Munaseka kundi sinabya ngasi ngoku munywani waghe ni munya dini. Munamubulya indi: “Ni byahi ebyo wasi okwa Biblia?” Mwathalhuaho akanzubirya. Erighunzerera, mwambwira athi mama wiwe ni Mwema wa Yehova; abya iniabirimw’ighirako emyatsi mirebe. Erianza eriminya, munamubwira indi ambwire bingyi.

Erikanirania eryo mulyaghunza hakuhi erithumbi eryosi. Munywani waghe mwambwira athi e Biblia yikabugha yithi Sitani ya muthabali w’ekihugho kino. (Yn. 14:30) Obundi wabiriminya ekyo omwa ngebe yawu eyosi, aliwe ingye ekyo kyabya kihyaka kandi mukyanyiswekya. Ekyo nabya ingowa ibakabugha bathi Nyamuhanga ow’olhukeri kandi ow’obulingirirania yukasondolha ekihugho. Aliwe ekyo isikirihambangana n’ebya ngabya ingalhangira omwa ngebe. Nomwakine indi nabya w’emyaka 26 misa, nabya inabirilhangira bingyi ebyabya bikanyilyambya.

Thatha waghe aby’akaghendya okwa syondegge sy’amalhwa esye United States. Neryo ingakine mulere, nabya inganasi ndeke-ndeke ngoku olhuhi lhw’eniuklia lhwangabere; abasirikali babya ibanemuyithegheka. Olhuhi lhwe Vietnam lhwabya ingane okwa yunivaste kwe California. Munayiyunga okwa banya sukuru abakayisamambulha. Abapolisi ababya n’ehigho mubathuthibithako, kandi muthwathibitha ithunemumika-mika kandi ithunemuthima-thima busana n’ethiyaggasi. Bwabya buthuku bw’ebitsibu kandi obw’eriyisamambulha. Muhabya er’itha abanya politki, eriyisamambulha n’akatabanguko. Obuli mundu aby’awithe amalengekania wiwe okwa kitholere erikolhwa. Iwukabulha ekiriho nga niki.

Omwa 1970, munabana omubiiri omwa north coast eya Alaska kandi munakolha esyosente nene. Neryo munaghenda omwa ndegge e London, namaghulha epiki-piki, munafughayo erilholya omwa kitsweka ky’eyikwa isingawithe eyo ngaya. Enyuma w’amezi, munahika e Afrika. Omwa nzira, munaghenda ingasanga abandu nabu abakanza eriyighendera, eriyilhuira omwa bitsibu ebyabiribanubya.

Neryo busana n’ebya nabya ingabiriyilhangirira n’eriowa, munayitheghererya engangirirya ye Biblia eyikabugha yithi ekihangikwa kibi ky’ekirimu ky’ekikasondolha  ekihugho. Neryo ibbwa kwesi, Nyamuhanga iyo aby’ahi? Munanza eriminya ekyo.

Omwa mezi awakwamako, munabana eky’erisubirya. Kandi ahabw’obuthuku, munaminya n’erianza abalhume n’abakali muthina-muthina ababirikangania ku ni bathaleghulha oku Nyamuhanga mughuma ow’ekwenene omwa mibere muthina-muthina eya babyamo.

Nabere ingasuba e London, munahika oku mama wa munywani waghe, neryo amanyiha e Biblia. Enyuma waho, nabere ingaghenda e Amsterdam, omwa Netherlands, Omwema mwanyilhangira inganemusomayo okwa nzira eyiriko ebitara, kandi mwangwathikya eriminya bingyi. Enyuma waho, munaghenda e Dublin, Ireland, neryo namabanayo ekyaghanda ky’omuthahulha eky’Abema ba Yehova. Munakongotha okwa lhuyi. Eyo yan’eghaya ndugu ow’amenge kandi oyuwasi bingyi ya Arthur Matthews. Munasaba eryeghesibwa e Biblia, kandi mwaligha erinyeghesya.

Munayihwerya omw’igha lyaghe, kandi n’omuhwa munene namasoma ebitabu n’esyogazeti ebyo Abema babya ibabirihulhukya. Kandi munasoma ne Biblia. Mukyanyilhumira kutsibu! Okwa mihindano y’ekithunga munalhangira ngoku nibya n’abaana babya ibanasi eribana eby’erisubirya okwa bibulyo ebyo abalhume babya ibabirilengekaniako kutsibu ahabw’emyaka mingyi: ‘Busana naki hali obubi? Nyamuhanga nindi? Omundu amaholha akabya omwa mibereki?’ Abema ba Yehova basa, bababya banywani baghe. Ekyo mukyanyolhobera kundi nabya isingasi owosi-wosi omwa kihugho ekyo. Mubangwathikya erianza Yehova n’erianza erikolha erisonda liwe.

