1-2. Busana naki Yehova mwathuhiriraho enzira ey’eribya omw’ihiika liwe kandi mwakikolha athi?

YEHOVA akathukokaya eribya omw’ihiika ly’abaramya biwe. Eri n’ikokya erikatsemesaya! Erihiika lyethu eri muli ababiriyihayo oku Nyamuhanga kandi abakakanganaya erikirirya omwa kihongo ky’embanulho ya Mughalha wiwe. Thuli ihiika eritsemire. Thuwithe engebe eyuwene lino, kandi thuwithe amaha w’engebe ya kera na kera​—mbulha omo lhubulha kutse omwa Paradiso okwa kihugho.

² Busana n’olhwanzo, Yehova mwathukyungulira enzira y’eribya omw’ihiika liwe. Aliwe erikolha ekyo, mwayithagha erihayo ekindu ky’obughuli bunene. (Yn. 3:16) ‘Abirithughulha omo bughuli.’ (1 Kor. 6:20) Erilhabira omwa mbanulho, Yehova mwaleka ikyathokekana ithwe eribya n’engolongana nayu. Thuwithe olhusunzo lhw’eryahulha oyulengireyo omo buhangwa bwosi mwa Thatha wethu. Kandi ngoku kine omo mwatsi owahwere, Yehova ya Thatha omubuyanga.

3. Ni bibulyo byahi ebyo thwanga yibulya? (Lebaya n’akasanduko “ Mbwino Naghe Yehova Ananyasi?”)

³ Ng’omuhandiki mughuma we Biblia, ithwangana yibulya: “Omwami Mukulhu nasyamuhaki kwehi? Busana n’ebibuya ebyosi ebyo akamba kwehi?” (Esy. 116:12) Sihali ekyo thwangaha kutse eriliha Thatha wethu w’elhubulha. Nomwabine, thukayowa ithutholere erimwanza. Omukwenda Yoane mwabugha athi: “Thukanza, kusangwa Nyamuhanga mwatsuka erithwanza.” (1 Yn. 4:19) Thwanga kangania thuthi ku thwanzire Thatha wethu w’elhubulha?

4. Ngoku kiri omu Yakobo 4:8, busana naki thutholere ithwahiraho akaghalha eriyithunda hakuhi na Yehova?

⁴ Yehova anzire ithwayithunda hakuhi nayu kandi ithwakania nayu. (Soma Yakobo 4:8.) Akabugha athi ‘thuyitsinge omw’isaba,’ kandi akowa emisabe yethu. (Abar. 12:12) Syali bulha endambi y’erithuhulikirira kandi syalithulhuha. Nethu thukamuhulikirira omw’isoma Ekinywe kiwe, e Biblia, haghuma n’ebitabu ebikathuwathikaya eriyitheghereryayo. Kandi thukamuhulikirira omw’ihulikirira ndeke okwa mihindano y’Ekikristayo. Ngoku erikanirania likaleka abaana ibabya banywani b’ababuthi babu, nethu erikanirania na Yehova kikaleka ithwabya banywani biwe.

5. Thwang’uwania thuthi emisabe yethu?

⁵ Thalengekania emisabe yawu nga yiri yithi. Yehova anzire ithwamubwira ebyosi ebiri oko muthima wethu omwa musabe. (Esy. 62:8) Neryo thutholere ithwayibulya ekibulyo kino: ‘Mbwino emisabe yaghe ni y’eyighulhu-ghulhu, ni y’erisubiriramo, kutse yine ng’esyobaruha esya wukayihandikira esiri mw’ebinywe ebikalhua oko muthima?’ Ahathe erithika-thika, wanzire Yehova ya kutsibu, kandi wanzire obunywani bwawu nayu ibwabya ibunakamathire. Erikolha ekyo, wutholere iwabya iwunemukanirania nayu. Mubwire ebiri oko muthima. Mubwire ebikakutsemesaya n’ebikakulyambaya. Yikethere ngoku wangana musaba obuwathikya.

