1. Ni bindu nga byahi ebyanga hamba okwa mibere omulhume angathwaliramu ab’eka yiwe?

OKW’IWE ekinywe “obukulhu” kikamanyisayaki? Abandi balhume, emibere bakathwaliramu bakali babu n’abaana babu yiseghemere okwa mirwa, ekalikya, kutse emibere bakuliramo. Lhangira ekyo mwali wethu Yanita oyuwikere omwa Yuropu akabugha, “Eyo ng’ikere, abandu bahathiremo amalengekania aw’erilhangira abakali mw’abahisi kandi ng’abatholere erithwalhwa mwa bakobe.” Na mughalha wethu Luke oyuwikere e Amerika akabugha athi, “Abandi bathatha bakakangiriraya abaana babu b’obulhume bathi abakali sibangaha erihano neryo isibaghendera okwa byabu.” Aliwe, amalengekania ayo syali hambangana n’emibere Yehova anzire abalhume ibakoleseryamo obukulhu bwabu. (Thasyalebaya na Mariko 7:13.) Neryo kwesi, omulhume ang’igha athi eribya muthwe w’eka mubuya?

2. Ni byahi ebya omuthwe w’eka atholere iniaminya, kandi busana naki?

² Omulhume eribya muthwe w’eka mubuya, atholere iniatsuka eriminya ebyo Yehova akamuyithaghako. Kandi atholere iniaminya ekyaleka Yehova iniahiraho endegheka y’obukulhu, kandi ngoku angagherererya eky’erileberyako kya Yehova na Yesu. Busana naki ni kikulhu omulhume eriminya ebyo? Kundi Yehova abiriha emithwe y’eka y’obuthoki bulebe, kandi anzire ibabukolesya ndeke.​—Lk. 12:48b.

3. Ebiri omwa 1 Abanya Korinto 11:3 bikathweghesayaki okwa bukulhu?

³ Soma 1 Abanya Korinto 11:3. Omulhondo oyu akakanaya okwa mibere Yehova abirithondekaniryamo erihiika liwe ery’omwa buhangwa bwosi. Obukulhu buli mw’ebindu bibiri bikulhu-bikulhu​—obuthoki n’eribya kw’olhukwamirwa. Yehova ya “muthwe,” kutse oyuwithe obuthoki obwosi, kandi abaana  biwe abosi​—abamalaika n’abandu​—bali kw’olhukwamirwa embere siwe. (Abar. 14:10; Efe. 3:14, 15) Yehova abiriyira Yesu mwa mukulhu w’ekithunga, aliwe Yesu ali kw’olhukwamirwa embere sya Yehova busana n’emibere akathusondoleramo. (1 Kor. 15:27) Kandi Yehova abiriha omulhume y’obuthoki oko mukali wiwe n’abaana biwe, aliwe omulhume ali kw’olhukwamirwa embere sya Yehova na Yesu busana n’emibere akathwaliramo eka yiwe.​—1 Pet. 3:7.

4. Ni buthoki bwahi obo Yehova na Yesu bawithe?

⁴ Kundi Yehova ya Muthwe w’erihiika liwe ery’omwa buhangwa bwosi, awithe obuthoki bw’erihiraho ebilhaghiro ebyo abaana biwe batholere ibaghenderako, kandi inialhangira athi bakabighenderako. (Isa. 33:22) Yesu nayu ng’omuthwe w’ekithunga ky’Ekikristayo, awithe obuthoki obw’erihiraho ebilhaghiro n’erilhangira athi bikaghenderawako.​—Gal. 6:2; Kol. 1:18-20, NW.

