1. Iha eky’erileberyako ekikaleka ithwabya ithutholere erikwama Yehova ng’Omusondoli wethu.

 THATHERA akasasani iwune omwa musithu iwabirithalha. Engebe yawu yiri omwa kabi: ebisoro by’omoli, ehihuka ehikaheka amalhwere, ebithi ebyanga hamba nabi okwa mubiri wawu, n’esyonguka. Iwukendi tsema kutsibu wamabana omusondoli oyuwasi ahali akabi kandi oyuwasi kw’angakubalya kuko. Ekihugho kino kiri ng’omusithu oyo! Kyoswire mw’ebitsibu kutsibu-tsibu ebyangahira obunyakirimu bwethu b’omwa kabi. Aliwe thuwithe Omusondoli oyuhikene—Yehova. Akathubalhaya okwa kabi ako n’erithulholerya aho thukaya—engebe y’erikotha omwa kihugho kihya-kihya.

2. Yehova akathusondolha athi?

² Yehova akathusondolha athi? Kutsibu-tsibu erilhabira omwa Kinywe kiwe, e Biblia. Nomwabine, akakolesaya n’abandu erimw’imanira. Ng’eky’erileberyako, akakolesaya “omughombe oyutheleghulha n’ow’amenge” erithuha akalyo k’obunyakirimu akakathuwathikaya erithwamu ndeke. (Mt. 24:45) Kandi Yehova akakolesaya abandi balhume abatholere erithusondolha. Ng’eky’erileberyako, abalebererya b’omuthimbo n’abasyakulhu b’ekithunga bakathuhimba n’erithuha obusondoli obwanga thuwathikya erilhaba omwa mighulhu eyikalire. Ka thukasima kutsibu eribya ithunawithe obusondoli obw’eriyikethera omwa biro by’enyuma-nyuma bino ebikalire! Bukaleka ithwabya ithunasimirwe na Yehova kandi ithwabya ithune omwa nzira y’engebe.

3. Omo mwatsi ono thukendi kania okuki?

³ Nomwabine, hanganayira ikyathukalira erighendera okwa busondoli bwa Yehova, kutsibu-tsibu omughulhu bukahebawa n’abalhume abathahikene. Busana naki? Obusondoli bwanganaghana erihambana n’ebya thwanzire. Kutse thwanganayowa thuthi obusondoli obwathukahebawa si bw’amenge neryo ithwaghunzerera thuthi obusondoli obo butholere eribya isibulilhua oku Yehova. Okwa buthuku ng’obo, kutsibu-tsibu thukayithagha eriyikethera  ngoku Yehova yunemusondolha abandu biwe kandi ngoku erighendera okwa busondoli bwiwe mukalhwiririra emighisa. Erithuwathikya erighumya eriyikethera lyethu, omwatsi ono akendi kania (1) okwa mibere Yehova asondoleramo abandu biwe omwa buthuku bwe Biblia, (2) ngoku anemuthusondolha munabwire, na (3) ngoku thwanga ghasirwa thwamalholha embere erighendera okwa busondoli bwiwe.

NGOKU YEHOVA ASONDOLHA EKIHANDA KYE ISRAELI

4-5. Yehova mwakangania athi kw’anemukolesya Musa erisondolha Abaisraeli? (Lebaya ekisasani ky’okwa kidipa.)

⁴ Yehova mwasombolha Musa erisondolha Abaisraeli erilhua e Misiri. Kandi Yehova mwaha Abaisraeli bw’obwema obulhangirikire obukakanganaya ngoku anemubasondolha erilhabira omu Musa. Ng’eky’erileberyako, mwahiraho enduyi y’ekithu omwa musibo n’ey’omuliro omwa kiro. (Eri. 13:21) Musa mwaghendera okwa kithu, ekyamusondolha iyo n’Abaisraeli erihika okwa Ngetse y’Engulha. Abandu mubakwa obuba bakalengekania bathi babiribambirwa ahakathi-kathi k’engetse n’amahe w’Abanya Misiri awabya iniabiribakwamirira. Mubaghunzerera bathi Musa abirisobya akabaletha okwa Ngetse y’Engulha. Aliwe abya isyathasobya. Kyabya kighendererwa kya Yehova eriletha abandu biwe baho erilhabira omu Musa. (Eri. 14:2) Neryo Nyamuhanga mwabalhamya omwa nzira eyikaswekaya kutsibu.—Eri. 14:26-28.

