1. Busana naki iwasima e Biblia?

 KA THUKASIMA Yehova Nyamuhanga habw’erithuha e Biblia! Erilhabira muyo, akathuha erihabulha ery’amenge eryanga thuwathikya erighumira ndeke ebitsibu ebyo thukabana lino. Kandi akathuha amaha awuwenenga aw’obuthuku obukasa. Ekikulhu kutsibu, Yehova abirikolesya e Biblia eribisulha emibere yiwe mingyi. Thukabya thukaghanirya okwa mibere yiwe mibuyanga, emithima yethu yikahambawako kutsibu kandi kikaleka ithwayithunda hakuhi na Nyamuhanga wethu omw’ikulha-kulhania obunywani obughumire nayu.​—Esy. 25:14.

2. Ni nzira syahi muthina-muthina esyo Yehova abiriyibisuliramu oko bandu?

² Yehova anzire abandu ibamuminya. Kera, iniakayibisulha erilhabira omwa bilhotho, esyonzoli, n’erilhabira omwa bamalaika. (Emig. 12:6; Emib. 10:3, 4) Aliwe ibbwa, thwanga minyire thuthi omwatsi w’ebilhotho, esyonzoli, kutse ow’abamalaika kwathahandikwa? Ky’ekyaleka, Yehova iniathwamu athi abalhume ‘basake omo kitabu’ ebyo aby’anzire ithwaminya. (Yer. 30:2) Kundi ‘enzira ya Nyamuhanga w’okwenene yihikene,’ thwangana yikethera ngoku enzira eyakakaniranayamu nethu eyi y’enzira eyuwene kutsibu kandi eyikaghasa.​—Esy. 18:30.

3. Ni mwa nziraki Yehova mwalhangira athi e Biblia yikatheghibawa? (Isaya 40:8)

³ Soma Isaya 40:8. Ekinywe kya Nyamuhanga kyabiriha abalhume n’abakali abathaleghulha b’obusondoli obuwene ahabw’esyongumi sy’emyaka. Ekyo kyabirithokekana kithi? Kundi ibbwa nibya Amasako ahandikawa kera oko bindu ebikatsanda lhuba, neryo munabwire sihakiri n’ekighuma ky’okwa bisakango ebyakera. Aliwe Yehova mwalhangira athi Amasako abuyirire ayo akalhusibawamo esindi kopi. Nomwakine  indi abahandiki babya isibahikene, babya bayitheghirye kutsibu. Ng’eky’erileberyako, omusomi mughuma abere akakania okwa Masako w’Ekihebrania, mwahandika athi: “Kihikire eribugha thuthi sihali wundi mwatsi owakera ow’abirighenda akakopwa ndeke ng’Amasako ayo.” Neryo nomwakine indi hamabirilhaba buthuku, ebyakolesibawa eribya ibyangana tsanda lhuba, n’abahandiki eribya isibahikene, thwangana yikethera ngoku ebinywe ebyo thukasoma omwa Biblia munabwire w’amalengekania wa Mwinyeyo, Yehova.

4. Thukendi kania okuki omo mwatsi ono?

⁴ Yehova ya Nzuko ‘y’obuli lhusunzo lhubuya n’obuli lhusunzo lhuwene.’ (Yak. 1:17) E Biblia ni nguma y’okwa syonzunzo kutse ebihembo bibuyanga ebyo Yehova abirithuha. Ekihembo kikathubwira kindu kirebe oko yulyathuhakyo​—ng’athwasi bungahi kuthya n’ebiyithawa byethu. Kwabine bithya n’oku Yuwathuha e Biblia. Thukabya thukakubungulha ndeke ekihembo eki, thukaminya bingyi oku Yehova. Thukaminya ngoku athwasi ndeke kuthya n’ebya thukayithagha. Omo mwatsi ono, thukendi minya e Biblia nga yikakanganaya yithi eyisathu y’okwa mibere ya Yehova: amenge wiwe, obulingirirania bwiwe, n’olhwanzo lhwiwe. Thutsuke erilebya esyonzira esya Biblia yikakanganirayamu amenge wa Nyamuhanga.

