OMWATSI W’ERIGHA 14
Wune Muberererya Ndeke Omubiiri Ogho Nyamuhanga Abirikuha?
“Wukole omubiiri w’erithulha engulhu yuwene, wuberereraye wubughirire emibiiri Nyamuhanga akuha.”—2 TIM. 4:5.
OLHWIMBO 57 Erithulira Abandu b’Emisindo Yosi
EBIKENDI KANIBWAKO *
Abere abirilhubuka, Yesu mwahindana n’abigha biwe n’eribalhaghira athi “mughende, muyire abigha” (Lebaya enungu 1)
1. Abaghombe ba Nyamuhanga abosi banzire ibakolhaki, kandi busana naki? (Lebaya ekisasani ky’okwa kidipa.)
KRISTO YESU mwalhaghira abamukwamire athi “mughende, muyire abigha okwa bihanda byosi.” (Mt. 28:19) Abaghombe ba Nyamuhanga abosi abathaleghulha banzire eriminya ngoku banga ‘berererya’ ndeke omubiiri owababirihebwa oyu. (2 Tim. 4:5) Nibya ibbwa kandi, omubiiri oyu ni mukulhu, ni w’omughaso, kandi ni w’erikolha omwa byalhuba kwilhaba owundi mubiiri wosi-wosi. Nomwabine, thwanganabya ithunanzire erikolesya endambi nene omw’ithulira aliwe ikyakalha.
2. Ni bitsibu byahi ebya thukabana thukaberererya omubiiri ogho Nyamuhanga abirithuha?
2 Hane eyindi mibiiri ey’omughaso eyikathuyithaghako endambi n’akaghalha. Thwanganabya ithuli b’erikolha kutsibu eribana ebiyithawa byethu n’eby’eka yethu. Thwanganabya ithunawithe esindi ngwamirwa nyingyi esy’amaka, amalhwere, engebe y’eriyinuwa, kutse amakeku n’obulhumi busana n’erikulha omo myaka. Thwanga berererya thuthi ndeke omubiiri ogho Nyamuhanga abirithuha kandi ithunemughumira emibere ng’eyi?
3. Ebinywe bya Yesu ebiri omu Matayo 13:23 bikathweghesayaki?
3 Emibere eyathulimu yamakehya endambi eya thukakolesaya omwa mubiiri wa Yehova, isithwahwa amani. Yesu abya inianasi ngoku ithwe bosi sithwanga hethya ebighuma by’Obwami ebingene-ngene. (Soma Matayo 13:23.) Yehova akasima kutsibu obuli kindu ekya thukakolha omwa mubiiri wiwe n’omuthima wethu wosi. (Ebr. 6:10-12) Okwa lhundi lhuhandi, thwanganayowa emibere eyathulimu iyangana thulighira erikolha bingyi. Omo mwatsi ono, thukendi lebya ngoku thwangahira omubiiri w’erithulira w’embere omwa ngebe yethu, ngoku thwang’olhobya engebe, kandi ngoku thwang’uwania emibere yethu y’erithulira n’erikangirirya. Aliwe thuthatsuka eriminya, kikamanyisayaki eriberererya ndeke omubiiri ogho Nyamuhanga abirithuha?
4. Kikamanyisayaki eriberererya n’eribughirira ndeke omubiiri ogho Nyamuhanga abirithuha?
4 Omwa bikuhi, eriberererya n’eribughirira ndeke omubiiri ogho Nyamuhanga abirithuha, thutholere ithwasangira kutsibu omwa mubiiri w’erithulira n’erikangirirya ngoku thwanga thoka. Aliwe eriberererya ndeke omubiiri wethu sikirisubulira okwa ndambi eya thukaghunza omw’ithulira. Ekya Yehova akalhangira mwa kikulhu ky’ekilhubirirwa ky’omuthima wethu. Kundi thwanzire Yehova n’abataka bethu, thukakolha omubiiri wethu w’Ekikristayo n’omuthima wosi. * (Mk. 12:30, 31; Kol. 3:23) Erikolera Nyamuhanga n’omuthima wethu wosi kikamanyisaya eriyihayo, erikolesya akaghalha n’amani wethu ngoku thwangathoka omwa mubiiri wiwe. Omughulhu thukatsemera olhusunzo lhw’erikolha omubiiri w’erithulira, thukalengaho eribwira abandu bangyi ngoku thwangathoka engulhu yuwene.
