ABAKALI babiri babya ibane mughenda haghuma omwa Tawuni ye Baguio, e Philippines. Mubalhangira akaggali k’ebitabu, aliwe mubathayaho. Helen, mwali wethu oyuwabya okwa kaggali, mwabasenyenyerya ndeke. Abakali abo mubalholha embere n’olhughendo lhwabu, aliwe mubasima erisenyenyia lya Helen.

Enyuma waho, babere banemughenda omwa bbasi bakasuba eka, mubalhangira ekyapa kinene ekiri kwe jw.org ikine okwa Kisenge ky’Obwami. Mub’ibuka ngoku esyonyughuta esyo syasinalhue okwa kaggali ako balyalhangira. Abosi mubakima omwa bbasi erilebya esyosaha sy’emihindano y’ebithunga muthina-muthina esiri okwa geti y’Ekisenge ky’Obwami.

Abakali babiri abo mubasa okwa mihindano eyakwamako. Kandi nindi oyo balhangira bak’ingira omwa Kisenge ky’Obwami? Helen! Mubalhuaho ibamuminyerera ngoku y’oyuwabasenyenyeraya ndeke. Helen akabugha athi: “Babere basa eyo ngali, munakwa engitsi. Munalengekania indi obundi hane ekindu kibi ekyo ngakolire.” Aliwe abakali mubasoborera Helen ekyabya.

Abakali abo mubatsemera emihindano n’obughuma bw’abalikyethu; mubayowa buholho. Babere bakalhangira abandi bakakolha obuyonzo emihindano yikahwa, nabu mubabulya bathi ngabangana wathikya. Omukali mughuma abirilhua e Philippines, aliwe owundi mwatsuka erihindana n‘erigha e Biblia​—eki kyabya busana n’erisenyenyia!