6. Thutholere ithwakolhaki eribya ithune hakuhi na Yehova?

⁶ Eribya ithune hakuhi na Thatha wethu w’elhubulha, thutholere ithwabya n’omuthima w’erisima. Thukalighirana n’omuhandiki w’esyonyimbo oyuwahandika athi: “Wabirithukolera emibiiri mingyi y’eriswekya, Iwe Mwami Mukulhu Nyamuhanga waghe. Wabirithutheghekanirya emyatsi mingyi. Sihali mundu oyuli nga we! Kumbe namalenga eryahulhayo, Sinangathoka erighanzayo!” (Esy. 40:5) Eryongera okw’iyowa ithukasima; thukakanganaya ku thukasima Yehova omwa binywe n’omwa mikolere. Eki kikaleka ithwabya mbaghane okwa bangyi munabwire. Thuli omwa kihugho ekiri mw’abandu abathesima ebyosi ebya Nyamuhanga akabakolera. Kundi nibya ekighuma ky’okwa bikakanganaya ngoku thuli omwa biro “by’enyuma-nyuma” kiri kithi abandu sibalisima. (2 Tim. 3:1, 2) Sithwanzire eribya n’emibere eyo!

7. Yehova anzire ithwakolhaki, kandi busana naki?

⁷ Ababuthi sibalyanza abaana babu bakabya bakalhwa aliwe bakanza ibabya banywani. Kuthya, Yehova anzire abaana biwe abosi ibabya banywani. Ni kwenene, olhwanzo olhwa thuwithirene lhukathuminyikalhaya ng’Abakristayo ab’okwenene. (Yn. 13:35) Thukalighirana n’omuhandiki w’esyonyimbo oyuwahandika athi: “Ni ky’eriswekya, kandi ni kibuya, Abandu ba Nyamuhanga bamikalha haghuma ng’abaana abasubeneko!” (Esy. 133:1) Thwamanza balikyethu, thukakanganaya Yehova ku thumwanzire. (1 Yn. 4:20) Kikatsemesaya eribya omwa balikyethu ‘abanzene, kandi ab’emithima eyihehere’!​—Efe. 4:32.

8. Ngoku kiri omu 1 Yoane 5:3, ni nzumwa yahi ngulhu eyikaleka ithwowa Yehova?

⁸ Yehova anzire abaana ibowa ababuthi babu, kandi anzire nethu ithwamwowa. (Efe. 6:1) Thutholere ithwamwowa kundi ya Muhangiki wethu, yukaleka ithwabyaho, kandi awithe amenge kwilhaba omubuthi wosi-wosi. Aliwe, enzumwa ngulhu eyikaleka ithwowa Yehova ly’eribya ithumwanzire. (Soma 1 Yoane 5:3.) Nomwakine indi  hali nzumwa nyingyi esyangaleka ithwowa Yehova, syali thukaka erikolha ekyo. Yehova abirithuha obughabe bw’eriyithwiramu, neryo akatsema thwamathwamu erimwowa busana n’erimwanza.

9-10. Busana naki ni kikulhu eriminya ebihano bya Nyamuhanga n’eribighenderako?

⁹ Ababuthi bakanza abaana babu ibabya ndeke. Ky’ekikaleka ibahiraho ebilhaghiro ebikatheghaya abaana. Abaana bamaghendera okwa bihano ebyo, bakakanganaya ku bayikethere ababuthi babu kandi ku babasikirye. Kwesi ni kikulhu kutsibu ithwe eriminya ebihano bya Thatha wethu n’eribighenderako. Thwamakolha ekyo, thukakanganaya ku thwanzire Yehova n’erimusikya kandi ithwaghasirwa. (Isa. 48:17, 18) Mbaghane n’ekyo, abakaghana Yehova n’ebihano biwe bakayilethera ebitsibu.​—Gal. 6:7, 8.

¹⁰ Thwamatsemesya Yehova, thukatheghibawa okwa byanga thutsandya kinyamubiri, omw’iyowa, na bunyakirimu. Yehova anasi ebyanga thughasira. Aurora, oyuwikere e Amerika, akabugha athi, “Nganasi ngoku eriowa Yehova, mughulhu wosi kikaleka engebe yethu iyuwana.” Ekyo ni kwenene. Wabirighasirwa wuthi omw’ighendera okwa busondoli bwa Yehova obw’olhwanzo?

11. Erisaba likathuwathikaya lithi?

¹¹ Erisaba likathuwathikaya eribya bowa, nibya n’omughulhu kikalire. Hakanayira, ikyakalha eriowa Yehova kundi thuli bakolha-nabi, aliwe thutholere ithwalengaho kutsibu erimwowa. Omuhandiki w’esyonyimbo  mwalemba-lemba Nyamuhanga athi: “Unyihanganaye omwa kirimu ky’eriowa.” (Esy. 51:12) Denise, omutemburi w’omughulhu wosi, akabugha athi, “Kikabya kikanyikalira erighondera ekighuma ky’okwa bihano bya Yehova, ngamusaba amaaka w’erikolha ekihikire.” Thuyikethere ngoku Yehova iniakendi subirya emisabe ng’eyo.​—Lk. 11:9-13.