5-6. Iha eky’erileberyako ngoku omundu oyuwithe bingyi by’erikolha angahira omubiiri w’erithulira w’embere.
5 Thalengekania oko mulhwana oyuwanzire eriwatha ekidari. Kikamutsemesaya eriwathakyo endambi yosi-yosi. Aliwe, iyo erithoka amaisha, iniabana akabiiri ak’erikolha eritsuka Kyabbalaza erihika Kyakathano. Aliwe nomwakine indi akaghunza ndambi nene okwa kabiiri ako, omuthima wiwe iniabya iniane okwa kidari kiwe. Anzire iniuwania emiwathire yiwe kandi iniabya mwimbi nyakabara. Busana n’ekyo, akabya akabana akathambi, akanza iniawatha ekidari, nomw’angakolha ekyo ahabw’akathuku kake buyira.
6 Kuthya, nawu endambi eya wukakolesaya omwa mubiiri w’erithulira yanganabya ini nyike. Aliwe, oyo w’omubiiri ogho wanzire. Wukalengaho eryuwania emibere yawu y’erikangirirya nuku wanga hika okwa mithima y’abandu wukababwira engulhu yuwene. Kundi wanganabya iwuwithe bingyi by’erikolha, iwangana bulha nga wuhire wuthi omubiiri w’erithulira w’embere.
NGOKU WANGA HIRA OMUBIIRI W’ERITHULIRA W’EMBERE
7-8. Thwanga gherererya thuthi amalengekania agho Yesu aby’awithe okw’ithulira?
7 Yesu mwahiraho eky’erileberyako ekyuwene omo malengekania agho aby’awithe okwa mubiiri w’erithulira. Ekikulhu omwa ngebe yiwe lyabya iry’erikania oko Bwami bwa Nyamuhanga. (Yn. 4:34, 35) Mwaghenda ebikumi n’ebikumi by’esyokilomita erithulira abandu bangyi ngoku angathoka. Iniakasondekanaya esyonzira esy’erithuliramu abandu ah’amabeya. Yesu mwahira erithulira ly’embere omwa ngebe yiwe.
8 Thwangana gherererya Kristo omw’isondekania esyonzira sy’erikaniryamu abandu okwa ngulhu yuwene okwa ndambi yosi-yosi n’ahosi-hosi aho thwangabya. Thunayitheghekire eriyithalya okwa bindi thwanamathasangira omwa mubiiri w’erithulira. (Mk. 6:31-34; 1 Pet. 2:21) Abandi omwa kithunga bangana thoka erikolha obutemburi bw’embaghane, obw’omughulhu wosi, kutse obw’obuwathikya. Abandi babirigha owundi mubughe kutse erighenda omwa mwanya owali mw’obuyithawa bw’abathuliri. Nomwabine, omubiiri munene ow’erithulira akakolhawa n’abathuliri b’Obwami ab’omuhwa, abakalengaho ngoku banga thoka. Mbulha ni kyahi, Yehova syali bugha athi thukole ebya thuthe thwanga thoka. Anzire ithwe bosi ithwatsemera omubiiri wiwe thukathulhughania “engulhu yuwene ey’olhukengerwa . . . eya Nyamuhanga oyutsemire.”—1 Tim. 1:11, NW; Ebi. 30:11.
9. (a) Paulo mwahira athi omubiiri w’erithulira w’embere nomwanabya w’erikolha omubiiri w’ekihugho? (b) Emibiri 28:16, 30, 31 hakakanganaya hathi amalengekania agho Paulo aby’awithe okw’ithulira?
