1. Abahakabibwa abosi bakendi syathwalhwa elhubulha mughulhu wahi?

 KERA, abandu ba Yehova ibakayibulhaya bathi, ‘Ab’erighunzerera ab’okwa Bakristayo abahakabibwa bakendisyathwalhwa elhubulha mughulhu wahi?’ Ithukalengekanaya thuthi obundi abaghuma b’okwa bahakabibwa bangana syasighalha okwa kihugho Paradiso ahabw’akathuku enyuma w’olhuhi lhwe Harmagedoni. Aliwe omwa Watchtower ey’Okwomusanju 15, 2013, muthw’igha ngoku abahakabibwa abosi abakine okwa kihugho bakendi syathwalhwa elhubulha olhuhi lhwe Harmagedoni lhuthe lhwatsuka.—Mt. 24:31.

2. Ni kibulyo kyahi ekyanga buthuka, kandi thukendi kania okuki omo mwatsi ono?

² Aliwe, hangana buthuka ekibulyo: Ni kyahi ekikendi syahika okwa “sindi mbuli” sya Kristo abakendi syabya ibanemukolera Yehova buthaleghulha okwa kihugho omwa buthuku ‘bw’obulighe bunene’? (Yn. 10:16; Mt. 24:21) Munabwire, abandi bangan’ubaha bathi bangana syaburaburirwa kutse erisighanibwa balikyabo banzwa abahakabibwa bakathwalhwa elhubulha. Thulebaye emyatsi ibiri eyiseghemere okwa Masako eyangabya iy’eyikasa omwa bulengekania bwabu. Neryo thukendi kania okwa syonzumwa esikaleka ithwabya isithutholere erisagha.

NI BYAHI EBITHENDI SYABYA?

3-4. Abandi bangana yibulya bathiki, kandi busana naki?

³ Abandi ibangana bulha ab’esindi mbuli ng’abakendi syayisununulha okwa kwenene omughulhu bakendi syabya isibakiwithe ab’okwa Kathunga Akakasondolha abanga basondolha. Obundi emyatsi mirebe eyiseghemere okwa Masako yikaleka ibasamo obuba ng’obo. Thulebaye eby’erileberyako bibiri. Eky’erimbere kihambire oko Muhereri Mukulhu Yehoyada. Abya mughombe muthaleghulha wa Nyamuhanga. Iyo na mukali wiwe, Yosabeati, mubatheya omulhwana ya Yoasi n’erimuwathikya eribya mwami oyuwene kandi muthaleghulha. Yoasi mwalholha embere erikolha  ebibuya omw’ibyaho lyosi lya Yehoyada. Aliwe Yehoyada abere abiriholha, Yoasi mwalhuaho iniabya mubi. Mwahulikirira abanya-mwami babi kandi amasighania Yehova.—2 Emy. 24:2, 15-19.

⁴ Ekindi ky’erileberyako ky’ekya Bakristayo ab’omwa kighana kyakabiri. Okwa bakwenda, omukwenda Yoane yuwabyaho buthuku buuli, abya ky’erileberyako ekyuwene okwa Bakristayo bangyi, mwabawathikya eriyiyinia banemukolera Yehova. (3 Yn. 4) Iyo haghuma n’abandi bakwenda ba Yesu abathaleghulha, Yoane abya iniabirighunza buthuku inianemurwanisya kutsibu eriyisamambulha okw’ikirirya eryabya irinemukanyirira. (1 Yn. 2:18) Aliwe Yoane abere abiriholha, eriyisamambulha okw’ikirirya mulyalhandaghana ng’olhuhindi. Omwa myaka eyakwamako, ekithunga ky’Ekikristayo mukyusulhamo esyongangirirya sy’amabehi.

5. Sithutholere thukaghunzerera thuthiki bikahika oko myatsi ibiri eyo?

⁵ Mbwino emyatsi ibiri eyi eyiseghemere okwa Masako yikakanganaya ngoku ekiri ng’ekyo kikendi syabya oko sindi mbuli sya Kristo abahakabibwa babithwalhwa elhubulha? Okwa buthuku obo, mbwino Abakristayo abathaleghulha ab’okwa kihugho banemwendi syayisununulha okw’ithendekwa lyabu, ngoku Yoasi akolha, kutse eriyisamambulha okw’ikirirya, ngoku Abakristayo bangyi ab’omwa kighana kyakabiri E.K. bakolha? Eky’erisubirya ni eyihi nahake! Thwangana yikethera ngoku abahakabibwa bakendisyabya bakalhua oko kihugho, ab’esindi mbuli bakendi syatsomanwa ndeke kandi ibakulha-kulhana bunyakirimu. Busana naki ithwayikethera ekyo?

