1. Bikahika okwa w’eringira nayu omwa butheke, ni bibulyo byahi ebyo mwali wethu omuhuru atholere iniayibulya?

ABAKRISTAYO abosi bali ahisi sy’obusondoli obuhikene obwa Yesu Kristo. Aliwe, omukali Omukristayo akabya akathahibwa akabya ahisi sy’obusondoli bw’omulhume oyuthahikene. Mughulhu mungyi ekyo sikyolho. Neryo akalengekania okw’isondekania ow’eringira nayu omwa butheke oyutholere, ni kibuya eriyibulya ebibulyo bino: ‘Ni byahi ebikakanganaya ngoku mughalha wethu oyu akendibya muthwe w’eka oyuwene? Akanahira eby’obunyakirimu by’embere omo ngebe yiwe? Byamabya ikwabithe bithya, ni kyahi ekyanga leka ingalengekania indi akendi syathoka erisondolha ndeke eka yethu bunyakirimu nabirimuherukira?’ Nibya kandi mwali wethu atholere iniayibulya na bino: ‘Ni mibere yahi eyo ngawithe eyikendi syaghasira obutheke bwethu? Ngana ghumisirizaya kandi ngane mwenge? Nganawithe obughuma obughumire na Yehova?’ (Omu. 4:9, 12) Etseme eya omukali akabana abiringira omwa butheke yikana seghemera okw’ithwamu eryo akolha athali athahibwa.

2. Omwa mwatsi ono thukendi kania okuki?

² Esyomiliyoni sy’abali bethu Abakristayo babirihiraho eky’erileberyako ekyuwene eky’erighondera bira babu. Batholere ibasimwa busana n’ekyo! Thukatsema thukakolha na bakali abathaleghulha aba thukakolera Yehova! Omo mwatsi ono, thukendi kania okwa by’erisubirya okwa bibulyo bisathu bino: (1) Ni bitsibu nga byahi ebyo abakali bathahibwa bangabana? (2) Ni kyahi ekikaleka omukali iniathwamu erighondera mwira wiwe? (3) Ni byahi ebihambire okw’ighondera ebyo abiba Abakristayo n’abakali bathahibwa bang’ighira okwa ky’erileberyako kya Yesu, Abigaili, na Maria, mama wa Yesu?

3. Busana naki sihali obutheke obuhikene?

³ Obutheke ni kihembo ekihikene erilhua oku Nyamuhanga, aliwe abandu sibahikene. (1 Yn. 1:8) Ky’ekikaleka Ekinywe kya Nyamuhanga ikyabwira abali omwa butheke ngoku bakendi bana ebitsibu ebikakanibawako nga “amalighe omo mubiri.” (1 Kor. 7:28) Thuthalebya ebitsibu birebe ebyo mukali muthahibwa angabana.

4. Busana naki omukali anganayowa nga ni ryathwako eribugha indi aghondere mwira wiwe?

⁴ Obundi emibere omukali akuliramu yangana leka inialengekania athi erighondera mwira wiwe ni ryathwako. Marisol oyuwikere e Amerika akabugha athi, “Eyo nakulira, mughulhu mungyi abakali ibakabwirawa indi batholere ibingana n’abalhume omwa buli kindu. Nganasi ngoku Yehova abirihiraho endegheka y’obukulhu kandi ngoku abakali batholere ibaghondera bira babu, aliwe nabu ibanasikibirwe. Aliwe kikanakalha eribya n’amalengekania awatholere owahambire okwa bukulhu busana n’amalengekania w’ekihugho.”

