Mubayilhangirira Olhwanzo omo Mikolere
YOMARA n’abaghalha babu—Marcelo na Hiver—bikere omwa kyalhu kike e Guatemala. Yomara mwatsuka erigha e Biblia n’Abema ba Yehova, n’erighunzerera baghalha babu mubamuyiyungako. Aliwe habya ihane ekitsibu. Abosi basathu babya ndimethime, kandi isibasi erisoma ebihandiko by’esyondimethime. Neryo oyuwabya akabeghesya e Biblia iniakabasomera omwatsi owabak’igha n’amasako we Biblia awali omw’isomo.
Emihindano muyaletha ekindi kitsibu. Okwa lyabu isibangathoka erighenda olhughendo lhw’esyodakika 40 erihika okwa Kisenge ky’Obwami ekiri hakuhi. Aliwe balikyethu mubahiraho emitheghekere y’eribathwalha okwa mihindano yosi. Kandi babere bakatsuka erilhabya ebitsweka by’abigha okwa mihindano y’ahakathi-kathi k’ewiki, balikyethu ibakabawathikaya erihambira omwa muthwe ebitsweka byabu.
Omwa Kwakathano 2019, emihindano y’ekithunga muyatsuka erikolerwa omwa kyalhu kyabu. Okwa buthuku obo, mughalha wethu na mukali wiwe abatemburi b’omughulhu wosi babya ibabirihumira omwa kyalhu ekyo. Mubayihiriraho ekilhubirirwa ky’eryeghesya abosi basathu erigha erisoma n’erihandika ebihandiko by’esyondimethime, nomwakine indi mughalha wethu na mukali wiwe aba sibabya basi nga bakendi kikolha bathi. Mubaghenda omwa lebrale eriminya ebihambire okwa bihandiko by’esyondimethime n’erigha ngoku banga kangiriryabyo abandi.
Marcelo anemusubirya omwa mihindano
Omwa mezi make abosi basathu babya ibamabirithoka ndeke erisoma ebihandiko by’esyondimethime, kandi ekyo mukyaleka ibongera erikulha-kulhana bunyakirimu. a Lino Yomara, Marcelo, na Hiver banemukolha ng’abatemburi b’omughulhu wosi. Marcelo ni mughombe omuwathikya. Bakasangira omwa mibiiri y’obunyakirimu omwa wiki eyosi. Omuhwa wabu akasighalira abandi.
Abasathu abasubeneko aba bakasima kutsibu obuwathikya bw’ekithunga obw’olhwanzo. Yomara akabugha athi: “Eritsuka aho thukathabananganira n’Abema, thwabirikanganibwa olhwanzo lhw’okwenene olhw’Ekikristayo.” Marcelo akongera athi: “Thuwithe abanywani abuwene omwa kithunga kyethu, kandi thuli baghuma b’okw’ihiika ly’ekihugho kyosi ery’abalikyethu eriri bughuma kandi omo lhwanzo.” Yomara na baghalha babu bakakandira ekiro bakendi syalhangira ekihugho kikahindulhwamo paradiso.—Esy. 37:10, 11; Isa. 35:5.
a Ebrokyuwa eya Learn to Read Braille yakolhawa eriwathikya omundu oyuli ndimethime kutse oyuthelhangira ndeke erigha erisoma n’erihandika ebihandiko by’esyondimethime.
