OKWA Baebrania ababya omwa Kihugho Ekyalhaghanisibawa, omwaka w’ekihugho iniakatsuka bakalima n’erihera, ekyabya kikabya omwa mezi agho thwasi munabwire mwa Okwomwenda/Okwerikumi.

Ekalinda eyiseghemere okwa kwezi ey’amezi 12 (awali mw’ebiro 29 kutse 30 obuli kwezi) iniakabya mwaka mukuhi oko mwaka owaseghemere okwa lyuba. Esyonzira muthina-muthina syabirikolesibwa okw’ibaririra emyaka ibiri eyi nuku yihambane. Mubakolha eki omw’ongeramo ebindi biro kutse eribya ibanemwongeramo okundi kwezi. Obundi ibangana kolha ekyo owundi mwaka athali atsuka. Emibarire ng’eyo iyikahambanaya ekalinda n’ebirimo eby’erihereramo ebirimwa kutse erihulhulha.

Aliwe omwa biro bya Musa, Nyamuhanga mwabwira abandu biwe athi omwaka w’edini okwa Baisraeli abya w’eritsuka omo kwezi kwa Abibu, kutse Nisani, omo Kwakasathu kutse Okwakani. (Eri. 12:2; 13:4) Ekiro kikulhu ekyabya kikabya omo kwezi oko imukabya erihulhulha ekisusu.​—Eri. 23:15, 16.

Omusomi ya Emil Schürer omwa kitabu kiwe The History of the Jewish People in the Age of Jesus Christ, (175 B.C.–A.D. 135) akabugha athi, “Ekihano ekyo babya bakakwama ng’abongeremo kutse eyihi kyabya kyolhobire kutsibu. Ekiro kikulhu ky’Erikyuruka, ekitholere erikolhwa okwezi ikwamabiribya kighoma omwa kwezi kwa Nisani (Nisani 14), ikitholere ikyabya kikabya omo Kwakasathu kutse Okwakani, omughulhu omusibo n’ekiro byabiryingana . . . Neryo ibakabya bamaminya omwaka akayahwa ngoku Ekiro ky’Erikyuruka kikendibya omusibo n’ekiro bithe byingana, ibakongeramo okwezi [okwe 13] e Nisani yitheyarangwa.”

Abema ba Yehova bakakwama ekihano eki bakathwamu ekiro ekitholere eky’eryibuka Ekihulho ky’Omukama eky’Erigholho, ekikabya omwa Kwakasathu kutse Okwakani kandi ekikahambangana ne Nisani 14 okwa kalinda y’Ekihebrania. Ebithunga erithimba omwa kihugho kyosi bikasangwa byamanyisibwa ekiro ekyo nga ni kyahi. *

Aliwe Abaebrania ibakaminya bathi okwezi nga kukendihwa mughulhu wahi n’okundi nga kukendi tsuka mughulhu wahi? Munabwire wangana kwama kya lebya okwa kalinda eyiprintingire kutse eyiri okwa kyuma kyawu ky’ekieletroniki. Aliwe omwa buthuku bwe Biblia, ekyo sikyabya kyolho kithya.

Omo biro bya Noa, kikalhangirika amezi iniakabya w’ebiro 30. (Enz. 7:11, 24; 8:3, 4) Enyuma waho, omwa Baebrania okwezi isi kw’ebiro 30 bisa. Okwa kalinda y’Abaebrania, okwezi ikukatsuka embaniko yikatsuka erilhangirwa erimbere. Neryo ibikabya biro 29 kutse 30 wamabaririra erilhua aho okwezi kw’ahanyuma kwa tsukira.

Buthuku bughuma, Dawudi na Yonatana mubakania okwa kwezi, bathi: “Omungya omukera iniathwa.” (1 Sam. 20:5, 18) Neryo obundi aho ekighana ekya 11 E.K.K. kyahikira, amezi abya iniabirisangwa abaririrwa. Abaisraeli ibakathoka bathi eriminya okundi kwezi nga kukendi tsuka mughulhu wahi? Ekitabu Mishnah, ekiri mw’ebilhaghiro n’emitse y’Abayuda, kikaha omwatsi mulebe. Kikakanganaya ngoku Abayuda babere babirilhua omwa bunyewa, Eribuyiro (ekoti ngulhu y’Abayuda) muyayira ekyo yikakolha. Omwa buthuku bwa mezi musanju, ab’ekoti ibakahindana okwa kiro kya 30 eky’okwezi. Abalhume abo babya bawithe olhukwamirwa lhw’erithwamu okwezi okukakwamako nga kukendi tsuka mughulhu wahi. Ibakakolha ekyo kya bathi?

Abalhume ababya bakahirwa okwa hithwe erithimba okwa Yerusalemu ibakasamalira omo kyanya omo kiro erilhangira okwezi kukathwa. Neryo ibakalhuaho ibabwira ab’omw’Ibuyiro. Ab’omw’Ibuyiro aba ibakabya babiriminya ngoku banawithe obwema obukaghunza ngoku okwezi kwabirilhangirwa, ibakaranga eritsuka ly’okundi kwezi.  Aliwe ibbwa ebithu kutse ekilhumbi kyamasukulha abakalebaya, eribakakirya okw’ilhangira embaniko? Neryo okwezi oko ikukahebawa ebiro 30, n’okundi kwezi ikwatsuka ekiro ekikakwamako.

Ekitabu Mishnah kikasoborera kithi erithwamu ly’ab’omw’Ibuyiro irikarangawa omwakya omuliro okwa Kithwe ky’Emizeituni, hakuhi ne Yerusalemu. Okwa hindi hithwe omwa Israeli, omuliro iniakakolesibawa erilhalhania omwatsi. Enyuma waho, mubatsuka eribya bakathuma abathumwa. Neryo Abayuda omwa Yerusalemu, omwa Israeli yosi, n’omwa yindi myanya ibakamanyisibawa ngoku okundi kwezi kwabiritsuka. Neryo abosi ibak’ibuka emikonga y’ebiro bikulhu okwa buthuku bughumerere.

Echati eyikakwamako yikendi kuwathikya eriyitheghererya ekalinda y’Abaebrania, ebiro bikulhu, n’ebirimo ngoku ebyosi byabya bihambangene.