OMWATSI W’ERIGHA 6
OLHWIMBO 18 Erisima Embanulho
Ekikaleka Ithwasima Erighanyira lya Yehova
‘Nyamuhanga mwanza ekihugho ky’athya, kyaleka iniahayo Mughalha wiwe, Ekyusa kiwe.’—YN. 3:16.
EKIGHENDERERWA
Eryongera erisima erighanyira lya Yehova omw’iyitheghererya ebyo akolha ithwe erithoka erighanyirwa ebibi byethu.
1-2. Emibere eyo abandu balimo yiri yithi ng’eya omulhwana oyukanibweko omwa nungu 1 abyamo?
THALENGEKANIA okwa mulhwana oyuwakulira omwa famile enyigaga. Kiro kighuma ihabuthuka ekitsibu; ababuthi biwe ibaholera omwa aksidenti. Iniabya omwa bulighe bunene busana n’omwatsi oyo. Nomwabine, hakine owundi mwatsi owakendi kukubalya omulhwana oyu. Akaminya ngoku ababuthi biwe mubakolesya esyosente nene kwilhaba esyo efamile yabya yiwithe n’erisigha amabanza manene kutsibu. Nawu thakilengekaniako, omwakanya k’erisighalya obugaga, iniasighalya amabanza w’ababuthi biwe, n’abandu ibanemumuthuhya. Eribanza ni linene kutsibu eribya isyendi thoka eririthuha.
2 Omwa nzira ndebe, emibere eya thulimo yiri ng’emibere eyo omulhwana oyo abyamu. Ababuthi bethu ab’erimbere, Adamu na Eva, babya bahikene kandi babya b’ikere omwa paradiso eyuwenenga. (Enz. 1:27; 2:7-9) Babya bawithe akaghisa ak’eritsemera engebe eyuwene eya kera na kera. Aliwe obuli kindu mukyahinduka. Mubaherya e Paradiso obwikalho bwabu obuwene n’akaghisa ak’engebe y’erikotha. Ni kyahi ekya abaana babu abangabuthirwe bangasigherye? E Biblia yikathubwira yithi: “Ebibi mubyahika munakihugho busana n’omundu mughuma [Adamu], n’olhuholho mulhwingira busana n’ekibi kiwe, neryo lithya olhuholho mulhwahika oko bandu bosi, kusangwa abosi mubakolha ebibi.” (Abar. 5:12) Adamu abirithusighalirya ekibi, ekikalhwiririramo olhuholho. Ekibi ekya thwasighalhaya kiri ng’eribanza linene kutsibu, erya owosi-wosi okw’ithwe athe angaliha.—Esy. 49:8.
3. Busana naki ebibi byethu ibyalinganisibwa ‘n’amabanza’?
3 Yesu mwalinganisya ebibi ‘n’amabanza.’ (Mt. 6:12, NWT; Lk. 11:4) Thukabya thukasobya, thukabya ng’abamabya mw’eribanza lya Yehova. Thutholere ithwaliha eribanza eri busana n’ekibi ekyo. Eribanza eri ly’amathendi thuhwa, irikendi thuhwa ithunalyaholha.—Abar. 6:7, 23.
4. (a) Ahathe obuwathikya, ni kyahi ekyangahikire okwa bandu abosi? (Esyonyimbo 49:7-9) (b) Omwa Biblia, ekinywe “ekibi” kikamanyisayaki? (Lebaya akasanduko “ Ekibi.”)
4 Mbwino kinathokekene ithwe erithasyasubyaho ebyosi ebyo Adamu na Eva baheraya? Sithwangathoka ahabwethu. (Soma Esyonyimbo 49:7-9.) Ahathe obuwathikya, sithwangabya n’amaha w’engebe y’erikotha kutse erilhubuka. Omo kwenene, olhuholho lhwethu lhwangabere ng’olhw’ebisoro.—Omu. 3:19.
5. Thatha wethu w’olhwanzo abirithuwathikya athi eriliha eribanza ly’ekibi eryo thwasighalhaya? (Lebaya ky’okwa kidipa)
5 Erisubya ameso w’enyuma okwa mulhwana oyukanibweko okw’itsuka, angayowire athi omulhume omugaga kwayihayo eriliha amabanza wiwe wosi? Ahathe erithika-thika, omulhwana iniakendi sima kutsibu ebya omulhume omugaga oyu amahayo. Omwa nzira iyaneyo, Thatha wethu w’olhwanzo, Yehova, abirithuha ekihembo ekikaliha eribanza ly’ekibi ekya thwasighalhaya oku Adamu. Yesu mwakisoborera omwa nzira eno: “Nyamuhanga mwanza ekihugho ky’athya, kyaleka iniaha Mughalha wiwe, Ekyusa kiwe, neryo oyukamwikiriraya syahere, nikwa abye n’engebe y’erikotha.” (Yn. 3:16) Eryongera okw’ekyo, ekihembo ikyan’ekyo kikaleka ikyathokekana eribya n’obughuma obuwene na Yehova.
