1. Ni byahi ebyangaletha erihanga-hangya, kandi thwanganasamo malengekaniaki?

WUNE wathabya omwa ngitsi? * Obundi wukahanga-hangaya busana n’eribya iwabiriponesibwa busana n’ebya bandi babugha kutse erikolha. Kutse obundi imuwahangya-hangya busana n’ebya wulyabugha kutse erikolha. Ng’eky’erileberyako, wanganabya imuwasobya neryo iwabulha Yehova ng’anemwendi syakughanyira. Kandi ibbwa ekya kabi kutsibu, iwangana lengekania wuthi erikirirya lyawu ni like kandi wuthi wuli mubi habw’eribya n’erihangya-hangya linene. Aliwe ekyo nina kwenene?

2. Ni by’erileberyako byahi eby’omwa Biblia ebikakanganaya ngoku erihangya-hangya sikirikanganaya indi sithuwithe erikirirya?

² Thalebya eby’erileberyako bino ebiri omwa Masako. Hana, Mama w’omuminyereri Samweli, abya awithe erikirirya linene. Nomwabine, mwabbunika omuthima, omundu w’omwa nyumba akamukolha nabi. (1 Sam. 1:7) Omukwenda Paulo aby’awithe erikirirya erighumire, nomwabine ‘mwahangya-hangya kutsibu busana n’ebithunga ebyosi.’ (2 Kor. 11:28) Omwami Dawudi aby’awithe erikirirya erighumire kandi Yehova iniamwanzire kutsibu. (Emib. 13:22) Nomwabine, Dawudi iniakasobaya ikyaleka iniabbunika omuthima. (Esy. 38:4) Yehova mwasibikya n’erihumulikania obuli mughuma. Thulebaye ekyo thwanga bighirako.

3. Ebinywe by’abandi byanga thulethera bithi erihangya-hangya?

³ Abandi bamathubwira ebinywe ebikalha-kalire kutse erithukolha nabi, ithwangana hangya-hangya. Kutsibu-tsibu amabya ini munywani kutse omuhughu. Ithwangana yilhalikirira thuthi obo syakiri munywani wethu. Oyulyathuhithanaya anganabya imwakabugha buthalengekania, kandi ithwayowa nga thwabiritsimithwa omwa muyali! (Emi. 12:18) Kutse omundu angana bugha ekindu ekyo anasi ku kikendi thuhithania. Ekiri ng’ekyo mukyabya oku mwali wethu omulere. Akabugha athi, “Myaka mirebe ahanyuma, omundu oyo nabya ingalengekania indi ni munywani waghe w’okwa ndungu mwatsuka erinyilhalhaniako amabehi okwa Intaneti. Munapona kandi munahangya-hangya. Munabulha ekiryaleka omunywani muyiketherwa inianyikolha ekiri ng’eki.” Wangan’ighira oku Hana kwa bingyi, omunywani kutse omuhughu amabya iniabirikuthwikalya.

4. Ni bitsibu byahi ebikalire ebyo Hana aby’awithe?

⁴ Hana aby’awithe ebitsibu ebikalire. Abya ngumba habw’emyaka mingyi. (1 Sam. 1:2) Abaisraeli ibikirirye bathi, obughumba ni mutsumo. Neryo mwayowa iniahemukire. (Enz. 30:1, 2) Kandi eribikalya, mwira wa Hana abya inianawithe owundi mukali, ye Penina, kandi iyo iniakabutha. Penina iniaponire Hana kandi “mwamwendererya kutsibu, erimuhithania.” (1 Sam. 1:6) Erimbere, Hana mwathathoka erighumira ndeke emibere eyo. Mwasirikalira kyamaleka inialira n’erithendibya akalya. Mwabya “n’obulighe” bunene omwa muthima. (1 Sam. 1:7, 10) Hana mwahumulikana athi?

5. Erisaba mulyawathikya lithi Hana?

⁵ Hana mwasaba Yehova n’erimubwira eriyowa liwe. Abere abirisaba, mwasoborera Omuhereri Mukulhu Eli emibere eyo alimu. Nayu mwamubwira athi: “Wughende buholho, Nyamuhanga wa Israeli alighe erisaba lyawu.” Mumwalhwiririraki? Hana “mwaghenda athya, kandi mwalya; n’obusu bwiwe isibukiri n’obulighe kandi.” (1 Sam. 1:17, 18) Omusabe mwaleka Hana iniayowa buholho.