⁵ Ahabw’emyaka 40 enyuma waho, Musa mwalholha embere erighendera okwa nduyi y’ekithu erisondolha abandu ba Nyamuhanga omwa mbwarara. a Ahabw’obuthuku, Yehova iniakimanaya ekithu endatha oko hema ya Musa, aho Abaisraeli bosi banga kilhangire. (Eri. 33:7, 9, 10) Yehova iniakakanaya na Musa erilhabira omwa kithu, na Musa iniabwira abandu bw’obusondoli Bwiwe. (Esy. 99:7) Abaisraeli babya bawithe obwema obulhangirikire obukakanganaya ngoku Yehova aby’akakolesya Musa eribasondolha.

6. Abaisraeli mubakolhaki bikahika okwa busondoli bwa Yehova? (Emiganzo 14:2, 10, 11)

⁶ Eky’obulighe, abangyi b’okwa Baisraeli mubaghana obwema obulhangirikire obukakanganaya ngoku Yehova aby’akakolesya Musa ng’oyukamw’imanira. (Soma Emiganzo 14:2, 10, 11.) Ngendo nyingyi, Abaisraeli mubaghana erilhangira olhukwamirwa lhwa Musa. Busana n’ekyo, olhulengo lhw’Abaisraeli olho mulhuthalighirwa eryingira omwa Kihugho Ekyalhaghanisibawa.—Emig. 14:30.

7. Iha eby’erileberyako ebya abaghendera okwa busondoli bwa Yehova. (Emiganzo 14:24) (Lebaya n’ekisasani.)

⁷ Nomwabine, abandi Baisraeli mubaghendera okwa busondoli bwa Yehova. Ng’eky’erileberyako, Yehova mwabugha athi: “Kalebu . . . abirinyikwama n’omuthima wosi.” (Soma Emiganzo 14:24.) Nyamuhanga mwahemba Kalebu, nibya mwamuha ekithaka ekyo aby’anzire e Kanana. (Yos. 14:12-14) Olhulengo lhw’Abaisraeli olhwakwamako nalho mulhwahiraho eky’erileberyako ekyuwene eky’erighendera okwa busondoli bwa Yehova. Yosua abera asuba omwa mwanya wa Musa ng’omusondoli oyusombwerwe w’Abaisraeli, “mubamubaha . . . ebiro byosi by’engebe yiwe.” (Yos. 4:14) Busana n’ekyo, Yehova mwabatsumulha omw’ibahikya omwa kihugho ekyo abya iniabiribalhaghanisya.—Yos. 21:43, 44.

8. Soborera emibere Yehova asondoleramo abandu biwe omwa buthuku bw’abami. (Lebaya n’ekisasani.)

⁸ Myaka mingyi enyuma waho, Yehova mwahiraho abatsweri erisondolha abandu biwe. N’enyuma waho, omwa buthuku bw’abami, Yehova mwasombolha abaminyereri erisondolha  abandu biwe. Abami abathaleghulha mubaghendera okw’ihabulha ly’abaminyereri. Ng’eky’erileberyako, omw’iyikehya Omwami Dawudi mwaligha erikunga eryalhua oku muminyereri Natana. (2 Sam. 12:7, 13; 1 Emy. 17:3, 4) Omwami Yosafati mwayikethera obusondoli obwa omuminyereri Yahazieli amuha kandi mwahira omwa bandu be Yuda mw’omuhwa ‘w’erikirirya abaminyereri’ ba Nyamuhanga. (2 Emy. 20:14, 15, 20) Omughulhu Omwami Hezekia abya omwa bulighe, mwayasaba omuminyereri Isaya y’obuwathikya. (Isa. 37:1-6) Abami ibakabya bakaghendera okwa busondoli bwa Yehova, ibakatsumulhawa n’ekihanda ikyabya omwa butheya. (2 Emy. 20:29, 30; 32:22) Abosi babya batholere erilhangira ndeke-ndeke ngoku Yehova abya inianemukolesya abaminyereri biwe erisondolha abandu biwe. Aliwe abangyi b’okwa bami kuthya n’abandu mubaghana abaminyereri ba Yehova.—Yer. 35:12-15.