5. Ni buthoki bwahi obo omuthwe w’eka Omukristayo awithe, kandi bukasubulira hayi?

⁵ Nga Yehova na Yesu, omuthwe w’eka Omukristayo awithe obuthoki bw’erihiriraho ab’eka yiwe b’ebilhaghiro. (Abar. 7:2; Efe. 6:4) Aliwe obuthoki bwiwe bunawithe aho bukasubulira. Ng’eky’erileberyako, ebilhaghiro biwe bitholere ibyaseghemera okwa misingyi eyiri omwa Kinywe kya Nyamuhanga. (Emi. 3:5, 6) Kandi iyo ng’omuthwe w’eka syawithe obuthoki bw’erihiriraho abathe b’eka yiwe b’ebilhaghiro. (Abar. 14:4) N’ekindi, abaana biwe ab’obulhume n’ab’obukali bamabirikulha, bakalhua eka, bakalholha embere erimusikya, aliwe bakabya isibakiri ahisi sy’obuthoki bwiwe.​—Mt. 19:5.

6. Ni kyahi ekyaleka Yehova iniahiraho obukulhu?

⁶ Yehova ahiraho obukulhu kundi anzire eka yiwe. Ni kihembo erilhua okw’iyo. Obukulhu bukaleka erihiika lya Yehova iryakolongana omwa buholho n’omwa buyithondeke. (1 Kor. 14:33, 40) Ku kithalhue kikanganibwe ndeke nga nindi oyuwithe obuthoki, ambi erihiika lya Yehova simuli obuyithondeke n’obutseme. Ng’eky’erileberyako, omundu syangaminyire nga nindi oyutholere erithwamu eky’erighunzerera kandi nga nindi oyukendi lhangira athi likaghenderawako.

7. Ngoku kiri omwa Abanya Efeso 5:25, 28, Yehova mwanahangika abalhume ini b’erithabalha oko bakali?

⁷ Endegheka ya Nyamuhanga ey’obukulhu kyamabya ini kindu ekyuwene, busana naki munabwire abakali bangyi bakayowa bira babu ibabiribanubya n’eribathabalhako? Eki kikabya kundi abalhume bangyi bakagheghena ebihano bya Yehova ebihambire oko maka, ibathwamu erighendera okwa mirwa y’abandu. Kandi bangana kolha bakali babu ba nabi bakanza eryughuthya esyongumbu syabu ndebe esy’eriyitsomana. Ng’eky’erileberyako, omulhume angana thabalha oko mukali wiwe erianza erisikibwa kutse erianza erikangania abandi athi “nayu ni mulhume.” Angana lengekania athi syanga kaka mukali wiwe erimwanza, aliwe athi angana kolha ebyangaleka iniamusagha. Angana kolesya eky’erimusagha ekyo erianza erimuthabalhako. * Amalengekania n’emibere ng’eyi bikaleka abakali ibathahebwa ekitsumbi n’erisikya, ebindu ebya banatholere erihebwa, kandi ahukene n’ebyo Yehova anzire.​—Soma Abanya Efeso 5:25, 28.

8. Omulhume ang’igha athi eribya muthwe w’eka mubuya?

⁸ Omulhume angan’igha eribya muthwe w’eka mubuya omw’igherererya emibere  Yehova na Yesu bakakoleserayamo obuthoki bwabu. Thuthakania okwa mibere ibiri eyo Yehova na Yesu bakakanganaya, thwanalebya ngoku omuthwe w’eka angakangania emibere eyi akakolongana na mukali wiwe n’abaana biwe.

9. Yehova akakanganaya athi eriyikehya?

⁹ Eriyikehya. Yehova yuwithe amenge wosi; aliwe, akahulikirira amalengekania w’abaghombe biwe. (Enz. 18:23, 24, 32) Akalighira abali ahisi sy’obusondoli bwiwe eriha amenge oko mwatsi mulebe. (1 Bam. 22:19-22) Yehova ahikene, aliwe lino, syali lengekanaya athi ithwakolha ebindu ng’abandu abahikene. Omwakanya k’ekyo, akawathikaya abandu abathahikene abakamukolera. (Esy. 113:6, 7) Kandi, e Biblia yikahulha Yehova mwa “muwathikya.” (Ebr. 13:6; Esy. 27:9) Omwami Dawudi mwaligha ngoku angathokire omubiiri munene ogho ahebawa busana n’eriyikehya lya Yehova.​—2 Sam. 22:36, NW.