Omwa 1972, munabatizibwa. Enyuma w’omwaka, munatsuka obutemburi kandi munayiyunga okwa kithunga kike e Newry, omwa kitsweka ky’Endatha kye Ireland. Munapangisya enyumba y’amabwe eyiyisolhwere okwa kithwe. Aho hakuhi ihali esyonde, neryo iningayibegheresaya emikania yaghe embere syasyo. Isikabya ngasinemuhulikirira ndeke isinemutakunya ebya sikasubulhaya. Isisyanga nyihabulha, aliwe isikanyiwathikaya eriminya ngananga samalira nyithi abahulikiriri. Omwa 1974, munasombolhwa ng’omutemburi w’embaghane kandi munayiyunga okwa wundi mutemburi ya Nigel Pitt, oyuwabya abere munywani waghe kundu.

Okwa buthuku obo, ekitsweka ky’endatha ekye Ireland ikyoswire mw’amalhwa. Abandi mubakilhukamo “ekihugho ky’esyobbomu n’amasasi.” Amalhwa w’okwa syonzira, erilhasanga abandu, n’erihutangya esyomatoka sy’omwa syobbomu byabya bindu ebikanyirire. Mughulhu mungyi ebitsibu ibikasa busana n’eby’ekipolitiki n’eby’edini. Aliwe, Abapira  n’Abakatuliki mubaminya ngoku Abema sibaliyingiraya omwa by’ekipolitiki, neryo muthwathoka erithulira bwiranda ahathe butsibu. Mughulhu mungyi abo thukathulira ibakaminya endambi n’ahakendibya akatabanguko, neryo ibakasangwa bathubwira nuku sithuwe omwa kabi.

Nomwabine, yabya iyine emibere eyikalire. Kiro kighuma ingye na Denis Carrigan, nayu oyuwabya mutemburi, muthwathulira omwa tawuni y’ahakuhi eyathabyamo Abema kandi eya thwabya ithwanahikiremu murundi mughuma musa. Omukali mwathuhangirira athi thuli basirikali esyombega sye Britain, obundi kundi okw’ithwe sikwabya oyuwabya akabugha ndeke Olhuayirishi. Erihangirirwa eryo mulyathwitha obuba. Kundi erithanywana buyira abasirikali ikikaleka omundu in’ithibwa kutse inialhaswa omwa marwe. Thwabere thun’imene eyihya, ithunakwire embeho ithunemulinda ebbasi, muthwalhangira ematoka yikatsubukira ahabakanywira ekawa ahabya omukali oyuwathuhangirira. Omukali oyo mwahulhuka n’erikania n’abalhume babiri ababya omwa matoka inianemuthukangania. Abalhume mubafugha lyolho-lyolho eriasa eya thuli kandi mubathubulya bibulyo bike ebihambire okwa syondambi esy’ebbasi yikaghenderamo. Ebbasi yabere yasa, mubakania n’omufuyi. Thwabya isithwangowa ebya bakabugha. Mwabya isimuli abandi bandu, neryo muthwayibwira thuthi habirihirwa emitheghekere y’eriyathukolha nabi thwab’ilhua omwa tawuni eyo. Aliwe ekyo mukithabya. Nabere ingakima omwa bbasi, munabulya omufuyi indi: “Mbwino abalhume abathulyasigha balhue bakathuyilhalikirira?” Mwasubirya athi: “Inywe nganabasi ndeke, kandi nabiribwirabo nga muli bahi. Simukwe buba. Obuholho buneho.”

Omwa 1976 okwa lhuhindano lhw’edistrikiti a e Dublin, munabana ya Pauline Lomax, omutemburi w’embaghane oyuwalhua e England. Abya dada w’obunyakirimu, oyuyikehirye kandi oyuwithe olhwanzo. Iyo na mughalha wabu ya Ray, baminya ekwenene eritsuka bulere. Enyuma w’omwaka, munaherukya Pauline kandi muthwalholha embere n’obutemburi obw’embaghane e Ballymena, omwa kitsweka ky’Endatha ekye Ireland.