6. Bikahika okw’isaba, ni byahi ebyo thwang’ighira oku Hana n’ebiri omu Abanya Filipi 4:6, 7?

⁶ Thwangana thasyabana obuholho thwamahathikana erisaba. Hana iniakaghunza ndambi nene inianemukania na Thatha wiwe  w’elhubulha. (1 Sam. 1:12) Nethu thwangana ghunza ndambi nene ithunemubwira Yehova y’erihangya-hangya lyethu, obuba, n’ebisobyo byethu. Sikirimanyisaya indi thuthanathathondekania ndeke ebya thukasaba. Thwanganayisanga nibya ithwabirilira thukabwira Yehova y’emilyambo yethu. Nomwabine, Yehova syangalhuha erithuhulikirira. Eryongera okw’ibwira Yehova y’ebitsibu byethu, thutholere ithwibuka ebinywe ebiri omu Abanya Filipi 4:6, 7. (Soma.) Paulo akabugha athi thutholere ithwasingya Yehova omwa misabe yethu. Ni bingyi ebyanga leka ithwasima Yehova. Ng’eky’erileberyako thwanganamusima busana n’ekihembo ky’engebe, ebyo abirihangika, olhwanzo lhwiwe olhuthyusa, n’amaha mabuyanga agho abirithuha. Ni kindi kyahi ekyo thwang’ighira oku Hana?

7. Hana na mwira wiwe ibabeghere erikolhaki?

⁷ Hana nomwanabya awithe ebitsibu, iniakaghenda e Silo na mwira wiwe bakayaramya Yehova. (1 Sam. 1:1-5) Hana iniane eyiri ehema y’eriramiryamo mw’omughulhu Omuhereri Mukulhu Eli amuhumulikanaya omw’imubwira athi awithe amaha ngoku Yehova akendi subirya erisaba liwe.​—1 Sam. 1:9, 17.

8. Emihindano yikathuwathikaya yithi? Soborera.

⁸ Thwangana thasyabana obuholho thwamalholha embere erihindana. Omusabe owakatsuka okwa muhindano akabyamu erisaba omulimu abuyirire wa Nyamuhanga eribya haghuma nethu. Obuholho ni kighuma ky’okwa mikolere y’omulimu. (Gal. 5:22) Thukabya thukahindana nibya ithunawithe ebitsibu, thukaha Yehova na balikyethu akaghisa k’erithuhimba n’erithuwathikya erithasyabya n’obuholho omwa malengekania n’omwa muthima. Erisaba n’emihindano y’enzira ngulhu eyo Yehova akakolesaya erithuhumulikania. (Ebr. 10:24, 25) Thulebaye ekindi ekya thukigha okwa ky’erileberyako kya Hana.

9. Ni byahi ebya thahinduka omwa mibere eya Hana abyamu, aliwe ni kyahi ekya muwathikaya?

⁹ Ebitsibu bya Hana mubithalhuaho bikahwa. Hana abere akalhua eyiri ehema okw’iramya, abya ini w’eryongera eribya omwa nyumba na Penina. Kandi e Biblia siyiri kanganaya yithi Penina mwanahindulha emibere yiwe. Neryo Hana mwabya ini w’erilholha embere eriyiyinirya ebinywe bya Penina ebikaponesaya. Aliwe Hana mwahumulikana n’eribya iniane n’obuholho. Wibuke ngoku Hana abere abirisigha emyatsi omo byalha bya Yehova, mwathekana. Mwayikethera Yehova erimuhumulikania n’erimughumya. Endambi muyahika, Hana amabutha abaana!​—1 Sam. 1:19, 20; 2:21.

10. Eky’erileberyako kya Hana kikathweghesayaki?

¹⁰ Thwangana thasyabana obuholho ekitsibu nomukyanga ghana erihwaho. Ebitsibu birebe byangana ghana erihwaho, nibya ithwabirisaba kutsibu n’erihindana mughulhu wosi. Eky’erileberyako kya Hana kikathweghesaya ngoku sihali ekyanga kakirya Yehova erihumulikania emithima yethu eyibbunikire. Yehova syendi syathw’ibirirwa na kera, kandi omwa buthuku obukasa akendi hemba obuthaleghulha bwethu.​—Ebr. 11:6.