12. Ngoku kiri omu Abanya Efeso 5:1, thutholere ithwakolhaki?

¹² Soma Abanya Efeso 5:1. Kundi thuli, “baana banze” ba Yehova, thukalengaho kutsibu erimugherererya. Thukagherereraya emibere yiwe omw’ibya b’olhwanzo, ab’olhukeri, kandi abakaghanyira. Abathasi Nyamuhanga ibakendibya bakalhangira emibere yethu mibuya, ibangananza erimwighako. (1 Pet. 2:12) Ababuthi Abakristayo batholere ibalengaho kutsibu erigherererya Yehova omwa mibere bakathwaliramu abaana babu. Bamakolha ekyo, abaana babu nabu ibangananza erinywana Thatha wethu w’olhwanzo.

13. Thutholere ithwakolhaki eribya bathubaha?

¹³ Omwana akayisyethera thatha wiwe kandi iniamukaniako inianatsemire. Kuthya nethu thukayisyethera Thatha wethu w’elhubulha, Yehova, kandi thwanzire n’abandi ibamuminya. Omwa mithima yethu, thukayowa ng’Omwami Dawudi, oyuwahandika athi: “Nasyayihalhamba omo Mwami Mukulhu.” (Esy. 34:2) Neryo ibbwa thwamabya ithukakwa esisoni? Thwangabya thuthi n’obuthubaha?  Thukabana obuthubaha thwamaghanirya oko tseme eyo Yehova angabya nayu thukabwira abandi okw’iyo kandi ngoku banga ghasirwa bamamwighako. Yehova akendi thuha obuthubaha obo thukayithagha. Mwawathikya balikyethu ab’omwa kighonye ky’erimbere eribya bathubaha, nethu akendi thuwathikya.​—1 Tes. 2:2.

14. Ni nzumwa nga syahi esyangaleka ithwayira abigha?

¹⁴ Yehova syawithe kasolholho, kandi akatsema akalhangira thukakangania abandi b’olhwanzo, nomubangabya ibalhuire omwa mibere eyisosire yithi. (Emib. 10:34, 35) Enguma y’okwa syonzira mbuya sy’erikanganiryamu ku thwanzire abandi ly’eribathulira. (Mt. 28:19, 20) Ekyo mwangalhwiririraki? Kyangan’uwania esyongebe sy’abakathuhulikirira lino kandi ibabya n’amaha w’engebe y’erikotha.​—1 Tim. 4:16.

15-16. Busana naki thutholere ithwatsema?

¹⁵ Yehova ni Thatha oyuthwanzire, neryo anzire erihiika liwe iryatsema. (Isa. 65:14) Hali nzumwa nyingyi esyangaleka ithwatsema na lino, nomwakine indi thwanganabya ithunawithe ebitsibu. Ng’eky’erileberyako, thuyikethere ngoku Thatha wethu w’elhubulha athwanzire kutsibu. Thuwithe eriminya erihikire ery’Ekinywe kya Nyamuhanga, e Biblia. (Yer. 15:16) Kandi thuli omw’ihiika ery’embaghane ery’abandu abanzire Yehova, ebihano biwe, kandi abanzene.​—Esy. 106:4, 5.

¹⁶ Thwangana tsema mughulhu wosi kundi thukakasirye ngoku engebe yikendi syuwana obuthuku obukasa. Thunasi ngoku Yehova akisiya iniaghunzaho obubi bwosi kandi ngoku omw’isi sy’Obwami bwiwe, ekihugho kyosi kikendibya Paradiso. Kandi thuwithe amaha mabuyanga ngoku ababiriholha bakendi syalhubuka, ibabya nethu kandi. (Yn. 5:28, 29) Eyo yikendisyabya tseme nyingahi! Kandi ekikulhu kutsibu, thwasi ndeke-ndeke ngoku, hakuhi-kuhi aha abosi abali omwa lhubulha n’okwa kihugho bakendiha Thatha wethu w’olhwanzo erisikya, eripipa, n’eriramya ebimutholere.