1. Ngoku kiri omwa Omugambuli 7:20, ni kwenene yahi eyo Mwami Solomono akanganaya?

 OMWAMI Solomono mwahandika athi: “Sihali mundu uthunganene muna-kihugho, oyukakolha ebibuya emighulhu yosi isyali halhaya.” (Omu. 7:20) Ekyo ni kwenene! Ithwe bosi thuli bakolha-nabi. (1 Yn. 1:8) Neryo ithwe bosi thukayithagha erighanyira lya Nyamuhanga n’ery’abandi bandu.

2. Wukayowa wuthi munywani wawu w’okwa ndungu akakughanyira?

² Obundi wun’ibukire omughulhu wahithanaya munywani wawu w’okwa ndungu. Muwanza eryuwania emyatsi n’erisuba-subania obughuma bwenyu, neryo muwasaba ekighanyiro erilhua okwa muthima. Muwayowa wuthi munywani wawu akakughanyira ndeke? Muwanayowa buholho? Ahathe erithika-thika, kandi muwatsema!

3. Thukendi kania okuki omo mwatsi ono?

³ Thwanzire Yehova iniabya Munywani wethu w’okwa ndungu, aliwe hanganayira ithwabugha kutse erikolha ebikamuponesaya. Aliwe, thwanga kakasya thuthi ngoku Yehova anzire kutsibu erithughanyira? Erighanyira lya Yehova ni ry’embaghane lithi lyamalinganisibwa n’erighanyira erya thwanga kangania abandi? Neryo kandi, ni bahi abanga ghasirwa omw’ighanyira lya Nyamuhanga?

4. Busana naki ithwaligha thuthi Yehova akabya inianayitheghekire erighanyira?

⁴ Ekinywe kya Nyamuhanga kikathukakasaya ngoku Yehova anayitheghekire erighanyira. Yehova abere akayibisulha oku Musa okwa Kithwe Sinai, erilhabira omwa mumalaika,  mwabugha athi: ‘Yehova, Yehova Nyamuhanga oyo woswire n’erighanyira n’ow’olhukogho, syanguhire okw’ihithana, oyo woswire n’obwenge bw’olhwanzo n’omwatsi w’okwenene; oyukabikira obwenge bw’olhwanzo oko bandu maelfu, oyukabughira obubi, n’amalholho, n’ebibi.’ (Eri. 34:6, 7) Yehova ni Nyamuhanga ow’olhukeri n’ow’obughanyiri oyukabya inianayitheghekire erighanyira abakolha-nabi abakayisubamu.​—Neh. 9:17; Esy. 86:15.

5. Ngoku kiri omwa Esyonyimbo 103:13, 14, Yehova eribya iniasi ndeke abandu kikaleka iniakolhaki?

⁵ Ng’Omuhangiki wethu, Yehova anasi ebyosi ebithuhambireko. Nawu thakilengekaniako! Anasi ndeke obuli kandu akahambire okwa buli mundu okwa kihugho. (Esy. 139:15-17) Neryo anganalhangira emibere mibi eyathwabirisighalya okwa babuthi bethu. Kandi nibya, anasi ebyosi ebya thwabirilhabamu ebikaleka ithwabya n’emibere eya thuwithe lino. Yehova eribya iniasi ndeke abandu kikaleka iniakolhaki? Kikaleka iniathukangania obughanyiri bwiwe.​—Esy. 78:39; soma Esyonyimbo 103:13, 14.

6. Yehova abirikangania athi kw’anzire kutsibu erighanyira?

⁶ Yehova abirikangania ngoku anzire kutsibu erighanyira. Anasi ngoku busana n’ebyo mundu w’erimbere ya Adamu akolha, ithwe bosi thwabiribya bakolha-nabi kandi thukaholha. (Abar. 5:12) Sihabya ekyo thwanga kolire eriyiboholha kutse eriboholha owundi wosi-wosi okwa kibi n’olhuholho. (Esy. 49:7-9) Aliwe, Nyamuhanga wethu ow’olhwanzo mwathukwira obulighe neryo amahiraho endegheka y’erithuboholha. Mwakolhaki? Ngoku Yoane 3:16 hakabisulha, Yehova mwathuma Mughalha wiwe ekyusa eriholha busana nethu. (Mt. 20:28; Abar. 5:19) Yesu mwaholha omwa bwethu nuku owosi-wosi oyukamwikiriraya abye bwiranda. (Ebr. 2:9) Yehova k’atholere eribya imwabya omwa bulhumi bunene akalhangira Mughalha wiwe mwanzwa akaholha olhuholho lhubi kandi olhukahemulha! Ahathe erithika-thika, Yehova syanga lighire Mughalha wiwe eriholha kw’abya isyanzire erithughanyira.

