1. Busana naki erighanyira ly’abandu mughulhu mungyi iryakalha eriyitheghereribwa?

 “NAMAKUGHANYIRA.” Ebinywe ebi ka bikahumulikanaya, kutsibu-tsibu wamaminya ngoku muwabugha kutse erikolha ekindu kirebe ekikaponesaya owundi! Ekinywe “namakughanyira” kikamanyisayaki? Mbwino oyo wulyaponesaya akamanyisaya athi mwamathasyabya banywani ndeke? Kutse mbwino akamanyisaya athi syakyanzire erithasyakania okwa mwatsi oyo? Erighanyira ly’abandu likalire eriyitheghereribwa.

2. Erighanyira lya Yehova lyabirikanibwako lithi omwa masako? (Lebaya n’omwatsi ahikwa.)

² Omuhandiki w’esyonyimbo mwakania oku Yehova athi: “Nikwa iwe wukathubuyira, ithwathoka erik’ubaha.” a (Esy. 130:4) Emibere eyo Yehova akaghanyiramu ni y’embaghane kutsibu okwa mibere eyo ithwe bandu abathahikene thukaghanyiramo abandi. Akathuhiriraho eky’erileberyako ekikakanganaya erighanyira ly’okwenene. Okwa bundi buthuku, abahandiki be Biblia mubakolesya ekinywe ky’Ekihebrania ekikamanyisaya erighanyira ekithe kolesibawa erighanyira ly’abandu likakanibwako.

3. Erighanyira lya Yehova liri mbaghane lithi okwa lyethu? (Isaya 55:6, 7)

³ Yehova akabya akaghanyira omundu, ekibi kiwe kikalhusibirawaho ighuma. Obughuma obwabiritsandibwa bukathasyasuba-subana ndeke. Thukasima Yehova kundi akathughanyira ighuma kandi mughulhu wosi.—Soma Isaya 55:6, 7.

4. Yehova akathuwathikaya athi eriyitheghererya ekyo erighanyira ly’ekwenene likamanyisaya?

⁴ Erighanyira lya Yehova lyamabya iniry’embaghane okwa  lyethu, ithwe ng’abandu abathahikene thwanga yitheghererya thuthi ekya erighanyira ly’ekwenene likamanyisaya? Yehova akakolesaya eby’erileberyako ebyuwene erithuwathikya eriyitheghererya erighanyira liwe. Omo mwatsi ono, thukendi lebya ebighuma by’okw’ibyo. Bikendi thukangania Yehova ng’ak’ihaho athi ekibi, kandi okwa buthuku ibwan’obo, nga akasuba-subanaya athi obughuma obwabiritsanda busana n’ekibi. Thukendibya thunemw’igha okwa by’erileberyako ebi, thukendyongera erisima Thatha wethu w’olhukeri oyukakanganaya erighanyira liwe omwa nzira nyingyi.

YEHOVA AKALHUSAYAHO EKIBI

5. Ni kyahi ekikabya Yehova akathughanyira ebibi byethu?

⁵ Omwa Biblia, mughulhu mungyi ebibi bikalinganisibawa n’emiheke eyilithohire. Omwami Dawudi mwakania okwa bibi biwe omwa nzira eno: “Erihalya lyaghe likanyitha, lyamanyilithohera ng’omuheke owalithohire.” (Esy. 38:4) Aliwe Yehova akaghanyira ebibi eby’abakolha-nabi abakayisubamu. (Esy. 25:18; 32:5) Ekinywe ky’Ekihebrania ekikahindulhawamu “erighanyira” kutsibu-tsibu kikamanyisaya “erisumba” kutse “eriheka.” Thwangana lengekania oku Yehova ng’omulhume w’amaaka oyuk’iha omuheke w’ebibi okwa bithigho byethu n’erihekagho omwa nzira y’omusyo.

6. Yehova akahekera ebibi byethu bya haali burahi?

⁶ Ebindi by’erileberyako bikakanganaya Yehova ng’akahekera ebibi byethu bya haali burahi. Esyonyimbo 103:12 hakathubwira hathi: ‘Ngoku endatha [ebulhua lyuba] yiri haali okwa yikwa [ebulengera lyuba], abirilhusya ebibi byethu byo haali kw’ithwe athya.’ Ebulhua lyuba ni haali kutsibu okwa bulengera lyuba. Ebibiri ebi sibyanga sanga-sangana. Ni bugha ambu, Yehova akaghusa ebibi byethu bya haali kutsibu kwilhaba ngoku thwanga lengekania. Eyi ka ni nzira eyuwene ey’erisoboreramo erighanyira liwe!