5. Ni malengekania wahi awathaseghemere okwa masako aw’abandi bawithe okwa bakali?

⁵ Okwa lhundi lhuhandi, omukali anganathahibwa n’omulhume oyukalengekanaya athi abakali ni bandu b’ahisi. Mwali wethu oyukahulhawamo Ivon oyuwikere e South America akabugha athi, “Ewethu, abalhume babakatsuka erirya abakali imubalya. Abaana b’obukali batholere ibatsumba n’erikolha obuyonzo, kandi mama na bali biwe batholere ibakolera abaana b’obulhume, kandi bakabwirawa indi ni ‘bakama omo nyumba.’” Mwali wethu oyukahulhawamo Yingling oyuwikere omwa Asia akabugha athi: “Omwa mubughe wethu mune akasimo akakamanyisaya kathi abakali sibatholere bakathunga amenge manene kutse eribya n’ebya bakayithokera eby’amani. Omubiiri wabu ly’erikolha emibiiri yosi ey’eka, kandi sibali lighirawa eribwira bira babu ekyabu kirengekanio.” Omulhume oyukaghendera okwa malengekania awathe kanganaya olhwanzo kandi awathaseghemere okwa Biblia ng’aya, akaleka engebe iyakalira mukali wiwe, akabya iniamalemwa erigherererya Yesu, kandi syali tsemesaya Yehova.​—Efe. 5:28, 29; 1 Pet. 3:7.

6. Ni byahi ebyo abakali bathahibwa batholere ibakolha erighumya obughuma bwabu na Yehova?

⁶ Ngoku kiri omwa mwatsi wahanyuma, Yehova anzire abalhume Abakristayo ibatsomana amaka wabu bunyakirimu, omw’iyowa, na kinyamubiri. (1 Tim. 5:8) Nomwakine indi bali bethu bathahibwe bawithe bingyi by’erikolha, obuli kiro batholere ibabana obuthuku obw’erisoma Ekinywe kya Nyamuhanga n’erikighaniryako n’erisaba Yehova erilhua okwa muthima. Eki kyangana kalha. Abakali abathahibwa bawithe bingyi eby’erikolha, neryo banganayowa bathi sibawithe obuthuku kutse akaghalha k’erikolha ebindu ebyo, aliwe ni kikulhu ibo erihiraho obuthuku bw’eribikolha. Busana naki? Kundi Yehova anzire obuli mughuma w’okw’ithwe iniayithungira obughuma obukamathire haghuma nayu.​—Emib. 17:27.

7. Ni kyahi ekikendi leka ikyolhobera omukali erighondera mwira wiwe?

⁷ Ni kwenene, kyangana yithaghisya omukali erihiraho akaghalha erithoka erighondera mwira wiwe oyuthahikene. Aliwe omukali ikikendi mwolhobera eriberererya olhukwamirwa olhwa Yehova abirimuha amayitheghererya n’eriligha esyonzumwa esiseghemere okwa Masako esikaleka iniabya iniatholere erighondera mwira wiwe.

8. Ngoku kiri omwa Abanya Efeso 5:22-24, busana naki omukali Omukristayo akathwamu erighondera mwira wiwe?

⁸ Omukali Omukristayo akathwamu erighondera mwira wiwe kundi ekyo kya Yehova  akabugha athi akole. (Soma Abanya Efeso 5:22-24.) Ayikethere Thatha wiwe w’elhubulha, kundi anasi ngoku ebyosi eby’akathusaba athi thukole biseghemere oko lhwanzo, kandi ngoku syanga musaba erikolha ebyo athe angathoka.​—Ebi. 6:24; 1 Yn. 5:3.

9. Ni byahi ebikabya mwali wethu Omukristayo amaghondera mwira wiwe?

⁹ Ekihugho kikahira omwa bakali mw’omuhwa w’erigheghena ebihano bya Yehova n’erilhangira omwatsi w’erighondera abandi nga ni ryathwako. Abakakulha-kulhanaya amalengekania ng’aya sibasi Nyamuhanga wethu w’olhwanzo. Yehova syangaha bali biwe ab’obughuli b’ekihano ekyangaleka ibalhangirwa mo bahisi. Mwali wethu oyukahiraho akaghalha eriberererya olhukwamirwa olho Yehova abirimuha akaleka omw’eka yiwe imwabya obuholho. (Esy. 119:165) Iyo, mwira wiwe, n’abaana abosi bakaghasirawa.

