Thatha na Mama babya bakatuliki kithina. Aliwe babere babiriminya erilhua omwa Biblia ngoku erina lya Nyamuhanga n’iyo Yehova, abosi mubabya Bema ba Yehova ab’omuhwa. Thatha mwalekeraho eribya akakokothya ebisasani bya Yesu. Omwakanya k’ekyo, mwakolesya ebyo asi omwa burande erihindulha ekisenge ky’enyumba yethu ekyahisi mwa Kisenge ky’Obwami ekyabya e San Juan del Monte, akatawuni kake akali e Manila, omuyi mukulhu omwa Philippines.

Nabere ngabiributhwa omwa 1952, ababuthi baghe mubatsuka erinyiha erikangirirya eryuwene ery’obunyakirimu eriri ng’eryo banabya ibanemuha bakulhu baghe ab’obulhume bbani n’ab’obukali basathu. Nabere inganemukulha, thatha waghe mwanyihira mw’omuhwa ow’erisoma esura nguma ye Biblia obuli kiro kandi mwanyeghesya ebitabu bingyi muthina-muthina eby’ekiteokrasi. Ababuthi baghe ibakabya ibane mukokya abalebererya abakabalhama, n’abathumwa erilhua okwa kyaghanda ky’omuthahulha eribya ewethu. Ng’efamile, ebyalholirweko ebyo baghalha bethu aba bathubwira, mubyaleka ithwatsema kutsibu kandi byamathuhimba, ekindu ekyahira omw’ithwe bosi mw’omuhwa ow’erihira omubiiri w’erithulira w’embere omwa ngebe syethu.

Ababuthi baghe mubanyisighira eky’erileberyako ekyuwene eky’erikirirya. Mama waghe mwanzwa abere abiriholha busana n’obulhwere, ingye na Thatha muthwatsuka erikolha haghuma obutemburi omwa 1971. Aliwe omwa 1973 ingane w’emyaka 20 thatha waghe mwaholha. Eriholerwa ababuthi baghe abosi mukyaleka ingayowa ingabulirweko kandi nga nabirisighanibwa. Aliwe amaha ‘aw’okwenene kandi awasikire’ awali omwa Biblia mwaleka ingabya inganasikire n’eribya ingane ndeke omw’iyowa na bunyakirimu. (Ebr. 6:19) Habere hathe halhaba buthuku buuli thatha aliholire, munahebwa olhusunzo olhw’eribya mutemburi w’embaghane okwa kizinga ekiyisolhwere ekye Coron omwa Provisi ye Palawan.

Nabya w’emyaka 21 ingahika e Coron. Ng’omulhwana oyukulire omwa tawuni nene, munasweka ingaminya ngoku okwa kizinga ekyo kwabya amanyumba  make awalimo amaghetse n’amasenyerezi, kutse ngoku esyomatoka n’esyopiki-piki syabya nyike. Nomuyanabya balikyethu bake, nabya isingwithe owundi mutemburi oyo nangakolha nayu, kandi okwa bundi buthuku iningathulira ingyuwene. Omwa kwezi kw’erimbere, munakwa ab’efamile yaghe n’abanywani baghe b’olhukando lhunene. Omwa kiro, iningasamalira omwakyanya ekiri mw’esyongununu emisonia iyinemutsububuka omwa meso waghe. Munanza erisighania olhukwamirwa lhwaghe n’erisuba eka.

Omwa buthuku bw’embwera obo, iningabwira Yehova y’ebyosi ebiri okwa muthima waghe. In’ingibuka ebinywe ebikahumulikanaya ebyo nabya inabirisoma omwa Biblia n’omwa bitabu byethu. Mughulhu mungyi in’ingibuka Esyonyimbo 19:14. Munakiminya ngoku Yehova angabere ‘Muhanganiri n’Omuthongolya waghe’ namaghanirya okwa bindu ebikamutsemesaya, ng’ebyakakolha n’emibere yiwe. Omwatsi wa Akaleberyo owawithe omuthwe “Siwendi Syasighanibwa” a mwangwathikya kutsibu. Munasomagho mirundi mingyi. Omwa buthuku obo, munayowa nga ngane haghuma na Yehova, kandi ekyo mukyanyiha ehighisa ehyuwene ehy’erisaba, eriyeghesya, n’erighanirya.

Hathe halhaba buthuku ngalihikire e Coron, munasombolhwa eribya musyakulhu w’ekithunga. Ingane musyakulhu ingyuwene, munatsuka erisondolha Esukuru ey’Ekiteokrasi ey’obuli wiki, Omuhindano w’Omubiiri, erigha ly’Ekitabu ery’Ekithunga n’erigha ly’Akaleberyo. Iningalhabaya omukania w’abandu abosi obuli wiki. Okwenene kuli kuthi—eky’erilengekania okwa bikaleka ingabya omwa mbwera nabya isingakikiwithire buthuku!

