WUNE wathayowa nga wutholere iwarwanisya iwuwene ebitsibu byawu? Thuli omwa ‘mighulhu eyikalire’ eyangana leka ithwayisolholha kandi ithw’ahwa amani. (2 Tim. 3:1) Nomwabine, sithutholere thukarwanisya ebitsibu by’engebe ithw’ibene. E Biblia yikakanaya okwa mughaso w’eribya n’abanywani ab’okwenene omwa buthuku ‘bw’obulighe.’—Emi. 17:17.

Omukwenda Paulo mwaghasirwa omw’inywana abo abya akakolha nabu omwa mubiiri w’eribalhama. (Kol. 4:7-11) Omughulhu Paulo abya omwa ngomo e Roma, banywani biwe mubakolha emibiiri eyo Paulo abya isyangathoka erikolha ahabwiwe. Ng’eky’erileberyako, Epafrodito mwathwalira Paulo y’ebindu ebyo abya akayithagha ebyo balikyabo abe Filipi bamuthumira. (Fil. 4:18) Tikiko iniakathwalira ebithunga muthina-muthina by’esyobaruha sya Paulo. (Kol. 4:7) Omwa buwathikya bw’abanywani biwe, Paulo mwalholha embere erikolha omubiiri wiwe n’omw’anabya aboherwe omwa nyumba kutse erisolholhwa omwa ngomo. Wangabya wuthi munywani w’okwenene munabwire?

Eby’erileberyako ebya munabwire bikakanganaya omughaso ow’eribya munywani w’okwenene. Thalengekania oko mwali wethu oyuwakanganaya ku ni munywani wa Elisabet, omutemburi w’omughulhu wosi e Spain. Omughulhu mama wa Elisabet apimawamo ekansa eyithe lhama, mwali wethu oyo mwathumira Elisabet y’esyomesegi nyingyi esirimo amasako awakahumulikanaya. Elisabet akabugha athi: “Esyomesegi esi musyamba amani aw’eriyowa isindi ingyuwene ingaghumira ebitsibu byaghe.”—Emi. 18:24.

Thwangana ghumya amanywani wethu n’abaramya balikyethu omw’ibasighika omwa mibiiri y’ekithunga. Ng’eky’erileberyako, mbwino siwanga yihayo erithwalha mwali wethu kutse mughalha wethu oyukulire omwa myaka okwa mihindano kutse omw’ithulira? Wamakolha ekyo, imwanganabana akaghisa k’erihimbangana. (Abar. 1:12) Nomwabine, abandi Bakristayo sibangathoka erilhua omwa miyi yabo. Thwangabya thuthi munywani wabo w’okwenene?

Abandi bikirirya balikyethu bawithe ebitsibu by’amaghalha kutse eyindi mibere eyikabalemesaya eryasa okwa mihindano busu okwa busu. Thalengekania okwa ky’erileberyako kya David, oyu wapimawamo obulhwere obwa lymphoma. Mwaghunza amezi mukagha iniane muhebwa omubatsi. Abere anemuthambirwa, David na mukali wiwe Lidia, mubabya bakahindana erilhabira okwa nganirania y’evidiyo ibane ewabu.

 Abanywani babu b’omwa kithunga mubabasighika bathi? Obuli muhindano iniakabya akahwamo, abaghuma b’okwa babya bakabya okwa Kisenge ky’Obwami ibakalengaho erikania na David na Lidia omw’ikolesya enganirania ye vidiyo. Ery’ongera okw’ekyo, David na Lidia ibakabya bamasubirya, abikirirya balikyabo ibakabathumira esyo mesegi esikahimba enyuma waho. Ekyalhwiririramo? David na Lidia mubayowa isibasolhwerwe.

Mbwino si thwanga thulira haghuma n’abathe bangalhua omwa manyumba? Omw’ikolha esy’ombinduka nyike, ithwangana kangania ngoku sithuli thwath’ibirirwa abali omwa mibere ng’eyi. (Emi. 3:27) Busana naki iwuthasondya endambi y’erihandika esyobaruha kutse erithulira nabo okwa simu? Abathe bangathoka erilhua omwa manyumba bangana yiyunga okwa mihindano y’erithulira erilhabira okwa nganirania y’evidiyo. David na Lidia mubatsemera endegheka eyi. David akasoborera athi, “Erithabya haghuma n’egurupu yethu ey’eriyathulira okwa mukania mukuhi oyo n’omusabe, ikikathuhira mw’omuhwa munene.” Ery’ongera okw’ekyo, emibere eyiriho yamabya iyangana balighira, mbwino siwangabya wukahiraho emitheghekere ey’eribya wukegheserya omwigha we Biblia ew’omuthuliri oyuthe wangathoka erilhua ewiwe?

Thukabya thukakolha haghuma na balikyethu abathe bangathoka erilhua omwa manyumba n’eriyilhangirira emibere yabu mibuya, thukayithunda hakuhi nabo. Ng’eky’erileberyako, wukabya wukathulira n’abathuliri abali ng’abo n’erisamalira ngoku bakakolesaya ndeke Ekinywe kya Nyamuhanga erihika okwa muthima w’omundu, ahathe erithika-thika wuk’ongera eriyithunda hakuhi nabo. Wamasighika abikirirya balikyenyu omwa mibiiri y’obunyakirimu, iwukendyongera okwa banywani abo wuwithe.—2 Kor. 6:13.

Paulo mwahumulikana busana n’eribya iniane haghuma na munywani wiwe Tito. (2 Kor. 7:5-7) Omwatsi oyu akathw’ibukaya ngoku thwangana humulikania abali omwa buyithawa butsira omw’ibakwira obulighe lisa, aliwe n’eribya haghuma nabo n’erikolha ngoku thwanga thoka eribasighika.—1 Yn. 3:18.

Balikyethu abe Russia babirihiraho eky’erileberyako ekyuwene omw’ikangania ku bakasighikana. Thalengekania okwa kyalholirweko kya Sergey na mukali wiwe, Tatyana. Epolisi yabere yabiri serembura-serembura enyumba yabo, mubathwalhwa eriyabulibwa. Mubatsuka erilhwika Tatyana neryo amasuba eka. Sergey akabugha athi: “Tatyana abere ahika eka, mwali wethu mughuma omuthubaha mwahika okwa lhukyo lhwethu. N’abandi banywani bethu bangyi mubasa n’erithuwathikya erithasyathonda ebindu byethu by’omwa nyumba .”

Sergey akathasyabugha athi: “Mughulhu wosi ngatsemera Emisyo 17:17, ahakabugha hathi: ‘Omwira akanza emighulhu yosi n’omughalha wabo akabuthawa busana n’obulighe.’ Nabiriyilhangirira ebinywe ebi bikabererera omwa mughulhu w’eriendereribwa ono omughulhu sinanga thoka erighuma aha bwaghe. Yehova abirinyiha abanywani abathubaha.” a

Thukabya thukabana ebitsibu ebikalire kutsibu, thukayithagha abanywani abanga thuwathikya. Thukendi bayithagha kwilhaba naho omwa buthuku bw’obulighe bunene. Neryo kwesi thulengeho eribya banywani b’okwenene lino!—1 Pet. 4:7, 8.