5. Ni nzira yahi nguma eya Biblia yikakanganirayamu amenge wa Nyamuhanga?

⁵ Yehova anasi ngoku thukayithagha erihabulha liwe ery’amenge. Kandi ekihembo kiwe, e Biblia, kyoswiremo amenge wiwe. Erihabulha lye Biblia likahamba ndeke oko bandu. E Biblia yikahindulha esyongebe. Ebitabu bye Biblia eby’erimbere-mbere byabere bikahandikwa, Musa mwabwira abandu ba Nyamuhanga, Abaisraeli athi: “Si kinywe ky’emitenyo [olhutseghe-tseghe] busana nenyu; ni ngebe yenyu.” (Ebi. 32:47) Abaghendera oko Masako mubatsumulhwa n’eribana etseme. (Esy. 1:2, 3) Nomwakine indi Ekinywe kya Nyamuhanga kyahandikawa kera, kikinawithe amaaka w’eryuwania esyongebe sy’abandu. Ng’eky’erileberyako, okwa jw.org, omo myatsi eyikabera eryasa eya “E Biblia Yikahindulha Esyongebe,” wukendi banako ebyalholirweko bingyi eby’abandu ebikakanganaya ngoku namunabwire e Biblia yikinawithe amaaka w’eryuwania esyongebe sy’abakayiketherayo.​—1 Tes. 2:13.

6. Busana naki ithwabugha thuthi sihali ekindi kitabu ekiri nge Biblia?

⁶ Sihali kitabu ekiri ng’Ekinywe kya Nyamuhanga. Busana naki? Kundi Omwinye kitabu ekyo, Yehova Nyamuhanga, ni muthoki w’ebyosi, ni w’erikotha, kandi awithe amenge manene kutsibu. Ebindi bitabu bingyi bikalholha embere erisomwa nibya n’abinyebyo ibabiriholha, aliwe endambi yikahika erihabulha eririmo iryahwa okwa buthuku. Okwa lhundi lhuhandi, emisingyi y’amenge eyiri omwa Biblia yikakotha; yabirilhangirika ku yikaghasira abandu abakabyaho okwa buli buthuku bulebe. Omughulhu thukasoma ekitabu ekibuyirire ekyo n’erighanirya okwa bya thuk’igha, Mwinyekyo akakolesaya omulimu wiwe abuyirire ow’amaaka erithuwathikya erilhangira ngoku thwanga ghendera okw’ihabulha lye Biblia omwa ngebe yethu. (Esy. 119:27; Mal. 3:16; Ebr. 4:12) Kwesi, Omwinye Biblia oyuliho anzire kutsibu erikuwathikya. Ekyo ka kitholere ikyakuhiramo omuhwa w’erisoma e Biblia mughulhu wosi!

