1. Ni byahi ebya Yesu abwira abigha biwe ebihambire okwa buthuku bw’enduli, kandi mwabaghusa kw’akasali athiki?

 BIRO bike Yesu iniakisiya iniaholha, abbani b’okwa bigha biwe mubamubulya bathi: “Ekiminyikalho . . . ni kyahi, n’erihwererera ly’emighulhu eyi ni kiro kyahi kwehi?” (Mt. 24:3) Abigha abo bangabya ibabya bakabulha nga banga minyire bathi ngoku emighulhu y’Ekiyuda yikayahwaho. Omw’isubirya liwe, Yesu mwathasubulira okw’ikania okw’ihwaho ly’emighulhu y’Ekiyuda aliwe kandi mwakania ‘n’okw’ihwererera ly’emighulhu’ eyo thulimo lino. Bikahika okw’ihwererera ly’emighulhu, Yesu mwabugha athi: “Sihali mundu oyo wasi erihika ly’ekiro ekyo kutse endambi eyo nomubangabya bamalaika omo lhubulha, kutse Omughalha, nina Thatha yunasi iyuwene.” Neryo mwaghusa okwa bigha biwe bosi kw’akasali athi “mulebaye” kandi “mutheghaye.”​—Mk. 13:32-37.

2. Busana naki kyabya kikulhu okwa babyaho omwa mighulhu w’Ekiyuda erisighalha ibanatheghirye?

² Abakristayo Abayuda ab’omwa kighana ky’erimbere mubayithagha erisighalha ibanatheghirye; erilhama lyabu lyabya liseghemere okw’ekyo. Yesu mwabwira abigha biwe ebya batholere ibalindirira erithoka eriminya ngoku emighulhu y’Ekiyuda yikayahwaho. Yesu mwabugha athi: “Omughulhu mukalhangira e Yerusalemu iyinathimbirweko emilhondo y’amalhwa, neryo imwaminya erihera lyagho ko lyamabirihika hakuhi.” Oko ndambi eyo, babya batholere ibaghendera okw’ikunga lya Yesu kandi ‘ibasaghira oko bithwe.’ (Lk. 21:20, 21) Abaghendera okw’ikunga eri mubalhama Abaroma bakathoghothya e Yerusalemu.

3. Thukendi kania okuki omo mwatsi ono?

 ³ Munabwire thuli omwa biro by’enduli eby’omughulhu mubi ono. Neryo nethu thutholere ithwalholha embere eribya ithunemulebya n’eritheya. Omo mwatsi ono, thukendi kania ngoku thwangabya n’amalengekania awatholere thunemulebya ebikabya omo kihugho, ngoku thwanga yitheya, kandi ngoku thwanga kolesya ndeke obuthuku obusighereyo.

4. Busana naki thutholere ithwanza erilebya ebikabya omwa kihugho lino nga bikaberereraya bithi amaminyereri we Biblia?

⁴ Busana n’enzumwa mbuya, thwanzire ithwalebya ebikabya omo kihugho munabwire nga bikaberereraya bithi amaminyereri we Biblia. Ng’eky’erileberyako, Yesu mwathondogholha ebindu birebe erithuwathikya eriminya obuthuku obukakanganaya ngoku enduli y’omughulhu mubi wa Sitani yiri hakuhi. (Mt. 24:3-14) Omukwenda Petero mwathuhira mw’omuhwa w’erilebya ndeke eribererera ly’amaminyereri nuku erikirirya lyethu libye irinaghumire. (2 Pet. 1:19-21) Ekitabu ky’erighunzerera ekye Biblia kikatsuka n’ebinywe bino: “Omo kitabu eki musakire emyatsi eyo Yesu Kristo abisulha, eribisulha eri Nyamuhanga amuhalyo erikumbulira abaghombe biwe emyatsi eyikendi syabya lhuba.” (Erib. 1:1) Neryo thwanzire kutsibu eriminya ebikabya omo kihugho munabwire n’eriminya nga bikaberereraya bithi amaminyereri we Biblia. Kandi ithwangananza eribibwirako abandi.

5. Ni kyahi ekya thutholere ithwayihighulhako, aliwe ni kyahi ekya thutholere ithwakolha? (Lebaya n’ebisasani.)

⁵ Aliwe, thukakania okwa maminyereri we Biblia, thutholere ithwayihighulha okw’iteberezya ebikabya nga bikamanyisayaki. Busana naki? Kundi sithwanganza eribugha ekyosi-kyosi ekyanga ghunzaho obughuma omwa kithunga. Ng’eky’erileberyako, thwangan’owa abasondoli b’ekihugho bakakania okwa mibere banga ghunziramu akatabanguko kalebe n’erilethaho obuholho n’eriyisyandira. Omwakanya k’eriteberezya thuthi ebinywe ng’ebyo bikaberereraya obuminyereri obuli omwa 1 Abanya Tesalonika 5:3, thutholere ithwabya ithunasi eriyitheghererya eryabirihulhukibwa eririho lino. Thwamaseghemerya ebyo thukabugha okwa ebyo ekithunga kya Yehova kikahulhukaya, ithukendi leka ekithunga ikyasighalha ikine ‘bughuma omo bulengekania.’​—1 Kor. 1:10; 4:6.