7. E Biblia Yikasoborera yithi ekyo Yehova akakolha okwa ebibi byethu? (Mika 7:18, 19)

⁷ Nomwakine indi Yehova akahekera ebibi byethu bya haali okw’ithwe omwa nzira y’omusyo, mbwino akanabya iniakinab’ibukire? Eyihi. Omwami Hezekia mwabugha oku Yehova athi: “Wabirighusa ebibi byaghe byosi enyuma sy’omughongo wawu.” (Isa. 38:9, 17) Ebinywe ebi bikakanganaya ngoku Yehova akaheka ebibi by’abakayisubamu kandi akaghusabyo eyo bithe byangathasyalhangirwa. Ebinywe ebi byangana thasyabuwa omwa nzira eno: “Wabiriyira [ebibi byaghe] ng’ebithe byathabyaho.” Yehova mw’ongera erikania okwa nzumwa eyo, omwa binywe ebiri omu Mika 7:18, 19. (Soma.) Aho, Yehova akakanibawako ng’oyukaghusa ebibi byethu omwa mithobero y’engetse. Kera, kyabya isikyanga thokekana erithasyasubulya ekindu ekyabirighuswa omwa mithobero y’engetse.

8. Ni byahi ebyo thwamabirith’igha?

⁸ Erilhabira omwa by’erileberyako ebi, thwamabiriminya ngoku Yehova amathughanyira, akathulhusayako omuheke w’ebibi byethu. Omo kwenene, ngoku Dawudi anabugha, ‘obutseme buli okwa babiribuyirwa amalholho wabo, kandi obutseme buli okw’abo ebibi byabo byabirikuningirwa na Nyamuhanga. Obutseme buli okwa mundu oyo Omukama syendi syamughanzira kw’ebibi biwe.’ (Abar. 4:7, 8) Eri ka ni ghanyira ly’okwenene!

YEHOVA AKASANGULHA EBIBI

9. Ni by’erileberyako byahi ebya Yehova akakolesaya erithusoborera ng’akathughanyira bungahi?

⁹ Yehova akakolesaya ebindi by’erileberyako erithuwathikya erisima ngoku erilhabira  omwa kihongwa ky’endongolya, akasangulha ebibi by’abakayisubamu. Omwa nzira y’omusyo, Yehova akakanibawako ng’oyukaberayako ebibi ebi. Eki mukalhwirira omukolha-nabi erihenia. (Esy. 51:7; Isa. 4:4; Yer. 33:8) Yehova iyuwene-wene akasoborera ebikalhwirira omw’eki omw’ibugha athi: “Nomo ebibi byenyu byangabya ng’engulha, byasyabya byeru ng’enzururu. Nomubyangabya ng’omunyama, byasyabya ng’obweya bw’esyombuli.” (Isa. 1:18) Kikalire kutsibu erilhusya ekipaka eky’engulha [eredi] ky’omwa lhukimba. Aliwe, erilhabira omwa ky’erileberyako eki, Yehova akathukakasaya ngoku ebibi byethu byangan’eribwa ibyahenia eribya isibyanga thasyalhangirwa.

10. Ni bindi by’erileberyako byahi ebya Yehova akakolesaya erikangania obunene bw’erighanyira liwe?

¹⁰ Ngoku kiri omo mwatsi w’ahanyuma, ebibi bikanathasya linganisibawa n’amabanza. (Mt. 6:12, NWT; Lk. 11:4, NWT) Obuli soberya Yehova, thukabya nga bam’ongera okwa ribanza lyethu. Thuli mw’eribanza liwe linene kutsibu! Aliwe Yehova akabya akathughanyira, akabya ng’oyuwamathughanyira eribanza lyethu linene. Syali thuhaya endihi y’ebibi ebyabirighanyirwa. Eki ka ni ky’erileberyako ekyuwene ekikakanganaya erithekana erya thukabya nalyo Yehova akathughanyira!