ERIRAMYA LY’OKWENENE SIRYENDISYATSANDIBWA

6. Ni mighulhu yahi isathu eyathukendi kaniako omwa bikuhi?

⁶ Busana naki ithwayikethera ngoku eriramya ly’okwenene siryendisyatsandibwa, nibya n’omwa mughulhu owakalire owakayasa? Busana n’ebya thwabir’igha omwa Biblia ebihambire okwa mughulhu ogho thulimo. Omughulhu oyu ali mbaghane kutsibu okwa mughulhu w’Abaisraeli ba kera n’okwa mughulhu w’Abakristayo b’omwa kighana kyakabiri. Neryo leka thulebaye ndeke emighulhu isathu eyi: (1) Omughulhu w’Abaisraeli ba kera, (2) omughulhu owabyaho abakwenda ibamabiriholha, na (3) omughulhu wethu, “omughulhu w’erisuba ly’emyatsi yosi.”—Emib. 3:21.

7. Omwa Israeli ya kera, busana naki abathaleghulha mubathahwa amani ekihanda kye Israeli n’abami bakyo bakathwamu eribya babi?

⁷ Omughulhu w’Abaisraeli ba kera. Musa iniakisiya iniaholha, mwabwira Abaisraeli athi: “Nyinasi enyuma w’olhuholho lhwaghe mwasyayitsandya, n’eribunukalha oko nzira eyo nabiribahana.” (Ebi. 31:29) Kandi Musa mwaghusa okwa Baisraeli kw’akasali athi bamayisamambulha, ekihanda ikikendi thwalhwa omwa bunyewa. (Ebi. 28:35, 36) Mbwino ebinywe ebyo mubyanabererera? Ee. Ahabw’ebighana bingyi, abami bangyi mubathwamu eribya babi n’erileka abandu ba Nyamuhanga ibamusighania. Eki mukyaleka Yehova iniahighitha abandu biwe babi n’erighunzaho erithabalha ly’abami be Israeli. (Eze. 21:25-27) Aliwe Abaisraeli abathaleghulha mubabya bathubaha bakalhangira ebinywe bya Nyamuhanga bikabererera.—Isa. 55:10, 11.

8. Kinatholere ikyathuswekya eribya ekithunga ky’Ekikristayo ky’omwa kighana kyakabiri imukyatsandibwa? Soborera.

⁸ Omughulhu owabyaho abakwenda ibamabiriholha. Mbwino ekithunga ky’Ekikristayo eky’omwa kighana kyakabiri eribya imukyatsandibwa, kinatholere ikyathuswekya? Eyihi nahake. Yesu mwalhaghulha athi abangyi banga yisamambwire okw’ikirirya. (Mt. 7:21-23; 13:24-30, 36-43) Omukwenda Paulo, Petero, na Yoane abosi babya ibabirikakasya ngoku  obuminyereri bwa Yesu obu bwabya ibwabiritsuka eribererera omwa kighana ky’erimbere E.K. (2 Tes. 2:3, 7; 2 Pet. 2:1; 1 Yn. 2:18) Omwa kighana kyakabiri E.K., ekithunga ky’Ekikristayo mukyatsandibwa. Abakristayo abayisamambuli mubabuthuka n’eribya kitsweka kikulhu ky’okwa Babeli Mukulhu, amadini wosi w’amabehi. Aho kandi, obuminyereri obwasondolibawa bwabya ibwamabererera.

9. Omughulhu ogho thulimo ali athi mbaghane okwa mughulhu w’Abaisraeli ba kera n’okwa ow’ekithunga ky’Ekikristayo eky’omwa kighana kyakabiri?