10. Ebyo Carol abugha bikathweghesayaki?

¹⁰ Omukali oyukaghondera mwira wiwe oyuthahikene, akakanganaya ngoku anzire Yehova oyukaha abandi b’obuthoki kandi kw’amusikirye. Carol oyuwikere e South America akabugha athi, “Nganasi ngoku mwira waghe angana sobya, kandi nganasi ngoku emibere nga muthwaliramo akasobya kikakanganaya ngangatsomene bungahi obughuma bwaghe na Yehova. Neryo ngalengaho erighondera mwira waghe kundi nganzire eritsemesya Thatha waghe w’elhubulha.”

11. Ni kyahi ekikawathikaya mwali wethu Aneese erighanyira, kandi thwanga mwighirakoki?

¹¹ Kyangana kalira omukali erisikya n’erighondera mwira wiwe amayowa athi mwira wiwe syali tsomana eriyowa liwe n’ebikamulhuma. Lhangira ekyo mwali wethu muthahibwa oyukahulhawamo Aneese akakolha ekyo kikabya. Akabugha athi: “Ngalengaho erithendi hithana. Ing’ibuka ngoku ithwe bosi thukasobaya. Ekilhubirirwa kyaghe ly’erighanyira ngoku Yehova akakolha. Namaghanyira, ngabana erithekana.” (Esy. 86:5) Omukali oyukaghanyira kikamwolhobera erighondera mwira wiwe.

12. Ni by’erileberyako byahi ebiri omwa Biblia?

¹² Abandi bakayowa bathi omundu oyukaghondera obuthoki akabya iniamayolhobererya. Aliwe amalengekania ayo syahikire nahake.  Omwa Biblia muli eby’erileberyako bingyi eby’abandu abaghondera obukulhu kandi nibya ibanawithe amaaka. Thulebaye ebyo thwang’ighira oku Yesu, Abigaili, na Maria.

13. Busana naki Yesu akaghondera Yehova? Soborera.

¹³ Yesu akaghondera Yehova, kandi erikolha ekyo si bugha indi syawithe eky’asi. Esyongangirirya siwe esyolhobire kandi esilhangirikire sikakanganaya ngoku aby’awithe amenge manene kutsibu. (Yn. 7:45, 46) Yehova abya inianasi ngoku Yesu awithe amaaka manene kutsibu kyamaleka iniamulighira erikolha haghuma nayu akahangika. (Emi. 8:30; Ebr. 1:2-4) Kandi eritsuka aho Yesu akathalhubukira, Yehova abirimuha ‘ehamuli yosi omwa lhubulha n’okwa kihugho.’ (Mt. 28:18) Nomwakine indi Yesu awithe amenge manene, akabya inianemusaba Yehova y’obusondoli. Busana naki? Kundi anzire Thatha wiwe.​—Yn. 14:31.

14. Abiba bang’ighaki (a) okwa mibere Yehova akathwaliramu abakali? (b) okwa biri omwa Emisyo 31?

¹⁴ Ekyo abiba bang’igha. Yehova eribugha athi abakali ibaghondera bira babu si bugha indi akalhangira abakali ng’abahisi okwa balhume. Yehova iyuwene-wene abirikangania eki kya ndeke omw’isombolha abakali erisyathabalha haghuma na Yesu. (Gal. 3:26-29) Yehova abirikangania kw’ayikethere Mughalha wiwe akamuha obuthoki. Kuthya, omulhume w’amenge akaha mukali wiwe y’obuthoki bulebe. Ekinywe kya Nyamuhanga kikabya kikakania okwa lhukwamirwa lhw’omukali omughenge kikabugha kithi angana lhabirira emibiiri y’eka, iniaghulha eririma n’eririsugha, kandi iniakolha eby’obusubure. (Soma Emisyo 31:15, 16, 18.) Si mukobe oyuthawithe obughabe bw’eriha ekirengekanio kiwe. Aliwe, mwira wiwe akamuyikethera n’erihulikirira amalengekania wiwe. (Soma Emisyo 31:11, 26, 27.) Omulhume amakangania mukali wiwe y’erisikya ng’eryo, mukali wiwe iniakendi tsemera erimughondera.