7. Kera, e Biblia muyawathikya yithi abandu ba Nyamuhanga eribya bughuma?

⁷ Eyindi nzira ey’embaghane eyo e Biblia yikakanganirayamu amenge wa Nyamuhanga ly’eriwathikya abandu biwe eribya bughuma. Abaisraeli babere babiringira omwa Kihugho  Ekyalhaghanisibawa, mubikalha omwa myanya muthina-muthina. Abandi mubabya basohi, abandi bamabya balisya, n’abandi bamalholha embere n’obulime. Abaisraeli ababya bikere omwa kindi kitsweka bangayisangire isibakitsomene abandi Abaisraeli balikyabo ababya omwa bindi bitsweka. Aliwe Yehova mwabahiriraho emitheghekere nuku babye bakahindana haghuma okwa mighulhu mirebe muthina-muthina erisyahulikirira Ekinywe kiwe kikasomwa n’erisoborerwa. (Ebi. 31:10-13; Neh. 8:2, 8, 18) Thathera akasasani Omuisraeli omuthaleghulha ng’atholere eribya iniabya akayowa athi akahika e Yerusalemu kandi obundi akalhangira esyomiliyoni sy’abaramya balikyabo erilhua omwa bitsweka muthina-muthina! Omwa nzira eyi Yehova mwawathikya abandu biwe erisighalha ibane bughuma. Enyuma waho, ekithunga ky’Ekikristayo kyabere kikatsuka, kyabyamo abalhume n’abakali ab’emibughe muthina-muthina kandi abalhuire omwa mibere mingyi muthina-muthina. Aliwe busana n’erianza Amasako, mubabya bughuma omw’iramya lya Nyamuhanga w’okwenene. Ababya bakikirirya banga yitheghererye Ekinywe kya Nyamuhanga omwa buwathikya bw’abaramya balikyabo n’omw’ihindana haghuma nabu.​—Emib. 2:42; 8:30, 31.

8. E Biblia yikawathikaya yithi abandu ba Yehova eribya bughuma munabwire?

⁸ Nyamuhanga wethu ow’amenge anemulholha embere erikangirirya n’erihira abandu biwe omwa bughuma erilhabira omwa Biblia. Y’engununuko  y’ebyalya by’obunyakirimu ebyo thukatsemera kutsibu. Mughulhu wosi thukahindana haghuma okwa mihindano, ey’ekithunga n’eminene-minene eriowa Amasako akasomwa, akasoborerwa, n’erikanibwako. Neryo kwesi e Biblia yikawathikaya kutsibu omw’iberererya ekighendererwa kya Yehova eky’erilhangira athi abaramya biwe bakamukolera omwa bughuma.​—Zef. 3:9.

9. Ni mubere wahi owakayithaghisibawa erithoka eriyitheghererya omwatsi we Biblia? (Luka 10:21)

⁹ Thulebaye obundi bwema obukakanganaya amenge wa Yehova. Mwalhangira athi ebitsweka bingyi by’Amasako bikahandikawa omo nzira y’eribya abandu abayikehirye basa ibabanga yitheghereryabyo. (Soma Luka 10:21.) Abandu ehosi-hosi bakasoma e Biblia. Ngoku omusomi mughuma abugha, e Biblia “siyirisubulira okw’ibya iky’ekitabu ekikasomawa kutsibu, aliwe kandi yikasomawa omw’iyitheya linene kwilhaba ebindi bitabu.” Aliwe abayikehirye basa babakayitheghereraya ndeke ebya yikabugha n’eribighenderako.​—2 Kor. 3:15, 16.

10. Ni yindi nzira yahi eyo e Biblia yikakanganirayamu amenge wa Yehova?

¹⁰ Hane eyindi nzira eyathukalhangiriramo amenge wa Yehova omwa Biblia. Yehova syalisubulira okw’ikolesya Amasako erithukangirirya ng’egurupu aliwe kandi akathusondolha n’erithuhumulikania obuli mundu ahabwiwe. Ithwe bosi thwangana lhangira ngoku Yehova athutsomene ahabwethu thukasoma Ekinywe kiwe. (Isa. 30:21) Omughulhu wuwithe ekitsibu, ni mirundi mingahi wabirilebya Amasako n’erisoma erisako erikabya nga lyahandikawa busana nawu? Nibya kandi ibbwa, e Biblia yikahika okwa mithima y’esyomiliyoni sy’abandu. Kikathokekana kithi iyo eribya mw’omwatsi owali okwa buthuku owahambene ndeke n’ebya wukayithagha? Eki kikathokekana kundi Omwinye e Biblia yuwithe amenge manene kutsibu omwa buhangwa bwosi.​—2 Tim. 3:16, 17.