⁹ ‘Omughulhu w’erisuba ly’emyatsi yosi.’ Omughulhu ogho thulimo ali mbaghane okwa mughulhu w’Abaisraeli ba kera n’okwa mughulhu habya eriyisamambulha linene omwa kighana kyakabiri E.K. Omughulhu wethu akahulhawamwaki? Okw’itsuka ithwangana hulhagho mo “biro by’enyuma-nyuma” eby’omughulhu mubi ono. (2 Tim. 3:1) Aliwe e Biblia yikakanganaya ngoku omughulhu mukulhu kandi muuli nagho atsuka okwa buthuku ibwan’obo. Akendi lholha embere erihika aho Obwami bw’Ekimasiya bukendi syasuba-subanirya abandu erihika okw’ihikana n’erihindulha ekihugho mo paradiso. Omughulhu oyu akahulhawamo “omughulhu w’erisuba ly’emyatsi yosi.” (Emib. 3:21) Omughulhu oyu atsuka omwa 1914. Neryo ni byahi ebyasuba-subanibawa? Yesu mwayirwa mo Mwami elhubulha. Neryo Yehova mwabya iniamathasyabya n’omuthabali oyukamwimanira, oyuwasighalhaya obwami bw’omwami muthaleghulha Dawudi. Aliwe obwami si ky’ekindu kisa ekyo Yehova asuba-subanaya. Buthuku buke enyuma waho, erighunzerera eriramya ly’okwenene mulyatsuka erisuba-subanibwa! (Isa. 2:2-4; Eze. 11:17-20) Linemwendi syaswatsandibwa?

10. (a) Ni byahi ebya e Biblia yikalhaghulha ebihambire okw’iramya ly’okwenene ery’omwa buthuku bwethu? (Isaya 54:17) (b) Busana naki amaminyereri ng’aya akahumulikanaya?

¹⁰ Soma Isaya 54:17. Thalengekania okwa buminyereri obo: ‘Sihali kindu ky’amalhwa ekikahesawa erilhwa nawu ekikendi syaghasa’! Ebinywe ebyasondolibawa ebyo binemubererera munabwire. Ebinywe ebikahumulikanaya bino nabyo bihambire okwa buthuku bwethu: “Baghalha bawu bosi basyakangiriribwa n’Omwami Mukulhu, n’obuholho bw’abaghalha bawu bwasyabya bungyi. Wasyahanganibwa omo lithunganene. . . . Siwendi syubaha. Wasyabya haali okw’iubahya, siryendisyahika hakuhi nawu.” (Isa. 54:13, 14) Nibya “nyamuhanga mubi w’ekihugho kino,” Sitani iyuwene-wene, syawithe amaaka w’erimania omubiiri w’erikangirirya ogho abandu ba Yehova bakakolha. (2 Kor. 4:4) Eriramya ly’okwenene lyabirisuba-subanibwa, kandi siryendisyaswatsandibwa. Ni ly’eribyaho kera na kera. Sihali ekyuma ky’amalhwa ekikaghesawa erilhwa nethu ekikendi syaghasa!

 NI KYAHI EKIKENDI SYABYA?

11. Ni kyahi ekikathukakasaya ngoku endeko nene siyendi syasighanibwa omughulhu abahakabibwa bakendi syaghenda elhubulha?

¹¹ Ni kyahi ekikendi syabya abahakabibwa babirithwalhwa elhubulha? Wibuke, Yesu ni Mulisya wethu. Ni muthwe w’ekithunga ky’Ekikristayo. Yesu mwabugha ndeke-ndeke athi: “Omusondoli wenyu ni mughuma, ye Kristo.” (Mt. 23:10) Omwami wethu oyunemuthabalha syendisyalemwa eriberererya omubiiri wiwe. Kristo anemusondolha, sihendisyabya ekyanga leka abamukwamire abali hano okwa kihugho bakubaha. Ni kwenene, sithwasi ebyosi ebihambire okwa mibere Kristo akendisya sondoleramo abandu biwe okwa buthuku obo. Neryo thulebaye eby’erileberyako birebe ebye Biblia ebyanga thukakasya.

