1. Ni mubere wahi mubuya owathukalhangira omwa bandu ba Yehova?

 KERA, e Biblia muyalhaghulha ngoku abandu ba Nyamuhanga banga yihereyo omwa mubiiri wa Yehova ahisi sy’obusondoli bwa Mughalha wiwe. (Esy. 110:3) Ahathe erithika-thika, obuminyereri obo bunemubererera munabwire. Obuli mwaka, abaghombe ba Yehova ab’omuhwa bakahayo esyomiliyoni sy’esyosaha omwa mubiiri w’erithulira. Bakakolha omubiiri oyu omw’iyihayo kandi sibali thuhawa. Kandi bakahiraho obuthuku bw’eriwathikya abikirirya balikyabu kinyamubiri, omw’iyowa, na bunyakirimu. Baghalha bethu abakasondolha bakakolesaya obuthuku bunene erithegheka ebitsweka by’emihindano n’eribungira abikirirya balikyabu. Ni kyahi ekikathuhira mw’omuhwa w’erikolha omubiiri wosi oyu? Lhw’olhwanzo​—olhwanzo olhwa thuwithire Yehova n’abaliranwa bethu.​—Mt. 22:37-39.

2. Ngoku kiri omwa Abanya Roma 15:1-3, ni ky’erileberyako kyahi ekya Yesu ahiraho?

² Yesu mwahiraho eky’erileberyako ekyuwene omw’ihira ebiyithawa by’abandi by’embere okwa biwe. Thunemulengaho ngoku thwanga thoka erimugherererya. (Soma Abanya Roma 15:1-3.) Abakamugherereraya bakendi syaghasirwa. Yesu mwabugha athi: “Erihithya likaletha obutseme kwilhaba erihebwa.”​—Emib. 20:35.

3. Omo mwatsi ono thukendi kania okuki?

³ Omo mwatsi ono, thukendi lebya ebighuma by’okwa bya Yesu ayiferezaya busana n’erikolera abandi kandi ithwalebya  ngoku thwanga gherererya eky’erileberyako kiwe. Kandi thukendi lebya ngoku thwang’ongera eriyisunza lyethu ly’erikolera bandi.

4. Yesu mwahira athi ebiyithawa by’abandi by’embere okwa biwe?

⁴ Yesu mwayihayo nibya n’omughulhu aby’alhuhire. Thalengekania okwa kya Yesu akolha omughulhu abandu bangyi basa eyali iniane okwa kithwe, obundi hakuhi ne Kapernaumu. Bwabya ibwabirikera Yesu inianemusaba. Atholere eribya iniabya iniabirilhuha kutsibu, aliwe abere alhangira endeko y’abandu, mwakwira abera n’ababya balhwere bw’obulighe ababya omo ndeko eyo. Mwathasubulira okw’ibalhamya lisa aliwe kandi mwalhabya omughuma w’okwa mikania eyikahumulikanaya eyabirithalhabibwa​—Erikangirirya ly’okwa Kithwe.​—Lk. 6:12-20.

5. Emithwe y’eka bakagherereraya bathi omubere wa Yesu ow’eriyihayo omughulhu balhuhire?

⁵ Ngoku emithwe y’eka banemugherererya Yesu. Thalengekania oku kino: Omuthwe w’eka inialhua okwa mubiiri iniabirilhuha kutsibu. Nomwakine indi anemwanza athi Eriramya ly’Eka lirekendibyayo omw’igholho eryo, aliwe iniasaba Yehova y’akaghalha k’erisondolhalyo. Yehova iniasubirya omusabe wiwe, neryo ibathunga eriramya ly’eka nga buli kiro. Abaana ibakend’igha erisomo likulhu omw’igholho eryo, ni bugha ambu, okwa babuthi babu, emyatsi y’obunyakirimu y’abakahira embere.