7. Ni by’erileberyako nga byahi by’omwa Biblia eby’abandu abo Yehova aghanyira?

⁷ Omwa Biblia muswire eby’erileberyako  by’abandu abo Yehova aghanyira ndeke. (Efe. 4:32) Okw’eki, nindi oyukasa omwa bulengekania bwawu? Obundi wukalengekanaya oku Mwami Manase. Omulhume mubi oyo mwahalya oku Yehova omo nzira esikalire. Mwasondolha eby’eriramya ly’amabehi. Mwitha abaana biwe-biwe, eribahayo ng’obuhere okwa sya nyamuhanga sy’ekikafiri. Mwahika n’okwa kiika ky’erihira esanamu eyibatsire ey’enyamuhanga y’amabehi y’omwa hekalu ya Yehova eyibuyirire. E Biblia yikamubughako yithi: “Mwakolha ebibi bingyi omo meso w’Omwami Mukulhu, erimuhithania.” (2 Emy. 33:2-7) Aliwe, Manase abere akayisubamu erilhua okwa muthima, Yehova mwamughanyira ndeke. Nibya Nyamuhanga mwamusubya okwa kitsumbi kiwe ng’omwami. (2 Emy. 33:12, 13) Obundi iwathasyalengekanaya n’oku Mwami Dawudi, oyuwakolha ebibi ebikalire embere sya Yehova, imwamuli erisingira n’eritha. Aliwe, abere akayisubamu erilhua okwa muthima n’eriligha ebisobyo biwe, nayu Yehova mwamughanyira. (2 Sam. 12:9, 10, 13, 14) Omo kwenene, thukaligha ngoku Yehova anzire kutsibu erighanyira. Kandi, ngoku thukayalhangira, amaaka wiwe w’erighanyira ni w’embaghane amalinganisibwa n’aw’abandu.

8. Ekitsumbi kya Yehova eky’embaghane ng’Omutsweri kikahamba kithi okwa maaka wiwe aw’erighanyira?

⁸ Yehova ni “Mutsweri w’ekihugho kyosi.” (Enz. 18:25) Omutsweri mubuya atholere eribya inianasi ndeke ebilhaghiro. Ahathe erithika-thika, Yehova kwali athya kundi ya Mutsweri wethu, kandi yukathuha n’ebilhaghiro. (Isa. 33:22) Sihali oyuwasi ndeke ekihikire n’ekiwire nga Yehova. Ni kindi kyahi ekyo omutsweri mubuya akayithagha? Atholere eribya iniangana thoka erilebya ndeke okwenene okwosi okuhambene n’omwatsi athali atswera. Omw’eki, Yehova ya Mutsweri oyutholere.

9. Ni byahi ebya Yehova akabya inianasi akathwamu ng’aghanyire?

⁹ Erithendibya ng’abatsweri bandu, Yehova mughulhu wosi akaminya okwenene okwosi kw’omwatsi ow’olhubanza lhwosi-lhwosi olhukalethawa embere siwe. (Enz. 18:20, 21; Esy. 90:8) Syalisubulira okwa bya bandu bakalhangira n’eriowa. Anasi ndeke ngoku emibere eyo mundu asighalhaya okwa babuthi, aho akulira, aho ikere, n’eriyowa kuthya n’amalengekania bikahamba okwa mikolere yiwe. Kandi Yehova akaminya ebiri omwa mithima. Anasi ndeke amalengekania, ebilhubirirwa, n’eriyisunza ly’obuli mundu. Sihali ekibisamire oku Yehova. (Ebr. 4:13) Neryo mughulhu wosi erighanyira lya Yehova liseghemere okw’iminya okwenene okwosi kw’omwatsi.

10. Busana naki ithwabugha thuthi mughulhu wosi eritswera lya Yehova ni ly’obulingirirania kandi litholere? (Eryibuka Ebihano 32:4)

¹⁰ Mughulhu wosi eritswera lya Yehova ni ly’obulingirirania kandi litholere. Syawithe kasolholho nahake. Erighanyira liwe siririseghemera nahake okwa misosere y’omundu, obugaga, obuminywa, kutse amaaka wiwe. (1 Sam. 16:7; Yak. 2:1-4) Sihali oyuwanga kaka Yehova kutse erimuha ekithuliro. (2 Emy. 19:7) Erithwamu liwe siririseghemera okw’ibya iniabiriyiponera kutse eriyowa buyira. (Eri. 34:7) Ahathe erithika-thika, Yehova eribya iniakayitheghereraya n’erilhangira ndeke emyatsi kikaleka iniatholera eribya Mutsweri oyulengireyo.​—Soma Eryibuka Ebihano 32:4.