12. Yehova mwatsomana athi abandu biwe (a) Musa aliholire? (b) Eliya alihebirwe olhundi lhusunzo? (Lebaya n’ekisasani.)

¹² Abaisraeli bathe bingira omwa Kihugho Ekyalhaghanisibawa, Musa mwaholha. Ni kyahi ekyabya okwa bandu ba Nyamuhanga? Omulhume omuthaleghulha oyo abere abiriholha, mbwino mubasighanibwa? Eyihi. Yehova iniakalholha embere eribatsomana bamasighalha bathaleghulha. Musa athali aholha, Yehova mwamubwira athi ahe Yosua y’omubiiri w’erisondolha abandu. Musa abya iniamabirighunza myaka mingyi inianemuthendeka Yosua. (Eri. 33:11; Ebi. 34:9) Eryongera okw’ekyo, habya ihane abandi balhume bangyi abatholere abanemusondolha—abasondoli b’amaelfu, amaghana, amakumi athano, nibya n’amakumi. (Ebi. 1:15) Abandu ba Nyamuhanga mubatsomanwa ndeke. Thukabana ekindi eky’erileberyako ekiri ng’ekyo ekya Eliya. Ahabw’emyaka abya inianemusondolha Abaisraeli omw’iramya ly’okwenene. Aliwe endambi muyahika Yehova amamusubya eyikwa ye Yuda eriyakolha y’owundi mubiiri. (2 Bam. 2:1; 2 Emy. 21:12) Mbwino abandu bathaleghulha ab’omwa bwami bw’ebihanda ikumi mubanasighanibwa? Eyihi. Eliya abya iniabirighunza emyaka inianemuthendeka Elisa. Kandi habya ihane “baghalha b’abaminyereri,” abo kilhangirikire ngoku babya ibabirithendekwa. (2 Bam. 2:7) Busana n’ekyo, abalhume bangyi abathaleghulha babya ibaneho eriwathikya okw’isondolha abandu ba Nyamuhanga. Ekighendererwa kya Yehova mukyabya ikinemulholha embere, kandi mwatsomana abaramya biwe abathaleghulha.

13. N’ikakasya lyahi erya thukabana omwa Abaebrania 13:5b? (Lebaya n’ekisasani.)

¹³ Wun’ibukire eby’erileberyako ebyo, wukalengekanaya ni kyahi ekikendisyabya ab’erighunzerera b’okwa bahakabibwa babithwalhwa elhubulha? Sithutholere thukubaha. E Biblia yikabisulha ekwenene nyolho kandi  eyikahumulikanaya: Yehova syendisyasighania abandu biwe ab’okwa kihugho. (Soma Abaebrania 13:5b.) Nga Musa na Eliya, egurupu nyike y’Abakristayo abahakabibwa abakasondolha munabwire banasi omughaso w’erithendeka abandi. Ahabw’emyaka, baghalha bethu ab’okwa Kathunga Akakasondolha babiribya ibanemuthendeka abalhume erilhua omwa b’esindi mbuli nuku basondole. Ngahathya, babiritheghekania esyosukuru nyingyi erithendeka abasyakulhu, abalebererya abakabalhama, ab’okwa Komiti y’Ekyaghanda ky’Omuthahulha, abalebererya b’okwa Beteli, n’abandi. Akathunga Akakasondolha kabiribya ikane muyithendekera abawathikya okwa sya komiti muthina-muthina esy’Akathunga Akakasondolha. Lino abawathikya aba banemukolha buthaleghulha olhukwamirwa olhulithohire. Banayitheghekire ndeke erilholha embere n’omubiiri w’eritsomana esyombuli sya Kristo.

14. Enzumwa ngulhu y’omwatsi ono y’eyahi?

¹⁴ Enzumwa ngulhu y’omwatsi wethu y’eno: Ab’erighunzerera okwa bahakabibwa bakendisyabya bakathwalhwa elhubulha obulighe bunene ibukisiya ibwahwa, eriramya ly’okwenene likendisyabya irinemulholha embere hano h’okwa kihugho. Thukasima eribya omwa busondoli bwa Yesu Kristo, abaramya ba Nyamuhanga bakendi syabya ibanemusondolhwa. Ni kwenene, okwa buthuku obo, Gogi owe Magogi, ebihanda ebiyiyungire haghuma ebitsurumire bikendi syathubambira. (Eze. 38:18-20) Aliwe eribambira ly’akathuku kake eryo likendi syalemwa; siryendisyalemesya abandu ba Nyamuhanga eriramya Yehova. Ahathe erithika-thika akendisya balhamya! Omwa syonzoli, omukwenda Yoane mwalhangira “endeko nene” y’esindi mbuli sya Kristo. Yoane mwabwirwa indi “endeko nene” eyi ‘yikalhua omw’endererya [obulighe] linene.’ (Erib. 7:9, 14) Omo kwenene bakendi syabya omwa butheya!