6. Ni masomo wahi agho thwang’igha omu 2 Petero 3:11-13?

⁶ Soma 2 Petero 3:11-13. Omukwenda Petero akathuwathikaya erisighalha ithune n’amalengekania awatholere thukalebya amaminyereri we Biblia. Akathubwira athi “mubye mukalindirira n’erihathania erihika ly’ekiro kya Nyamuhanga.” Busana naki? Isi busana n’erianza eribaririra “ekiro ekyo, kutse esaha” eyo Yehova akendi syaletheramo e Harmagedoni, aliwe busana n’erianza erikolesya ndeke obuthuku obusighereryo omw’ibya “b’emighendere yibuyirire n’erikenga Nyamuhanga.” (Mt. 24:36; Lk. 12:40) Ni bugha ambu, thwanzire ithwalholha embere ithune n’emighendere mibuya n’erilhangira thuthi akaghalha ako thukahira omwa mubiiri wa Yehova kakakanganaya ku thumwanzire kutsibu. Erithoka erilholha embere ithune n’amalengekania ayo, thutholere ithwabya ithunayitheghirye.

7. Thukakanganaya thuthi ku thunayitheghirye? (Luka 21:34)

⁷ Yesu mwabwira abigha biwe athi isibasubulira okw’ilebya ebikabya omwa kihugho lisa  aliwe kandi batholere ibabya ibanayitheghirye. Enzumwa eyo yilhangirikire ndeke omw’ikunga eriri omu Luka 21:34. (Soma.) Thalhangira ebinywe bya Yesu bino: ‘Muyitheghaye.’ Omundu oyuyitheghirye akabya inianemulebya ahangasira akabi akanga hamba nabi oko bughuma bwiwe na Yehova, kandi iniayira eky’erikolha eriyihighulha kuko. Omwa nzira eyi, akayibika omo lhwanzo lhwa Nyamuhanga.​—Emi. 22:3; Yuda 20, 21.

8. Omukwenda Paulo mwabwira Abakristayo athiki?

⁸ Omukwenda Paulo mwabwira Abakristayo athi babye ibanayitheghirye. Ng’eky’erileberyako, mwabwira Abakristayo be Efeso athi: “Muyitheghaye ndeke, simusibe ng’abandu bakiru, nikwa ng’abandu b’amenge.” (Efe. 5:15, 16) Mughulhu wosi obunyakirimu bwethu bukabya ibune omwa kabi, neryo e Biblia yikathuhabulha yithi ‘thusondaye erigha ekyo Mukama anzire ithwakolha’ nuku thwanga thoka erighumira ekitsibu kyosi-kyosi.​—Efe. 5:17.

9. Thukaminya thuthi ebyo Yehova anzire?

⁹ E Biblia siyirikanganaya obuli kindu ekyanga hamba nabi okwa bunywani bwethu na Yehova. Mughulhu wosi thutholere ithwabya ithunemuthwamu oko myatsi eyithawithe ebihano ebilhangirikire ndeke omo Masako. Erithoka erithwamu ndeke, thutholere ithwaminya “ekyo Mukama anzire.” Thwangana kolha eki omw’iyeghesya n’erighanirya okwa Kinywe kya Nyamuhanga mughulhu wosi. Thukabya thukongera eriyitheghererya erisonda lya Yehova n’eribya ‘n’obulengekania bwa Kristo,’ kwa thukanongera thuthya erilendera “ng’abandu b’amenge,” nibya n’omughulhu hathe ebihano ebilhangirikire ebyanga thusondolha. (1 Kor. 2:14-16) Ebindi bithegho, kyolhobire eribiminyerera; ebindi sibilhangirikire ndeke.

10. Ni bithegho nga byahi ebya thutholere ithwayihighulhako?

¹⁰ Ebindi bithegho ebya thutholere ithwayihighulhako mwamuli eriyanzirirya ery’obutswatswa, erithamira, erirya binene, emikanirye eyikahuthalhaya abandi, kuthya n’erilebya eby’eriyitsemesya ebirimo amalhwa, eponografe, n’ebindi ng’ebyo. (Esy. 101:3) Enzighu yethu, Diabolo, akabya ikwanemusondya ehighisa hy’eritsandiryamo obughuma bwethu na Yehova. (1 Pet. 5:8) Thwamathendi yitheya, Sitani inianganahera omwa mithima n’omwa bulengekania bwethu mw’embutho y’eritsuru, erithendibyamo okwenene, omururu, eriponangana, emiyiheko, n’eribika ekinigha. (Gal. 5:19-21) Okw’itsuka, emibere eyi yanganabya isiyithulimo kutsibu. Aliwe thwamathendi lhuaho thukayilhusyayomo, iyikendyongera erikulha ng’ebithi ebik’itha ebindi neryo iyathulethera ebitsibu.​—Yak. 1:14, 15.