Munatsemera omubiiri w’erithulira owalhwiririramo ebibuya e Coron—abaghuma b’okwa bigha baghe be Biblia mubahika okwa kiika ky’eribatizibwa. Aliwe kandi hanabya n’ebitsibu. Okwa bundi buthuku, erithoka erihika omwa bulhambu obwa thukayathuliramo, iningabya w’erilyatha ahabw’esyosaha mukagha isingasi n’aho nangakesya ingahikayo. Obulhambu bw’ekithunga mwabya imune n’ehindi hizinga hingyi. Mughulhu mungyi iningakolesaya obwathu obukakolesaya eyingyini erilhaba omwa ngetse eyiwungire erithoka erihikayo, nomwakine indi nabya isingasi eriziha! Omwa bitsibu byosi ebi, Yehova mwanyitheya n’erinyisighika. Enyuma waho, munaminya ngoku Yehova abya akanyithendeka erilhaba omwa bitsibu ebikalire okw’ebi omwa lhukwamirwa lhwaghe olhwakwamako.

Omwa 1978, munathumwa omwa Papua New Guinea, endatha ye Australia. Papua New Guinea ni kihugho ky’ebithwe. Mukyanyiswekya eriminya ngoku abandu nga miliyoni isathu babya bakabugha emibughe eyilhabire omwa 800. Eky’obutseme, abangyi ibakabugha omubughe owa Melanesian Pidgin, owasibwe kutsibu mwa Tok Pisin.

Munathumwa omwa kithunga ky’Olhusungu omwa muyi mukulhu owe Port Moresby ahabw’obuthuku buke. Aliwe munahumira omwa kithunga ky’omubughe owe Tok Pisin kandi namatsuka erikangiriribwa omubughe oyo. Ebyo nabya ing’igha munabya ingabikolesya omwa mubiiri w’erithulira. Ekyo mukyanyiwathikya erigha omubughe oyo wa lhuba. Omwa buthuku buke, munatsuka erilhabya emikania y’abandu abosi omwa Lhutokpisin. Thalengekania nga munasweka bungahi omwa buthuku buke okwa mwaka ngalihikire e Papua New Guinea, ingahebwa olhukwamirwa lhw’obulebererya bw’omuthimbo omwa bithunga by’Olhutokpisin omwa bitsweka binene-binene muthina-muthina.

 Kundi ebithunga byabya haali na haali, iningabya w’eritheghekania emihindano minene-minene mingyi ey’omuthimbo kandi iningabera erighenda-ghenda. Okw’itsuka, munakwa embwera ahabw’eribya omwa mwanya ogho ngathabeghere—ekihugho kihyaka, omubughe muhyaka, n’emirwa mihyaka. Busana n’eribya iyiri ebithwa n’esyonguka, siyabya esyonzira, neryo iningakolesaya esyondege nyisa eribungira ebithunga. Busana n’ekyo, iningakolesaya endege hakuhi obuli wiki. Okwa bundi buthuku, iningahekawa ingyuwene omwa ndege nyike kandi eyabya omwa mibere eyithuwene. Esyongendo ng’esyo isikanyitha engitsi ng’esyongendo esy’erighendera omwa bwathu!

Ini bandu bake abawithe esyosimu, neryo iningakaniranaya n’ebithunga omw’ikolesya esyobaruha. Mughulhu mungyi, iningahika esyobaruha syaghe isisirisyahika neryo iningabuliriraya abali aho erithoka eribanangana n’abathuliri. Nomwabine, obuli banangana n’abalikyethu ibakanyithangirira ndeke, neryo ikyaleka ingatsema busana n’eribya imungalengaho eribasondya. Munayilhangirira obuwathikya bwa Yehova omwa nzira nyingyi kandi obughuma bwaghe nayu mubw’ongera kutsibu.

Okwa muhindano waghe w’erimbere okwa kizinga ekikahulhawamo Bougainville, omulhume na mukali wiwe, mubanyihikako ibane musenyenyia n’erinyibulya bathi: “Wukina thw’ibukire?” Mun’ibuka ngoku munabathulira omurundi waghe w’erimbere ingahika e Port Moresby. Nabya inabiritsuka erigha nabu e Biblia ngathali ngabaha mughalha wethu ow’eyo. Abosi babya ibabiribatizibwa! Oyu ni mughuma w’okwa mighisa mingyi eyo nabana omwa myaka isathu eyo naghunza ingane e Papua New Guinea.