NGOKU YEHOVA ASONDOLHA ABAKRISTAYO ABAKERA

9. Ni bahi abo Yehova akolesaya erisondolha Abakristayo ab’omwa kighana ky’erimbere? (Lebaya n’ekisasani.)

⁹ Omwa kighana ky’erimbere E.K., Yehova mwatsukisya ekithunga ky’Ekikristayo. Mwasondolha athi Abakristayo abakera abo? Mwasombolha Yesu ng’omuthwe w’ekithunga. (Efe. 5:23) Aliwe Yesu isyali sondolha obuli mughuma w’okwa bigha busu okwa busu. Mwakolesya abakwenda n’abakulhu e Yerusalemu erisondolha. (Emib. 15:1, 2) N’abasyakulhu mubasombolhwa erisondolha ebithunga.—1 Tes. 5:12; Tito 1:5.

10. (a) Abangyi b’okwa Bakristayo ab’omwa kighana ky’erimbere mubakolhaki bakahebwa obusondoli? (Emibiri 15:30, 31) (b) Busana naki abandi omwa buthuku bwe Biblia mubalemwa eriligha abakimanira Yehova? (Lebaya akasanduko “ Ekyaleka Abandi Ibaghana Obusondoli Obulhangirikire.”)

¹⁰ Abakristayo ab’omwa kighana ky’erimbere mubakolhaki? Abangyi, ibanatsemire, mubaghendera okwa busondoli obo bahebawa. Kundi nibya, “mubatsema busana n’ebinywe by’erisikyabo” ebyo bahebawa. (Soma Emibiri 15:30, 31.) Aliwe ibbwa, Yehova abiribya iniamusondolha athi abandu biwe omwa buthuku bwa lino-lino?

NGOKU YEHOVA AKATHUSONDOLHA MUNABWIRE

11. Iha eky’erileberyako ekikakanganaya ngoku Yehova abiribya inianemusondolha abakasondolha omwa buthuku bwa lino.

¹¹ Yehova anemulholha embere erisondolha abandu biwe munabwire. Abiribya inianemukolha ekyo erilhabira omwa Kinywe kiwe na  Mughalha wiwe, omuthwe w’ekithunga. Mbwino thunemulhangira obwema obukakanganaya ngoku Nyamuhanga akinalholha embere erikolesya abandu erimw’imanira? Ee. Ng’eky’erileberyako, thulebaye esyombinduka ndebe esyabyaho okw’ihwererera ly’emyaka eya 1800. Charles Taze Russell n’abo abya nabo mubatsuka eriminya ngoku omwaka wa 1914 angabere mwaka mukulhu bikahika okw’isinga ly’Obwami bwa Nyamuhanga. (Dan. 4:25, 26) Erithwamu lyabo eryo, lyabya liseghemere okwa maminyereri we Biblia. Mbwino Yehova abya inianemubasondolha omw’isekulya lyabo lye Biblia eryo? Kwabine bithya. Ebyabya omwa 1914 mubyaghumya ngoku Obwami bwa Nyamuhanga bwabya ibwabiritsuka erithabalha. Olhuhi lhw’Ekihugho Kyosi olhw’Erimbere mulhwabya, kwamakwama esyondwalha, emisiki, n’esyonzalha. (Lk. 21:10, 11) Omo kwenene Yehova abya inianemukolesya abalhume Abakristayo abali mw’okwenene abo eriwathikya bandu biwe.

12-13. Ni mitheghekere yahi eyihambire okw’ikanyirirya omubiiri w’erithulira n’erikangirirya eyahirawaho omwa Lhuhi lhw’Ekihugho Kyosi Olhwakabiri?