11. Ni byahi ebyaleka Paulo iniahangya-hangya?

¹¹ Ni bingyi ebyaleka omukwenda Paulo iniahangya-hangya. Ng’eky’erileberyako, kundi abya anzire balikyethu, ebitsibu byabu mubyamuhambako kutsibu. (2 Kor. 2:4; 11:28) Omwa mubiiri wiwe ng’omukwenda, Paulo mwabana abahakani abamuswiraya n’erimuhira omwa ngomo. Kandi mwabya w’erighumira  ebitsibu, ‘ng’eribyaho omwa bindu bike.’ (Fil. 4:12) Kandi obwathu eribya imubwanamutsandirako mirundi isathu omo ngetse, kyangabya imukyabya kikamulethera erihangya-hangya akaghenda omo bwathu. (2 Kor. 11:23-27) Ni kyahi ekyawathikaya Paulo omw’ihangya-hangya eryo?

12. Ni byahi ebya kehaya erihangya-hangya lya Paulo?

¹² Paulo mwahangya-hangya balikyabo bakabana ebitsibu, aliwe mwathalengekania athi akendi bighunzaho iyuwene. Paulo abya inianasi ngoku syanga thoka ebyosi. Mwabwira abandi athi bawathikaye ekithunga. Ng’eky’erileberyako, mwaha abalhume abayiketherwa b’obuthoki nga Timoteo na Tito. Ahathe erithika-thika, ebya balhume abo bakolha mubyakehya erihangya-hangya lya Paulo.​—Fil. 2:19, 20; Tito 1:1, 4, 5.

13. Abasyakulhu banga gherererya bathi Paulo?

¹³ Saba abandi b’obuwathikya. Nga Paulo, munabwire abasyakulhu bangyi ab’olhukeri bakahanga-hangaya busana n’ebitsibu ebya balikyethu omwa kithunga bawithe. Aliwe omusyakulhu syanga thoka eriwathikya abosi omwa kithunga. Eriyikehya irikendi leka iniawathikania n’abandi balhume abatholere n’erithendeka abalhwana eriwathikya omw’itsomana ekihangulho kya Nyamuhanga.​—2 Tim. 2:2.

14. Ni kyahi ekya Paulo athasagha, kandi eky’erileberyako kiwe kikathweghesayaki?

¹⁴ Ligha ku wukayithagha erihumulikanibwa. Paulo aby’ayikehirye, neryo mwaminya ku akayithagha erighumibwa erikalhua okwa banywani biwe. Mwathalengekania athi abandi bakendi mulhangira mwa mutseke kundi banywani biwe bamamughumya. Omwa baruha eyo handikira Filemono, Paulo mwabugha athi: “Nabiritsema kutsibu busana n’olhwanzo lhwawu, kandi lhwabirinyikirania.” (File. 7) Paulo mwathondogholha abandi balikyabo bangyi abamughumaya kutsibu omwa buthuku bw’ebitsibu. (Kol. 4:7-11) Omw’iyikehya thwamaligha ngoku thukayithagha erighumibwa, balikyethu ibakenditsema erithuha obuwathikya obwa thukayithagha.

15. Ni kyahi ekya Paulo akolha omughulhu abya omwa mibere eyikalire?

¹⁵ Yikethere Ekinywe kya Nyamuhanga. Paulo mwaminya ngoku Amasako akendi muhumulikania. (Abar. 15:4) Kandi angamuhere amenge w’erighumira ekitsibu kyosi-kyosi. (2 Tim. 3:15, 16) Iniane omwa ngomo mwe  Roma omurundi wakabiri, Paulo mwayowa olhuholho lhwiwe nga lhuli hakuhi. Omwa mibere eyikalire eyo, Paulo mwakolhaki? Mwasaba Timoteo athi anguhe eyo ali kandi alethe “ebitabu.” (2 Tim. 4:6, 7, 9, 13) Busana naki? Kundi ebitabu ebyo byangabya ibyabya bitsweka by’Amasako w’Ekihebrania agho Paulo angakolesirye omw’iyeghesya liwe lye Biblia. Thwamagherererya Paulo omw’iyeghesya Ekinywe kya Nyamuhanga mughulhu wosi, Yehova iniakendi kolesya Amasako erithuhumulikania​—nomuthwangabya n’ebitsibu ebiri bithi.

16. Ni hangya-hangya lyahi eryo Dawudi ayilethera?

¹⁶ Dawudi mwakolha ekindu kibi kutsibu. Mwasingira na Batiseba, am’ithisya mwira wiwe, n’erilengaho eribisa ekibi kiwe. (2 Sam. 12:9) Okw’itsuka, Dawudi mwagheghena obunyamuthima-thima bwiwe. Erighunzerera, mwaghalhwa bunyakirimu, omwa malengekania, na kinyamubiri. (Esy. 32:3, 4) Ni kyahi ekyawathikaya Dawudi erighumira erihangya-hangya eryo ayilethera, kandi ni kyahi ekyanga thuwathikya thwamakolha ekibi ekikalire?