Ngathe nalhua e Coron omwa 1978, munaminya mwali wethu omubuya, kandi oyukayihayo oyukahulhawamo Adel. Abya mutemburi w’omughulhu wosi oyuwabya inianemulembera abaana biwe babiri, Samuel na Shirley. Okwa buthuku ibwa n’obo, abya inianemulembera mama wiwe oyukulire omwa myaka. Omwa Kwakathano 1981, munasuba e Philippines eriyathahya Adel. Thwabere thwabirithahania, muthwakolha obutemburi bw’omughulhu wosi n’eritsomana haghuma efamile yethu.

Nomunanabya n’efamile, omwa 1983, munathasyasombolhwa eribya mutemburi w’embaghane n’erithumwa okwa kizinga kye Linapacan, omwa provisi ye Palawan. Efamile yosi muyahumira omwa mwanya owayisolhwere oyu owathabyamo Abema. Enyuma w’omwaka nga mughuma, mama wa Adel mwaholha. Nomwabine, muthwasighalha ithune bbize omw’ithulira, ekindu ekyaleka ithwaghumira ekitsibu eki. Muthwatsukisya abigha be Biblia bangyi abakakulha-kulhana e Linapacan erihika okw’ibya muthwayithagha eribya n’Ekisenge ky’Obwami kike hathe halhaba buthuku buuli. Neryo muthwayihimbira ekyethu. Habere halhaba myaka isathu thwalihikireyo, muthwatsema thukalhangira abandu 110 bakahindana okw’Ibuka, abangyi b’okw’ibo mubakulha-kulhana erihika okw’ibatizibwa thwalilhwireyo.

Omwa 1986, munathumwa okwa kizinga kye Culion, eyabya omwanya owalimo abalhwere b’ebihagha. Enyuma waho, na Adel mwasombolhwa eribya mutemburi w’embaghane. Okw’itsuka, muthwasagha erithulira abandu abakwire ebihagha. Aliwe, abathuliri b’eyo mubathukakasya ngoku abalhwere obulhwere obu babiribana obubalya kandi babya isibangabusighalirya abandi. Abaghuma b’okwa balhwere aba ibakahindana okwa mihindano omwa nyumba ya mwali  wethu. Muthwalhwaho ithwabeghera kandi mukyathutsemesya kutsibu eribwira abandu ababya bakayowa nga babirighanwa na Nyamuhanga n’abandu okwa maha wethu we Biblia. Ikikatsemesaya erilhangira abandu abalhwere kutsibu bakabana etseme busana n’amaha w’erisyabya n’amaghalha awuwene.​—Lk. 5:12, 13.

Abaana bethu mubaghenda-ghendania bathi n’engebe ye Culion? Ingye na Adel muthwakokya abadada babiri abalere abe Coron erithuyiyungako nuku abaana bethu bathunge abanywani babuya. Samuel, Shirley, n’abadada babiri aba, mubatsemera omubiiri wabu w’erithulira owalhwiriramo ebibuya, ibakeghesaya abaana bangyi naghe na Adel ithunemweghesya ababuthi b’abaana abo. Omo kwenene, muhanayira thwamabya thuk’igha n’esyofamile 11. Hathe halhaba buthuku, muthwasondolha abigha be Biblia bangyi abakakulha-kulhana erihika okw’itsukisya ekithunga ekihyaka!

Okw’itsuka, ningye nabya musyakulhu w’ekithunga musa omwa bulhambu obo. Neryo ekyaghanda ky’omuthahulha mukyanyisaba erisondolha emihindano ya buli wiki ey’abathuliri munani be Culion kandi n’erikolha ikyan’ekyo okwa bathuliri mwenda omwa kyalhu ekikahulhawamo Marily, olhughendo lhw’esyosaha isathu iwune omwa bwathu erithoka erihikayo. Emihindano y’eyo iyikabya yikahwamo, ithwe ng’efamile, ithukaghenda omwa bisando erilhaba omwa bithwa ahabw’esyosaha nyingyi eriyasondolha abigha be Biblia omwa kyalhu ekikahulhawamo Halsey.

Erighunzerera, abandu bangyi be Marily ne Halsey mubasa omwa kwenene, neryo muthwahimba Ebisenge by’Obwami omwa myanya yosi ibiri. E Linapacan, balikyethu n’abanzisibirwe mubakolha kutsibu kandi bamaletha ebikayithaghisibawa bingyi. Ekisenge kye Marily kyabya ikyangana hikamu abandu 200 kandi kyabya ikyangana kanyibwa erihikamo abandu bangyi, ekindu ekyathuthokesaya eribya thukabya n’emihindano eminene-minene e Marily.

