Mary na mwira wiwe John, a b’ikere omwa kihugho eyo kyolhobire eribwira abandu bangyi abakalhua e Philippines bakasondya emibiiri b’engulhu yuwene. Omwa buthuku bw’ekihunzo ky’ekorona, Mary mwathoka eritsukisya abigha be Biblia n’abandu ab’omwa kihugho eky’ikeremu n’abandi ab’omwa bindi bihugho. Mwathoka eki kyathi?

Mary iniakabulhaya abigha biwe be Biblia athi, “Wunasi owundi mundu wosi-wosi oyu wanganza erigha e Biblia?” Ibamabugha bathi ee, iniakababwira athi bamuwathikaye eribabana. Eribulya ekibulyo ekyolhobire eki mughulhu mungyi kikalhwiririramo ebibuya. Busana naki? Kundi abandu abakatsemera Ekinywe kya Nyamuhanga mughulhu mungyi bakanza ibabwira abahughu n’abanywani babu abo batsomene okwa ebya bak’igha. Ni kyahi ekyabirilhwiririra omw’ibulya ekibulyo eki?

Omwigha wa Mary owe Biblia ya Jasmin mwamuwathikya eribana abandi bigha bbani abahyaka. Omughuma w’okw’ibo, ya Kristine, mwatsemera kutsibu erigha liwe lye Biblia erihika okw’isaba Mary athi abye ak’igha nayu mirundi ibiri omwa wiki. Mary abere akamubulya nga hane owundi wosi-wosi oyo asi oyuwanganza erigha e Biblia, Kristine mwabugha athi, “Ee, ngendi bwira banywani baghe imwakanirania.” Omwa syowiki nyike buyira, Kristine mwawathikya Mary eribanangana n’abanywani biwe bbani ababya banzire erigha. Enyuma waho, Kristine mwawathikya Mary eribana abandi banywani biwe, abaghuma b’okw’ibo nabo mubakolha ikyan’ekyo okwa bandi.

Kandi Kristine aby’anzire ab’efamile yiwe abe Philippines ib’igha e Biblia. Neryo mwakania na mwali wiwe, ya Andrea. Okw’itsuka, Andrea mwalengekania athi, ‘Abema ni kadini buyira, abathikirirye omu Yesu, kandi abakakolesaya Endaghano ya Kera nyisa.’ Aliwe enyuma w’erigha murundi mughuma musa, mwahwamu amalengekania wiwe awathahikire ayo. Iniakabya ak’igha, iniakabugha athi, “E Biblia yamabya iyamabugha ekyo, obo kitholere eribya ikihikire!”

Endambi muyahika, Andrea amawathikya Mary eribana banywani biwe babiri n’oyo akakolha nayu abatsuka erigha. Kandi Mary abya isyasi ngoku Sungali wa Andrea ya Angela, oyuli ndime-thime, akabya inianahulikirire bak’igha. Neryo kiro kighuma, Angela mwasaba Andrea athi anzire iniakania na Mary neryo amayisabira eribya ak’igha e Biblia. Angela mwatsemera ebyo ak’igha. Omwa kwezi kughuma kusa, Angela abya iniabirihambira omwa muthwe mwa masako mangyi kandi mwanza eribya ak’igha mirundi ini obuli wiki! Omwa buwathikya bwa Andrea, Angela  mwatsuka eribya akahindana mughulhu wosi omw’ikolesya enganirania y’evidiyo.

Omughulhu Mary aminya ngoku mwira wa Kristine ya Joshua, aby’akabera eribya inian’eka bak’igha na Kristine, Mary mwamubulya ng’angananza eribayiyungako. Joshua mwabugha athi, “Ngendi hulilkirira buyira, aliwe isiwanyibulhaya ekibulyo kyosi-kyosi; wamakolha ekyo, iningendi lhuaho.” Omwa syodakika ithano esy’erimbere-mbere esy’erigha lyabo, mwabulya ebibulyo bingyi kwilhaba Kristine kandi mwanza erilholha embere n’erikanirania eriseghemere okwa Biblia.

Ekibulyo kya Mary ekyolhobire mukyaleka abandu bangyi ib’igha e Biblia. Mwahiraho emitheghekere nuku abandi Bema bamuwathikaye erigha n’abangyi b’okw’ibo. Mary mwatsuka erigha n’abandu 28 omwa bihugho bbini muthina-muthina busana n’eribulya ekibulyo eki.

Jasmin, omw’igha w’erimbere oyukanibweko omwa kyalholirweko kino mwabatizibwa omwa Kwakani 2021. Kristine abatizibawa omwa Kwakathano 2022 kandi abirisuba e Philippines eribya n’ab’efamile yiwe. Abandi bigha babiri abo Kristine awathikaya Mary eribana, nabo babiribatizibwa. Angela mwabatizibwa mezi make Kristine alibatizibirwe, kandi lino anemukolha ng’omutemburi w’omughulhu wosi. Mwira wa Kristine ya Joshua, n’omwana wabu w’obukali ya Andrea, haghuma n’abandi bigha bane mulholha embere erikulha-kulhana.

Omwa kighana ky’erimbere, engulhu yuwene muyalhuaho iyalhandaghana omwa bahughu n’abanywani. (Yn. 1:41, 42a; Emib. 10:24, 27, 48; 16:25-33) Busana naki iwuthabulya abigha bawu be Biblia kutse abandi abakanzisibawa wuthi, “Wunasi owundi mundu wosi-wosi oyuwanganza eryeghesibwa e Biblia?” Nindi oyuwasi nga ni bangahi abanga tsuka erigha e Biblia busana n’eribulya ekibulyo ekyolhobire eki?