiri. Kandi lino thutsemire kutsibu.”

10. Busana naki sikiriswekaya eribya abandu ibakubaha abandi?

¹⁰ Abandu basibwe ng’abakahuthalhaya abandi. (Omu. 8:9) Ng’eky’erileberyako, abandu bakakolesaya nabi obuthoki bwabu, esyongoli sy’ebibi sikakolha eby’obwithi, abanya sukuru ab’omwagha bakatsuma n’erihayira abo bakasoma nabu, kandi abandi bandu bakakolha nabi ab’omw’eka yabu. Kwesi sikiriswekaya eribya abandu ibakubaha abandi bandu! Sitani akalengaho athi erikolesya eky’ithwe eryubaha abandu?

11-12. Sitani akakolesaya athi eky’eryubaha abandu akanza erithulemesya?

¹¹ Sitani akakolesaya eky’eryubaha abandu  erianza erithukaka nuku thuleghule n’erithulemesya erithulira. Omw’isukumwa na Sitani, esyogavumente syabirimania omubiiri wethu n’erithwendererya. (Lk. 21:12; Erib. 2:10) Omwa kihugho kya Sitani abandu bakalhalhanaya okwa Bema ba Yehova kw’emyatsi eyithahikire n’amabehi awakalire. Abandu abakaligha amabehi aya bangana thusekererya, kutse nibya ibathukolha nabi. (Mt. 10:36) Ebithegho bya Sitani ibyanathuswekya? Eyihi nahake. Anabya akabikolesya n’omwa kighana ky’erimbere.​—Emib. 5:27, 28, 40.

¹² Erisagha erihakanisya erikalhua okwa syogavumente si ky’eky’amalhwa kisa ekya Sitani akakolesaya. Okwa bandi, erithalengekania okwa ekya bahughu babu bangakolha bakaminya ngoku babiriminya ekwenene ky’ekikabubahisaya kutsibu kwilhaba erikolhwa nabi. Banzire abahughu babu ba kutsibu kandi banzire nabu ibaminya Yehova n’erimwanza. Bakayiponera bakowa abahughu babu bakakania nabi oku Nyamuhanga w’okwenene n’abaramya biwe. Aliwe ahandi n’ahandi, abo abahughu babu bahakanisaya, enyuma waho mubasa omwa kwenene. Aliwe ibbwa abahughu bethu bamathughanira ighuma busana n’esyonyikirirya syethu mbyaka? Ithukendi kolhaki?

13. Eribya ithunalighire ngoku Nyamuhanga athwanzire kyanga thuwathikya kithi abahughu bethu bakathughana? (Esyonyimbo 27:10)

¹³ Ekwenene eyiri omwa Esyonyimbo 27:10 yangana thuhumulikania. (Soma.) Thukabya thuk’ibuka ngoku Yehova athwanzire kutsibu, sithulikwa obuba thukahakanisibwa. Kandi thuyikethere ngoku akendi syathuhemba busana n’eriyiyinia lyethu. Yehova akendi thutsomana kinyamubiri, omw’iyowa, na bunyakirimu kwilhaba mundu wosi-wosi! Ekyo kya Biniam oyukanibweko okw’itsuka aminya.

14. Eky’erileberyako kya Biniam kyanga kweghesyaki?

¹⁴ Biniam mwabya Mwema wa Yehova nomwanabya inianasi ngoku akendi endereribwa kutsibu. Thalebya ngoku Biniam eriminya Yehova kw’amwanzire ku mukyamuwathikya erisingura eryubaha abandu. Akabugha athi: “Eriendereribwa mulyabya linene kutsibu kwilhaba ngoku nabya ingalengekania. Aliwe ekyanabya ingasagha kutsibu ly’erihakanisya ly’abahughu baghe kwilhaba eriendererya ly’egavumente. Iningasagha indi erithwamu lyaghe ly’eribya Mwema wa Yehova lyanga ponesirye thatha waghe oyuthikirirye kandi indi lyangalekire abahughu baghe ibalhangira nga nabirilemwa.” Aliwe, Biniam aby’asi ngoku mughulhu wosi Yehova  akatsomana abo anzire. Biniam akasoborera athi: “Munalengekania okwa mibere Yehova awathikirayamo abandi erighumira obunakwa, akasolholho, n’eribambirwa. Munaminya ngoku namamakirira Yehova iniakendi nyitsumulha. Nabere ingahambwa mirundi mingyi nibya n’eriaghalibwa munayilhangirira ngoku Yehova akathuwathikaya thwamasighalha bathaleghulha.” Oku Biniam, Yehova mwabya nga Thatha wiwe owenyine-nyine, n’abandu Biwe mubakangania ku ni b’okw’iyo.

15. Busana naki ni kya buli kiro erisagha olhuholho?

¹⁵ E Biblia yikakanganaya ndeke-ndeke ngoku olhuholho ni nzighu. (1 Kor. 15:25, 26) Thwangana hangya-hangya thukalengekania okwa lhuholho, kwilhabirirya ithwe kutse omwanze wethu amabya iniathohire. Busana naki ithwasagha olhuholho? Kundi Yehova mwathuhangika ithunawithe eriyisunza ery’eribyaho kera na kera. (Omu. 3:11) Amalengekania awatholere okw’isagha olhuholho angana thuwathikya eritheya engebe yethu. Ng’eky’erileberyako, angana thuhira mw’omuhwa w’erithwamu ndeke bikahika okwa mirire n’erikolha ebisasayizi, erisondya obuwathikya bw’abathambiri n’emithambirire kikayithaghisibwa, n’eriyihighulha okw’ihira engebe yethu y’omwa kabi.