15. Ni kyahi ekyo abakali bang’ighira okwa ky’erileberyako kya Yesu?

¹⁵ Ekyo abakali bathahibwa bang’igha. Nomwakine indi Yesu abirikolha bingyi, syali yowa erighondera Yehova nga ni ryathwako. (1 Kor. 15:28; Fil. 2:5, 6, NW) Kuthya omukali omughenge oyukakwama eky’erileberyako kya Yesu, syali yowa erighondera mwira wiwe nga n’ibya w’ahisi. Akasighika mwira wiwe butsira kundi amwanzire lisa aliwe kundi anzire Yehova kandi amusikirye.

16. Ngoku kiri omu 1 Samweli 25:3, 23-28, ni bitsibu byahi ebyo Abigaili abana? (Lebaya ekisasani ky’okwa kidipa.)

¹⁶ Abigaili abya awithe mwira wiwe oyukahulhawamo Nabali. Nabali abya mukurungu, ow’emiyiheko, kandi omulhume oyuthesima. Nomwabine, Abigaili mwathasondekania enzira eyikabya nga ni nyolho ey’erilhua omwa butheke bwiwe. Anganathwiremo eriyihunira neryo inialeka Dawudi n’abalhume biwe ibitha mwira wiwe. Omwakanya k’ekyo, mwayira ebyo akakolha eritheya Nabali haghuma n’ab’eka yiwe. Thalengekania okwa buthubaha obo Abigaili akanganaya akahikira abasirikali 400 n’erikania na Dawudi inianamusikirye. Nibya abya inianayitheghekire eritswebwa busana n’ebyo mwira wiwe akolha. (Soma 1 Samweli 25:3, 23-28.) Dawudi mwalhuaho iniaminya ngoku Yehova alyakolesaya omukali muthubaha oyu erimuhabulha n’erimubalya okw’ikolha ekibi ekikalire.

17. Omwatsi wa Dawudi na Abigaili ang’eghesya abiba baki?

¹⁷ Ekyo abiba bang’igha. Abigaili abya mukali w’amenge. Omwa menge, Dawudi mwahulikirira erihabulha liwe. Ekyo mukyaleka iniayihighulha okw’ibyako olhubanza lhw’eryutha omusasi. Kuthya, omulhume ow’amenge akatsuka erighanirya okwa kirengekanio kya mukali wiwe akathwamu oko myatsi mikulhu-mikulhu. Obundi amalengekania wa mukali  wiwe inianganaleka iniayihighulha okw’ithwamu nabi.

18. Abakali bathahibwa bang’ighaki okwa ky’erileberyako kya Abigaili?

¹⁸ Ekyo abakali bathahibwa bang’igha. Omukali oyuwanzire Yehova n’erimusikya anganaghasira eka yiwe, mwira wiwe nomwangabya isi Mwema wa Yehova kutse isyakikolera Yehova. Syali sondekenaya esyonzumwa esithaseghemere okwa masako erianza erilhua omwa butheke biwe. Omwakanya k’ekyo, omw’isikya n’erighondera mwira wiwe, akalengaho erihira omo mwira wiwe mw’omuhwa w’erigha oku Yehova. (1 Pet. 3:1, 2) Mwira wiwe nomwangaghana erikolera Yehova, Yehova akatsema akalhangira ku ni mwowa kandi ku ni muthaleghulha.