¹² Thulebaye n’ebyabya omwa Olhuhi lhw’Ekihugho Kyosi Olhwakabiri. Babere babiriyithendya okwa Eribisulirwa 17:8, baghalha bethu ab’esyongwamirwa ab’okwa kyaghanda kikulhu mubaminya ngoku olhuhi olho silhwanga kolirye okwa Harmagedoni, aliwe lhwangalekire ihabya obuthuku obulimo obuholho okwa lhulengo lhulebe obwangalekire ihabya ehighisa ehy’erikanyiriryamo omubiiri w’erithulira. Nomwakine indi mukyabya nga sikitholere okwa buthuku obo, ekithunga kya Yehova mukyatsukisya esukuru ye Gilead nuku kithendeke abamisyonare ngoku banga thulira n’erikangirirya omwa kihugho kyosi. Abamisyonare mubathumwa nibya n’omwa buthuku bw’olhuhi olho. Eryongera okw’ekyo, omughombe oyutheleghulha mwatsukisya endegheka eyikahulhawamo Course in Theocratic Ministry b erithendeka abosi omwa kithunga eribya bathuliri kandi bakangirirya babuya. Erilhabira omwa syonzira esyo, abandu ba Nyamuhanga babya ibali kutheghekerwa omubiiri w’erithulira owabya iniakinayithaghisibawa.

¹³ Thukabya thukasubya ameso w’enyuma, thukalhangira ndeke-ndeke ngoku Yehova abya inianemusondolha abandu biwe omwa buthuku obukalire obo. Eritsuka omwa Lhuhi olhw’Ekihugho Kyosi Olhwakabiri, abandu ba Yehova omwa bihugho bingyi babiribya ibanawithe obuholho n’obwiranda okwa lhulengo lhulebe  banemukolha omubiiri w’erithulira. Erithwalira haghuma, omubiiri abirilholha embere.

14. Ni kyahi ekyanga leka ithwayikethera obusondoli obukalhua omwa kithunga kya Yehova n’okwa basyakulhu abasombwerwe? (Eribisulirwa 2:1) (Lebaya n’ekisasani.)

¹⁴ Munabwire, ab’okwa Kathunga Akakasondolha bakalholha embere erisondya oku Kristo kw’obusondoli. Banzire obusondoli obwabakaha balikyethu ibwalhangirika ku bukalhua elhubulha. Kandi bakakolesaya abalebererya b’omuthimbo n’abasyakulhu eriha ebithunga by’obusondoli. c Abasyakulhu abahakabibwa bali omwa ‘byalha bya Kristo eby’amali.’ (Soma Eribisulirwa 2:1.) Ni kwenene, abasyakulhu aba sibahikene kandi bakasobaya. Musa na Yosua ibakanasobaya, ngoku kyanabya n’okwa bakwenda. (Emig. 20:12; Yos. 9:14, 15; Abar. 3:23) Nomwabine, Kristo anemusondolha ndeke omughombe oyutheleghulha n’abasyakulhu abasombwerwe, kandi akendi lholha embere erikolha ekyo “ebiro byosi erihika okw’ihwererera ly’emighulhu.” (Mt. 28:20) Kwesi thuwithe nzumwa nyingyi esyangaleka ithwayikethera obusondoli obo anemuthuha erilhabira omwa abo abirisombolha erisondolha.

THUKAGHASIRAWA THUKALHOLHA EMBERE ERIGHENDERA OKWA BUSONDOLI BWA YEHOVA

15-16. Wam’ighaki okwa byalholirweko by’abaghendera okwa busondoli bwa Yehova?

