1. Engebe yethu ni y’obughuli yithi embere sya Yehova?

 THUBUGHE thuthi munywani wawu iniakuha enyumba. Enyumba eyo iyabya iyabirihwako erangyi kandi iyikathogha. Nomwayinawithe ebitsibu ebyo, iyabya ini y’obughuli bunene kwilhaba esyomiliyoni sy’esyodola. Ahathe erithika-thika, iwukendi simayo kandi iwatheyayo. Kuthya, Yehova abirithuha ekihembo ky’obughuli, ekihembo ky’engebe. Erithwalira haghuma, Yehova abirikangania ngoku akalhangira engebe yethu mwa y’obughuli omw’ihayo Mughalha wiwe ng’endongolya busana nethu.​—Yn. 3:16.

2. Ngoku kiri omwa 2 Abanya Korinto 7:1, Yehova anzire ithwakolhaki?

² Yehova ya Nzuko y’engebe. (Esy. 36:9) Omukwenda Paulo mwaligha ekwenene eyi akabugha athi: “Eriwathana nayu thuliho, kandi thukalendera, ithuneho.” (Emib. 17:25, 28) Kwesi thuhikire thukabugha thuthi engebe yethu ni kihembo erilhua oku Nyamuhanga. Omo lhwanzo akathuha ebya thukayithagha erithoka eribyaho. (Emib. 14:15-17) Aliwe Yehova syali theghaya engebe yethu omo nzira y’ekithiko-thiko. Omwakanya k’ekyo, anzire ithwatsomana amaghalha wethu n’eritsomana obunyakirimu bwethu ngoku thwanga thoka. (Soma 2 Abanya Korinto 7:1.) Busana naki thutholere ithwatheya amaghalha n’engebe yethu, kandi thwanga kikolha thuthi?

3. Ni nzumwa yahi nguma eyikaleka ithwabya ithutholere erilengaho eribya n’amaghalha awuwene?

³ Enzumwa nguma eyikaleka ithwabya ithutholere erilengaho eribya n’amaghalha awuwene yiri yithi thwanzire erikolera  Yehova ngoku thwanga thoka. (Mk. 12:30) Thwanzire eriha emibiri yethu “oku Nyamuhanga ng’obuhere obuliho, kandi obubuyirire, obukamutsemesaya,” neryo thukayihighulha okw’isombolha ebindu ebya thunasi ku byangana hamba nabi oko maghalha wethu. (Abar. 12:1) Okwenene kuli kuthi, ni bingyi ebya thwanga kolha nuku thubye n’amaghalha awuwene. Aliwe thukakolha ebya thwanga thoka kundi thwanzire erikangania Thatha wethu w’elhubulha ku thukasima ekihembo ky’engebe.

4. Omwami Dawudi aby’anzire erikolhaki?

⁴ Omwami Dawudi mwasoborera ekyaleka iniasima ekihembo kya Nyamuhanga eky’engebe akahandika athi: “Omusasi waghe asyaghasaki namandaghalira omo buhya kwehi? Abaholi basyakupipa kwehi? Basyathulha omwatsi w’ekwenene yawu kwehi?” (Esy. 30:9) Dawudi angabya iniahandika ebinywe ebi iniakisiya iniaholha. Aliwe aby’anzire eribya inianeho kandi inianawithe amaghalha awuwene kyamathokekana nuku abye iniangana pipa Yehova. Ahathe erithika-thika ithwe bosi ekyo kya thwanzire.

5. Mbulha thukulire omo myaka kutse thulhwere bungahi, ni kyahi ekyo thwanga kolha?

⁵ Amalhwere n’erikulha omo myaka byangana thukakirya okw’ikolha bindu bingyi ebya thwanabya thukakolha. Busana n’ekyo, thwangana yiponera n’erikwa obulighe. Aliwe sithutholere thukabikyako n’erithendi tsomana amaghalha wethu. Busana naki? Kundi nomuthwangabya ithukulire omo myaka kutse ithulhwere bungahi, paka thwangana pipa Yehova, ngoku Omwami Dawudi akolha. Kikahumulikanaya eriminya ngoku Nyamuhanga wethu akathulhangira mw’ab’obughuli nomwathuthahikene! (Mt. 10:29-31) Nomuthwanga holha, iniakendi kandira erithulhubukya. (Yobu 14:14, 15) Omughulhu thuliho, thukanza ithwakolha ngoku thwanga thoka eritheya amaghalha n’engebe yethu.