10. Yesu mwakangania athi eriyikehya?

¹⁰ Thalengekania n’okwa ky’erileberyako kya Yesu. Nomwanabya Mukama kandi Mukangirirya w’abigha biwe, mwanabya ebisandu byabu. Ni nzumwa yahi nguma eyaleka Yehova inialhangira athi omwatsi oyu akahandikawa omwa Biblia? Ahathe erithika-thika ahereraya obuli mundu imwamune n’emithwe y’eka eky’erileberyako ekilhangirikire ekyo banga kwama. Yesu iyuwene-wene mwabugha athi: “Nabiribaha ekiminyisyo, imwakolha ngoku nabiribakolera.” (Yn. 13:12-17) Nomwakine indi Yesu abya awithe obuthoki bunene, mwathanza erikolerwa. Omwakanya k’ekyo, mwakolera abandi.​—Mt. 20:28.

11. Ni kyahi ekya omuthwe w’eka mubuya ang’ighira okwa ky’erileberyako kya Yehova na Yesu eky’eriyikehya?

¹¹ Erisomo. Omuthwe w’eka angana kangania eriyikehya omwa nzira nyingyi. Ng’eky’erileberyako, akabya inianasi ngoku mukali wiwe n’abaana biwe sibahikene. Akahulikirira amalengekania w’ab’eka yiwe nomubangabya isibathalighirana na wiwe. Marley oyuwikere e Amerika akabugha athi: “Hakanayira ingye na mwira waghe ithwabya n’amalengekania awathasosene. Aliwe ngayowa iniakanyilhangira mwa w’omughaso kandi kw’anyisikirye kundi akanyibulhaya amalengekania waghe kandi inialengekania kugho kwa ndeke imwathwamu.” Eryongera okw’ekyo, omulhume oyuyikehirye  akabya inianayitheghekire erikolha emibiiri y’eka, nomukyangabya indi omwa bulhambu bw’ewabu emibiiri eyo yasibwe ng’emibiiri y’abakali. Ekyo kyangana kalha. Busana naki? Mwali wethu Rachel akabugha athi, “Ewethu eyo ngalhuire, omulhume amawathikya mukali wiwe eryoya ebindu kutse erikolha obuyonzo obw’eka, abataka n’abahughu bakayibulhaya kwenene nga ‘nina mulhume.’ Bakalengekanaya bathi mukali wiwe abirimuhamba.” Amalengekania ayo amabya iniakanyirire eyo wikere, wibuke ngoku Yesu mwanabya ebisandu bya bigha biwe, nomwakine indi omubiiri oyu abya akathwalhwa ng’ow’abakobe. Omuthwe w’eka mubuya akalengekanaya okwa byangakolha erileka mukali wiwe n’abaana biwe bayowe buholho, butsira eriyilengekaniako nga n’iyo alengire. Eryongera okw’iyikehya, ni wundi mubere wahi ogho omuthwe w’eka mubuya atholere iniabya nagho?

12. Olhwanzo lhukaleka Yehova na Yesu ibakolhaki?

¹² Olhwanzo. Ebyosi ebya Yehova akakolha biseghemere oko lhwanzo. (1 Yn. 4:7, 8) Omo lhwanzo akatsomana ebiyithawa byethu eby’obunyakirimu erilhabira omwa Kinywe kiwe​—e Biblia​—n’ekithunga kiwe. Akatsomana eriyowa lyethu omw’ithukakasya kw’athwanzire. Kandi ibbwa ebiyithawa byethu by’ekinyamubiri? Yehova “yukathuha ndeke-ndeke ebindu byosi eritsemerabyo.” (1 Tim. 6:17) Thwamasobya akathuhengulha, aliwe kandi iniabya inianathwanzire. Busana n’olhwanzo, Yehova mwathuhiriraho endegheka y’endongolya. Na Yesu athwanzire kutsibu eribya imwahayo engebe yiwe busana nethu. (Yn. 3:16; 15:13) Sihali ekyangathwa olhwanzo olho Yehova na Yesu bawithire abathaleghulha.​—Yn. 13:1; Abar. 8:35, 38, 39.