11. E Biblia yikamanyisayaki yikabugha yithi ebibi byethu byabirisangulhwa? (Emibiri 3:19)

¹¹ Yehova syalikwama k’ihaho amabanza kutse ebisobyo byethu, akabisangulha. (Soma Emibiiri 3:19.) Ng’eky’erileberyako, thera akasasani omundu inialhabya omwa syosente esyo bakakubanza esiri okwa risiti mw’omukuru. Nomwabine, omughanzo w’eribanza owalhabiryemo omukuru akabya inianalhangirwe. Aliwe erisangulha ekindu ni ly’embaghane. Erithoka erisoborera eky’erileberyako eki, thutholere ithw’ibuka ngoku omwa myaka eyakera, obwino obwabya bukakolesibwa ibukakolhawa omwa syombiro kutse omuyeye, egamu, n’amaghetse. Omundu iniakahamba akafalisi akatsapire iniasimura ebya alyahandika. Neryo eribanza irikabya ‘lyamabirisangulhwa,’ irikabuliranira ighuma. Abandu ibakabya isibangathasyathoka erilhangira ebilhwe bihandikirwe. Ebya handikawa ibikabya ng’ebithe byathabyaho. Ka kikatsemesaya eriminya ngoku Yehova syali subulira okw’ihaho ebibi byethu lisa aliwe kandi akabisangulira ighuma!—Esy. 51:9.

12. Eky’erileberyako ky’ekithu ekikinirene kikathweghesayaki?

¹² Yehova akakolesaya eky’erileberyako ekisosene n’ekyo erithukangania ngoku akasangulha ebibi byethu. Akabugha athi: ‘Nabirisangulha ebibi byawu ng’ekithu kinene, n’amalholho wawu ng’obuheha bulithohire [ekithu ekikinirene].’ (Isa. 44:22) Yehova akabya akaghanyira, akabya ng’oyukakolesaya ekithu ekikinirene eribisa ebisobyo byethu nuku bibuliranire ighuma.

13. Thukayowa thuthi Yehova amaghanyira ebibi byethu?

¹³ Eby’erileberyako ebi bikathweghesayaki? Yehova amaghanyira ebibi byethu, sithutholere thukalholha embere eriyowa nabi omwa ngebe yethu yosi busana n’ebibi ebyo. Erilhabira omwa musasi wa Yesu Kristo, amabanza wethu abirighanyirwa ighuma. Nibya ebibi ebyo sibyanga thasy’ibukwa. Erighanyira ly’okwenene erikalhua oku Yehova ku likathughasira lithya thwamayisubamu ndeke.

YEHOVA AKATHASYASUBAYAHO OBUGHUMA OBUWENE

14. Busana naki thutholere ithwayikethera erighanyira lya Yehova? (Lebaya n’ebisasani.)

¹⁴ Erighanyira ly’okwenene erikalhua oku Yehova likaleka ithwabya n’obughuma obuwene nayu. Likathuwathikaya erisingura amalengekania  w’eriyowa nga wuli kw’olhubanza. Sithutholere thukasagha thuthi Yehova akinathuhitheneko bubiso-biso kandi anemusondekania akaghisa ak’erithusuyira. Sithutholere thukasagha thuthi ekyo kyanganabya. Busana naki ithwayikethera Yehova amabugha athi amathughanyira? Omuminyereri Yeremia mwahandika ebinywe ebya Yehova abugha bino: ‘Nasyabuyira amalholho wabo, n’ebibi byabo sinendi syasibukabyo.’ (Yer. 31:34) Akakania okwa binywe ebi, omukwenda Paulo mwakolesya ebinywe ibyan’ebyo athi: ‘Sinendi syasibuka ebibi byabo.’ (Ebr. 8:12) Aliwe ekyo kikamanyisayaki?

