1. Ni nzumwa nguma yahi eyikaleka erihiika lya Yehova iryabya bughuma?

THUTSEMIRE eribya omw’ihiika lya Yehova. Busana naki erihiika lyethu eri liri mw’obuholho n’obughuma? Enzumwa nguma yiri yithi ithwe bosi thukalengaho erighondera endegheka y’obukulhu eyo Yehova abirihiraho. Omo kwenene, thukabya thukongera eriyitheghererya endegheka y’obukulhu, ku thukan’ongera thuthya eribya bughuma.

2. Ni bibulyo byahi ebyo thukendi subiryako omwa mwatsi ono?

² Omo mwatsi ono thukendi kania okwa bukulhu obw’omwa kithunga. Omwa byathukendi kaniako, thukendi subirya okwa bibulyo bino: Bali bethu bawithe lhukwamirwaki? Nina kwenene indi obuli mughalha wethu ni muthwe w’obuli mwali wethu? Mbwino obuthoki obwa basyakulhu bawithe oko balikyethu bunasosene n’obuthoki obo omuthwe w’eka awithe oko mukali wiwe n’abaana biwe? Thutsuke eriminya nga thutholere ithwalhangira thuthi bali bethu.

3. Thwang’ongera thuthi erisima emibiiri eyo bali bethu bakakolha?

³ Thutholere ithwasima bali bethu abakahiraho akaghalha eritsomana amaka wabu, erithulha engulhu yuwene, n’erisighika ekithunga. Thwangan’ongera eribasima omw’ighanirya okwa malengekania agho Yehova na Yesu babawitheko. Kandi thwangana  ghasirwa omw’ilebya emibere omukwenda Paulo athwaliramu abakali.

4. E Biblia yikakanganaya yithi ngoku Yehova akalhangira abakali kuthya n’abalhume mwa b’obughuli?

⁴ E Biblia yikakanganaya ngoku Yehova akalhangira abakali kuthya n’abalhume mwa b’obughuli. Ng’eky’erileberyako, yikabisulha ngoku omwa kighana ky’erimbere, Yehova mwathaha abalhume basa b’omulimu abuyirire, mwahagho n’abakali kandi amabaha n’amaaka w’erikolha ebithiko-thiko ng’eribugha omwa mibughe muthina-muthina. (Emib. 2:1-4, 15-18) Abosi mubahakabibwa omwa mulimu abuyirire kandi bawithe amaha w’erisyathabalha na Kristo. (Gal. 3:26-29) Abakali kuthya n’abalhume bakendi syahebwa olhuhembo olhw’engebe y’erikotha okwa kihugho. (Erib. 7:9, 10, 13-15) Kandi abalhume n’abakali abosi bakahebawa omubiiri w’erithulha n’erikangirirya engulhu yuwene. (Mt. 28:19, 20) Ng’eky’erileberyako, ekitabu ky’Emibiri y’Abakwenda kikakanaya oku mwali wethu ya Pirisila, oyo iyo na mwira wiwe, Akwila, bawathikaya omulhume oyuwabya asomire ya Apolo eriyitheghererya ndeke ekwenene.—Emib. 18:24-26.

5. Ebiri omu Luka 10:38, 39, 42 bikabisulhaki okwa malengekania agho Yesu abya awithe oko bakali?

⁵ Yesu iniakaha abakali b’ekitsumbi n’eribasikya. Mwathaghendera okwa mitse y’Abafarisayo ababya baghayire abakali kandi ababya isibali kanaya nabu embere sy’abandu, nibya n’eribakanirya oko Masako. Omwakanya k’ekyo, Yesu iyo iniakakaniraya abakali okwa by’obunyakirimu ngoku anabya akakolha okwa bandi bigha biwe. * (Soma Luka 10:38, 39, 42.) Kandi mwalighira abakali erighenda nayu omw’ithulira. (Lk. 8:1-3) Kandi Yesu mwaha abakali b’olhusunzo olhw’eriyabwira abakwenda ngoku abirilhubuka.—Yn. 20:16-18.

6. Omukwenda Paulo mwakangania athi kw’asikirye abakali?

⁶ Omukwenda Paulo mwakangania ngoku abya asikirye abakali. Ng’eky’erileberyako, mw’ibukya Timoteo athi asikaye abakali. Mwamubwira athi alhangire “abakekulhu ng’abakoyo” kandi ‘n’abakali balere nga bali babu.’ (1 Tim. 5:1, 2) Paulo mwakolha kutsibu eriwathikya Timoteo eribya Mukristayo oyukulire bunyakirimu, aliwe abya inianasi ngoku mama wa Timoteo na mukaka wiwe babatsuka erimukangirirya “Amasako Abuyirire.” (2 Tim. 1:5; 3:14, 15) Paulo mwahulha amena w’abali bethu omwa baruha yiwe okwa Abanya Roma akabaramukya. Mwathasubulira okw’ilhangira lisa omubiiri owa bali bethu abo bakolha aliwe kandi mwakangania kw’akabasima busana n’emibiiri y’Ekikristayo.—Abar. 16:1-4, 6, 12; Fil. 4:3.

