WUNE wathalhangira ngoku abandu bangyi munabwire bakayowa ibatholere erihebwa ebitsumbi, obughabe, kutse erithwalhwa omwa nzira ey’embaghane? Nomubanga bana bingahi, bakayowa ibatholere erihebwa bingyi okw’aho. Amalengekania ng’aya aw’eriyitsomana iwuwene n’erithendi sima akakanganaya ngoku thuli omwa biro by’enyuma-nyuma.​—2 Tim. 3:2.

Omo kwenene, omubere w’eriyitsomana iwuwene si kindu kihyaka. Adamu na Eva mubathwamu eriyisombolera ekibuya n’ekibi nga ky’ekyahi, ekindu ekyabirilhwiririramu ebitsibu bingyi. Ihamabirilhaba bighana bingyi, Omwami Uzia owe Yuda mwalengekania athi n’iyo atholere erihayo obukwa okwa hekalhu, aliwe syabya ahikire nahake. (2 Emy. 26:18, 19) Kuthya, Abafarisayo n’Abasadukayo babya bikirirye bathi Nyamuhanga atholere iniabalhangiramo b’embaghane ahabw’erithabya ibalhuire omwa lhubutho lhwa Abrahamu.​—Mt. 3:9.

Thuthimbirweko n’abandu abayitsomene ibobene n’abayanzire kutsibu, kandi amalengekania wabo angana thuhambako. (Gal. 5:26) Ithwangana tsuka erilengekania thuthi thutholere ithwahebwa esyonzunzo ndebe kutse ithwathwalhwa omwa nzira y’embaghane. Thwanga yihighulha thuthi okwa malengekania ng’aya? Erithatsuka, thutholere ithwaminya amalengekania wa Yehova oko mwatsi. Emisingyi ye Biblia ibiri yikendi thuwathikya.

Yehova yukathwamu ekya thwangahebwa. Thalengekania okwa eby’erileberyako bino.

• Omw’eka, iba atholere iniayowa mukali wiwe  inianamusikirye, n’omukali atholere iniayowa mwira wiwe inianamwanzire. (Efe. 5:33) Abali omwa butheke batholere ibakangania eby’olhwanzo eby’abathahenie okwa banze babu basa. (1 Kor. 7:3) Abaana batholere ibowa ababuthi babu, n’ababuthi batholere ibakangania abaana babu b’olhwanzo olhukaghunza n’eribasighika.​—2 Kor. 12:14; Efe. 6:2.

• Omwa kithunga, kundi abasyakulhu bakakolha kutsibu thutholere ithwabasikya. (1 Tes. 5:12) Aliwe, ekyo sikirileka bakabya inib’eribendekerya balikyabo.​—1 Pet. 5:2, 3.

• Nyamuhanga abiriha esyogavumente sy’abandu sy’obughabe obw’erisaba emisolho n’erihebwa ekitsumbi erilhua okw’abo bakathabalhako.​—Abar. 13:1, 6, 7.

Omwa lhwanzo, Yehova akathuha bingyi kw’ilhaba ebya thutholere erihebwa. Busana n’eribya ithuli bakolha-nabi, ekithutholere lhwa n’olhuholho. (Abar. 6:23) Aliwe, busana n’olhwanzo lhw’iwe olhuthyusa, Yehova akathuha emighisa mingyi. (Esy. 103:10, 11) Obuli mughisa kutse olhusunzo ebya akathuha ni busana n’olhukogho lhwiwe.​—Abar. 12:6-8; Efe. 2:8.

Yitheghaye okwa malengekania w’ekihugho. Omwa buthaminya, ithwangana yisanga ithwabiritsuka erilengekania thuthi thutholere ithwahebwa bingyi kwilhaba abandi. Yesu mwakangania ngoku ky’olhobire eryasamo amalengekania ng’ayo omw’ikolesya eky’erileberyako ky’abakoli abathuhawa dinari nguma-nguma. Abaghuma b’okwa bakoli mubatsuka omubiiri omwa ngyakya n’erikolha ekiro kyosi omwa mwisi munene; abandi mubakolha ahabw’esaha nguma nyisa. Egurupu y’erimbere muyalengekania yithi yitholere iyathuhwa omusara munene busana n’omubiri ogho babya ibabirikolha. (Mt. 20:1-16) Omw’ikolesya eky’erileberyako eki, Yesu mwakangania ngoku abigha biwe batholere ibatsemera ebya Nyamuhanga akathwamu eribaha.

Ibya oyukasima, butsira oyukabera erianza erihebwa. (1 Tes. 5:18) Gherereraya omukwenda Paulo, oyuwathasaba balikyabo abe Korinto b’ebindu by’ekinyamubiri nomwakine indi abya inianawithe obughabe obw’erikolha ekyo. (1 Kor. 9:11-14) Thutholere ithwasima obuli mughisa owathukahebawa  n’eriyihighulha okw’ibyamo omuthima ow’eribera erianza erihebwa.

Kulha-kulhanaya omubere ow’eriyikehya. Omundu amatsuka eriyilengekaniako kutsibu, mughulhu mungyi akatsuka eriyowa ngatholere erihebwa bingyi kwilhaba ebyawithe. Eriyikehya ly’eryanga wathikya omundu eriyihamo amalengekania mabi ng’aya.

Omuminyereri Danieli mwahiraho eky’erileberyako ekyuwene omw’ikangania eriyikehya. Eyo akulira, emisosere mibuya, amenge, n’ebyo abya akathoka byangalekire iniayowa ngabya atholere erithwalhwa omwa nzira ey’embaghane n’erihebwa esyonzunzo esyo abya awithe. (Dan. 1:3, 4, 19, 20) Nomwabine, Danieli mwasighalha inianayikehirye, kandi omubere oyu mwaleka iniabya w’obughuli embere sya Yehova.—Dan. 2:30; 10:11, 12.

Kwesi, thuyihighule okwa muthima w’eriyitsomana ithwibene n’ow’eriyowa ngawulengire abandi owoswire omwa kihugho munabwire. Omwakanya k’ekyo, ka thulhole embere eritsemera obuli mughisa ogho Yehova akathuha busana n’olhukogho lhwiwe.