19. Omukali syatholere akowa mwira wiwe omwa mibere yahi?

¹⁹ Aliwe omukali Omukristayo oyukaghondera mwira wiwe syanga musighika amamubwira athi akole ekindu ekikathwa ebihano kutse emisingyi ye Biblia. Ng’eky’erileberyako, thubughe thuthi mwira wa mwali wethu oyuthe mwema iniamubwira athi abughe amabehi, ayibe, kutse asangire omwa kindi kindu ekithaseghemere okwa masako. Abakristayo abosi, imwamune n’abali bethu abathahibwa, Yehova Nyamuhanga ya batholere ibowa kwilhaba owundi mundu wosi-wosi. Mwali wethu amasabwa erikolha ekindu ekikathwa emisingyi ye Biblia, atholere iniaghana, iniasoborera kandi inianasikire ekikaleka iniaghana erikolha ekya mwira wiwe akabugha athi akole.​—Emib 5:29.

20. Thukaminya thuthi ngoku Maria abya awithe obunywani obughumire na Yehova?

²⁰ Maria abya awithe obunywani obughumire na Yehova. Ahathe erithika-thika abya asi ndeke Amasako. Omw’ikanirania liwe na Elizabeti, mama wa Yoane Mubatizya, Maria mwakania okwa biri omwa Masako w’Ekihebrania emirundi eyilhabire oku 20. (Lk. 1:46-55) Kandi thalengekania n’oku kino: Nomwakine indi Maria abya iniabirisimolibwa kutse eriyasungwa na Yozefu, omumalaika wa Yehova mwathatsuka erihika oku Yozefu. Omumalaika mwatsuka erikania na Maria n’erimubwira ngoku akendi butha Mughalha wa Nyamuhanga. (Lk. 1:26-33) Yehova abya inianasi Maria ya ndeke kandi inianayikethere ngoku Maria akendianza n’eritsomana Mughalha wiwe. Kandi  ahathe erithika-thika, Maria mwalholha embere inianawithe obughuma obughumire na Yehova nibya Yesu iniabiriholha n’erighenda elhubulha.​—Emib. 1:14.

21. Abiba bang’ighaki okwa bya Biblia yikabugha oku Maria?

²¹ Ekyo abiba bang’igha. Omulhume w’amenge akatsema mukali wiwe amabya iniasi ndeke Amasako. Ekyo sikirileka akubaha erilengekania athi mbwino mukali wiwe akanza eribya muthwe w’eka. Akaminya ngoku omukali oyuwasi ndeke e Biblia n’emisingyi yayu akendi wathikya ndeke eka yiwe. Nomwabine, omukali nomwangabya iniasomire kwilhaba mwira wiwe, ni lhukwamirwa lhw’omulhume erisondolha eka yiwe omw’iramya ly’eka n’omwa yindi mibiiri y’ekiteokrasi.​—Efe. 6:4.

22. Abakali bathahibwa bang’ighaki oku Maria?

²² Ekyo abakali bathahibwa bang’igha. Omukali atholere iniaghondera mwira wiwe, aliwe ni lhukwamirwa lhwiwe ng’omukali eriyitsomana obunyakirimu. (Gal. 6:5) Busana n’ekyo, atholere iniahiraho obuthuku obw’eriyeghesya n’erighanirya. Ekyo ikikendi leka iniabya iniananzire Yehova n’erimusikya kandi iniabana etseme omw’ighondera mwira wiwe.

23. Abakali abakaghondera bira babu banga yighasira bathi, erighasira eka yabu, n’ekithunga?

²³ Abakali abakaghondera bira babu busana n’erianza Yehova bakabana obutseme bunene n’erithekana kwilhaba abakaghana endegheka ya Yehova ey’obukulhu. Bakabya ky’erileberyako oko bandi balhume n’abakali. Bakaleka omw’eka n’omwa kithunga imwabya obuholho. (Tito 2:3-5) Munabwire, abangyi b’okwa bakakolera Yehova buthaleghulha ni bakali. (Esy. 68:11) Ithwe bosi, abalhume n’abakali, thunawithe olhukwamirwa lhukulhu omwa kithunga. Omwatsi owakakwamako akendi kangania obuli mughuma w’okw’ithwe ng’angaberererya athi olhukwamirwa olho.