7. Ni bibulyo byahi ebyo thukendi kaniako?

⁷ Ngoku kyabirikanganibwa, sihali enzumwa eyiseghemere okwa Masako eyangaleka ithwalengekania thuthi abakali ni bahisi okwa balhume. Bali bethu ab’olhwanzo kandi abenge bakawathikaya kutsibu, kandi abasyakulhu bakasima obuwathikya bwabu obw’eriletha omwa kithunga mw’obuholho n’obughuma. Aliwe hane ebibulyo ebikayithagha eby’erisubirya. Ng’eky’erileberyako: Busana naki Yehova akabugha athi abakali ibaswika omuthwe wabu omwa mibere mirebe? Baghalha bethu basa eribya ibabakasombolhawa eribya basyakulhu n’abaghombe bawathikya, mbwino kikamanyisaya kithi obuli mughalha wethu ni muthwe w’obuli mwali wethu omwa kithunga?

8. Ngoku kiri omwa Abanya Efeso 5:23, mbwino obuli mughalha wethu ni muthwe w’obuli mwali wethu? Soborera.

⁸ Omwa bikuhi, eyihi. Mughalha wethu si muthwe w’abali bethu abosi omwa kithunga;  Kristo ya muthwe. (Soma Abanya Efeso 5:23.) Omw’eka, omulhume awithe obuthoki okwa mukali wiwe. Omwana w’obulhume oyubatizibirwe si muthwe wa mama wiwe. (Efe. 6:1, 2) N’omwa kithunga, abasyakulhu bawithe obuthoki bulebe oko baghalha bethu na bali bethu. (1 Tes. 5:12; Ebr. 13:17) Bali bethu abahuru abathakikere n’ababuthi babu bakalholha embere erisikya ababuthi babu n’abasyakulhu b’ekithunga. Aliwe nabu ng’abalhume omwa kithunga bawithe omuthwe mughuma, Yesu.

9. Busana naki hakanayira bali bethu ibabya ibatholere eriswika emithwe yabu?

⁹ Ni kwenene, Yehova abirisombolha abalhume erisondolha omwa by’erikangirirya n’eriramya omwa kithunga, aliwe syathaha abakali b’obuthoki obo. (1 Tim. 2:12) Busana naki? Ngoku anasombolha Yesu eribya muthwe w’omulhume—abirisombolha abalhume erilhangira bathi ekithunga kikabya ikine omwa buyithondeke. Neryo busana n’emibere mirebe, mwali wethu amabya w’erikolha omubiiri owatholere erikolhwa na mughalha wethu neryo Yehova akabugha athi mwali wethu iniaswika omuthwe wiwe. * (1 Kor. 11:4-7) Yehova eribugha athi bali bethu ibakolha eki, sibasubya ahisi, aliwe ni baha enzira ey’erikanganiryamu ku bakasikaya endegheka y’obukulhu eyo Yehova abirihiraho. Thun’ibukire ebyo, muleke thusubiraye ekibulyo kino: Emithwe y’eka n’abasyakulhu bawithe buthoki bungahi?

10. Busana naki omusyakulhu angananza erihiriraho abali omwa kithunga b’ebilhaghiro?

¹⁰ Abasyakulhu banzire Kristo kandi banzire “esyombuli” esyo Yehova na Yesu babiribaha eritheya. (Yn. 21:15-17) Kundi omusyakulhu akatsomana ekithunga, iniangana tsuka eriyilhangira  nga thatha w’abali omwa kithunga. Iniangana lengekania athi, omuthwe w’eka amabya iniawithe obughabe bw’erihiraho ebilhaghiro ebikendi theya eka yiwe, omusyakulhu angana yihiriraho ebilhaghiro eby’akalengekanaya athi bikendi theya esyombuli sya Nyamuhanga. Kandi abandi balikyethu bakanaleka abasyakulhu ibakolha eki bakabasaba bathi babathwiremo. Aliwe mbwino abasyakulhu omwa kithunga n’emithwe y’eka banawithe obuthoki obusosene?

11. Esyongwamirwa esy’emithwe y’eka n’esy’abasyakulhu sisosene sithi?

¹¹ Omukwenda Paulo mwakangania ngoku olhukwamirwa lhw’omuthwe w’eka n’olho musyakulhu lhunasosene omwa nzira ndebe. (1 Tim. 3:4, 5) Ng’eky’erileberyako, Yehova anzire ab’omw’eka ibaghondera omuthwe w’eka. (Kol. 3:20) Kandi anzire abali omwa kithunga ibaghondera abasyakulhu. Yehova anzire emithwe y’eka n’abasyakulhu ibalhangira bathi abo bakasondolha bane ndeke bunyakirimu. Kandi abosi bakatsomana eriyowa ly’abali ahisi sy’obuthoki bwabu. Kandi ng’emithwe y’eka eyiri ky’erileberyako kibuya, abasyakulhu nabu bakalhangira bathi abo bakasondolha bakabana obuwathikya omughulhu bawithe ebitsibu. (Yak. 2:15-17) Eryongera okw’ekyo, Yehova anzire abasyakulhu n’emithwe y’eka ibawathikya abandi erighendera  okwa bihano biwe aliwe ‘isibalhabaya oko myatsi eyabirihandikwa’ omwa Biblia.—1 Kor. 4:6, NW.