Muthwakolha omubiiri w’obulebererya habw’obuthuku, erikolera balikyethu abe Belfast, Londonderry, n’omwa yindi myanya eyikalire. Erikirirya ly’abalikyethu, abo erikolera Yehova lyabya iryabirileka ibasighania akasolholho, eriponangana, n’esyonyikirirya sy’amadini esyabya isyabiribakaghathiramu, mulyathuhimba. Mwabatsumulha kandi mwabatheya!

Nabya inamabirighunza omwa Ireland mw’emyaka ikumi. Neryo omwa 1981 muthwakokibwa okwa sukuru ye Gileadi eya 72. Thwabere thwaghunza, muthwathumwa e Sierra Leone, ebulengera lyuba bwe Afrika.

Muthw’ikalha omwa muyi w’abamisyonare n’abandi balikyethu babuya 11. Ithukakolesaya ejokoni nguma, esyokabbina isathu, ebyoghero bibiri, esimu nguma, emashini nguma eyikoghaya esyongyimba, n’eyikumayasyo nguma. Amasenyerezi iniakabya inianemubulha. Esyombeba isyoswire omwa lhuthwe lhw’enyumba, n’esyonzoka isikabya isinemwasa omwa kisenge ky’eyikwa.

Nomwakine indi emibere yabya isiyuwene, erithulira irikatsemesaya. Abandu ibasikirye e Biblia kandi ibakahulikirira ndeke. Abangyi mubigha kandi mubaligha ekwenene. Abandu b’eyo ibakanyahulhamo “Mister Robert.” Pauline ibamwahulhamo “Missus Robert.” Aliwe enyuma w’obuthuku, emibiiri y’okwa kyaghanda ky’omuthahulha muyatsuka erithwalha endambi yaghe nene neryo munabya isingakighunza  omw’ithulira mwa ndambi nene, abandu mubatsuka eryahulha Pauline mwa “Missus Pauline.” Naghe ibanyahulha mwa “Mister Pauline.” Pauline mwanza ekyo!

Abangyi b’okwa balikyethu babya banakwa, aliwe mughulhu wosi Yehova iniakatsomana ebiyithawa byabu, okwa bundi buthuku omwa nzira eyikaswekaya. (Mt. 6:33) Ng’ibuka mwali wethu mughuma oyuwabya awithe esyosente sy’erighulhako ebyalya by’erirya iyo n’abaana biwe, eby’ekiro ekyo kisa, aliwe esyosi mwasiha mughalha wethu oyuwabya alhwere omutsutsa oyuthabya awithe esyosente sy’erighulhako omubatsi. Enyuma waho ekiro ikyan’ekyo, mwali wethu isyayitsulirye, omukali mwasa n’erimuha esyosente athi amulhuke esyonzwiri. Emibere ng’eyo iyikabya mirundi mingyi.

Muthwaghunza e Sierra Leone y’emyaka mwenda. Neryo mubathuthuma okwa Beteli kwe Nigeria. Lero lino muthwabya okwa kyaghanda ky’omuthahulha kinene. Munalholha embere n’omubiiri we ofisi ogho nanabya ingakolha e Sierra Leone, aliwe oku Pauline, eyi yabya mbinduka nene kandi eyikalire. Aby’akaghunza omw’ithulira mw’esyosaha 130 obuli kwezi, kandi aby’awithe abigha be Biblia abakakulha-kulhana. Mwahebwa omubiiri ow’erisona, neryo iniakaghunza buthuku inianemubbandika esyongyimba. Mukyamuthwalira obuthuku eribeghera, aliwe mwaminya ngoku abandi bakasima kutsibu omubiiri ogho aby’akakolha, neryo mwahwerya amenge w’okwa highisa hy’erihimbiramo abanya Beteli balikyabo.

Ekalikya y’abanya Nigeria yabya mbyaka okw’ithwe, neryo thwabya thuwithe bingyi by’erigha. Buthuku bughuma, mughalha wethu mwasa omwa ofisi yaghe erisyanyikangya dada oyuwabiribirikirwa okwa Beteli. Nabere ingamuha ebyalha, mwanyunamira. Munasweka kutsibu! Mun’ibuka amasako abiri: Emibiri 10:25, 26 na Eribisulirwa 19:10. Munayibulya, ‘Mbwino ngamubwire indi aleke erikolha ekyo?’ Aliwe mun’ibuka kw’abiribirikirwa okwa Beteli; anasi ebya e Biblia yikakangiriraya.