Yesu mwathulha engulhu yuwene eyihambire okw’ighanyira lya Yehova eriseghemere okwa kihongo ky’endongolya. (Yn. 3:16) Neryo ahathe erikakwa mwahayo engebe yiwe-yiwe erithoka erihayo endongolya eyo (Lebaya enungu 5)
6. Ni binywe byahi bye Biblia ebya thukendi kaniako omo mwatsi ono, kandi busana naki?
6 Thwanga ghasirwa thuthi omwa kihembo kibuyanga eki nuku ebibi byethu kutse “amabanza” wethu bighanyirawe? Eky’erisubirya okwa kibulyo eki kikabanika omwa binywe ebikakolesibawa omwa Biblia nga erisangania [erisubanamo], erihanulha, endongolya, erisabulhwa, n’erithungananibwa. Omo mwatsi ono, thukendikania okwa ekya buli kinywe kikamanyisaya. Kandi thunemughanirya okw’isoborera ly’obuli kinywe, thukendyongera erisima ekyo Yehova akaseghemerayako erighanyira liwe.
EKILHUBIRIRWA: ERISUBANAMO
7. (a) Ni kindi kyahi ekyo Adamu na Eva baheraya? (b) Ithwe ng’ab’olhubutho lhwa Adamu na Eva, ni kyahi ekya thukayithagha kutsibu? (Abanya Roma 5:10, 11)
7 Eryongera okw’ibya imubaherya akaghisa ak’eribyaho kera na kera, Adamu na Eva mubaherya obughuma bwabu bw’obughuli na Thatha wabu, Yehova. Okwi’tsuka, Adamu na Eva babya b’omw’ihiika lya Nyamuhanga. (Lk. 3:38) Aliwe babere babirisoberya Yehova, mubalhusibwa omw’ihiika liwe isibali babutha abaana. (Enz. 3:23, 24; 4:1) Ithwe ng’abaana babu, thutholere ithwasanganibwa [ithwasubanamo] na Yehova. (Soma Abanya Roma 5:10, 11.) Ni bugha ambu, obughuma bwethu nayu butholere ibwasuba-subanibwa. Ngoku kiri omwa kitabu kighuma, ekinywe ky’Ekigiriki ekikolesibirwe hano, “erisubanamo” kyangana manyisya “erinywana enzighu.” Ekikaswekaya, Yehova n’iyo watsuka erileka eki ikyathokekana. Kithi?
EMITHEGHEKERE: ERIHANULHA
8. Erihanulha niki?
8 Erihanulha y’emitheghekere eya Yehova ahiraho erisuba-subania obughuma obuwene ahakathi-kathi kiwe n’abakolha-nabi. Mwamuli erihingisya ekindu n’ekindi ekingene-ngene nakyo omwa bughuli. Omwa nzira eyi, ekindu ekiryathalha kutse ekiryatsandibawa ikyangana thasyasuba-subanibwa kutse erisubibwaho. Amasako w’Ekigiriki akakolesaya ekinywe ekiri ng’ekyo ekikamanyisaya “erihanulha.” (Abar. 3:25) Erihanulha ky’ekikakolhawa nuku omundu abye buholho na Nyamuhanga kandi athunge obughuma obuwene nayu.
9. Ni mitheghekere yahi y’obuthuku buke eya Yehova ahiraho nuku ebibi bya Baisraeli bighanyirawe?
9 Abaisraeli erithoka eribya n’obughuma obuwene nayu, Yehova mwahira h’endegheka y’obuthuku buke eyangalekire ibathoka erighanyirwa ebibi byabu. Omwa Israeli, Ekiro eky’Erihanulha ikik’ibukawa obuli mwaka. Okwa kiro ekyo, omuhereri mukulhu iniakahayo amahere w’ebisoro busana n’abandu. Ni kwenene, amahere w’ebisoro abya isyanga ghunziraho ighuma amalholho w’obuli mughuma kundi abandu balengire ebisoro. Aliwe Abaisraeli ababiriyisubamo ibakabya bamahayo amahere agho Yehova akabayithaghako, iniakabya inianayitheghekire eribaghanyira ebibi byabu. (Ebr. 10:1-4) Eryongera okw’ekyo, endegheka eyo n’erihayo mughulhu wosi obuhere bwabu bw’ebibi, mubyaleka Abaisraeli ibaminya ngoku emibere y’ekibi eyo babyamo si mwatsi wamasatha kandi ngoku babya bakayithagha ekindu ekilengireyo erighunzaho ebibi byabu.
