OMWATSI W’ERIGHA 8
OLHWIMBO 130 Wubye Mughanyiri
Wanga Gherererya Wuthi Erighanyira lya Yehova?
“Ngoku Mukama [Yehova] ababuyira, nenyu ko mwangabuyira abandi bo muthya.”—KOL. 3:13.
EKIGHENDERERWA
Omwatsi ono akendi kania okwa bindu birebe ebya thwanga kolha erithoka erighanyira omundu oyuwabirithusoberya.
1-2. (a) Ni mughulhu wahi kyangana thukalira erighanyira omundu? (b) Denise mwakangania athi omuthima w’erighanyira?
KIKANAKUKALIRA erighanyira abandi? Abangyi omw’ithwe kikanathukalira, kutsibu-tsibu omundu amabugha kutse erikolha ekindu ekikathuhithanaya kutsibu. Nomwabine, thwangana singura obulhumi obw’eriponesibwa kandi ithwabya abakaghanyira. Ng’eky’erileberyako, lengekanaya okwa ekyalholirweko ekya mwali wethu Denise, a oyuwakanganaya erighanyira linene kutsibu. Omwa 2017, Denise n’ab’eka yiwe babya ibabiribungira Ekyaghanda Kikulhu ekya Bema ba Yehova ekyabya imukyanamakyingulhwa. Babere bakasuba eka, owundi mufuyi mwatarya-tarya ematoka yiwe neryo amabatomera. Denise mwabya omwa tsuli-tsuli. Abere akalhua omwa tsuli-tsuli eyo, mwaminya ngoku abaana biwe babirihuthalha kutsibu, kandi ngoku mwira wiwe Brian abiriholha. Akabya akalengekania okwa kyabya eki, Denise akabugha athi, “Munabya omwa maghaniryo kandi munayibulha-bulha.” Enyuma waho, mwaminya ngoku nibya sihabya ekyosi-kyosi ekyatabura omufuyi kutse erimulengemerya, neryo Denise mwasaba Yehova erimuha obuthekane.
2 Omufuyi oyuwabatomera, mwahirwako omusango ow’eritha omundu. Ekoti kuyathwamu yithi ali kw’olhubanza, angahirirwe omwa ngomo. Aliwe, ekoti muyabwira Denise yithi omulhume akendi tswerwa omusango erikwamana n’ebya Denise akendi bugha. Denise akabugha athi: “Munayowa omundu ng’amatsutsanga esyahuzi esiri omwa bironda byaghe kandi ng’amahira mw’omunyu munene, kundi munabya w’erikania okwa kindu ekyo ngathendisy’ibirirwa omwa ngebe yaghe.” Enyuma w’amayenga make, Denise mwayithegheka eriyathongana n’omulhume oyuwabalethera obulhumi omwa famile. Mwabugha athiki? Denise mwasaba omuramuzi athi aghanyire omulhume oyo. b Mwabya akaghunza erikania, omuramuzi mwalhuaho iniathoghongya emisonia. Neryo mwabugha athi: “Emyaka 25 eyo n’amabirighunza ingane muramuzi, sindi nathowa ekiri ng’eki omwa misango eyo nabirith’imanira. Sindi nath’owa abahughu b’oyulyakolhawa nabi bakasaba bathi oyulyamukolha nabi aghanyirawe. Sindi nath’owa ebinywe ebikakanganaya olhwanzo n’erighanyira lingaha n’eri.”
3. Ni kyahi ekyawathikaya Denise erighanyira?
3 Ni kyahi ekyawathikaya Denise eribya n’omuthima w’erighanyira? Mwaghanirya okw’ighanyira lya Yehova. (Mika 7:18) Erisima erighanyira erya Yehova abirithukangania kikathuhira mw’omuhwa w’erighanyira abandi.
4. Yehova anzire ithwakolhaki? (Abanya Efeso 4:32)
4 Yehova anzire ithwaghanyira abandi ngoku iyo abirithughanyira. (Soma Abanya Efeso 4:32.) Anzire ithwabya ithunayitheghekire erighanyira abakathuponesaya. (Esy. 86:5; Lk. 17:4) Omo mwatsi ono, thukendi kania okwa bindu bisathu ebyanga thuwathikya eryongera eribya abakaghanyira.
