1. Omundu iniakayithagha erikolhaki erihikira omwami we Persia?

THERA akasasani myaka 2,500 kera iwun’ikere e Persia. Wuwithe eby’eribwira omwami w’eyo, neryo iwaghenda omwa tawuni ye Susa eyiri omwami. Omwami atholere iniakulighira, imuwamuhikako. Wamathendi kolha ekyo, iwangan’ithibwa!​—Esi. 4:11.

2. Thutholere ithwayowa thuthi erikania na Yehova?

² Thukasima Yehova eribya iyo isyali ng’omwami we Persia oyo! Yehova alengire kutsibu omuthabali wosi-wosi, aliwe thwangana kania nayu okwa ndambi yosi-yosi. Anzire ithwayowa bwiranda erikania nayu. Ng’eky’erileberyako, nomwakine indi Yehova awithe ebitsumbi by’endatha nga Omuhangiki, Omuthoki w’Ebyosi, na Mwami Mukulhu, anzire ithwakania nayu omw’ikolesya ekinywe ky’olhwanzo ekya thwasi ekya “Thatha.” (Mt. 6:9) Kikathutsemesaya Yehova eribya inianzire ithwamulhangira ng’omunywani!

3. Ni kyahi ekikaleka ithwahulha Yehova mwa “Thatha,” kandi omwatsi ono akendi kania okuki?

³ Thuhikire eryahulha Yehova mwa “Thatha”​—kundi ya Nzuko y’engebe yethu. (Esy. 36:9) Kundi ni Thatha wethu, thuwithe olhukwamirwa olhw’erimwowa. Thwamakolha ebyo akabugha athi thukole, ithukendi bana emighisa mibuyanga. (Ebr. 12:9) Emighisa eyo mwamuli engebe y’erikotha, omwa lhubulha kutse okwa kihugho. Kandi thunemughasirwa na lino. Omwatsi ono akendi kania ngoku lino Yehova akakanganaya ku ni Thatha w’olhwanzo n’ekikaleka ithwakakasya ngoku syendi  syathusighania n’omwa buthuku obukasa. Thuthatsuka eriminya ekikaleka ithwayikethera ngoku Thatha wethu w’elhubulha athwanzire kutsibu kandi ngoku akathutsomana.

4. Busana naki kikanakalira abandi erilhangira Yehova nga Thatha wabu?

⁴ Kikanakukalira erilhangira Nyamuhanga mwa Thatha wawu? Abandi bangana lhangira Yehova ini w’endatha kutsibu ikyaleka ibayowa nga sibawithe omughaso embere siwe. Bakayowa bathi Nyamuhanga Omuthoki w’Ebyosi syabatsomene ibo ahabwabu. Nomwabine, Thatha wethu w’olhwanzo syanzire thukayowa thuthya. Mwathuha engebe kandi anzire ithwabya banywani biwe. Paulo abere abiryahulha ekwenene eyo, mwasoborera abahulikiriri biwe e Atene athi Yehova “syali hali okw’ithwe oko buli mundu.” (Emib. 17:24-29) Nyamuhanga anzire obuli mughuma iniakania nayu ngoku omwana akanakanaya n’omubuthi wiwe oyutsomene kandi oyuwithe olhwanzo.

5. Eky’erileberyako kya mwali wethu mughuma kikathweghesayaki?

⁵ Abandi kyangana bakalira erilhangira Yehova nga Thatha wabu kundi abathatha wabu abababuthire mubathabakangania olhwanzo. Thalebya ebya mwali wethu mughuma akabugha. Akabugha athi: “Thatha waghe abya mutsurumi. Nabere ingatsuka erigha e Biblia, mukyanyikalira eriyithunda hakuhi na Thatha w’elhubulha. Aliwe nabere nabiriminya Yehova, ebyosi ebyo mubyahwa.” Nawu wukanayowa wuthya? Byamabya ikwabiri bithya, nawu endambi yanganahika iwalhangira Yehova nga Thatha mubuyanga.