11. Erighanyira lya Yehova ni ly’embaghane lithi?

¹¹ Abahandiki b’Amasako w’Ekihebrania  mubaminya ngoku erighanyira lya Yehova ni ry’embaghane. Okwa bundi buthuku, mubakolesya ekinywe ky’Ekihebrania ekyo ekitabu kighuma kikabughako kithi “kikakolesibawa erikangania erighanyira erya Nyamuhanga akakanganaya omukolha-nabi, kandi ikyabya isikirikolesibawa okw’ighanyira like buyira eryo mundu akakanganaya owundi mundu.” Yehova musa yuwithe obuthoki bw’erighanyira ighuma omukolha-nabi. Yehova akabya akathughanyira ni byahi ebikalhwiririramu?

12-13. (a) Omundu akabanaki Yehova akamughanyira? (b) Emighaso eyikalhwiririra omw’ighanyira lya Yehova yikaghunza buthuku bungahi?

¹² Thwamaligha kwenene ngoku Yehova abirithughanyira, thukabana “emighulhu y’eriyisyandira,” imwamuli erithekana n’obunyamuthima-thima obuhenirye. Erighanyira ng’eryo siryangalhua okwa mundu aliwe litholere iryalhua oku Yehova iyuwene-wene. (Emib. 3:19, 20) Yehova akabya akathughanyira akasuba-subaniraya ighuma obunywani bwethu nayu ikyabya nga sithuli thwathakolha kibi.

¹³ Yehova amabirithughanyira, akabya isyanga thasyathutsweba kutse erithasyathusuyira busana n’ekibi ekyo. (Isa. 43:25; Yer. 31:34) Yehova akahira ebibi byethu bya haali “ngoku endatha yiri haali kw’eyikwa.” * (Esy. 103:12) Thukabya thukalengekania okwa bunene bw’erighanyira lya Yehova, thukatsema kutsibu kandi ithwamusikya. (Esy. 130:4) Ni bahi abo Yehova akaghanyira?

14. Ni byahi ebya thwamabirith’igha okw’ithwamu lya Yehova ery’erighanyira?

¹⁴ Ngoku thwabirilhangira, erithwamu lya Yehova ly’erighanyira siririseghemera okwa ky’eribya ekibi ini kinene kutse kike. Kandi, thwabirigha ngoku Yehova iyo ng’Omuhangiki wethu, oyukathuha ebilhaghiro, kandi Omutsweri akakolesaya ebyasi akathwamu ng’aghanyire. Ni bindu byahi ebyo Yehova akalengekanayako akathwamu ng’aghanyire?

15. Ngoku kiri omu Luka 12:47, 48, ni kindu kyahi kighuma ekya Yehova akalengekanayako?

¹⁵ Eky’erimbere ekyo Yehova akalengekanayako ly’erilebya omukolha-nabi ng’alhue inianasi ngoku ekyo alyakolha kiwire. Yesu  mwakangania eki kya ndeke, ngoku kiri omu Luka 12:47, 48. (Soma.) Omundu oyukakighenderera erikolha ekindu kibi kandi inianasi ndeke ngoku ekya akakolha kikaponesaya Yehova akabya iniamakolha erilholho erikalire. Omundu ng’oyo akabya iniali okwa kaleghemereryo ak’erithendi ghanyirwa. (Mk. 3:29; Yn. 9:41) Aliwe thutholere ithwaligha ngoku hakanayira ithwakolha ekindu ekya thunasi ku kiwire. Mbwino aho ithwanaghanyirwa? Ee! Neryo eki kikaleka ithwahika okwa kindi ekya Yehova akalengekanayako.