6. Iha eky’erileberyako ekikakanganaya ngoku Yesu mwahayo obuthuku bwiwe eriwathikya abandi.

⁶ Yesu iniakathungira abandi b’obuthuku. Thathera akasasani Yesu nga mwayowa athi akaminya ngoku munywani wiwe ya Yoane Mubatizya babirimuthwako omuthwe? Yesu atholere eribya imwakwa obulighe bunene kutsibu. E Biblia yikabugha yithi: “Omughulhu Yesu owa omwatsi [owahambire okwa lhuholho lhwa Yoane], mwalhuaho omwa bwathu, mwaya iyuwene ehandi ahathe bandu.” (Mt. 14:10-13) Thwangana yitheghererya ekyaleka inianza eribya iyuwene. Abandi bakananza ibabya ibobene omughulhu bali omwa bulighe bw’eriholerwa. Aliwe oku Yesu, ekyo mukithathokekana. Endeko nene y’abandu muyatsuka erihika omo mwanya oyo Yesu  isyali ahika mugho. Yesu mwakolhaki? Mwalengekania okwa biyithawa by’endeko y’abandu, kandi “mwakwirabo bulighe.” Mwalhangira ibakayithagha kutsibu erihumulikanibwa bunyakirimu, neryo mwalhuaho iniabawathikya. Nibya, “mwatsuka erikangiriryabo emyatsi mingyi.”​—Mk. 6:31-34; Lk. 9:10, 11.

7-8. Iha eky’erileberyako ekikakanganaya ngoku abasyakulhu b’olhwanzo bakagherereraya Yesu hakabya obuyithawa.

⁷ Ngoku abasyakulhu b’olhwanzo bakagherereraya Yesu. Thukasima kutsibu omubiiri ogho abasyakulhu abakayihayo bakakolha busana nethu! Abangyi omo kithunga sibali minya ebya basyakulhu bakakolha. Ng’eky’erileberyako, mulikyethu oyulhwere amayithagha obuwathikya obwa lhuba-lhuba, abali okwa Kathunga Akakakolongana n’Amathambiriro bakamwanguhira. Mughulhu mungyi ekiyithawa ng’ekyo kikabya omwa kathi k’ekiro! Aliwe busana n’erikwira mulikyabu oyuli omwa bitsibu y’obulighe, abasyakulhu banzwa abo, haghuma n’ab’omw’eka yabu, bakahira ebiyithawa by’omwikirirya mulikyabu oyo by’embere.

⁸ Kandi abasyakulhu bakasangira omwa by’obuhimbe bw’Ebisenge by’Obwami n’eyindi mibiiri ng’eriwathikya ahawire ekitsinduli. Kandi bakakolesaya obuthuku bunene bakathukangirirya, erithuhimba, n’erithuwathikya. Baghalha bethu abosi aba n’ab’omw’eka yabu, thutholere ithwabasima erilhua okwa muthima. Ambi Yehova inialhangira omuthima owabakakanganaya! Neryo kandi, ng’abandi balikyethu, abasyakulhu sibatholere bakaghemera olhuhandi lhughuma. Sibatholere bakahwerya obuthuku bwabu bwosi okwa by’ekiteokrasi kikaleka bakalekerania amaka wabu.

9. Ngoku kiri omwa Abanya Filipi 2:4, 5, ni malengekania wahi agho Abakristayo abosi batholere ibakulha-kulhania?

⁹ Soma Abanya Filipi 2:4, 5. Ni kwenene, ithwe bosi sithuli basyakulhu b’ekithunga, aliwe ithwe bosi thwangana gherererya omubere wa Yesu ow’eriyihayo. E Biblia yikabugha yithi “mwayiyira ng’omughombe.” (Fil. 2:7) Thalengekania ekyo nga kyanga thweghesyaki. Omughombe mubuya iniakendi sondekania ehighisa hy’eritsemeseryamu mukama wiwe. Iwe ng’omughombe wa Yehova kandi oyukakolera balikyethu, ahathe erithika-thika, iwukendianza eryongera eribya w’omughaso embere sya Yehova n’abalikyethu. Wangana kolha ekyo omw’ilengekania okwa menge ano.

