1. Omusamaria oyo Yesu alhamaya mwakangania athi erisima?

ABALHUME ikumi babya omwa mibere eyikitha obulighe. Ibakwire ebihagha, kandi isibawithe maha. Aliwe kiro kighuma, mubalhangira Yesu, Omukangirirya Mukulhu, iniane mwasa. Babya ibabiriowa ngoku Yesu akalhamaya amalhwere awosi, kandi ibayikethere ngoku nabu angana balhamya. Neryo mubabirikira bathi: “Yesu, Omukama, wuthughanyire!” Abalhume ikumi abo mubalhama ndeke. Ahathe erithika-thika abosi mubasima olhukeri lhwa Yesu. Aliwe, omughuma w’okw’ibo mwathasubulira okw’isima​—mwakangania Yesu kw’abirisima. * Omulhume oyuwalhamibawa oyo, Omusamaria, mwayowa iniatholere eripipa Nyamuhanga “n’omulenge munene.”​—Lk. 17:12-19.

2-3. (a) Busana naki thwangana lemwa erikangania erisima? (b) Omo mwatsi ono thukendi kania okuki?

² Nethu ng’Omusamaria, thwanzire ithwakangania erisima abakakanganaya olhukeri. Aliwe okwa bundi buthuku, thwangan’ibirirwa erisima omwa binywe n’omwa mikolere.

³ Omo mwatsi ono, thukendi lebya ekikaleka ikyabya kikulhu erikangania erisima omwa bya thukabugha n’erikolha. Thukend’igha okwa by’erileberyako birebe eby’omwa Biblia eby’abo abasima n’abathasima. N’enyuma waho ithwakania okwa mibere mirebe eyathwanga kanganiryamu erisima.

4-5. Busana naki thutholere ithwakangania erisima?

⁴ Yehova akathuhiriraho eky’erileberyako eky’erikangania  erisima. Enzira nguma ey’akakolera mw’eki ly’erihemba abakamutsemesaya. (2 Sam. 22:21; Esy. 13:6; Mt. 10:40, 41) Kandi Amasako akathuhira mw’omuhwa athi ithwe ‘ng’abaana banzwa ba Nyamuhanga, thumugherereraye.’ (Efe. 5:1) Neryo enzumwa ngulhu eyikaleka ithwakangania erisima yiri yithi thwanzire erigherererya Yehova.

⁵ Thulebaye eyindi nzumwa eyikaleka ithwanza erisima abandi. Erisima liri ng’ebyalya ebyuwene​—bikasiha kutsibu byamalibwako abandi. Thukatsema thwamaminya ku thwabirisimwa. Thwamakangania erisima lyethu, thukaleka abandi ibatsema. Oyothukasima akaminya ngoku akaghalha kiwe k’erithuwathikya, kutse ak’erithuha kindu kirebe ekyo thukayithagha, mukakathughasira. Neryo, obunywani bwethu n’omundu oyo bukaghuma.

6. Ebinywe by’erikangania erisima bisosene bithi n’ebighuma ebikolirwe omwa horo?

⁶ Ni ky’omughaso ithwe erikangania erisima. E Biblia yithi: “Ekinywe kikabughawa okwa mughulhu atholere kiri ng’ebighuma by’esyamaghetse omwa bilhukire by’ekitsipa.” (Emi. 25:11) Thalengekania ekighuma ekikolirwe omwa syamaghetse [ehoro] kyamahirwa omwa bitsipa [efeza] nga kyanguwana bungahi! Kandi thalengekania nga kyangabya ky’obughuli bungahi! Wangayowa wuthi wamahebwa ekihembo ng’ekyo? Neryo, ebinywe by’erisima ebya wukabwira abandi byanganabya by’obughuli ng’obo. Thalengekania n’oku kino: Ekighuma ekikolirwe omwa horo kikaghunza mughulhu muuli kutsibu. Kuthya, oyowabwira ebinywe byawu by’erisima anganabya akab’ibuka kandi iniabibika omwa muthima wiwe engebe yiwe yosi.