9 Omukwenda Paulo mwahiraho eky’erileberyako ekyuwene eky’erikolha erithulira mwa mubiiri mukulhu kutsibu omwa ngebe yiwe. Iniane e Korinto okwa lhubungo lhwiwe lhwakabiri olhw’obumisani, esyosente musyamukehera neryo amayithagha eribya inianemulhuka esyohema habw’obuthuku bulebe. Aliwe, Paulo mwathalhangira erilhuka esyohema mwa mubiiri wiwe mukulhu. Mwakolha omubiiri oyu erimusighika omw’ithulira nuku angathoka erithulhughania engulhu yuwene okwa Banya Korinto isyathabya muheke okw’ibo. (2 Kor. 11:7) Nomwakine indi Paulo mwayithagha erikolha owundi mubiiri, mwalholha embere erihira omubiiri w’erithulira w’embere, kandi iniakathulira okwa buli Sabato. Emibere eyo abyamu yabere yikuwana, Paulo mwathoka eritsomana kutsibu omubiiri w’erithulira. “Mwasiba omughulhu wosi akathulha engulhu yuwene, iniakathuliragho Abayuda athi, Yesu ni Kristo.” (Emib. 18:3-5; 2 Kor. 11:9) Enyuma waho, inianaboherwe omwa nyumba yiwe e Roma habw’emyaka ibiri, Paulo iniakathulira abakamubungira kandi mwahandika esyobaruha. (Soma Emibiri 28:16, 30, 31.) Paulo mwathwamu erithendi lighira ekyosi-kyosi erimulemesya omubiiri wiwe w’erithulira. Mwahandika athi: ‘Kusangwa Nyamuhanga abirithuha omubiiri oyu, sithweremerawa.’ (2 Kor. 4:1) Nethu nga Paulo, nomuthwangabya b’erighunza buthuku bunene okwa mubiiri w’ekihugho, thwanganayira omubiiri w’Obwami mwa mukulhu kutsibu omwa ngebe.
Hali nzira nyingyi sy’eriberereryamu ndeke omubiiri ogho Nyamuhanga abirithuha (Lebaya enungu 10-11)
10-11. Thwanga berererya thuthi ndeke omubiiri ogho Nyamuhanga abirithuha, amaghalha nomwangabya iniakathukakiraya?
10 Thwamabya isithwanga thasyathoka erithulira nyumba okwa nyumba busana n’erikulha omo myaka kutse amaghalha eritsotsobera, thwangana thulira omwa sindi nzira. Abakristayo abakera mubathulira abandu ehosi-hosi eya babya. Mubakolesya akaghisa kosi-kosi erikania oko kwenene—nyumba okwa nyumba, ahali abandu bangyi, kandi kitsumbukirania—ehosi-hosi eya bandu babya. (Emib. 17:17; 20:20) Thwamabya isithwanga thoka erighenda lhughendo lhuuli, ithwangan’ikalha ahakabya abandu bangyi nuku thuthulire abalhabi. Kutse ithwangana thoka erithulira kitsumbukirania, erihandika esyobaruha, kutse erithulira okwa simu. Abathuliri bangyi abalemererwe kutsibu bakatsemera erikolesya eyindi mibere eyi ey’omubiiri w’erithulira.
11 Nomuwangabya iwukakakiribawa busana n’amaghalha erithendyuwana, wangana berererya ndeke omubiiri ogho Nyamuhanga abirikuha. Thasyalengekanaya okwa ky’erileberyako ky’omukwenda Paulo. Mwabugha athi: “Obuthoki bunene obo bubye bwa Nyamuhanga butsira bwethu.” (2 Kor. 4:7) Paulo mwayithagha obuthoki obo omughulhu alhwalha iniane omwa lhughuma lhw’okwa ngendo siwe sy’obumisani. Mwasoborera Abanya Galatia athi: “Munasi ngoku nabya nyilhwere omwa mubiri omughulhu natsuka eribathulira engulhu yuwene.” (Gal. 4:13) Kuthya, amaghalha wawu anganakuha akaghisa k’erithulhughania engulhu yuwene okwa bandi, nga badokita, abanasi, n’abandi bathambiri. Abangyi b’okwa bandu aba bakabya ibane okwa mibiiri abathuliri bakahika okwa miyi yabu.