10. Ni mitheghekere yahi eya kera na kera eya Yehova ahiraho nuku ebibi bighanyirawe?
10 Yehova abya inianasi emitheghekere eyanga ghunzireho ighuma ebibi. Mwahiraho emitheghekere nuku Mughalha wiwe mwanzwa ahebaweyo “ngendo nguma eriheka ebibi by’abandu bangyi.” (Ebr. 9:28) Yesu mwahayo “engebe yiwe mw’obughuli busana n’abandu bangyi.” (Mt. 20:28) Endongolya niki?
ENDIHI: ENDONGOLYA
11. (a) Ngoku kiri omwa Biblia, endongolya niki? (b) Ni mundu oyulyathi oyuwanga yithaghisibirwe eriliha endongolya?
11 Ngoku kiri omwa Biblia, endongolya y’endihi eyikalihawa nuku habye erihanulha n’erisubanamo. Oku Yehova, yikaleka ikyathokekana erisubyaho ekyaheribawa. Omwa nziraki? Wibuke, Adamu na Eva mubaherya engebe eyihikene haghuma n’akaghisa k’eribyaho kera na kera. Neryo endongolya yanga yithaghisibirwe eriliha ekindu ekingene n’ekyahera. (1 Tim. 2:6) Yanga lihirwe omulhume oyunakulire oyuwangabere (1) iniahikene; (2) oyuwangana byaho kera na kera okwa kihugho; kandi (3) inianayitheghekire erihayo engebe yiwe eyo busana nethu. Omwa nzira eyi nyisa, omundu mwangathokire eriliha engebe eyaheribawa.
12. Ni kyahi ekyaleka Yesu iniathoka erihayo endihi y’endongolya eyayithaghisibawa?
12 Thulebaye esyonzumwa isathu esyaleka ikyathokekana Yesu eriliha endongolya. (1) Aby’ahikene—“mwathakolha ekibi.” (1 Pet. 2:22) (2) Busana n’ekyo, abya iniangana byaho kera na kera okwa kihugho. (3) Abya inianayitheghekire eriholha n’erihayo engebe yiwe eyo busana nethu. (Ebr. 10:9, 10) Ng’omundu oyuwabya ahikene, Yesu yuwabya ingene n’omulhume w’erimbere ya Adamu, athali akolha ekibi. (1 Kor. 15:45) Neryo erilhabira omwa lhuholho lhwiwe, Yesu mwathoka erighulha ekibi kya Adamu, ni bugha ambu erisubyaho ebyosi ebyo Adamu aheraya. (Abar. 5:19) Busana n’ekyo, Yesu mwabya “Adamu w’enyuma.” Sihakiri ekindi kiyithawa ekyangaleka omundu oyuhikene iniasa eriliha ekya Adamu aheraya. Yesu mwaholha “ngendo nguma nyisa.”—Ebr. 7:27; 10:12.
13. Ni mbaghane yahi eyiri ahakathi-kathi k’emitheghekere y’erihanulha n’endongolya?
13 Kwesi, ni mbaghane yahi eyiri ahakathi-kathi k’emitheghekere y’erihanulha n’endongolya? Emitheghekere y’erihanulha ky’ekya Nyamuhanga akakolha erisubyaho obughuma obuwene ahakathi-kathi kiwe n’abandu. Endongolya y’endihi eyikalihawa nuku erihanulha lithokekane okwa bakolha-nabi. Endihi eyi yahebawayo erilhabira omwa musasi wa Yesu ow’obughuli ow’uthibawa busana nethu.—Efe. 1:7; Ebr. 9:14.
EBIKALHWIRIRAMU: ERISABULHWA N’ERITHUNGANANIBWA
14. Ni byahi ebya thukendi kaniako, kandi busana naki?
14 Ni byahi ebikalhwiririra omwa mitheghekere y’erihanulha? E Biblia yikakolesaya ebinywe muthina-muthina yikakania okwa bibuya ebikalhwiririra omwa mitheghekere eyi. Nomwakine indi ebinywe ebi bisosene, obuli kinywe kikahira omuwatho okwa mibere emitheghekere y’erihanulha yikaleka Yehova iniathughanyira. Thukayithendya okwa myatsi eyi, thukendi lhangira ngoku nethu yikathuhambako ahabwethu.
15-16. (a) Omwa Biblia, ekinywe “erisabulhwa” kikamanyisayaki? (b) Kandi eki kikathuhambako kithi?