6. Yehova anzire ithwakolhaki bikahika okw’irya n’erinywa?

⁶ Nomwakine indi e Biblia si kitabu ky’eby’amaghalha kutse eby’emirire, yikabisulha amalengekania wa Yehova oko myatsi eyo. Ng’eky’erileberyako, akathuhabulha athi ‘thuyilhusayeko obubi’ obwanga tsandya omubiri wethu. (Omu. 11:10) E Biblia yikathanga erirya binene n’erithamira kundi ebyosi bikatsandaya engebe yethu. (Emi. 23:20) Yehova akabugha athi ambi ithwakangania omubere w’eriyikakirya thukathwamu nga ni byahi ebya thulye n’erinywa kandi bingahi.​—1 Kor. 6:12; 9:25.

7. Erihabulha eriri omwa Emisyo 2:11 likathuwathikaya lithi erithwamu ndeke bikahika okwa maghalha wethu?

⁷ Thwangana thwamu ebikakanganaya ku thukasima kutsibu ekihembo kya Nyamuhanga eky’engebe omw’ikolesya amaaka wethu w’obulengekania. (Esy. 119:99, 100; soma Emisyo 2:11.) Ng’eky’erileberyako, thukathwamu ndeke bikahika okwa bya thukalya. Thwamabya ithwanzire ebyalya birebe aliwe ithunasi ku bikathukolha nabi, ikikendibya ky’amenge eriyihighulha kubyo. Kandi thukakanganaya amenge thukaghotsera othulho othukaghunza, erikolha ebisasayizi mughulhu wosi, eribya n’endegheka eyuwene ey’eriyiyonza n’eriyonza emiyi yethu.

8. E Biblia yikabisulhaki okwa malengekania agho Nyamuhanga awithe oko mwatsi w’eriyitheya okw’ihuthalha?

⁸ Emighambo eyo Yehova aha ekihanda kye Israeli mwabya n’obusondoli obwanga bawathikirye eriyitheya okwa syo aksidenti  esikalire, eka n’okwa mubiiri. (Eri. 21:28, 29; Ebi. 22:8) Omundu iniamitha owundi omw’ithendi kighenderera imukalhwiririra ebitsibu ebikalire. (Ebi. 19:4, 5) Emighambo iyikabugha yithi nibya n’abakahuthalhaya omwana oyuthe wabuthwa omw’ithendi kighenderera, ibakasuyirawa. (Eri. 21:22, 23) Amasako akakanganaya ndeke-ndeke ngoku Yehova anzire ithwayitheya okw’ihuthalha.

9. Ni byahi ebya thwanga kolha eriyihighulha okwa syo aksidenti? (Lebaya n’ebisasani.)

⁹ Thukakanganaya ku thukasima ekihembo kya Nyamuhanga eky’engebe omw’iyitheya okw’ihuthalha, eka n’okwa mubiiri. Ng’eky’erileberyako, sithuli ghalhaghandaya ebindu ebithwire kandi thukabika ebindu ng’ebyo aho abaana bathe bangahika. Thukabya ithunayitheghirye thukakolesya omuliro, ebindu ebihuhire ng’amaghetse n’ebikakolesaya amasenyerezi, kandi sithuli bisighanaya thukabikolesya. Sithulifugha ematoka thwamabya ithunemulya omubatsi owakaleka ikyathukalira erifugha, ithulhue thukanywa obwabu, kutse imuthukakuba othulho, kandi sithulyanza thukalengemeribwa omwa syosimu ithunemufugha.