ISIWAGHEGHENA ERIYOWA LYAWU
5. Ngoku kiri omwa Emisyo 12:18, thwangayowa thuthi omundu amathuponesya?
5 Kyangana thuhithania kutsibu omundu mulebe amabugha kutse erikolha ebikathuponesaya, kwilhabirirya amabya ini munywani w’okwa ndungu kutse omuhughu. (Esy. 55:12-14) Okwa bundi buthuku, obulhumi obwa thukabya nabu bwangana linganisibwa n’obulhumi bw’eritimbwa omwa muhamba. (Soma Emisyo 12:18.) Thwangananza erigheghena obulhumi obukalhwiririra omw’iponesibwa. Aliwe erikolha ekyo lyanganabya ng’erikutimba neryo ibasigha omuhamba w’omwa kironda. Kuthya, isithwalengekanaya thuthi obulhumi obukalhwiririra omw’iponesibwa bukendi keha omw’ikwama kya bugheghena.
6. Thwanga kolhaki omundu amathuhithania?
6 Omundu amathuhithania, ithwangana hithana aho naho. E Biblia yikakanganaya ngoku thwangana hithana. Aliwe, yikathukunga okw’ihithana lhughumerera. (Esy. 4:4; Efe. 4:26) Busana naki? Kundi mughulhu mungyi eriyowa lyethu likaleka ithwakolha omwa nzira ndebe. Kandi erihithana mughulhu mungyi likalhwiririramo ebithuwene. (Yak. 1:20) Wibuke, erihithana ni yowa, aliwe erisighalha iwunahithene ni yithwiramo.
Erihithana ni yowa, aliwe erisighalha iwunahithene ni yithwiramo
7. Ni rindi yowa lyahi eryo thwangabya nalyo omundu amathukolha nabi?
7 Thwamakolhwa nabi, ikyangana leka ithwasamu owundi mulingo w’eriyowa nabi. Ng’eky’erileberyako, mwali wethu Ann akabugha athi: “Ngabere ingakine mwana, thatha waghe mwasighania mama waghe neryo amathahya omukoli oyuwabya akanyilembera. Munayowa inabirisighanibwa. Babere babutha abaana, munayowa abaana abo ng’abamasuba omwa bwaghe. Munakulha n’amalengekania w’eriyowa isinganzibirwe.” Mwali wethu oyukahulhawamo Georgette akasoborera ngoku ayowa omughulhu mwira wiwe asingira, akabugha athi: “Thwabya banywani eritsuka bulere. Muthwakolha obutemburi bwa haghuma! Munabbunika omuthima. Erighunzerera, muthwakomolhana.” Mwali wethu oyukahulhawamo Naomi akabugha athi: “Sinabya ngalengekania indi mwira waghe inianyiponesya. Abere akabisulha ngoku abya inianemulebya e ponografe kandi ngoku abirinyibisakyo, munayowa iniamanyilhabirya ahisi n’erinyighoberya.”
8. (a) Ni nzumwa nga syahi esyangaleka ithwaghanyira abandi? (b) Thukaghasirawa thuthi thwamaghanyira? (Lebaya akasanduko “ Kandi Ibbwa Omundu Amathukolha kw’Ekindu Ekikalire Ekya Thuthe Thwang’ibirirwa?”)
8 Sithwanga kakirya ebyo abandi banga thubwira kutse erithukolhako, aliwe thutholere ithwalengaho eriyikakirya. Mughulhu mungyi ekyuwene kutsibu eky’erikolha ly’erighanyira. Busana naki? Kundi thwanzire Yehova, kandi anzire ithwabya abakaghanyira. Thwamabika ekinigha kandi thukathendi ghanyira, ithwangana kolha ekindu eky’obukiru kandi obundi ithwangana huthalha kinyamubiri. (Emi. 14:17, 29, 30) Thulebaye eky’erileberyako kya mwali wethu Christine. Akabugha athi: “Namabya inabirihithana kutsibu, sindi thasyasenyenyaya. Ngakwama kyathwamu erirya ebyalya ebithe byanga nyighasira. Sindi bana othulho othukaghunza, kandi kikanyikalira erikakirya eriyowa lyaghe, obuthuku bukahika ikyahamba okwa butheke bwaghe n’obughuma bwaghe n’abandi.”
9. Busana naki sithutholere thukabika ekinigha?
9 Nomukyangabya indi omundu oyulyathukolha nabi syathathusaba ekighanyiro, thwangana yira eky’erikolha erikehya obulhumi obukalhwiririra omwa ekya alyathukolhako. Thuthi? Georgette, oyulyakanibawako, akabugha athi: “Mukyathwalha buthuku, aliwe munalengaho erithendi bika ekinigha okwa oyuwabya mwira waghe. Busana n’ekyo, munayowa ingawithe obuholho bunene.” Thwamaghanyira, kikendi leka ithuthalighira ekinigha erihamba okwa mibere thukakolonganiramo n’abandi. Kandi thukayiha ekihembo—erilholha embere n’engebe yethu n’erithasyatsemerayo. (Emi. 11:17) Aliwe wanga kolhaki wamayowa isiwuyitheghekire erighanyira?