15 Omwa Biblia, erisabulhwa likamanyisaya eriboholhwa, kutse erilhwikwa, busana n’endihi y’endongolya. Omukwenda Petero mwakikaniako omwa nzira eno: “Munasi mumwathathongolibwa okwa mitse mithya-mithya n’emighendere y’abathatha-kulhu wenyu, omo bindu ebikahera, ng’ebitsipa kutse esyamaghetse. Nikwa mwathongolibawa omwa musasi wa Kristo, ow’obughuli bunene, nayo abya ng’ekyana ky’embuli ekithe kw’ekithingu kutse bulema.”—1 Pet. 1:18, 19.
16 Busana n’ekihongwa eky’endongolya, thukaboholhawa okw’inubibwa ly’ekibi n’olhuholho. (Abar. 5:21) Omo kwenene, thuwithe nzumwa mbuya eyangaleka ithwasima Yehova na Yesu ba kutsibu busana n’erisabulhwa erilhabira omwa musasi wa Yesu ow’obughuli, kutse engebe yiwe.—1 Kor. 15:22.
17-18. (a) Erithungananibwa niki? (b) Kandi likathughasira lithi?
17 Erithungananibwa likamanyisaya erilhusibwako emisango eya thuwithe n’ebyosi ebyo thwakolha, kutse ery’eribwa. Omw’ikolha eki, Yehova syalithwa ebihano biwe eby’obulingirirania. Syali thuyira mw’abathunganene ahabw’emikolere yethu; kutse erigheghena ebibi byethu. Aliwe busana n’erikirirya lyethu omwa mitheghekere y’erihanulha n’endihi y’endongolya eyathuhawa, Yehova anawithe ekyanga leka iniasangulha ebibi byethu.—Abar. 3:24; Gal. 2:16.
18 Eki kikaghasira kithi obuli mughuma w’okw’ithwe? Ababirisombolhwa erithabalha na Yesu omwa lhubulha babiriyirwa mw’abathunganene ng’abaana ba Nyamuhanga. (Tito 3:7; 1 Yn. 3:1) Ebibi byabu byabirighanyirwa. Si bakyasibwe ng’abakolha-nabi ngoku babya, busana n’ekyo, bakatholera eribya omwa Bwami. (Abar. 8:1, 2, 30) Abawithe amaha aw’eribya okwa kihugho babiriyirwa mwabathungenene nga banywani ba Nyamuhanga, kandi babirighanyirwa ebibi byabu. (Yak. 2:21-23) Endeko nene, eyikendi syalhamibwa okwa Harmagedoni, bawithe amaha w’erisyabyaho kera na kera. (Yn. 11:26) “Abathunganene” “n’ababi [abathathunganene]” ababiriholha bakendi syalhubukibwa. (Emib. 24:15; Yn. 5:28, 29) Erighunzerera, abaghombe ba Yehova abosi abakamwowa abali okwa kihugho bakendi ‘sy’ingira omwa bwiranda n’olhukengerwa lhw’abaana ba Nyamuhanga.’ (Abar. 8:21) Ka thukatsema busana n’omughisa ow’akalhwiririra omwa ndegheka y’endongolya—erisubanamu ndeke na Thatha wethu, Yehova!
19. Engebe yethu yabiry’uwana yithi? (Lebaya n’akasanduko “ Ngoku Kikathughasira.”)
19 Omo kwenene, thwabya omwa mibere ng’ey’omulhwana oyukanibweko okw’itsuka oyuwaheraya ebyosi n’erisighalya eribanza linene eryo athe angaliha. Thukasima Yehova ahabw’eribya ithunawithe obuwathikya. Engebe yethu yabirihinduka busana n’emitheghekere y’erihanulha n’endihi y’endongolya. Erikirirya lyethu omu Yesu Kristo likaleka ithwasabulhwa, kutse eriyirwa bwiranda okwa kibi n’olhuholho. Kandi ebibi byethu bikaghanyirawa, neryo ithwalhusibwako olhubanza. Ekikulhu kutsibu, lino, thwanganabya n’obughuma obuwene na Thatha wethu ow’olhwanzo ow’elhubulha, Yehova.
20. Thukendi syakania okuki omo mwatsi owakakwamako?
20 Thukabya thukaghanirya okwa kya Yehova na Yesu bathukolera, thukatsema kutsibu. (2 Kor. 5:15) Ahathe obuwathikya bwabu, sithwangabere n’amaha nahake! Aliwe erighanyira lya Yehova likaghasira lithi obuli mughuma w’okw’ithwe? Ekyo kya thukendi kaniako omo mwatsi owakakwamako.
OLHWIMBO 10 Thupipe Yehova, Nyamuhanga Wethu!