11. Nyamuhanga mwakangania athi ku syawithe kasolholho e Biblia yikahandikwa?

¹¹ Obulingirirania ni wundi mubere wa Yehova. (Ebi. 32:4) Obulingirirania buhambene ndeke n’erithendibyamo akasolholho, kandi Yehova syawithe kasolholho. (Emib. 10:34, 35; Abar. 2:11) Iyo erithendibyamo akasolholho kikalhangirika omwa mibughe eyakolesibawa e Biblia yikahandikwa. Ebitabu 39 ebye Biblia eby’erimbere kutsibu-tsibu byahandikawa omwa Kiebrania, ekyo abandu ba Nyamuhanga babya bakayitheghererya okwa buthuku obo. Aliwe, aho ekighana ky’erimbere E.K. kyahikira, omubughe w’Ekigiriki abya iwakakolesibawa kutsibu, neryo ebitabu 27 eby’erighunzerera mubyahandikwa omwa mubughe oyo. Yehova mwathabugha athi Ekinywe kiwe kibye omwa mubughe mughuma musa. Munabwire, hakuhi esyobbiliyoni munani abali okwa kihugho bakabugha emibughe mingyi. Abandu bangaha n’aba bang’igha bathi oku Yehova?

12. Ni mwanzira yahi nguma Danieli 12:4 habiribererera omwa biro by’enyuma-nyuma bino?

¹² Erilhabira omu muminyereri Danieli, Yehova mwalhaghanisya athi okwa mughulhu w’enduli, “eriminya” ly’okwenene eriri omwa Biblia ‘lyangakanyirire.’ Abangyi banga yitheghereryelyo. (Soma Danieli 12:4.) Enzira nguma eyo eriminya ng’eryo lyabirikanyiriramo ly’erilhabira omw’ihindulha, erihulhukya, n’erighaba esyo Biblia n’ebitabu ebiseghemere kuyo. E Biblia ky’ekitabu ekyabirihindulhwa n’erighabwa kutsibu omwa kihugho kyosi. Okwa bundi buthuku, esyombindulha sye Biblia esikahulhukibawa omwa makolero w’abasuburi sikalire ebbeyi. Abandu ba Yehova babirihindulha e Biblia, eyosi kutse omwa bitsweka,  omwa mibughe eyilhabire oku 240, kandi owosi-wosi anganabanayo ahathe erithuha. Ekyo kyabirileka abandu erilhua omwa bihanda byosi ibaminya “engulhu yuwene y’obwami” enduli yithe yasa. (Mt. 24:14) Nyamuhanga wethu w’obulingirirania anzire eriha abandu bangyi ngoku kyanga thokekana b’akaghisa ak’erimuminya omw’isoma Ekinywe kiwe. Ekyo kiri kithya kundi athwanzire kutsibu.

13. Busana naki ithwabugha thuthi e Biblia yikakanganaya olhwanzo lhwa Yehova? (Yoane 21:25)

¹³ E Biblia yikaha obwema obukakanganaya omubere mukulhu owa Mwinyeyo​—olhwanzo. (1 Yn. 4:8) Thulebaye ebyo Yehova ahira omwa Biblia n’ebyo athahiramu. Abirithuha ebyo thukayithagha nuku thubye bughuma nayu, eribya omwa ngebe eyitsemire lino, n’erisyabana engebe y’erikotha. Aliwe kundi Yehova athwanzire, mwathathuhahamya omo myatsi mingyi eya thuthe thwanga thoka.​—Soma Yoane 21:25.

14. Ebiri omwa Biblia bikakanganaya olhwanzo lhwa Nyamuhanga omwa yindi nzira yahi?

¹⁴ Kandi Yehova mwakangania olhwanzo omw’ikanirania nethu omwa nzira y’ekitsumbi. Omwa Biblia, syali thuhamo ebilhaghiro bingahu-ngahu ebihambire okwa buli kandu omwa ngebe yethu. Omwakanya k’ekyo, akathuwathikaya erikolesya amaaka wethu w’erilengekania erilhabira omwa byalholirweko by’abandu, amaminyereri awakasisimulha, n’erihabulha erikakolha. Erilhabira omw’ebi, Ekinywe kya Nyamuhanga kikathuhiramo omuhwa w’erimwanza n’erimwowa erilhua okwa muthima.