NGOKU WANGA KAKIRYA ERIYOWA LYAWU
10. Busana naki thutholere ithwaligha halhabe obuthuku erithoka erithekana? (Lebaya n’ebisasani.)
10 Wanga singura wuthi obulhumi bw’eriponesibwa? Enzira nguma ly’eriligha halhabe obuthuku iwe erithekana. Enyuma w’eribana obubalya, hakayithagha erilhaba obuthuku omundu oyuwahuthalha kutsibu erithoka erilhama. Omwa nzira iyaneyo, hakayithagha ihalhaba obuthuku erithoka erithekana imuthwathoka erighanyira omundu erilhua okwa muthima.—Omu. 3:3; 1 Pet. 1:22.
Ngoku erihuthalha ly’omubiri likanayithagha eritsomanwa ndeke n’eriligha halhabe obuthuku erithoka erilhama, kwabine bithya n’okw’ihuthalha omw’iyowa (Lebaya enungu 10)
11. Erisaba lyanga kuwathikya lithi eribya oyukaghanyira
11 Saba Yehova wuthi akuwathikaye erithoka eribya oyukaghanyira. c Ann, oyulyakanibawako, akasoborera ngoku omusabe amuwathikaya. Akabugha athi: “Munasaba Yehova indi aghanyire obuli mughuma w’okw’ithwe busana n’ebisobyo byethu. Neryo munahandikira thatha waghe na mukali wiwe omuhyaka b’ebaruha n’eribabwira ngoku nabiribaghanyira.” Ann akaligha ngoku erikolha ekyo sikyabya kyolho. Aliwe akabugha athi: “Ngawithe amaha ngoku erilengaho erigherererya obughanyiri bwa Yehova, kyangana hira omu thatha na mukali wiwe mw’omuhwa w’erianza erigha bingyi oku Yehova.”
12. Busana naki thutholere ithwayikethera Yehova omwakanya k’eriyowa lyethu? (Emisyo 3:5, 6)
12 Yikethere Yehova, butsira eriyowa lyawu. (Soma Emisyo 3:5, 6.) Mughulhu wosi Yehova akabya inianasi ekithutholere. (Isa. 55:8, 9) Kandi syendi syabugha athi thukole ekindu ekyanga thuhuthalya. Busana n’ekyo, akabya akathuhira mw’omuhwa ow’eribya abakaghanyira, thwangana yikethera ngoku erikolha ekyo kikendi thughasira. (Esy. 40:4; Isa. 48:17, 18) Okwa lhundi lhuhandi, thwamayikethera eriyowa lyethu, ikyangana thukalira erisyaghanyira. (Emi. 14:12; Yer. 17:9) Naomi, oyulyakanibawako ahighulhu akabugha athi: “Okw’itsuka, munayowa ingahikire erighana erighanyira mwira waghe busana n’erilebya eponografe. Munasagha nyithi akendi thasyanyiponesya kutse akendi lhuaho in’ibirirwa obulhumi bunene obo anyirethera. Kandi munalengekania indi Yehova akayitheghereraya eriyowa lyaghe. Aliwe munaminya ngoku eribya Yehova iniakayitheghereraya eriyowa lyaghe, sikirimanyisaya indi akalighirana nalyo. Anasi ku ngayowa kandi ngoku kikathwalha obuthuku erithekana, aliwe kandi anzire ingabya oyukaghanyira.” d
HINDULHA ERIYOWA LYAWU
13. Ngoku kiri omwa Abanya Roma 12:18-21, thutholere ithwakolhaki?
13 Thwamaghanyira omundu oyuwabiri thuhithania kutsibu, sithuli kwama kyasubulira okw’ithendi kania okwa kyabya. Omukristayo mulikyethu amabya iyulyathuponesaya, ekilhubirirwa kyethu ly’erihira h’obuholho. (Mt. 5:23, 24) Thukathwamu erisubya omwa mwanya w’ekinigha mw’olhukeri n’omwa mwanya w’eribika ekinigha mw’erighanyira. (Soma Abanya Roma 12:18-21; 1 Pet. 3:9) Ni kyahi ekyanga thuwathikya erikolha ekyo?