13. Busana naki ni kikulhu omuthwe w’eka erianza eka yiwe? (Lebaya akasanduko “ Omulhume Oyukatsuka Obutheke Angakolhaki Mukali Wiwe Erimusikya?”)

¹³ Erisomo. Obuli kindu kyosi ekya omuthwe w’eka akakolha kitholere ikyaseghemera oko lhwanzo. Busana naki ekyo ni kikulhu? Omukwenda Yoane akabugha athi: “Oyuthanzire mulikyabu [kutse eka yiwe] oyo abirilholhako, syanga thoka erianza Nyamuhanga oyo  athe athalholhako.” (1 Yn. 4:11, 20) Kwilhabirirya, omulhume oyuwanzire eka yiwe kandi oyuwanzire erigherererya Yehova na Yesu akatsomana eka yiwe bunyakirimu, omw’iyowa, na kinyamubiri. (1 Tim. 5:8) Akathendeka abaana biwe n’eribakunga. Kandi akalholha embere erigha erithwamu ebya ngaha Yehova y’olhukengerwa kandi ebyanga ghasira eka yiwe. Thulebaye ebindu ebyo kighuma okwa kighuma n’erilhangira omuthwe w’eka ng’angagherererya athi Yehova na Yesu.

14. Omuthwe w’eka akatsomana athi ebiyithawa by’eka yiwe eby’obunyakirimu?

¹⁴ Eritsomana ebiyithawa by’eka yiwe eby’obunyakirimu. Omw’igherererya Thatha wiwe, Yesu mwatsomana ebiyithawa eby’obunyakirimu ebya bakamukwama. (Mt. 5:3, 6; Mk. 6:34) Kuthya, ekikulhu okwa byosi ekyo muthwe w’eka atholere iniakolha ly’eritsomana eka yiwe bunyakirimu. (Ebi. 6:6-9) Akakolha eki omw’ilhangira athi iyo n’eka yiwe haghuma bakasoma n’erigha Ekinywe kya Nyamuhanga, erihindana, erithulha engulhu yuwene, n’erighumya n’erikamathya obughuma bwabu na Yehova.

15. Ni nzira nguma yahi eya omuthwe w’eka angakanganiryamu kw’atsomene eriyowa ly’ab’eka yiwe?

¹⁵ Eritsomana eriyowa ly’eka yiwe. Yehova mwakangania ndeke-ndeke kw’anzire Yesu. (Mt. 3:17) Yesu mwakangania ndeke-ndeke kw’anzire abakamukwama, omwa by’akolha n’eby’abugha. Nabu mubakangania ku bamwanzire. (Yn. 15:9, 12, 13; 21:16) Omuthwe w’eka angana kangania kwanzire mukali wiwe n’abaana biwe omwa by’akakolha, ng’erigha nabu e Biblia. Kandi atholere iniababwira kwabanzire kandi ku ni b’obughuli embere siwe, kandi kyamathokekana, iniabasima embere sy’abandi.​—Emi. 31:28, 29.

16. Ni kindi kyahi ekyo muthwe w’eka atholere iniakolha, kandi atholere iniayihighulha okuki?

¹⁶ Eriha ab’eka yiwe ebiyithawa by’ekinyamubiri. Yehova mwatsomana Abaisraeli kinyamubiri nibya n’omughulhu babya bakasuyirwa busana n’obuthowa bwabu. (Ebi. 2:7; 29:5) Namunabwire anemuthuha ebya thukayithagha kinyamubiri. (Mt. 6:31-33; 7:11) Na Yesu nayu mwaha abamukwama b’ebyalya. (Mt. 14:17-20) Kandi mwalhamya abangyi ababya balhwere. (Mt. 4:24) Omuthwe w’eka eritsemesya Yehova, atholere iniatsomana eka yiwe kinyamubiri. Aliwe hane eky’atholere iniayihighulhako. Syatholere akayihwerya omwa mibiiri akanza erisighika eka yiwe kikaleka akalemwa eritsomana eka yiwe bunyakirimu n’omw’iyowa.