6. Ngoku kiri omu Matayo 11:27, ni nzira yahi nguma eya Yehova abirithuwathikiryamu erimulhangira nga Thatha w’olhwanzo?

⁶ Enzira nguma eya Yehova abirithuwathikiryamu erimulhangira nga Thatha wethu w’olhwanzo ly’erilhangira athi ebinywe n’ebya Yesu akolha bikahandikawa omwa Biblia. (Soma Matayo 11:27.) Yesu mwagherererya ndeke-ndeke emibere ya Thatha wiwe amahika n’okw’ibugha athi: “Oyo wamanyilhangira iniabirilhangira Thatha.” (Yn. 14:9) Yesu iniakabera erikania oku Yehova nga Thatha. Omwa bitabu bbini by’Enjiri bisa, Yesu mwakolesya ekinywe “Thatha” mirundi mingyi akakania oku Yehova. Ni kyahi ekyaleka Yesu iniakania kutsibu oku Yehova nga Thatha? Enzumwa nguma abya anzire abandu ibaligha ngoku Yehova ni Thatha w’olhwanzo.​—Yn. 17:25, 26.

7. Emibere Yehova athwaliramu Mughalha wiwe yikathweghesayaki?

⁷ Thalebya ekya thukigha okwa mibere Yehova athwaliramu Mughalha wiwe, Yesu. Mughulhu wosi Yehova iniakowa emisabe ya Yesu. Eryongera okw’ihulikirirayo, iniakasubirayayo. (Yn. 11:41, 42) Omwa bitsibu byosi ebya Yesu abana, mwalhangira olhwanzo n’obuwathikya bwa Thatha wiwe.​—Lk. 22:42, 43.

8. Yehova mwaha athi Yesu ebyo akayithagha?

⁸ Yesu mwakangania ngoku Thatha wiwe ya Nzuko y’engebe yiwe akabugha athi: “Nyiriho busana na Thatha.” (Yn. 6:57) Yesu mwayikethera ndeke-ndeke Thatha wiwe, na Yehova mwamuha ebiyithawa biwe by’ekimubiri. Ekikulhu kutsibu, Yehova mwatsomana ebiyithawa bya Yesu eby’obunyakirimu.​—Mt. 4:4.

9. Yehova mwakangania athi ku ni Thatha wa Yesu ow’olhwanzo kandi oyumutsomene?

⁹ Nga Thatha w’olhwanzo, Yehova mwalhangira athi Yesu akaminya ngoku Thatha wiwe anemumusighika. (Mt. 26:53; Yn. 8:16) Nomwakine indi Yehova mwathakakirya ebyosi ebyanga kolha Yesu ya nabi, mwamuwathikya erighumira ebitsibu. Yesu abya inianasi ngoku ebitsibu ebyosi-byosi ebikamuhikako ni bya mughulhu muke. (Ebr. 12:2)  Yehova mwakangania ngoku atsomene Yesu omw’imuhulikirira, erimuha ebyo akayithagha, erimuthendeka, n’erimusighika. (Yn. 5:20; 8:28) Thulebaye nethu ngoku Thatha wethu w’elhubulha akathutsomana.

10. Ngoku kiri omu Esyonyimbo 66:19, 20, Yehova akakanganaya athi kw’athwanzire?

¹⁰ Yehova akahulikirira emisabe yethu. (Soma Esyonyimbo 66:19, 20.) Syanzire thukayikukumirira omw’isaba; anzire ithwasaba buthumbya. (1 Tes. 5:17) Thwanganasaba Nyamuhanga wethu okwa ndambi yosi-yosi, ahosi-hosi aho thwangabya. Akabya inianayitheghekire erithuhulikirira okwa ndambi yosi-yosi. Thukabya thukaminya ngoku Yehova akahulikirira emisabe yethu, thukongera eriyithunda hakuhi nayu. Omuhandiki w’esyonyimbo mwabugha athi: “Nyanzire Omwami Mukulhu, kusangwa akanyowa.”​—Esy. 116:1.