14. Thutholere ithwalengaho erikolhaki, kandi busana naki?
14 Thutholere ithwalengaho erilhangira oyulyathuponesaya ngoku Yehova akamulhangira. Yehova akasondekanaya omwa bandu mw’ebibuya. (2 Emy. 16:9; Esy. 130:3) Mughulhu mungyi thukabana ebya thukasondaya omwa bandu—mbulha ni bibuya kutse bibi. Thwamasondekania ebibuya omwa bandi, kikathw’olhobera eribaghanyira. Ng’eky’erileberyako, mughalha wethu oyukahulhawamo Jarrod akabugha athi, “Kikanyolhobera erighanyira mulikyethu namalinganisya ekisobyo kiwe n’ebindu bingyi ebyo ngamutsemerako.”
15. Busana naki kyanganabya kibuya eribwira omundu ngoku wabirimughanyira?
15 Ekindi kindu kikulhu eky’erikolha ly’eribwira omundu ngoku wabirimughanyira. Busana naki? Naomi oyulyakanibawako akabugha athi: “Mwira waghe mwambulya athi, ‘Wune wanyighanyira?’ Nabere nganza erimubwira nyithi, ‘Namakughanyira,’ munalemwa eribugha. Munaminya ngoku ngalhwe isindi namughanyira erilhua okwa muthima. Endambi muyahika, namathoka eribugha ekinywe ky’amaaka ekyo, ‘Namakughanyira.’ Munasweka eki kikahumulikania mwira waghe oyuwabya awithe ebiyiri-yiri omwa meso naghe namathasyayowa buholho. Eritsuka-tsukana naho, n’abirithasya muyikethera kandi thwabirithasyabya banywani ndeke.”
16. Ni byahi ebya wam’igha okw’ighanyira?
16 Yehova anzire ithwabya abakaghanyira. (Kol. 3:13) Nomwabine, ikyangana thukalira erighanyira abandi. Aliwe thwangana thoka erikolha ekyo thwamathendi gheghena eriyowa lyethu n’erilengaho eririkakirya. Neryo ithwangana hindulha eriyowa lyethu—Lebaya akasanduku “ Ebiika Bisathu Ebikakolhaya okw’Ighanyira.”
LENGEKANAYA OKWA MIGHASO Y’ERIBYA OYUKAGHANYIRA
17. Thukaghasirawa thuthi omw’ibya abakaghanyira?
17 Thuwithe nzumwa nyingyi esyangaleka ithwabya abakaghanyira. Thalengekania okwa sighuma syo kw’isyo. Ey’erimbere, thukaghereraya n’eritsemesya Thatha wethu oyukaghanyira, Yehova. (Lk. 6:36) Eyakabiri, thukakanganaya ngoku thukasima erighanyira erya Yehova abirithukangania. (Mt. 6:12) N’eyakasathu, thukabya n’amaghalha awuwene n’eribya n’amanywani awaghumire.
18-19. Ni kyahi ekyanga lhwiririra omw’ibya oyukaghanyira?
18 Thwamaghanyira abandi, ithwangana thunga emighisa eya thuthayitsulirye. Ng’eky’erileberyako, lhangira ebyabya oku Denise, oyulyakanibawako. Nomwakine indi Denise abya isyasi ekiriho okwa buthuku obo, omulhume oyowabatomera abya iniabirithegheka eriyayitha enyuma w’erimusomerwa omusango wiwe. Aliwe omuthima wa Denise ow’erighanyira mwamuhambako kyamaleka iniatsuka erigha e Biblia n’Abema ba Yehova.
19 Thwangana yowa erighanyira omundu nga ni kindu ekikalire kutsibu ekyo thuthe thwanga thoka erikolha—aliwe kyanganabya kighuma ky’okwa bindu ebyanga thughasira kutsibu. (Mt. 5:7) Busana n’ekyo, ithwe bosi ka thulengeho erigherererya erighanyira lya Yehova.
OLHWIMBO 125 “Obutseme Buli oko Bakaghanyira!”
a Awandi mena abirihindulhwa.
b Omwa mibere ng’eyo, obuli Mukristayo atholere iniayithwiramu ng’akendi kolhaki.
c Thalengekania okwa biri omwa lhwimbo 125, “Obutseme Buli oko Bakaghanyira!,” n’olhwimbo 130, “Wubye Mughanyiri.”
d Nomwakine indi erilebya eponografe ni kibi kandi kikaponesaya, si nzumwa eyiseghemere okwa masako eyangaleka oyuthe kw’olhubanza iniakomolha omwanze wiwe.