11. Ni kithegho kyahi kighuma ekithalhangirikire ekya thutholere ithwayihighulhako, kandi busana naki?

¹¹ Ekithegho kighuma ekithelhangirika b’abanywani babi. Thalengekania okwa ky’erileberyako kino. Thubughe thuthi okwa mubiiri, wukakolha n’omundu oyuthawithe erikirirya ng’eryawu. Wanzire oyowukakolha nayu oyo iniathunga amalengekania awatholere oko Bema ba Yehova, neryo iwamukangania olhukeri n’erimuha obuwathikya bulebe. Kandi ihayira iwatsuka eribya wukalya nayu eky’erithungyi. Buthuku buke-buke, iwatsuka erikolha ekyo mughulhu wosi. Okwa yindi ndambi imwayisanga imwamabirikania oko myatsi y’obutswatswa, ekindu ekyo wabya iwabirilengaho eriyihighulhako. Endambi iyahika iwabeghera emikanirye ng’eyo, iyabya isiyikikuponesaya. Neryo oyowukakolha nayu oyo iniakukokya okwa ky’erinywa mukakulhuka, neryo iwaligha. Erighunzerera, iwatsuka eribya n’amalengekania awali nga wiwe. Okwa ndambi eyi, ikikendi kuthwalira buthuku bungahi wuthe watsuka erikolha ng’iyo? Ni kwenene, thukatsomana n’erisikya obuli mundu,  aliwe thutholere ithwibuka ngoku abathukasiba nabu bakathuhambako kutsibu. (1 Kor. 15:33) Thwamabya ithunayitheghirye ngoku Yesu abugha athi thukole, ithukendi yihighulha okw’inywana abatheghendera okwa bihano bya Yehova. (2 Kor. 6:15) Ithukendi lhangira ekithegho kandi ithwayihigulha kukyo.

12. Abigha ba Yesu babya b’erikolhaki bakalindirira erihwererera ly’emighulhu?

¹² Abigha ba Yesu sibabya b’eriyitheka bakalindirira erihwererera ly’emighulhu. Yesu mwabaha omubiiri w’erikolha. Mwabalhaghira athi bathulhughanaye engulhu yuwene “e Yerusalemu n’omo Yudea yosi, ne Samaria, n’erihika okwa nduli-nduli sy’ekihugho.” (Emib. 1:6-8) Abigha ba Yesu ka mubahebwa omubiiri munene kutsibu! Omw’iyihwerya omwa mubiiri oyo, mubakolesya ndeke obuthuku bwabu.

13. Busana naki thutholere ithwakolesya ndeke endambi yethu? (Abanya Kolosai 4:5)

¹³ Soma Abanya Kolosai 4:5. Erithoka eribya ithunayitheghirye, thutholere ithwalengekania okwa mibere thukakoleserayamo endambi yethu. “Ebikawa kitsumbukirania” byangana hamba okwa buli mughuma w’okw’ithwe. (Omu. 9:11, NWT) Engebe yethu yanganahwaho kitsumbukirania.

14-15. Thwanga kolesya thuthi ndeke endambi yethu? (Abaebrania 6:11, 12) (Lebaya n’ekisasani.)

 ¹⁴ Thwangana kolesya obuthuku bwethu bwa ndeke omw’ikolha erisonda lya Yehova n’erighumya obunywani bwethu nayu. (Yn. 14:21) Thutholere ‘ithwasika, isithwasegha-seghana, n’erikanyirira omo mubiiri w’Omukama.’ (1 Kor. 15:58) Neryo enduli yikendi syabya yikasa​—mbulha ey’engebe yethu erihwaho kutse enduli y’omughulhu mubi ono​—sithwendi syayikubya bwomo.​—Mt. 24:13; Abar. 14:8.

¹⁵ Munabwire, Yesu akinalholha embere erisondolha abigha biwe bakathulhughania Obwami bwa Nyamuhanga omo kihugho kyosi. Abirikolha owiwe. Erilhabira omwa kithunga kya Yehova, Yesu akathuthendeka ngoku thwanga thulira kandi akathuha eby’erikolesya ebya thukayithagha nuku thuthulhughanaye engulhu yuwene. (Mt. 28:18-20) Thukakolha owethu omw’ikolha n’omuhwa omubiiri wethu w’erithulira n’erikangirirya n’omw’ibya ithunalholire thukalinda Yehova erighunzaho omughulhu mubi ono. Omw’ighendera okw’ihabulha eriri omwa Abaebrania 6:11, 12, thukendyamakirira amaha wethu “erihika oko nduli.”​—Soma.

16. Thwamathwamu erikolhaki?

¹⁶ Yehova abirihiraho ekiro n’esaha eby’akendi syaghunziramo omughulhu mubi wa Sitani. Ekiro ekyo kikendi syabya kikahika, Yehova syendi syalemwa eriberererya amaminyereri agho abirihandika omwa Kinywe kiwe. Thunalindirire ekyo, enduli y’omughulhu mubi ono yanganabya nga yamasibayo. Aliwe, ekiro kya Yehova ‘sikyendi syamalha!’ (Hab. 2:3) Neryo kwesi thuthwemu ‘erilinda Omwami Mukulhu n’omuhwa, erilindirira Nyamuhanga ow’erilhama lyethu.’​—Mika 7:7.