Omwa 1993 abaana bethu ibamabirikulha, ingye na Adel muthwatsuka omubiiri w’obulebererya e Philippines. Omwa 2000, munahindana okwa Sukuru y’Abaghombe Abawathikya erithendekwa ng’omuthendeki okwa sukuru eyo. Munayowa nga sinangathoka olhukwamirwa olho, aliwe Adel iniakabera erinyihira mw’omuhwa. Mwany’ibukya ngoku Yehova akendi nyiha akaghalha ak’eriberererya olhukwamirwa lhuhyaka  olhu. (Fil. 4:13) Adel abya inianasi ekyo kya ndeke kundi abya inianemuberererya olhukwamirwa lhwiwe n’omwakine indi amaghalha wiwe syabya ndeke.

Omwa 2006 ingane muthendeka, Adel mwapimwamo obulhwere bwe Parkinson. Muthwakukubalha! Nabere ngamubwira okwa ky’erileka olhukwamirwa lhwethu nuku ngamuthwanire, Adel mwanyisubirya athi “Kisi nyibanire omudokita oyukendi nyiwathikya omwa bulhwere bwaghe, kandi nganasi ngoku Yehova akendi thuwathikya erilholha embere.” Ahabw’emyaka mukagha eyakwamako, Adel mwalholha embere erikolha omubiiri wa Yehova isyathayineghenia. Omughulhu abya isyakithoka erighenda, iniakathulira iniane omwa kaggali kiwe k’abalema. N’omughulhu kyabya kikamukalira eribugha, iniakasubiraya omwa kinywe kighuma kutse bibiri okwa mihindano. Erihika okwa lhuholho lhwiwe omwa 2013, Adel iniakabana mughulhu wosi esyomeseji esy’abakamusima busana n’eky’erileberyako kiwe kibuya eky’eriyiyinia. Nabya ingamabirighunza myaka 30 ingane na Adel, omunywani waghe mwanzwa kandi omuthaleghulha, neryo abere akaholha, munathasyabya omwa bulighe bunene n’omwa mbwera nene.

Adel abya anzire ingalholha embere n’olhukwamirwa lhwaghe, neryo munakolha ikyan’ekyo. Munalhangira indi ngabya ingane bbize, ekindu ekyanyiwathikaya erighumira embwera. Erilhua 2014 erihika 2017, munahebwa olhusunzo olhw’eribungira ebithunga ebikakolesaya omubughe w’Olhutagalog omwa bihugho eyo omubiiri wethu abya kw’olhukako. Enyuma waho, munabungira ebithunga eby’Olhutagalog e Taiwan, e United States, ne Canada. Omwa 2019, munasondolha Esukuru ey’Abathuliri b’Obwami ey’Olhusungu e India ne Thailand. Nabiribana etseme nene omwa syongwamirwa syosi esi. Ngatsema kutsibu namayihwerya omwa mubiiri wa Yehova.

Omwa buli lhukwamirwa lhuhyaka, ngathungira balikyethu abo ngabanangana nabo b’olhwanzo neryo isikiribya kyolho eribasighania. Omwa mughulhu ng’oyo, nabir’igha eriyikethera Yehova ya kutsibu. Nabiriyilhangirira obuwathikya bwiwe mughulhu wosi kandi eki kyabirinyiwathikya eriligha n’omuthima wosi esyombinduka syosi esikasa. Lino, ngali mutemburi w’embaghane e Philippines. Lino ngane ndeke omwa kithunga kyaghe ekihyaka ekyabiribya ikinemunyisighika n’erinyitsomana. Kandi ngayisyetha ingalhangira Samuel na Shirley bakagherererya erikirirya lya mama wabu.​—3 Yn. 4.

Omwa kwenene, nabirilhaba omwa bitsibu bingyi omwa ngebe yaghe, imwamune n’erilhangira mukali waghe mwanzwa akaghalhwa n’eriholha busana n’obulhwere obukalire. Kandi n’abiribya w’eribeghera emibere mingyi mihyaka. N’omwabine, nabiriyilhangirira ngoku Yehova “syali haali oko buli mughuma w’okw’ithwe.” (Emib. 17:27) Okuboko kwa Yehova sikuli kwathabya kukuhi erisighika n’erighumya abaghombe biwe, nibya n’omwa myanya eyiyisolhwere. (Isa. 59:1) Yehova, Olhukuka lhwaghe, abiribya iniane naghe omwa ngebe yaghe yosi kandi ngamusimira ekyo. Sindinathasighanibwa.