17. Eriyisubamu lya Dawudi erikalhua okwa muthima lilhangirikire lithi omwa binywe ebiri omu Esyonyimbo 51:1-4?

¹⁷ Saba ekighanyiro. Erighunzerera Dawudi mwasaba Yehova. Omw’iyisubamu erilhua okwa muthima, mwabwira Yehova y’amalholho wiwe wosi. (Soma Esyonyimbo 51:1-4.) Eki mukyaleka iniathekana n’erithasyabya n’etseme! (Esy. 32:1, 2, 4, 5) Wamakolha ekibi ekikalire, isiwalengesaya erikibisa. Omwakanya k’ekyo, omw’isaba, bwira Yehova y’ekibi kyawu ahathe eribisirira. Neryo iwukendi thekana kandi isiwendi thasyayowa nabi. Aliwe wamabya iwanzire erisuba-subania obunywani bwawu na Yehova, ni bingyi ebikayithaghisibawa eryongera okw’isaba.

18. Dawudi mwakolhaki akakungwa?

¹⁸ Ligha erikungwa. Yehova abere akathuma Natana eriyakania okwa kibi kya Dawudi, Dawudi mwathayihambulya kutse eribugha athi ekyo alyakolha sikibi kutsibu. Aho n’aho mwaligha ngoku abirihalya butsira oku mwira wa Batiseba musa, aliwe kutsibu-tsibu n’oku Yehova. Dawudi mwaligha erikunga lya Yehova, na Yehova mwamughanyira. (2 Sam. 12:10-14) Thwamabya ithwabirikolha ekibi ekikalire, thutholere ithwabwira abo Yehova  abirisombolha erithusondolha. (Yak. 5:14, 15) Kandi thutholere ithwayihighulha okw’iyihambulya. Thwamalhuaho thukaligha n’erighendera okw’ikunga eryo thwamahebwa, ithukendilhuaho ithwathunga obuholho n’etseme.

19. Thutholere ithwathwamu erikolhaki?

¹⁹ Ithwamu erithendi suba omwa bisobyo ibyanebyo. Omwami Dawudi mwaminya ngoku amabya w’erithendi subira amalholho iwanayo, akayithagha obuwathikya bwa Yehova. (Esy. 51:7, 10, 12) Yehova abere abirighanyira Dawudi, Dawudi mwathwamu eriyitheya okwa malengekania mabi. Erighunzerera, mukyamulethera erithekana omwa muthima.

20. Thwanga kangania thuthi ku thukasima erighanyira lya Yehova?

²⁰ Thukakanganaya ku thukasima erighanyira lya Yehova thukasabalyo, thukaligha erikungwa, n’erilengaho eriyitheya okw’isuba omwa bisobyo byethu. Thwamakolha ebi, ithukendi thasyathekana omwa muthima. James, mughalha wethu oyuwakolha ekibi ekikalire, mwayilhangirira eki. Akabugha athi: “Nabere ingabwira abasyakulhu b’ekisobyo kyaghe, munayowa nganamalhusibwako omusiko owalithohire. Munathasyathekana omwa malengekania.” Ka kikahimba kutsibu eriminya ngoku Yehova “ali hakuhi n’ab’emithima ibbunangikire, akalhamaya abathawithe amaha”!​—Esy. 34:18.

21. Thwanga lighira thuthi Yehova erithuhumulikania?

²¹ Ebiro by’enyuma-nyuma bino bine mwongera eriseghera hakuhi, ebitsibu bikendyongera. Wamathunga erihangya-hangya, isiwalindiriraya erisaba Yehova y’obuwathikya. Igha e Biblia ya ndeke. Ighira okwa ky’erileberyako kya Hana, Paulo, na Dawudi. Saba Thatha wawu w’elhubulha akuwathikaye eriminya ekikakulethera erihangya-hangya. (Esy. 139:23) Leka akuhekere ebiritho byawu, kutsibu-tsibu ebya wuthawitheko eky’erikolha. Wamakolha ekyo, iwukendibya ng’omwimbi w’esyonyimbo oyuw’imbira Yehova athi: “Omughulhu ngahandabuka n’erikwa engitsi, wukanyisibikaya n’erinyitsemesya [erinyihumulikania, NW].”​—Esy. 94:19.