12-13. Ngoku kiri omwa Emisyo 6:20, ni mbaghane yahi eyiri ahakathi-kathi k’esyongwamirwa sy’emithwe y’eka n’esy’abasyakulhu?

¹² Aliwe hane embaghane nene ahakathi-kathi k’olhukwamirwa lhw’omusyakulhu n’olhw’omuthwe w’eka. Ng’eky’erileberyako, Yehova abiriha abasyakulhu b’omubiiri w’eribya batsweri, kandi abiribaha olhukwamirwa lhw’erilhusya omwa kithunga mw’abakolha-nabi abatheyisubamu.—1 Kor. 5:11-13.

¹³ N’okwa lhundi lhuhandi, Yehova abiriha emithwe y’eka y’obuthoki bulebe obo athe athaha abasyakulhu. Abiriha omuthwe w’eka y’obuthoki bw’erihira omw’eka yiwe mw’ebilhaghiro n’erilhangira athi bikaghenderawako. (Soma Emisyo 6:20.) Ng’eky’erileberyako, omuthwe w’eka awithe obughabe bw’erithwamu abaana biwe nga batholere ibathaha saha singahi. Kandi omuthwe w’eka awithe obuthoki bw’erisuyira abaana biwe bamalemwa erighendera okwa kilhaghiro ekyo. (Efe. 6:1) Nomwabine, omuthwe w’eka ow’olhwanzo, iniakendi tsuka erikanirania na mukali wiwe athali ahira omw’eka yiwe mw’ebilhaghiro; kundi nibya ababiri ni “mubiri mughuma.” *—Mt. 19:6.

14. (a) Ngoku kiri omu Mariko 10:45, busana naki kihikire Yehova erisombolha Yesu eribya muthwe w’ekithunga? (b) Akathunga Akakasondolha kawithe lhukwamirwaki? (Lebaya akasanduko “ Olhukwamirwa lhw’Akathunga Akakasondolha.”)

¹⁴ Erilhabira omwa ndongolya, Yehova mwaghulha engebe y’obuli mundu wosi oyuli omwa  kithunga, n’ey’owundi wosi-wosi oyukikiriraya Yesu. (Soma Mariko 10:45; Emib. 20:28; 1 Kor. 15:21, 22) Neryo kihikire Yesu oyuwahayo engebe yiwe ng’endongolya eribya imwasombolhwa eribya muthwe w’ekithunga. Kwesi Yesu ng’omuthwe wethu awithe obuthoki bw’erihiraho ebilhaghiro n’erilhangira athi obuli mundu, amaka, n’ekithunga kyosi bakabighenderako. (Gal. 6:2) Aliwe Yesu syali subulira okw’ihiraho ebilhaghiro lisa. Akathulisaya bunyakirimu kandi athwanzire.—Efe. 5:29.

15-16. Wuk’ighaki okwa bya mwali wethu Marley na mughalha wethu Benjamin bakabugha?

¹⁵ Bali bethu bakakanganaya ku basikirye Kristo omw’ighendera okwa busondoli obukahebawa n’abalhume abo abirisombolha eribatheya. Bali bethu bangyi bakalighirana n’ebya mwali wethu oyukahulhawamo Marley oyuwikere e Amerika akabugha. Akabugha athi: “Omo kwenene, ingye ng’omukali muthahibwa kandi nga dada, ngalhangira omwanya waghe omwa kithunga mwa w’obughuli. Mughulhu wosi ngalengaho eribya n’amalengekania awatholere okwa ndegheka y’obukulhu eyo Yehova abirihiraho. Aliwe mwira waghe na baghalha bethu omwa kithunga babirileka ekyo ikyanyolhobera kundi banyisikirye kandi bakakanganaya ku bakasima ebyo ngakolha.”

¹⁶ Baghalha bethu bakakanganaya ku basikirye endegheka ey’obukulhu omw’isikya bali bethu n’eribaha ekitsumbi. Mughalha wethu Benjamin oyuwikere e England, akabugha athi: “Ebya bali bethu bakasubiraya omwa mihindano n’amenge awabakakolesaya bakathulira n’erikangirirya, byabirinyeghesya bingyi. Omo kwenene omubiiri owabakakolha ni w’obughuli bunene kutsibu.”

17. Busana naki thutholere ithwasikya endegheka y’obukulhu?

¹⁷ Abosi omwa kithunga—abalhume, abakali, emithwe y’eka, n’abasyakulhu—bamayitheghererya n’erisikya endegheka y’obukulhu, omwa kithunga imukendibya obuholho. Kandi ekikulhu kutsibu, ikikendi leka Thatha wethu w’elhubulha ow’olhwanzo, Yehova, iniapipwa.—Esy. 150:6.