16. Sitani akakolesaya athi obuhangiranwa bwethu bw’erisagha olhuholho?

¹⁶ Sitani anasi ngoku thwanzire engebe yethu. Aliwe akabugha athi thwangana yithalya okwa buli kindu ekya thuwithe​—nibya n’obughuma bwethu na Yehova—​habw’erithanza erilhamya engebe yethu lino. (Yobu 2:4, 5) Sitani awire! Kandi kundi Sitani yuwithe “obuthoki bw’olhuholho,” akalengaho erikolesya obuhangiranwa bwethu bw’erisagha olhuholho nuku thusighanaye Yehova. (Ebr. 2:14, 15) Ahandi, abakasighika Sitani bakahayira Abema ba Yehova bathi ibakendi bitha bamathendi yighana erikirirya lyabu. N’ahandi, Sitani iniangana kolesya eky’eribya engebe yethu iyiri omwa kabi erianza thuleghule. Abadokita kutse abahughu bethu abathe Bema bangana thuhathikana bathi thulighe erihirwako omusasi, ekindu ekikathwa ebihano bya Nyamuhanga. Kutse owundi mundu angana lengaho erithulemba-lemba athi thulighe eyindi mithambirire eyikathwa emisingyi y’Amasako.

17. Ngoku kiri omwa Abanya Roma 8:37-39, busana naki si thutholere thukasagha olhuholho?

¹⁷ Nomwakine indi sithwanzire eriholha, thunasi ngoku Yehova syendi leka erithwanza nomuthwanga holha. (Soma Abanya Roma 8:37-39.) Banywani ba Yehova bakabya bamaholha, akabya inianabibukire, ibabya nga bane naho. (Lk. 20:37, 38) Akakandira eribalhubukya. (Yobu 14:15) Yehova abirihayo ekindu ky’obughuli bunene nuku thubye “n’engebe y’erikotha.” (Yn. 3:16) Thunasi Yehova kw’athwanzire kutsibu kandi kw’athutsomene. Neryo omwakanya k’erisighania Yehova omughulhu thulhwere kutse omughulhu hali erikwa, thukamuyikethera erithuhumulikania, erithuha amenge, n’akaghalha. Ekyo kya Valérie na mwira wiwe bakolha.​—Esy. 41:3.

18. Ekyalholirweko kya Valérie kyanga kweghesyaki?

¹⁸ Valérie abere ahikya emyaka 35, mubamupimamo ekansa eyikalire kutsibu. Lhangira ngoku olhwanzo olhwawithire Yehova lhwamuwathikaya erisingura erisagha olhuholho. Akabugha athi: “Obulhwere bwaghe obo mubwalhuaho ibwahindulha engebe yethu. Munayithagha erisemezibwa erikalire erithoka eribyaho. Munahika okwa badokita bangyi, aliwe abosi mubaghana erinyisemezya ahathe erikolesya omusasi. Munakwa obuba,  aliwe erikwamana n’ekihano kya Nyamuhanga, nabya isinanga ligha nahake erihirwako omusasi! Omwa ngebe yaghe yosi, Yehova abirikangania kw’anyanzire kutsibu. Naghe aho munabana akaghisa k’erimukangania ku nga mwanzire. Obuli eribana omwatsi mubi erilhua okwa badokita, ikikaleka ingongera erithwamu eritsemesya Yehova n’erithendi lighira Sitani erisinga. Erighunzerera munasemezibwa ahathe erihiribwako omusasi. Nomwakine indi amaghalha waghe abirilholha embere eribya inianaghanire, mughulhu wosi Yehova abirithuha ebya thukayithagha. Ng’eky’erileberyako, okwa mihindano yethu y’okwa wikendi inde napimwamo ekansa, thwabya ithwabirigha oko mwatsi owakabugha athi, ‘Erighumira Ebitsibu Ebya Munabwire Buthubaha.’ * Omwatsi oyu mwathuhumulikania kutsibu. Muthwasomagho mirundi mingyi. Emyatsi ng’eyi n’endegheka eyuwene ey’obunyakirimu byabirileka ingye na mwira waghe ithwathekana n’erithuwathikya eribya n’amalengekania awatholere n’erithwamu ndeke.”

19. Ni kyahi ekikisiya ikyabya?

¹⁹ Busana n’obuwathikya bwa Yehova, Abakristayo omwa kihugho kyosi babirisingura ebitsibu ebikalire kandi babirithoka erilhwa na Diabolo. (1 Pet. 5:8, 9) Nawu wangana singura. Yehova akisiya iniasondolha Yesu n’abakendi syathabalha nabu “eriherya emibiiri ya Sitani.” (1 Yn. 3:8) Enyuma w’ekyo, abandu abakakolera Nyamuhanga okwa kihugho ‘sibendi syubaha. Basyabya haali okw’iubahya.’ (Isa. 54:14; Mika 4:4) Aliwe thunalindirire ekyo, thutholere ithwakolha kutsibu erisingura obuba obwa thuwithe.

20. Ni byahi ebikendi thuwathikya erisingura obuba obwa thuwithe?

²⁰ Thutholere ithwalholha embere erighumya eriyikethera lyethu ngoku Yehova anzire abaghombe biwe kandi kw’akabatheghaya. Thukendi thoka erikolha eki omw’ighanirya n’erikania okwa mibere Yehova athegherayamo abaghombe biwe kera. Kandi thutholere ithwibuka Yehova ng’abirithuwathikya athi erighumira emibere eyikalire. Omwa buwathikya bwa Yehova thwangana singura obuba obwa thuwithe!—​Esy. 34:4.