15. Kikamanyisayaki Yehova eribya isy’ak’ibukire ebibi byethu?

¹⁵ Omwa Biblia, ekinywe ‘ery’ibuka’ mughulhu mungyi sikirimanyisaya omundu ery’ibuka ekindu kirebe kutse erikilengekaniako. Aliwe, kyangana manyisya omundu eriyira eky’erikolha. Omukolha-nabi oyuwabya ahanikirwe okwa muthi hakuhi na Yesu mwasaba athi: “Yesu wunyibuke omughulhu wukasa omo Bwami bwawu.” (Lk. 23:42, 43) Syabya akakwama kyasaba athi Yesu amulengekanayeko okwa buthuku obo. Ekya Yesu asubiraya mukyakangania ngoku akendi yira eky’erikolha erilhubukya omukolha-nabi oyu. Kwesi, Yehova amabugha athi sy’ak’ibukire ebibi byethu, akamanyisaya athi amathughanyira kandi syendi syathusuyira omwa buthuku obukasa busana n’ebibi ebyo.

16. E Biblia yikasoborera yithi obwiranda obukalhwiririra omw’ighanyira ery’okwenene?

¹⁶ E Biblia yikakolesaya ekindi ky’erileberyako erithuwathikya eriyitheghererya obwiranda obukalhwiririra omw’ighanyira ery’okwenene. Busana n’obuthahikana bwethu n’amalengekania w’ekibi, thukasosekanibawa ‘ng’abakobe b’ebibi.’ Aliwe thukasima Yehova busana n’erighanyira liwe, thuli ng’abakobe ‘ababiriboholhwa okwa bibi.’ (Abar. 6:17, 18; Erib. 1:5) Omo kwenene, erighanyira lya Yehova lyabirileka ithwalhua omwa bukobe.

17. Erighanyirwa likalhwiririra lithi mw’erilhama? (Isaya 53:5)

 ¹⁷ Soma Isaya 53:5. Eky’erileberyako eky’erighunzerera ekyo thukayakanayako kikathusosekanaya ng’abandu abalhwere obulhwere obukalire. Busana n’ekihongwa ky’endongolya ekya Yehova ahayo erilhabira omu Mughalha wiwe, thukakanibawako omwa nzira ey’omusyo ng’abandu ababirilhamibwa. (1 Pet. 2:24) Endongolya yikaleka ikyathokekana erisuba-subania obughuma bwethu na Yehova, obwabya ibwabiritsandibwa omwa bulhwere bw’obunyakirimu. Ngoku omundu oyuwabirilhamibwa kw’obulhwere obukalire akanatsema kutsibu, nethu thukatsema thukalhamibwa bunyakirimu kandi thukathasyasimwa na Yehova busana n’erighanyira liwe.

NGOKU ERIGHANYIRA LYA YEHOVA LIKATHUGHASIRA

18. Ni byahi ebya thwamabir’igha okwa by’erileberyako muthina-muthina ebiri omwa Biblia ebihambire okw’ighanyira lya Yehova? (Lebaya n’akasanduko “Ngoku Yehova Akathughanyira.”)

¹⁸ Ni byahi ebya thwamabir’ighira okwa by’erileberyako ebiri omwa Biblia ebihambire okw’ighanyira lya Yehova? Akabya amaghanyira, akaghanyira ighuma. Eki kikaleka ithwabya n’obughuma obuwene na Thatha wethu w’elhubulha. Kandi, thuk’ibuka ngoku erighanyira ly’okwenene ni kihembo. Ekyo kikabya busana n’olhwanzo lhwa Yehova n’olhukogho olho akakanganaya abakolha-nabi. Abandu sibangakaka Yehova eribakolera ekyo.—Abar. 3:24.

19. (a) Ni kyahi ekya thutholere ithwasima? (Abanya Roma 4:8) (b) Thukendi syakania okuki omo mwatsi owakakwamako?

¹⁹ Soma Abanya Roma 4:8. Ithwe bosi ka thukasima thukaminya ngoku Yehova ni Nyamuhanga ‘oyukabuyira’! (Esy. 130:4) Aliwe, erighanyirwa lyethu liseghemere okw’ikolha ekindu kirebe eky’omughaso. Yesu mwasoborera athi: “Mwamathendi buyira abandi b’amalholho bakabakolera, Thatha wenyu syendi syababuyira amalholho agho mw’abirikolha.” (Mt. 6:14, 15) Kwesi, ni kikulhu ithwe erigherererya erighanyira lya Yehova. Aliwe thwanga kikolha thuthi? Omwatsi owakakwamako akendi syathukangania nga thwanga kolha eki kya thuthi.