¹⁵ Thukabya thukalholha embere erighendera okwa busondoli bwa Yehova, thukabana emighisa nibya na lino. Ng’eky’erileberyako, Andy na Robyn mubaghendera okw’ihabulha ly’eryolhobya engebe yabo. (Ebr. 13:5) Busana n’ekyo, mubathoka eriyihayo eriwathikya okwa by’obuhimbe bw’ekiteokrasi. Robyn akabugha athi: “Thwabiribya ithunemw’ikalha omwa syonyumba nyike-nyike kutsibu, mughulhu mungyi okuthe ejokoni. Kandi munabya w’erighulya ebindu bingyi ebyo nabya ingakolesya okw’ithera ebisasani, ekindu ekyo nabya nganzire kutsibu. Ekyo mukyaleka ingathoghongya emisoni. Aliwe nga Sara mukali wa Abrahamu, munathwamu erisamalira embere, butsira enyuma.” (Ebr. 11:15) Abathahenie aba mubaghasirwa bathi? Robyn akabugha athi: “Thutsemire kutsibu habw’eriminya ngoku thukaha Yehova y’ebyosi ebya thuwithe. Thukabya thukakolha okwa mibiiri y’ekiteokrasi, thukayilhangirira engebe nga yikendi syabya yithi omwa kihugho kihya.” Andy akaligha athi: “Thwabiribana etseme busana n’eriyihwerya omwa mubiiri w’Obwami.”

¹⁶ Thukathasyaghasirawa thuthi omughulhu thukalholha embere erighendera okwa busondoli  bwa Yehova? Marcia abere abirighunza esiniya, mwanza erighendera okw’ihabulha ery’eringira omwa mubiiri wa Yehova ow’omughulhu wosi. (Mt. 6:33; Abar. 12:11) Akabugha athi: “Munahebwa akaghisa k’erisomera bbule okwa yunivasite ahabw’emyaka ini. Aliwe munanza erikwamirira ebilhubirirwa by’obunyakirimu. Neryo munathwamu erighenda okwa sukuru y’erigha emibiiri y’ebyalha nuku ng’ighe omubiiri owanganyisighika omw’ithulira lyaghe. Eri ly’eryabya lighuma ly’okw’ithwamu eryuwene kutsibu eryo nabirithakolha. Lino nganemukolha obutemburi bw’omughulhu wosi, kandi n’omubiiri waghe abirinyilighira eriwathikya okwa Beteli n’eritsemera esindi nzunzo sy’embaghane.”

17. Ni yindi mighisa yahi eya thwanga bana busana n’erilholha embere erighendera okwa busondoli bwa Yehova? (Isaya 48:17, 18)

¹⁷ Okwa bundi buthuku, thukanabana erihabulha erikathutheghaya okwa bindu ng’erianza ebindu n’okw’ikolha emibiiri eyanga thuhira omwa kabi k’erithwa ebihano bya Nyamuhanga. N’omw’eki, thukatsumulhawa busana n’erighendera okwa busondoli obo Yehova akaha. Thukabya ithunawithe obunyamuthima-thima obuhenirye kandi ithwayibalya okwa bitunturo ebitheyithaghisibawa. (1 Tim. 6:9, 10) Busana n’ekyo, n’omuthima wosi thukakwamirira eriramya Yehova, ekindu ekikaletha etseme nene, obuholho n’erithekana.—Soma Isaya 48:17, 18.

18. Busana naki wamathwamu erilholha embere erighendera okwa busondoli bwa Yehova?

¹⁸ Ahathe erithika-thika Yehova akendi lholha embere erikolesya abandu erimw’imanira erithuha obusondoli omwa buthuku bw’obulighe bunene n’erihika okw’Ithabalha ly’Emyaka Rukumi. (Esy. 45:16) Mbwino thunemwendi lholha embere erighendera okwa busondoli obo nibya n’omughulhu erikolha ekyo kikayithagha eriyithalya okwa ebya thwanzire? Kutsibu-tsibu eki ikikendi thokekana thwamabya thunemughendera okwa busondoli obwa Yehova akaha lino. Kwesi mughulhu wosi ka thughendere okwa busondoli bwa Yehova, imwamune n’obwa abalhume abasombwerwe erithutheya bakathuha. (Isa. 32:1, 2; Ebr. 13:17) Kandi thukabya thukakolha ekyo, thukabya n’enzumwa nyingyi esyangaleka ithwayikethera Omusondoli wethu, Yehova, oyukathubalhaya okwa kabi k’obunyakirimu n’erithulholya aho thukaya—engebe y’erikotha omwa kihugho kihya.