7. Ngoku kiri omu Esyonyimbo 30:12, Dawudi n’abandi bahandiki b’esyonyimbo mubakangania bathi erisima lyabu?

⁷ Abangyi b’okwa baghombe ba Nyamuhanga  abakera mubakangania erisima. Omughuma w’okw’ibo ni Dawudi. (Soma Esyonyimbo 30:12.) Mwakangania kw’akasima kutsibu eriramya ly’okwenene n’erikangania eriyowa liwe omwa mikolere. Mwahayo ebindu bingyi eby’obughuli okwa buhimbe bw’ehekalu. Abitsikulhu ba Asafu mubakangania erisima lyabu omw’ihandika esyonyimbo sy’eripipa. Omwa lhwimbo lhughuma, mubasingya Nyamuhanga n’erikangania erisima lyabu busana ‘n’emyatsi y’eriswekya’ ya Yehova. (Esy. 75:1) Ahathe erithika-thika, Dawudi n’abitsikulhu ba Asafu mubanza erikangania Yehova nga bakasima bungahi emighisa eyosi eyo babiribana erilhua okw’iyo. Wangana lengekania okwa syonzira esyo wanga gherereryamu abahandiki b’esyonyimbo?

8-9. Omukwenda Paulo mwakangania athi erisima balikyabo, kandi ni kyahi ekyangabya imukyalhwiririramu?

⁸ Omukwenda Paulo mwasima balikyabo n’erikikangania omwa mibere eyo abakanayako. Omwa misabe yiwe iniakasima Nyamuhanga busana nabu. Mwakangania erisima liwe akabahandikira. Omwa milhondo 15 ey’erimbere-mbere omwa Abanya Roma 16, Paulo akahulha Abakristayo balikyabo 27 oko mena. Paulo mwakania oku Pirisila na Akwila athi “mubathalhanda oko ngebe yabu” busana n’erinyilhamya, n’oku Foibe athi “abiriwathikya abandu bangyi,” imwamune na Paulo. Mwasima balikyethu banzwa abo, abakakolha kutsibu.​—Abar. 16:1-15.

⁹ Paulo abya inianasi ngoku balikyabo nabu sibahikene, aliwe abere akaghunzerera ebaruha yiwe ey’ahandikira Abaroma, mwathwamu erihira omuwatho okwa mibere yabu mibuya. Thalengekania balikyethu abo nga mubayowa bathi bakowa ebinywe bya Paulo ebyo bikasomerwa omwa kithunga! Busana n’ekyo, obunywani bwabu na Paulo mubwaghuma. Wukanabya iwune mukangania erisima balikyethu omwa kithunga kyawu busana n’ebya bakabugha n’erikolha?

10. Thuk’ighaki okwa mibere eya Yesu akanganirayamu erisima abamukwamire?

¹⁰ Omo myatsi eyo abwira ebithunga birebe omwa Asia Enyike, Yesu mwakangania erisima busana n’omubiiri ow’abamukwamire bakolha. Ng’eky’erileberyako, omo mwatsi wiwe okwa kithunga kye Tuatera mwabugha athi: “Nyinasi emibiiri yawu, n’olhwanzo lhwawu, n’erikirirya lyawu, n’erikolha lyawu, n’eriyitsingirira lyawu. Kandi nyinasi wukakolha lino kwilhaba erimbere.” (Erib. 2:19) Yesu mwathasubulira okw’ikania lisa okw’ongera lyabu ery’erikolha kutsibu aliwe kandi mwabasima busana n’emibere yabu eyikaleka ibakolha ebibuya. Nomwakine indi Yesu ayithagha erikunga abandu balebe e Tuatera, mwatsuka omwatsi wiwe n’erighunzereragho omw’ibahira mw’omuhwa. (Erib. 2:25-28) Thalengekania okwa hamuli eya Yesu awithe ng’omuthwe w’ebithunga byosi. Si bugha ambu atholere erithusima busana n’ebya thukamukolera. Nomwabine bithya, akalhangira athi akakanganaya erisima. Akahiriraho eky’erileberyako ekyuwene okwa basyakulhu b’ekithunga!

11. Ngoku kiri omu Abaebrania 12:16, Esau aby’awithe malengekaniaki oko myatsi ya Nyamuhanga?

¹¹ Eky’obulighe, hane abandi abakanibweko omwa Biblia abathakanganaya erisima. Ng’eky’erileberyako, nomwakine indi Esau akulibawa n’ababuthi abanzire n’erisikya Yehova, mwathakenga Nyamuhanga. (Soma Abaebrania 12:16.) Omubere wiwe w’erithendi sima mwalhangirika athi? Esau mwaghulya mughalha wabu omulere ya Yakobo y’omwandu wiwe w’obukulhu busana n’omukubi w’ebitsali. (Enz. 25:30-34) Enyuma waho, Esau mwayikubya bwomo kutsibu busana n’erithwamu liwe. Aliwe kundi mwathakangania erisima ekya witheko,  neryo syabya atholere eriyineghenia akathendi thunga okwa mighisa eyabya yitholere iyahebwa omwana omukulhu.