15. (a) Yehova abirikangania athi kw’atsomene abakasoma Ekinywe kiwe? (b) Omwa kisasani, ni bahi abakanibweko omwa Biblia abo akasika akalere, mughalha wethu, na mwali wethu oyukulire bakaghanirayako? (Enz. 39:1, 10-12; 2 Bam. 5:1-3; Lk. 2:25-38)

 ¹⁵ E Biblia yikabisulha ngoku Yehova athutsomene kutsibu. Athi? Ekinywe kiwe kyoswiremo emyatsi eyikakanganaya eriyowa ly’abandu. Thwangana yitheghererya eriyowa ly’abakanibweko omwa Biblia kundi babya ‘bandu ng’ithwe.’ (Yak. 5:17) Ekikulhu kutsibu, omw’ilhangira emibere akolonganiramu n’abandu ng’ithwe, thukathoka eryongera eriyitheghererya ndeke ngoku “Omukama ni w’erighanyira kutsibu, kandi akaghanyira abandu.”​—Yak. 5:11.

16. Thuk’ighaki oku Yehova thukasoma omwa Biblia okwa bandu abasobaya? (Isaya 55:7)

¹⁶ E Biblia yikabisulha eyindi nzira eyo Yehova akakanganirayamu kw’athwanzire. Amasako akathukanganaya ngoku Nyamuhanga wethu syangathusighania thwamasobya. Abaisraeli mubahalya oku Yehova ngendo na ngendo; aliwe, babere bayisubamu erilhua okwa muthima, Nyamuhanga mwabaghanyira. (Soma Isaya 55:7.) Abakristayo b’omwa kighana ky’erimbere nabu mubaminya ngoku Nyamuhanga abanzire. Omw’isondolibwa n’omulimu, omukwenda Paulo mwabwira abikirirya balikyabo athi ‘babuyire n’erikirania’ omulhume oyuwabya iniabirikolha erilholho erikalire aliwe amayisubamu. (2 Kor. 2:6, 7; 1 Kor. 5:1-5) Ka kikahumulikanaya kutsibu eribya Yehova imwathaghana abaramya biwe habw’erithabya imubasobya! Omwakanya k’ekyo, omo lhwanzo mwabawathikya, amabahengulha, n’erithasyabayikubako. Akayilhagha erikolha ikyan’ekyo okwa bakolha-nabi abosi abakayisubamu munabwire.​—Yak. 4:8-10.

17. Busana naki e Biblia ni kihembo eky’embaghane?

¹⁷ Yehova abirithuha ekihembo ekyuwenenga. Busana naki Ekinywe kiwe ni ky’embaghane? Ngoku thwamabir’igha, e Biblia yikabisulha amenge wa Nyamuhanga, obulingirirania bwiwe, n’olhwanzo lhwiwe. Ekitabu eki kikakanganaya ngoku Yehova anzire ithwamuminya. Anzire ithwabya banywani biwe.

18. Thwanga kangania thuthi ku thukasima ekihembo ekyuwenenga kya Yehova, e Biblia?

¹⁸ Sithwanzire thukalenzya-lenzya ekihembo ekyuwenenga eky’Ekinywe kya Nyamuhanga. (Yak. 1:17) Kwesi thulhole embere erikangania ku thukasimakyo. Thwangana kolha ekyo omw’isaba Yehova y’obuwathikya thukasoma ebinywe byakyo ebibuyirire n’eribighaniryako. Thwamakolha ekyo, ithwangana yikethera ngoku Mwinyekyo akendi tsumulha akaghalha ako thukahiraho kandi ngoku thukendi bana “eriminya lya Nyamuhanga.”​—Emi. 2:5.