16. Eriyisubamu niki, kandi busana naki likayithayisibawa Yehova amabya w’erithughanyira?

¹⁶ Ekindi kindu ekya Yehova akalengekanayako ly’erilebya omukolha-nabi ng’anabiriyisubamu erilhua okwa muthima. Eriyisubamu likamanyisayaki? Eriyisubamu “ly’erihindulha amalengekania, emibere, kutse ekighendererwa.” Mwamuli omundu eriyikubyabwomo n’eribya omwa bulighe bunene busana n’ebindu bibi ebyo alyakolha kutse ahabw’erithendi kolha ebihikire ebyanga kolire. Oyukayisubamu akabya omwa bulighe busana n’ebindu bibi ebyo alyakolha kandi busana n’obunyakirimu bwiwe obutsekire obulyaleka iniakolha ebibi ebyo. Wibuke ngoku Omwami Manase n’Omwami Dawudi abosi mubakolha amalholho awakalire; aliwe, Yehova mwabaghanyira kundi mubayisubamu erilhua okwa muthima. (1 Bam. 14:8) Kwesi, Yehova atholere inialhangira ebikakanganaya eriyisubamu nuku aghanyire. Aliwe erithayikubyabwomo busana n’ekibi ekyo thulyakolha sikirighunza. Thutholere ithwabya ithunayitheghekire eriyira eky’erikolha. * Ekyo kikathukolhaya okwa kindi kindu ekya Yehova akalengekanayako.

17. Eribinduka niki, kandi busana naki likayithayisibawa thwamabya b’eriyihighulha okw’isubira ebibi byethu bya kera? (Isaya 55:7)

¹⁷ Eribinduka ni kindi kindu kikulhu ekya Yehova akalengekanayako. Eribinduka kikamanyisaya mundu erileka enzira yiwe nyibi n’erikwamirira enzira ya Yehova. (Soma Isaya 55:7.) Omundu atholere erihindulha amalengekania wiwe nuku asondolhawe n’amalengekania  wa Yehova. (Abar. 12:2; Efe. 4:23) Atholere iniathwamu erileka amalengekania n’emikolere yiwe mibi ebyakera. (Kol. 3:7-10) Ni kwenene, erikirirya lyethu omwa kihongo kya Kristo likathuha omusingyi w’okwenene owakaleka Yehova iniathughanyira n’erithwerya kw’ebibi byethu. Busana n’ekihongo ekyo, Yehova iniakendi thughanyira amalhangira thukalengaho erilhua okwa muthima erihindulha emibere yethu.​—1 Yn. 1:7.

18. Ni byahi ebya thwamabirilebya ebihambire okw’ighanyira lya Yehova?

¹⁸ Omwa bikuhi thulebaye esyonzumwa ndebe sy’okwa syonzumwa ngulhu-ngulhu esyo thwamabirikaniako. Yehova kwenene ya Mughanyiri mukulhu omwa buhangwa bwosi. Busana naki ithwabugha ekyo? Eky’erimbere, mughulhu wosi akabya inianayitheghekire erighanyira. Ekyakabiri, athwasi ndeke. Asi ndeke emikwikire yethu, kandi yutholere erithwamu kwenene nga thwanabiriyisubamu ndeke. Ekyakasathu, Yehova akabya amathughanyira, akathweraya kw’ebibi byethu. Eki kikaleka ithwabya n’obunyamuthima-thima obuhenirye kandi ithwasimwa nayu.

19. Busana naki thwangana tsema nomwakine indi sithuhikene kandi thukendibya ithunemukolha ebibi?

¹⁹ Kundi sithuhikene, thukendi lholha embere erikolha ebibi. Aliwe, ebinywe ebiri omwa Insight on the Scriptures, Volyumu 2, olhupapura 771 byangana thuhumulikania, bikabugha bithi: “Kundi omwa bughanyiri Yehova akabya inian’ibukire erilemererwa ly’abaghombe biwe, sibatholere bakabera eriyowa nabi busana n’ebisobyo ebya bakakolha habw’obuthahikana obwa babirisighalya. (Esy. 103:8-14; 130:3) Bamabya ibanemukolha ngoku banga thoka erilendera omwa syonzira sya Nyamuhanga, ibangana tsema. (Fil. 4:4-6; 1Yn. 3:19-22).” Ekyo ka kikahumulikanaya!

20. Thukendi syakania okuki omo mwatsi owakakwamako?

²⁰ Thutsemire kutsibu kundi Yehova akabya inianayitheghekire erithughanyira thwamayikubyabwomo omwa kwenene busana n’ebibi ebyo thwabirikolha. Aliwe, thwanga gherererya thuthi erighanyira lya Yehova? Ni mwanzira syahi erighanyira lyethu lisosene n’erya Yehova, aliwe kandi liri lithi mbaghane? Busana naki ni kikulhu eriyitheghererya embaghane eyo? Omwatsi owakakwamako akendi syasubirya ebibulyo ebyo.