10. Ni bibulyo byahi ebya thwanga yibulya?

¹⁰ Lebaya ndeke amalengekania wawu. Yibulhaye ebibulyo nga bino: ‘Ngayitheghekire bungahi eriyihayo eriwathikya abandi? Ng’eky’erileberyako, ngakolhaki namasabwa eribungira kutse eriyasiba na mughalha wethu oyukulire kutse erithwalha mwali wethu oyukulire okwa mihindano? Ngananguhirawa eriwathikya hakabya ekiyithawa kya bakayihayo erikolha obuyonzo ahakabya olhuhindano kutse erisugha Ekisenge ky’Obwami?’ Yehova akatsema thukahayo ahathe eriyikukumirira obuthuku bwethu n’ebya thuwitheko​—ebyosi ebyo thwayilhagha erimuha thukayihayo okw’iyo​—eriwathikya abandi. Thutholere ithwakolhaki thwamalhangira ah’eryuwania?

11. Erisaba lyanga kuwathikya lithi erikulha-kulhania omuthima w’eriyihayo?

¹¹ Saba Yehova erilhua okwa muthima. Thubughe thuthi iwalhangira ah’eryuwania bikahika okw’ibya n’omuthima w’eriyihayo, aliwe iwabulha omuhwa w’erikolha ekyo. Byamabya bithya, saba Yehova erilhua okwa muthima. Ibya w’okwenene. Bwira Yehova y’eriyowa lyawu kandi musabe akuhe omuthima “w’erianza n’amaaka w’eriyira eky’erikolha.”​—Fil. 2:13, NWT.

12. Ni kiyithawa kyahi ekya mughalha wethu omulere oyubatizibirwe angaberererya?

¹² Wamabya iwuli mughalha wethu omulere oyubatizibirwe, saba Yehova akuwathikaye wukulha-kulhanaye eriyisunza ly’erianza erikolha bingyi omwa kithunga. Omwa bindi bihugho, abasyakulhu ni banene okwa baghombe abawathikya, kandi abanene b’okwa baghombe abo bakulire omo myaka. Ekithunga kinemuyongera, thukayithagha baghalha bethu bangyi abalere erithuwathikya eritheya abandu ba Yehova. Wamabya iwunanzire erikolera ahosi-hosi aho wukayithaghisibawa, iwukendi tsema. Busana naki? Kundi iwukendi tsemesya Yehova, iwayikolera erina libuya, kandi iwabana etseme eyikasa busana n’eriwathikya abandi.

13-14. Ni byahi ebya thwanga kolha eriwathikya balikyethu? (Lebaya ekisasani ky’okwa kidipa.)

¹³ Ibya iwunemulebya eriminya ebiyithawa by’abandi. Omukwenda Paulo mwabwira Abaebrania athi: “Simwibirirawe erikolha ebibuya n’eriwathikania, kusangwa ebi biri ng’amahere awakatsemesaya Nyamuhanga.” (Ebr. 13:16) Ayo abya menge awuwene! Buthuku buke balithungire ebaruha eyi, Abakristayo e Yudea mubabya b’erisighania amanyumba, esyosuburu, n’abahughu babu abathikirirye ‘n’erisaghira okwa bithwe.’ (Mt. 24:16) Ahathe erithika-thika, okwa buthuku obo kyabya kikulhu ibo eriwathikania. Bamabya ibabya ibabiritsuka erighendera okw’ihabulha lya Paulo ery’eriwathikania, kyangabya imukyabolhobera erighenda-ghendania n’emibere mihyaka eyi omo ngebe.