10. Thwanga kolhaki ebyangahira engebe y’omwa kabi bithe byabya kandi bikabya?

¹⁰ Okwa bundi buthuku sithwanga kakirya emibere eyikalire erithuhikako. Kutsibu-tsibu eki kihikire hakabya ebitsinduli, ebihunzo, n’akatabanguko. Aliwe, ebindu ng’ebyo byamabya, thwangana lengaho eriyitheya ngoku thwanga thoka erilhamya engebe yethu omw’ighendera okwa busondoli bw’erihumya abandu kutse okwa bindi bilhaghiro by’egavumente. (Abar. 13:1, 5-7) Kyanganabya ikinasibwe ngoku ebyanga hira engebe y’omwa kabi bikendibya, neryo ni kibuya erighendera okwa busondoli bwosi-bwosi obo ab’egavumente bakaha erithuwathikya eriyitheghekera ekitsinduli. Ng’eky’erileberyako, kyanganabya kibuya eribika amaghetse n’ebyalya ebithetsanda lhuba n’obubalya obwa lhuba-lhuba.

11. Hamabya obulhwere obukasighalira, thutholere ithwabya ithunayitheghekire erikolhaki?

¹¹ Thutholere ithwakolhaki eyo thwikere yamabya obulhwere obukasighalira? Thutholere ithwaghendera okwa busondoli bw’egavumente, ng’obw’erinaba oko byalha, erithendi segheranako hakuhi, eriambalha emasiki, n’eribya omwa karantini. Thwamakolha ebi thukakanganaya ku thukasima kutsibu ekihembo kya Nyamuhanga eky’engebe.

12. Omusingyi owali omwa Emisyo 14:15 akathuwathikaya athi erisombolha okwa myatsi eyabirilhandaghana hakabya omuhitho?

¹² Omughulhu hakabya emihitho, emyatsi eyithahikire yangana lhandaghana omwa banywani, omwa bataka, n’omwa makuru. Omwakanya k’eriligha “obuli kinywe” ekyo thukowa, ni kibuya erihulikirira emyatsi eyikalhua okwa b’egavumente n’ab’emithambirire abayiketherwa. (Soma Emisyo 14:15.) Akathunga Akakasondolha n’ebyaghanda by’emithahulha bikahiraho akaghalha kanene eribana omwatsi owahikire bathebaha obusondoli obuhambire okwa mihindano y’ekithunga n’omubiiri w’erithulira. (Ebr. 13:17) Thwamakolongana, thukayitheghaya n’eritheya abandi okw’ihuthalha. Kandi thwangan’uwania erina ly’ekithunga kyethu omwa bulhambu bwethu.​—1 Pet. 2:12.

13. Thukakanganaya thuthi ku thukasima ekihembo kya Nyamuhanga eky’engebe bikahika oko mwatsi w’omusasi?

¹³ Abema ba Yehova basibwe ng’abasikirye obubuyirire bw’omusasi. Thukaghondera ekihano kya Yehova ekihambire oko musasi omw’ighana erihirwako omusasi, nibya n’omughulhu engebe yiri omwa kabi. (Emib. 15:28, 29) Aliwe ekyo sikirimanyisaya kithi thwanzire ithwaholha. Mbaghane n’ekyo, thukasima kutsibu ekihembo kya Nyamuhanga eky’engebe. Thukasondaya obuwathikya bwa badokita abanayitheghekire erithambira ahathe erikolesya omusasi.

14. Thwanga yitheya thuthi okwa mithambirire eyikalha-kalire?

¹⁴ Thwamatsomana amaghalha wethu omw’ighendera oko menge owakanibweko omo mwatsi ono, obundi ithwangana yibalya okw’isemezibwa kutse eyindi mithambirire eyikalire. Thwamabya ithunawithe amaghalha awuwene, omubiri wethu iniakendilhuaho iniasuba-subana thukakolhwako erisemezibwa lyosi-lyosi n’enyuma w’erisemezibwa. Kandi thwangana yibalya okw’isemezibwa erya lhuba-lhuba omw’ihighulha ebyanga hira engebe yethu y’omwa kabi, eka n’okwa mubiiri, n’omw’ighendera ndeke okwa bilhaghiro by’enguda.