NGOKU WANG’OLHOBYA ENGEBE YAWU
12. Kikamanyisayaki eriso lyawu ‘erithungerera kighuma’?
12 Yesu mwabugha athi: “Etala y’omubiri ly’eriso; omughulhu eriso lyawu likakoleraya [kutse “lyamathungerera kighuma,” NW], omubiri wawu wosi asyusulha n’ekyakakalha.” (Mt. 6:22) Amanyisayaki? Amanyisaya athi thutholere ithw’olhobya engebe kutse erithungerera ekilhubirirwa kighuma, kutse ekighendererwa, butsira erilengemeribwa. Yesu iyuwene-wene mwahiraho eky’erileberyako omw’ihwerya engebe yiwe omw’ithulira, kandi mwakangirirya abigha biwe erihwerya amalengekania wabu okw’ikolera Yehova n’oko Bwami Bwiwe. Thukagherereraya Yesu omw’ibya omwa ngebe eyikahira erithulira ly’embere, eritsuka “erisonda Obwami bwa Nyamuhanga n’erithunganene liwe.”—Mt. 6:33.
13. Ni kyahi ekyanga thuwathikya erihwerya amalengekania wethu okwa mubiiri wethu w’Ekikristayo?
13 Enzira nguma ngoku thwanga hwerya amalengekania okwa mubiiri wethu w’erithulira ly’eryolhobya engebe nuku thuthasyaghunza ndambi nene ithune muwathikya abandi eriminya Yehova n’erimwanza. * Ng’eky’erileberyako, mbwino thwangana kolha esyombinduka omwa ndegheka y’omubiiri wethu w’ekihugho nuku thwang’ongera endambi y’erithulira omwa wiki? Mbwino thwangana kehya okwa by’eriyitsemesya ebyanga thulira endambi nene?
14. Ni mbinduka syahi esya mulhume na mukali wiwe bakolha nuku bongere obuthuku bw’erithulira?
14 Eki ky’omusyakulhu mughuma w’ekithunga ya Elias na mukali wiwe bakolha. Akabugha athi: “Thwabya isithwanga kolha obutemburi okwa buthuku obo, aliwe habya ihane ebya thwangana kolha erithoka erisangira kutsibu omw’ithulira. Neryo muthwakolha hindu hike-hike nuku thwongere obuthuku bwethu omwa mubiiri w’erithulira. Ng’eky’erileberyako, muthwakehya okwa mihulhukirye yethu, thwamakehya okwa by’eriyitsemesya ebyo lino thukalhangira ibilhabirirenie, kandi thwamasaba abathuhere emibiiri erithuhiriraho esyombinduka nuku thwanga bana endambi y’erithulira. Neryo muthwathoka erithulira omwa syosaha sy’erigholho, erigha n’abigha be Biblia, n’erisangira omw’ithulira erikabya ahakathi-kathi k’ewiki mirundi ibiri omo kwezi. Muthwabana etseme nene!”
NGOKU WANG’UWANIA EMIBERE YAWU Y’ERITHULIRA N’ERIKANGIRIRYA
Erikolesya ebya thuk’igha okwa mihindano yethu ey’ahakathi-kathi k’eyenga kikendi thuwathikya erilholha embere erikulha-kulhana omwa mubiiri wethu (Lebaya enungu 15-16) *
15-16. Erikwamana na 1 Timoteo 4:13, 15, thwang’uwania thuthi emibere yethu y’erithulira? (Lebaya akasanduko “ Ebilhubirirwa Ebikendi Nyiwathikya Eriberererya Ndeke Omubiiri Waghe.”)
15 Eyindi nzira ey’eriberereryamu ndeke omubiiri wethu w’erithulira ly’eryuwania emibere yethu y’erithulira. Abandu abakakolha mibiiri mirebe bakabya ibane muthendekwa n’erikangiriribwa nuku banga thasyongera eribya n’amenge n’emibere y’erikoleramu. Kwa bine bithya n’okwa bathuliri b’Obwami. Thukayithagha erilholha embere erigha ngoku thwanga thasyongera erikolha ndeke omw’ithulira lyethu.—Emi. 1:5; soma 1 Timoteo 4:13, 15.