Muthwakanirania ingane muyibulha-bulha, neryo enyuma waho munasekulya. Munaminya ngoku dada oyo alyakolha erikwamana n’emibere y’ewabu eyabya iyikine omwa bindi bitsweka by’erihanga. Abalhume nabu ibakakolha ikyan’ekyo. Yabya nzira y’erikanganiryamu erisikya. Siryabya iramya; hane Amasako awakakanganaya ikyan’ekyo. (1 Sam. 24:8) Munatsema kundi nomunanabya isingwithe ekyo ngasi, mundabugha ekyosi-kyosi ekyangalekire dada iniayowa nabi.

 Muthwabana abanya Nigeria bangyi ababya ibabirikangania obuthaleghulha bunene ahabw’emyaka. Thalengekania oku Isaiah Adagbona. b Aminya ekwenene iniakine mulhwana, aliwe mwalhwalha ebihagha. Mwathwalhwa eyikabya abahagha, kandi eyo mwabyayo Mwema iyuwene. Nomuhanabya erihakanisibwa, mwawathikya abahagha abalhabire oku 30 eriligha ekwenene kandi muyatsuka n’ekithunga.

Omwa 1996 muthwathumwa okwa kyaghanda ky’omuthahulha e Kenya. Oyu abya murundi waghe w’erimbere erisubayo erilhua aho ngathabungirayo ngoku kikanganibwe okw’itsuka ly’omwatsi ono. Muthw’ikalha okwa Beteli. Okwa bagheni ababya bakabungirako mwabya n’esyongende. Isik’iba ebighuma okwa bali bethu ababya bakabya ibanabihekire. Kiro kighuma, mwali wethu okwa Beteli mwasigha eridirisa liwe isirikingire. Abere akasubulha mwasanga esyongende nene isyabiryusulha omwa kisenge kiwe isinemulya ebyalya ebyo alyasighamo. Mwalhaka n’erighenda akathibitha. Esyongende musyalhaka n’eriyitsyadanga erilhaba omw’idirisa.

Ingye na Pauline muthwaghenda omwa kithunga ky’Olhuswahili. Enyuma w’obuthuku buke munahebwa olhusunzo lhw’erisondolha Erigha ly’Ekitabu ery’Ekithunga (lino erikahulhawamo Erigha lye Biblia ery’Ekithunga). Aliwe nabya ingakinabugha omubughe oyo ng’omwana. Iningasangwa ngayeghesya omwatsi nuku ngathoke erisoma ebibulyo. Aliwe abahulikiriri ibamasubirya ebiri mbaghane hake okwa bihandikire, isinendi yitheghererya. Iningayiponera! Iningakwira balikyethu b’obulighe. Munatsema kundi ibanathekene mubaligha emitheghekere eyo omw’ighumisirizya n’omw’iyikehya.

E Kenya muthuthaghunzayo n’omwaka. Neryo omwa 1997 muthwabirikirwa okwa Beteli e Brooklyn, New York. Lino thwabya ithwamabya omwa kihugho ekiri mw’obugaga, ekindu ekyangana letha ebitsibu. (Emi. 30:8, 9) Aliwe nibya n’omwa kihugho ng’ekyo, balikyethu babya ibanemukangania erikirirya erighumire. Balikyethu bakakolesaya obuthuku bwabu n’ebya bawitheko, isi busana n’eriyighasira aliwe busana n’erisighika omubiiri owuwene ow’ekithunga kya Yehova.

Ahabw’emyaka, thwabirilhangira erikirirya ly’Abema balikyethu abali omwa mibere muthina-muthina. Omwa Ireland, erikirirya nomuhane esyonyuhi. Omwa Afrika, erikirirya nomuhane obunakwa n’eribya omwa myanya eyithemo Abema. Omwa United States, erikirirya nomubane bagaga. Yehova k’atholere eribya iniakatsema akunama n’erilhangira abandu abali omwa mibere muthina-muthina bakakangania ku bamwanzire!

Emyaka yikalhuaho iyathibitha​—“kwilhaba omuhokoli w’omulhandi.” (Yobu 7:6) Lino thukakolha haghuma n’abandi okwa kyaghanda kikulhu eky’ekihugho kyosi e Warwick, New York, kandi thutsemire erilholha embere erikolha n’abandu abanzene kundu. Ithunathekene, thutsemire erikolha ngoku thwanga thoka erisighika Omwami wethu, Kristo Yesu, oyukisiya iniahemba akathabarika k’abathaleghulha.​—Mt. 25:34.