12-13. Abaisraeli mubakangania bathi erithendi sima, kandi mumwalhwiririraki?

¹² Abaisraeli babya bawithe nzumwa nyingyi esy’erikanganiryamu erisima. Yehova abere abiriletha ebihunzo ikumi oko Misiri, mwabalhusya omwa bukobe. Enyuma waho Nyamuhanga mwabalhamya oko kabi omw’ithoghothya amahe wosi w’Abanya Misiri omwa Ngetse y’Engulha. Abaisraeli mubasima kutsibu kyamaleka ib’imbira Yehova olhwimbo lhw’erisingura. Mubanalholha embere n’omubere w’erisima?

¹³ Abaisraeli babere bakabana ebitsibu bihyaka, mubalhua ibibirirwa ebibuya byosi ebya Yehova abya iniabiribakolera. Neryo mubakangania omuthima wabu w’erithendi sima. (Esy. 106:7) Bathi? “Endeko yosi y’abaana ba Israeli mubathongera Musa na Haruni b’omw’irungu”​—aliwe omo kwenene, babya ibakathonga Yehova. (Eri. 16:2, 8) Yehova mwathatsemera omuthima w’erithendi sima owa bandu biwe bakanganaya. Enyuma waho mwabugha athi Abaisraeli abo bakendisya holera omw’irungu, erihako ya Yosua na Kalebu. (Emig. 14:22-24; 26:65) Thulebaye ngoku thwanga yihighulha okw’ikwama eby’erileberyako ebithuwene ebi aliwe ngoku thwanga gherererya eby’erileberyako ebyuwene.

14-15. (a) Abathahenie banga kangania bathi owundi kw’akasima owundi? (b) Ababuthi banga kangirirya bathi abaana babu erikangania erisima?

¹⁴ Omw’eka. Eka yosi yikaghasirawa obuli mughuma amakangania erisima. Abali omwa butheke owundi amongera erikangania erisima owundi, bakongera eribya bughuma. Kandi kikab’olhobera erighanyirana. Omulhume oyukasima mukali wiwe syali samalira ebibuya ebyo mukali wiwe akabugha n’erikolha bisa aliwe kandi “akamupipa.” (Emi. 31:10, 28) N’omukali w’amenge akabwira mwira wiwe ebyonyine-nyine ebikaleka iniamusima.

¹⁵ Ababuthi, mwanga kangirirya muthi abaana benyu erikangania erisima? Mwibuke ngoku abaana benyu bakendi gherererya ebya mukabugha n’erikolha. Neryo muhireho eky’erileberyako ekyuwene omw’ibugha muthi wasingya abaana benyu bakabakolera ekindu. Kandi, mukangiriraye abaana benyu eribugha bathi wasingya abandu bakabakolera ekindu. Muwathikaye abaana benyu eriyitheghererya ngoku erisima likalhua okwa muthima kandi ngoku ebinywe byabu byanganalhua  mw’ebibuya. Ng’eky’erileberyako, omukali mulere ya Clary akabugha athi: “Mama waghe abere akahikya myaka 32, isyayitsulirye thatha mwamusighira abaana basathu akathwalhwa omwa ngomo. Nabere ingahikya myaka 32, munalengekania okwa myaka eyo nga kyangabya imukyamukalira bungahi. Neryo munamubwira ngoku ngamusima busana n’ebyosi eby’akolha erikulya baghalha bethu babiri naghe. Lino-lino, mwambwire athi akin’ibukire ebinywe ebyo, akabya inianemubighaniryako, kandi bikaleka iniatsema.”

16. Iha ky’erileberyako ekikakanganaya ngoku erisima lyangana himba abandi.

¹⁶ Omwa kithunga. Thukabya thukasima balikyethu, thukabahimba. Ng’eky’erileberyako, Jorge, omusyakulhu w’ekithunga ow’emyaka 28, mwalhwalha kutsibu. Mwaghunza okwezi isyali hindana. Nibya n’omughulhu atsuka erihindana, mwabya isyangalhabya ekitsweka kyosi-kyosi. Jorge akabugha athi: “Munayowa nga singakiwithe mughaso busana n’obutseke bwaghe n’eribya isinangathoka erikolha esyongwamirwa omwa kithunga. Aliwe enyuma w’omuhindano mughuma, mughalha wethu mwambwira athi: ‘Nganza erikusima busana n’eky’erileberyako ekyuwene ekyo wabirihiriraho eka yaghe. Siwanga minya emikania yawu ey’omwa myaka ey’ahanyuma ngayabya yikathuhimba bungahi. Yabirithuwathikya erikulha bunyakirimu.’ Mukyanyihambako kutsibu, neryo namathoghongya emisoni. Ebinywe biwe ebyo byanabya iningayithagha.”