16 Neryo ibbwa, thwanga lholha thuthi embere erikulha-kulhana omw’ithulira lyethu? Omw’ihulikirira ndeke obusondoli obwa thukabana okwa mihindano yethu eya buli yenga omwa Muhindano ow’Engebe n’Omubiiri. Omuhindano oyu akathuthendeka ndeke erithuwathikya eryuwania emibere yethu y’erithulira. Ng’eky’erileberyako, omughulhu omwimaniri akahabulha abalyalhabaya ebitsweka by’abigha, thwangan’igha amenge awanga thuwathikya eryuwania erithulira lyethu. Ithwangana kolesya amenge ayo thukabwira omundu okwa ngulhu yuwene. Ithwangana saba omulebererya w’egurupu ey’omubiiri w’eriyathulira y’obuwathikya kutse iwakolha nayu kutse iwakolha n’owundi muthuliri oyuwasi ndeke, omutemburi, kutse n’omulebererya w’omuthimbo. Thukendibya thune mwongera erikolesya ndeke obuli kindu ekiri omwa Ebya Thukakolesaya Thukakangirirya, thukendiongera eritsemera erithulira n’erikangirirya lyethu.
17. Wukendi banaki wamaberererya ndeke omubiiri ogho Nyamuhanga abirikuha?
17 Ni lhusunzo lhunene Yehova erithulighira erikolha “haghuma nayu”! (1 Kor. 3:9) Wamaminya “ndeke eby’omughaso munene” kandi wukahwerya amalengekania okwa mubiiri w’Ekikristayo, iwukendi ramya Yehova n’eriyisyandira. (Fil. 1:10, NW; Esy. 100:2) Iwe ng’omughuma w’okwa bakoli ba Nyamuhanga, wangana yikethera ngoku akendi kuha amaaka w’eriberererya ndeke omubiiri wawu nomuwangabya iwuwithe ebitsibu kutse erilemererwa. (2 Kor. 4:1, 7; 6:4) Mbulha emibere eya wulimu yikakulighira erisangira kuke kutse kutsibu omw’ithulira, wanganabana “eky’eriyihalhambira” wamakolhagho n’omuthima wosi. (Gal. 6:4) Wamaberererya ndeke omubiiri ogho Nyamuhanga abirikuha, iwamakangania ku wanzire Yehova na balikyethu. “Wamakolha wuthya wasyayilhamya haghuma n’abakakuhulikirira.”—1 Tim. 4:16.
OLHWIMBO 58 Erisondya Abandu b’Obuholho
^ enu. 5 Thwabirihebwa omubiiri w’erithulha engulhu yuwene ey’Obwami n’eriyira abigha. Omwatsi ono akendi kangania ngoku thwanga berererya ndeke omubiiri wethu ogho thwabirihebwa, nomuthwangabya ithuwithe bitsibu bingyi. Kandi thukendi minya ngoku thwangabya bathuliri babuya n’eribana etseme nene thukathulira.
^ enu. 4 ERISOBORERA EKINYWE: Omubiiri wethu w’Ekikristayo mwamuli erithulira n’erikangirirya, erihimba n’erisugha amanyumba awakakolerawa mw’ebya Nyamuhanga, n’eriwathikya abawire kw’ekitsinduli.—2 Kor. 5:18, 19; 8:4.
^ enu. 13 Lebaya esyonzira musanju esiri omwa kasanduku “Ngoku Wang’olhobya Engebe Yawu” omwa Kaleberyo ak’Okwomusanju 2016, olhup. 12.
^ enu. 62 ERISOBORERA EBISASANI: Mwali wethu akakolha ekitsweka ky’erisubayo omwa muhindano w’ahakathi-kathi k’eyenga. N’enyuma waho, omwimaniri akabya akahabulha, mwali wethu akahandika omwa brokyuwa yiwe eya Erikangirirya. Enyuma waho, okwa wikendi, iniane omw’ithulira akakolesaya eby’igha okwa mihindano.