11. Yehova akasubiraya athi emisabe yethu?

¹¹ Thatha wethu syali subulira okw’ihulikirira emisabe yethu aliwe kandi akasubirayayo. Omukwenda Yoane akathukakasaya athi: “Thwamabulya ekindu omw’isonda [lya Nyamuhanga], akathwowa.” (1 Yn. 5:14, 15) Ni kwenene, Yehova anganasubirya emisabe yethu omwa nzira eyo thuthalengekenie. Anasi ebyanga thughasira, neryo hakanayira iniathathusubirya kutse iniabya inianzire thulinde.​—2 Kor. 12:7-9.

12-13. Thatha wethu w’elhubulha akathuha ebya thukayithagha omwa nzira syahi?

¹² Yehova akathuha ebya thukayithagha. Neryo akakolha ekyo anzire abathatha bosi ibakolha. (1 Tim. 5:8) Akaha abaana biwe ebyo bakayithagha kinyamubiri. Syanzire thukahangya-hangya okwa ky’erirya, eky’eryambalha, kutse ah’erikalha. (Mt. 6:32, 33; 7:11) Ng’omubuthi w’olhwanzo, Yehova nibya abirithegheka eryughuthya esyongumbu syethu syosi obuthuku bw’embere.

¹³ Ekikulhu kutsibu, Yehova akaberereraya ebiyithawa byethu by’obunyakirimu. Erilhabira omwa Kinywe kiwe, abiribisulha ekwenene eyimuhambireko, ekighendererwa kiwe, ekyaleka iniathuhangika, n’obuthuku bw’embere. Mwakangania kw’athutsomene omughulhu thwatsuka erigha ekwenene, erilhabira omwa babuthi bethu kutse omwa bandi erithuwathikya erimuminya. Kandi thukalholha embere eribana obuwathikya bw’olhukeri erilhabira omwa basyakulhu b’ekithunga n’abalikyethu abakulire bunyakirimu. Eryongera okw’ekyo, Yehova akathukangiriraya erilhabira omwa mihindano yethu, aho thuk’ighira haghuma n’abalikyethu. Omwa nzira esi n’esindi, Yehova akakanganaya kw’athutsomene ithwe bosi.​—Esy. 32:8.

14. Busana naki Yehova iniathuthendeka, kandi akakikolha athi?

¹⁴ Yehova akathuthendeka. Ithwe sithuli nga Yesu, sithuhikene. Neryo omw’ithuthendeka, Thatha wethu w’olhwanzo akathukunga kikayithaghisibwa. Ekinywe kiwe kikathw’ibukaya kino: “Omwami Mukulhu akakunga oyo anzire.” (Ebr. 12:6, 7) Yehova akathukunga omwa nzira nyingyi. Ng’eky’erileberyako, thwangana soma omwa Kinywe kiwe kutse ithwowa mwatsi mulebe okwa mihindano ow’angathuhengulha. Kutse obundi abasyakulhu ibathuwathikya. Mbulha erikunga lyamasirahi, Yehova akakolha ekyo kundi athwanzire.​—Yer. 30:11.

15. Yehova akathutheghaya omo nzira syahi?

¹⁵ Yehova akathuwathikaya omwa bitsibu byethu. Ngoku thatha akanawathikaya abaana biwe omwa bitsibu, Thatha wethu w’elhubulha akathuwathikaya omwa bitsibu  byethu. Akathuha omulimu wiwe abuyirire erithutheya bunyakirimu. (Lk. 11:13) Kandi thwamahwa amani, Yehova akathuwathikaya. Ng’eky’erileberyako, akathuha amaha mabuyanga. Amaha w’obuthuku obukasa ayo akaleka ithwaghumira ebitsibu. Thalengekania oku kino: Nomuthwangabana bitsibu bingahi, Thatha wethu w’olhwanzo akendi syaghunzaho obulhumi bwosi-bwosi obukalhwiririramo. Ebitsibu byosi ebyo thukabana ni by’akathambi kake, aliwe emighisa eyo Yehova akathuha ni ya kera na kera.​—2 Kor. 4:16-18.