15-16. Ngoku kiri omwa Eribisulirwa 17:14, abigha ba Kristo abahakabibwa bakendi syabya ibanemukolhaki omwa lhuhi lhwe Harmagedoni, kandi busana naki ekyo kikahumulikanaya?

¹⁵ Nomwabine, abandi ibangana yibulya: ‘Kandi ibbwa abahakabibwa? Bakendi syakolhaki babirilhua okwa kihugho?’ E Biblia yikasubiraya ekibulyo ekyo omwa nzira eyilhangirikire. Yikabisulha ngoku abanya politiki ab’ekihugho kino “basyalhwa n’Ekyana ky’Embuli.” Ahathe erithika-thika, bakendi syasingwa. Thukasoma  thuthi: ‘Ekyana ky’Embuli kyasyakindabo.’ Kandi ni bahi abakendi syamuwathikya? Omulhondo akaha eky’erisubirya. “Ababirikirawa,” “abayisoghawa,” na “abathaleghulha.” (Soma Eribisulirwa 17:14.) Aba babahi? Abahakabibwa ababirilhubukibwa! Neryo ab’erighunzerera b’okwa bahakabibwa bakendi syabya bakathwalhwa elhubulha obulighe bunene ibukisiya ibwahwa, omughuma w’okwa mibiiri yabu y’erimbere akendisyabya iry’erilhwa. Olho ka ni lhusunzo olhukaswekaya! Abaghuma b’okw’Abakristayo abahakabibwa babya balhwi bathe babya Bema ba Yehova. Abandi nibya babya basirikali omwa mahe w’ekihugho kino. Aliwe enyuma waho mubabya Bakristayo b’okwenene bam’igha enzira y’obuholho. (Gal. 5:22; 2 Tes. 3:16) Mubaleka erisighika eby’esyonyuhi. Aliwe bakendi syabya babirithwalhwa elhubulha bakendi syakolha haghuma na Kristo n’abamalaika biwe ababuyirire, erilhwa n’esyonzighu sya Nyamuhanga omwa lhuhi lhw’erighunzerera.

¹⁶ Thakilengekaniako! Okwa kihugho, abandi Bakristayo abahakabibwa babirikulha omwa myaka, nibya n’eribbwetema. Bakendisyabya babirilhubukibwa okwa ngebe y’elhubulha, bakendi syabya bihangikwa by’ekirimu eby’amaaka kandi eby’engebe eyithehonda, ababirihebwa omubiiri w’erilhwa ibane n’Omwami wabu Mbangyi, Yesu Kristo. Olhuhi lhwe Harmagedoni lhukendisyabya lhwabirihwa, bakendi syasangira omw’isondolha abandu erihika okw’ihikana. Ahathe erithika-thika, ibane elhubulha bakendi syakolera balikyabo banzwa abali okwa kihugho b’ebibuya bingyi kwilhaba ebya bangakolire ibane bandu abathahikene!

17. Thukaminya thuthi ngoku abaghombe ba Nyamuhanga abosi bakendi syabya ibane omwa butheya omwa buthuku bw’olhuhi lhwe Harmagedoni?

¹⁷ Wuli w’okwa b’esindi mbuli? Neryo wukendi syakolhaki olhuhi lhukulhu kutsibu olhwe Harmagedoni lhukatsuka? Kighuma kisa: Yikethere Yehova kandi ghendera okwa busondoli bwiwe. Ekyo mwangabya imwamuliki? E Biblia yikathuhumulikanaya omw’ibugha yithi: “Mwingire omo manyumba wenyu, mukinge esyonyuyi syenyu enyuma wenyu. Muyibise oko kathambi kake, erihika aho erihithana lyamabilhabira.” (Isa. 26:20) Abaghombe ba Nyamuhanga abosi abathaleghulha omwa lhubulha n’okwa kihugho, bakendi syabya ibane omwa butheya okwa buthuku obo. Ng’omukwenda Paulo, thukaligha ngoku sihali ‘bathabali, kutse emyatsi eyasesene, kutse eyikendisyasa eyanga thoka erithughabulha oko lhwanzo lhwa Nyamuhanga.’ (Abar. 8:38, 39) Mughulhu wosi w’ibuke kino: Yehova akwanzire, kandi syendi syakusighania!