17. Ni ky’erileberyako kyahi eky’erithendeka n’erikunga ekyo Yehova na Yesu babirihiraho?

¹⁷ Erithendeka. Yehova akathuthendeka n’erithukunga kundi anzire erithuwathikya. (Ebr. 12:7-9) Nga Thatha wiwe, omo lhwanzo Yesu akathendeka abali ahisi sy’obuthoki bwiwe. (Yn. 15:14, 15) Akabakunga aliwe omwa lhukeri. (Mt. 20:24-28) Anasi ku sithuhikene kandi ku thwangana sobya.​—Mt. 26:41.

18. Ni kyahi ekyo muthwe w’eka mubuya akabya inianibukire?

 ¹⁸ Omuthwe w’eka oyukagherereraya Yehova na Yesu akabya inianasi ngoku mukali wiwe n’abaana biwe sibahikene. Syali kalha oko mukali wiwe kutse abaana biwe. (Kol. 3:19) Omwakanya k’ekyo, akaghendera okwa musingyi owali omwa Abanya Galatia 6:1 n’erilengaho eribahengulha “omwa muthima mwolho,” inianibukire ngoku nayu syahikene. Nga Yesu, akaminya ngoku enzira eyuwene ey’erikangiriryamu ly’eribya eky’erileberyako ekyuwene.​—1 Pet. 2:21.

19-20. Bikahika okw’ithwamu, omuthwe w’eka angagherererya athi Yehova na Yesu?

¹⁹ Tsomana abandi wukathwamu. Yehova akathwamu ebikendi ghasira abandi. Ng’eky’erileberyako, mwathwamu erithuhangika, isi busana n’eriyighasira aliwe busana n’erianza thutsemere engebe. Sihali oyuwanga mukakire erihayo Mughalha wiwe busana n’ebibi byethu. Mwathwamu erihayo ekihongo ekyo nuku thughasirawe. Na Yesu nayu akathwamu ebikaghasira abandi. (Abar. 15:3) Ng’eky’erileberyako, mwathwamu erithendi lhuhuka nuku akangiriraye endeko y’abandu.​—Mk. 6:31-34.

²⁰ Omuthwe w’eka mubuya anasi ngoku ekighuma ky’okwa bindu ebikalire eby’atholere erikolha ly’erithwiramu eka yiwe, kandi akalhangira ekyo mwa lhukwamirwa olhulithohire. Akalengaho eriyihighulha okw’ithwamu kitura muthwe kutse erikwamana n’eriyowa liwe. Omwakanya k’ekyo, akalighira Yehova erimuthendeka. * (Emi. 2:6, 7) Omwa nzira eyo, iniakendi lengekania okw’ighasira abandi, butsira eriyighasira.​—Fil. 2:4.

21. Thukendisya kania okuki omo mwatsi owakakwamako?

²¹ Yehova abiriha emithwe y’eka y’olhumimbi olhukalire, kandi bali kw’olhukwamirwa omwa mibere bakalhuberererayamo. Aliwe omulhume amalengaho erighendera okwa ky’erileberyako kya Yehova na Yesu, iniakendibya muthwe w’eka mubuya. Kandi na mukali wiwe amaberererya olhukwamirwa lhwiwe, obutheke obo imukendibya etseme. Omukali muthahibwa atholere inialhangira athi obukulhu, kandi ni bitsibu byahi eby’angabana? Omwatsi owakakwamako akendi subirya ebibulyo ebyo.