16. Ni kyahi ekyabya kyabere Adamu akaghana eriowa Thatha wiwe w’olhwanzo?

¹⁶ Thukalhangira olhwanzo olho Yehova athuwithire thwamalengekania okwa ky’akolha Adamu akaghana erimwowa. Adamu abere akaghana eriowa Thatha wiwe w’elhubulha, mwaherya olhusunzo lhw’eribya omw’ihiika lya Yehova eritsemire, iyo n’abaana biwe. (Abar. 5:12; 7:14) Aliwe, Yehova mwayira ekyo akakolha eriwathikya abaana ba Adamu.

17. Adamu abere abirisobya, Yehova mwalhuaho iniakolha kyahi?

¹⁷ Yehova mwasuyira Adamu, aliwe mwathasigha abaana aba Adamu angabuthire butsira maha. Mwalhuaho inialhagha ngoku abandu bowa bakendi syabya kandi omw’ihiika liwe. (Enz. 3:15; Abar. 8:20, 21) Yehova mwathegheka eriberererya eki erilhabira omwa kihongo kya Mughalha wiwe mwanze, Yesu. Omw’ihayo Mughalha wiwe busana nethu, Yehova mwakangania kw’athwanzire kutsibu.​—Yn. 3:16.

18. Thwanga kakasya thuthi ngoku Yehova athwanzire, nomuthwangabya ithwabirimulhuako?

¹⁸ Nomuthuthanahikene, Yehova anzire ithwabya omw’ihiika liwe, kandi syali thulhangira ng’omuheke. Thwangana muponesya kutse  ithwamulhuako habw’akathuku, aliwe Yehova syali thulhuhirirako. Yesu mwakangania ngoku Yehova anzire abaana biwe ba kutsibu omwa musyo w’omwana oyuwatsaha. (Lk. 15:11-32) Omwa musyo oyo thatha mwathahwa amaha w’erisyalholha oko mwana wiwe. Omwana abere asubulha, thatha wiwe mwamwangirira. Thwamalhua oku Yehova aliwe thukayisubamu, thutholere ithwakakasya ngoku Thatha wethu w’olhwanzo anayitheghekire erithwangirira.

19. Yehova akendi syuwania athi ebyabiritsanda busana na Adamu?

¹⁹ Thatha wethu akendi syuwania ebyosi ebya Adamu abiritsandya. Adamu abere abiriyisamambulha, Yehova mwathwamu erisombolha abandu 144,000 abakendi syakolha ng’abami n’abahereri omo lhubulha haghuma na Mughalha wiwe. Yesu n’abo akendi syathabalha nabu bakendi syawathikya abandu bowa erihikana omwa kihugho kihya-kihya. Enyuma w’erilengesibwa ly’erighunzerera, Nyamuhanga akendi syabaha engebe y’erikotha. Thatha wethu akendi syatsema akalhangira ekihugho kikusulhamo baghalha biwe n’abali biwe abahikene. Obu bukendi syabya buthuku obuwene kutsibu!

20. Yehova abirikangania athi kw’athwanzire kutsibu, kandi omwatsi owakakwamako akendi syakania okuki?

²⁰ Yehova abirikangania ngoku athwanzire kutsibu. Ni Thatha oyutholere. Akowa emisabe yethu n’erithuha ebyo thukayithagha, kinyamubiri na bunyakirimu. Akathuthendeka n’erithuwathikya. Kandi anathutheghekere emighisa mingyi. Thukatsema thukaminya ngoku Thatha wethu athwanzire kandi kw’athutsomene! Omwatsi owakakwamako akendi syakangania ngoku ithwe baana biwe thwanga kangania ku thukasima olhwanzo lhwiwe.