15. (a) Busana naki ni kikulhu eribya ithune n’ekadi ey’omusasi eyiri okwa buthuku? (Lebaya n’ekisasani.) (b) Ngoku kiri omwa vidiyo, thwanga thwamu thuthi bikahika okwa mithambirire eyirimo erikolesya omusasi?

 ¹⁵ Kundi thukasima ekihembo ky’engebe, thuk’usuliririraya ekadi y’omusasi eya durable power of attorney (advance health-care directive) n’eribya ithunenayo obuli ndambi. b Erilhabira omwa kadi eyi, thukakanganaya ebya thwanzire bikahika okw’ihirwako omusasi n’emithambirire mirebe. Ekadi yawu yine okwa buthuku? Wamabya iwutholere eryusulirirya ekadi kutse erihirayo okwa buthuku, isiwalindiriraya. Erikangania ndeke ebya thwanzire omw’ibihandika kikendi leka ibathwanguhira erithuthambira. Kandi ikikendi wathikya abathambiri eriyihighulha okw’ithendi yitheghererania lyosi-lyosi eryanga thukolha nabi. c

16. Thwanga kolhaki thwamabya isithwasi ngoku thwang’usulirirya ekadi y’omusasi?

¹⁶ Mbulha thuli balere kutse thuwithe amaghalha awuwene, esyo aksidenti n’amalhwere byangana thuhikako. (Omu. 9:11) Neryo kwesi ni ky’amenge eryusulirirya ekadi y’omusasi.  Wamabya isiwasi nga wang’usulirirya wuthi ekadi eyi, saba abasyakulhu b’obuwathikya. Bakalengaho eribya ibanasi ekadi eyi nga yikusuliriribawa yithi, aliwe sibanga kuthwiramu bikahika okwa mithambirire. Olho ni lhukwamirwa lhwawu. (Gal. 6:4, 5) Aliwe bangana kuwathikya eriyitheghererya ebya wanzire kandi nga wanga bihandika wuthi.

17. Thwanga kangania thuthi obuyitheghererya bikahika okwa by’amaghalha?

¹⁷ Ebingyi by’okwa bya thukathwamu ebihambire okwa maghalha wethu n’emithambirire biseghemere ndeke-ndeke okwa bunyamuthima-thima bwethu obukangiriribwe ne Biblia. (Emib. 24:16; 1 Tim. 3:9) Thukathwamu kandi thukabwira abandi okw’ithwamu lyethu, ni kibuya erighendera okwa musingyi owali omwa Abanya Filipi 4:5: “Muminyikalhaye eriyibombeka [obuyitheghererya] lyenyu oko bandu abosi.” Thwamabya n’obuyitheghererya, isithwendibya omwa maghaniryo manene busana n’amaghalha wethu; kutse isithwendi kaka abandi b’amalengekania wethu. Thwanzire balikyethu kandi thubasikirye, erithwamu lyabu nomulyangabya mbaghane okwa lyethu.​—Abar. 14:10-12.

18. Thwanga kangania thuthi ku thukasima ekihembo ky’engebe?

¹⁸ Thukakanganaya ku thukasima Yehova, oyuli Nzuko y’engebe, omw’itheya engebe yethu n’omw’imukolera ngoku thwanga thoka. (Erib. 4:11) Lino, thutholere ithwaghumira amalhwere n’emihitho. Eyi si y’engebe eya Omuhangiki wethu athusunzira. Akisiya iniathuha engebe y’erikotha eyithemo obulhumi n’olhuholho. (Erib. 21:4) Thunalindirire ekyo, ka ni kibuya eribyaho n’erikolera Thatha wethu w’elhubulha ow’olhwanzo, Yehova!