¹⁴ Mughulhu mungyi balikyethu bangana  ghana erithubwira ebiyithawa byabu. Ng’eky’erileberyako, mwali wethu iniaholha, iniasigha mwira wiwe y’omwa bulighe. Mbwino mughalha wethu oyo akayithagha obuwathikya bw’ebyalya, etraspoti, kutse okwa mibiiri y’eka? Iniangana ghana erithubwira ekyosi-kyosi habw’erisagha eribya ng’amathusurusuthya. Aliwe iniangana sima kutsibu thukayira eky’erikolha erihayo obuwathikya obukayithaghisibawa. Sithutholere thukalengekania thuthi hane oyukendi muwathikya kutse thuthi oyuli omwa buyithawa akendi bera erithubwira ebiyithawa biwe. Yibulhaye, ‘Namabya omwa mibere ng’eyo, ni buwathikya bwahi obwa nanga sima?’

15. Erithoka eribya n’omuthima w’eriwathikya abandi, thutholere ithwakolhaki?

¹⁵ Leka kyolhobere abandi erikuhikira. Ahathe erithika-thika, omo kithunga kyenyu wunasi mw’abalikyethu abakabya ibanayitheghekire eriwathikya abandi. Sibali leka thukayowa nga thukabasurusuthaya. Thunasi ngoku thwangana bahikira thukayithagha obuwathikya kandi nethu ithukendianza eribya ng’ibo! Alan, oyuli omwa myaka eya 40, anzire iniabya oyo kikolhobera abandi erimuhikira. Akabya akalengekania okwa ky’erileberyako kya Yesu, Alan akabugha athi: “Yesu abya withe bingyi by’erikolha, aliwe abandu b’emyaka yosi ibakasa okw’iyo kandi ibayowa buholho erimusaba obuwathikya. Mubalhangira kwenene ini mulhume oyukabatsomana. N’omuthima waghe wosi nganzire ingakangania omubere owali ng’owa Yesu n’eriminywa ng’omundu oyo kikolhobera abandi erihikira, ow’olhwanzo, kandi oyutsomene abandi.”

16. Erighendera okwa biri omwa Esyonyimbo 119:59, 60 kyanga thuwathikya kithi erigherererya eky’erileberyako kya Yesu?

¹⁶ Sithutholere thukahwa amani thwamalemwa erigherererya Yesu ya ndeke-ndeke. (Yak.  3:2) Omwigha syanga thera ekindu kya ndeke-ndeke ng’omukangirirya wiwe. Aliwe omwigha akabya anemw’ighira okwa bisobyo biwe n’erilengaho erigherererya omukangirirya wiwe ngoku angathoka, iniakendi ghenda akuwania eby’akakolha. Kuthya, thwamaghendera okwa bya thuk’igha omw’iyeghesya lyethu, erilengaho eryuwania ahosi-hosi ahangabya ihasobire, ithwangana thoka erigherererya Yesu.​—Soma Esyonyimbo 119:59, 60.

17-18. Ithukendi ghasirwa thuthi thwamagherererya omubere wa Yesu ow’eriyihayo?

¹⁷ Omuthima wethu w’eriyihayo angana sighalira abandi. Omusyakulhu oyukahulhawamo Tim akabugha athi: “Thuwithe baghalha bethu abalere ababirikulha-kulhana n’erisombolhwa ng’abaghombe abawathikya​—abandi ni balere kutsibu​—eki kyabya kundi mubagherererya omuthima w’erianza erikolera abandi ogho balhangira omo bandi. Baghalha bethu abalere aba bakawathikaya ekithunga kyethu n’eryongera eriwathikya abasyakulhu.”

¹⁸ Thuli omwa kihugho ekyoswire mw’eriyitsomana. Aliwe abandu ba Yehova bali mbaghane. Omubere wa Yesu ow’eriyihayo abirithuhambako, kandi thwabirithwamu erikwama eky’erileberyako kiwe. Sithwanga thoka erimugherererya ndeke-ndeke, aliwe thwangana kwama olhughobe lhwiwe. (1 Pet. 2:21) Thukendibya thukakolha ngoku thwanga thoka erigherererya omubere wa Yesu ow’eriyihayo, nethu thukendi yilhangirira etseme ey’erisimwa na Yehova.