17. Ngoku kiri omu Abanya Kolosai 3:15, thwanga sima thuthi Yehova busana n’ebyakathuha?

¹⁷ Oku Nyamuhanga wethu omwenge. Yehova abirithuha ebyalya bingyi by’obunyakirimu. Ng’eky’erileberyako, thukabana obusondoli omwa mihindano yethu, omwa syogazeti syethu, n’okwa muthahulha wethu. Wune wathahulikirira omukania, iwasoma omwatsi, kutse iwalebya endegheka ye JW tivi n’eribugha wuthi, ‘Ekyo kyangalhue ingayithagha’? Thwanga sima thuthi Yehova? (Soma Abanya Kolosai 3:15.) Enzira nguma ly’eribera erimusima omwa misabe yethu busana n’ebihembo bibuya ebi.​—Yak. 1:17.

18. Thwanga kangania thuthi ku thukasima Ekisenge kyethu ky’Obwami?

¹⁸ Kandi thukakanganaya ku thukasima Yehova omw’ilhangira thuthi emyanya yethu y’eriramiryamu yikabya iyinahenirye. Mughulhu wosi thukakolera haghuma eriyonza n’erisugha Ekisenge kyethu ky’Obwami, kandi n’abakakolha okwa radio n’esyovidiyo ebikakolesibawa  omwa kithunga bakatheghayabyo ndeke. Thwamasugha ndeke Ekisenge kyethu ky’Obwami, ikikendi ghunza buthuku bunene kandi ikyathwalha sente nyike thukakokothya ahamatsanda. Omwa nzira eyi, thukaleka ihabya ihane esyosente sy’erihimba n’erisuba-subania ebindi Bisenge by’Obwami erithimba omwa kihugho kyosi.

19. Wam’ighaki okwa ky’erileberyako ky’omulebererya na mukali wiwe?

¹⁹ Abakathukolera kutsibu. Thwamakangania erisima, ebinywe byethu ibyangana hindulha amalengekania agho mundu awithe okwa bitsibu eby’akabana. Lebaya eky’erileberyako ky’omulebererya mughuma w’omuthimbo na mukali wiwe. Enyuma w’erithulira ekiro kyosi omwa kihuhiriro, mubasuba eka ewabu ibabirilhuha. Yabya embeho nene indi mukali wiwe mwakesya inianambere ekoti y’embeho. Omwangyakya, mwabwira mwira wiwe athi akayowa syendi thasyathoka erilholha embere omwa mubiiri w’eribungira ebithunga. Enyuma waho omwa ngyakya eyo, mubabana ebaruha erilhua okwa ekyaghanda ky’omuthahulha, kandi ini ya mukali wiwe. Omwa baruha mubamusima busana n’erithulira liwe n’eriyiyinia. Muyakangania ngoku si kyolho er’ikalha omo myanya muthina-muthina obuli wiki. Mwira wiwe akabugha athi: “Erisima eryo mulyamuhambako kyamaleka iniabya isyanga thasyakania okw’ileka omubiiri w’eribungira ebithunga. Omo kwenene, mirundi mingyi iniakanyihira mw’omuhwa w’erilholha embere ingalengekania okw’ibikyako.” Abathahenie abo mubakolha omubiiri w’eribungira ebithunga hakuhi myaka 40.

20. Ni kyahi ekyathutholere ithwalengaho erikolha obuli kiro, kandi busana naki?

²⁰ Obuli kiro thulengeho eriha ewasingya omwa bya thukabugha n’erikolha. Ebinywe byethu ebikalhua okwa muthima kutse ebya thukakolha byanganabya ibya wundi mundu akayithagha erithoka erighumira ebitsibu omwa kihugho kino ekithe mw’erisima. Kandi ebinywe byethu by’erisima bikendi kamathya obunywani bwethu n’abandi obwangana byaho kera na kera. Ekikulhu kutsibu, thukendibya ithukagherereraya Thatha wethu Yehova omwenge kandi oyukasima.