Nomwabine, Yehova anzire ithwamulinda omw’ighumisirizya erihika aho akendi syayirira eky’erikolha okwa buthuku obw’abirihiraho. Busana naki anzire ithwakolha ekyo? Ni kyahi ekyanga thuwathikya eribya ithunatsemire thunemulinda?

BUSANA NAKI YEHOVA ANZIRE ITHWALINDA?

E Biblia yikabugha yithi: “Omwami Mukulhu akasonda eribaghanyira. Kandi busana n’ekyo akalinda endatha iniabakwira olhukogho. Kusangwa Omwami Mukulhu ni Nyamuhanga w’eribanza lithunganene. Omughisa ali okwa bosi abakamukwa olhukando.” (Isa. 30:18) Ebinywe bya Isaya ebi erimbere byabwirawa Abayuda abathowa. (Isa. 30:1) Aliwe habya ihane Abayuda abathaleghulha, neryo ebinywe ebi mubyabaha amaha. Ebinywe ibyan’ebyo bikaha abaghombe ba Yehova abathaleghulha abamunabwire b’amaha.

Neryo thutholere ithwalinda omw’ighumisirizya kundi Yehova nayu anemulinda omw’ighumisirizya. Abirihiraho obuthuku obw’akendi syaletheramo enduli y’omughulhu mubi ono, kandi anemulinda erihika ly’ekiro n’esaha eyo. (Mt. 24:36) Okwa buthuku obo, kikendi syalhangirika ndeke-ndeke ngoku ebya Diabolo akabugha oku Yehova n’abakamukolera ni mabehi. Akendi syaghunzaho Sitani n’owosi-wosi oyukamusighika, aliwe akendisya ‘thughanyira.’

Thunalindirire ekyo, Yehova anganaghana erighunzaho ebitsibu byethu, aliwe akathukakasaya ngoku thwangana tsema thunemulinda. Ngoku Isaya abugha, thwangana tsema thunemulinda kutse erikandira ekindu kirebe ekibuya eribya. (Isa. 30:18) a Thwanga bana thuthi etseme eyo? Ebiika bbini byangana thuwathikya.

NGOKU THWANGABYA ITHUNATSEMIRE THUNEMULINDA

Hira amalengekania w’okwa bibuya. Omwami Dawudi abya iniabirilhangira obubi bunene omwa ngebe yiwe. (Esy. 37:35) Nomwabine, mwahandika athi: “Wuyibombeke embere sy’Omwami Mukulhu, wumulinde n’erisikya-sikya omuthima, siwuhaghukaye omuthima busana n’abakabana omughaso, kutse busana n’abakaghasa omo syombitha nyibi syabu.”  (Esy. 37:7) Dawudi iyuwene-wene mwaghendera okw’ihabulha eryo omw’ihira amalengekania wiwe okwa maha wiwe aw’omulhamo. N’ekindi mwalengekania oko buli mughisa ogho Yehova amuha. (Esy. 40:5) Nethu thwamahira amalengekania w’okwa bibuya ebihambire okwa mibere eyathulimo butsira erihiragho okwa bithuwene ebikathubyako, ikikendi thwolhobera erilinda Yehova.

Pipa Yehova mughulhu wosi. Omuhandiki we Esyonyimbo 71, oyutholere eribya ini Dawudi, mwabwira Yehova athi: “Nasyahira amaha okw’iwe emighulhu yosi, nasyakupipa akandi n’akandi.” (Esy. 71:14) Angapipire athi Yehova? Angabwire abandi oku Yehova n’eriimba esyonyimbo sy’erimupipa. (Esy. 71:16, 23) Nga Dawudi, thwangana bana etseme thunemulinda Yehova. Thukamupipa omw’ithulira lyethu, omw’ikanirania lyethu erya buli kiro, n’omwa syonyimbo syethu sy’erimuramya. Ekindi kiro wukimba olhwimbo lhw’Obwami, busana naki iwuthalengekania kutsibu okwa mwatsi owakahimba owalimo?

Bana erihumulikanibwa erilhua oko balikyenyu. Dawudi abere akabana ebitsibu, mwabwira Yehova athi: “Nasyakangania ku wuli mwenge omwakathi-kathi k’abandu bawu.” (Esy. 52:9) Nethu kuthya thwanganabana erihumulikanibwa erilhua okwa balikyethu abathaleghulha, okwa mihindano n’omw’ithulira, kuthya omw’iyitsemesya haghuma.—Abar. 1:11, 12.

Ghumaya amaha wawu. Esyonyimbo 62:5 hathi: “Ngayikethera Nyamuhanga iyuwene, iyo ni maha waghe.” Amaha awaghumire mwamuli erilindirira iwunasikire—ekindu kikulhu ekikayithaghisibawa thwamabya b’eriyiyinirya omughulhu mubi ono habw’obuthuku buuli kwilhaba ku thulengekenie. Thutholere ithwaligha ngoku emilhaghe ya Yehova yikendi syabererera nomuthwangabya ithwamabirighunza myaka mingahi ithunemulinda. Thwangana ghumya amaha wethu omw’iyeghesya Ekinywe kya Nyamuhanga—amaminyereri, erihambangana ly’ebiri omwa Biblia, n’emyatsi mingyi eyo Yehova akabisulha eyimuhambireko. (Esy. 1:2, 3) Kandi thutholere ithwalholha embere erisaba “omo buthoki bw’omulimu abuyirire” nuku obunywani bwethu na Yehova bubye ibunaghumire thunemulinda eribererera ly’omulhaghe wiwe ow’engebe y’erikotha.—Yuda 20, 21.

Ng’Omwami Dawudi, yikethere ngoku Yehova akabya inianalhangire abakamulinda kandi akabakanganaya olhwanzo Lhwiwe olhuthyusa. (Esy. 33:18, 22) Lholha embere erilinda Yehova omw’ighumisirizya omw’ihira amalengekania okwa bibuya, omw’imupipa, omw’ibana erihumulikanibwa erilhua okwa Bema balikyethu, n’omw’ilhangira amaha wawu awaghumire mwa w’obughuli.