Winston, thathubwira ngoku wasondekanaya Nyamuhanga.

Nakulira omw’eka eyithatsomene eby’edini omwa famu e Queensland, Australia. Kundi thwabya haali okwa bandu, isindilholha okwa bandi bandu kw’ihaho ab’eka yethu basa. Inganawithe myaka nga 12, munatsuka erisondekania Nyamuhanga. Munamusaba, indi ngaminye ekwenene eyimuhambireko. Endambi muyahika namalhua omwa famu n’eribana omubiiri e Adelaide, omwa bitsweka by’eyikwa bye Australia. Inganawithe myaka 21, munabana Pam ingane omwa kihumuro e Sydney, kandi mwanyibwira okwa gurupu y’edini ey’Abengereza n’Abaisraeli, eyikabugha yithi Abengereza balhua omwa bakahulhawamu ebihanda bya Israeli ebyahera. Egurupu eyo iyikabugha yithi ebihanda ebyo, by’ebihanda ikumi eby’obwami bw’endatha obwa thwalhawa omwa bunyewa omwa kighonye ky’omunani E.K.K. Neryo nabere ingasuba e Adelaide, munakania oko mwatsi oyo n’oyothukakolha nayu oyuwabya iniabiritsuka erigha e Biblia n’Abema ba Yehova. Thwabere thwakania habw’esyosaha nyike buyira​—kutsibu-tsibu okwa bya Bema ba Yehova bikirirye​—munaminya ngoku omusabe waghe w’omwa bwana amasubwamu. Munigha ekwenene eyihambire okwa Muhangiki waghe n’Obwami bwiwe! Nabya inamabana ‘elulu y’obughuli bunene.’​—Mt. 13:45, 46.

Pam, nawu watsuka erisondya elulu eyi iwukine mulere. Muwabanayo wuthi?

Nakulira omw’eka eyanzire eby’edini omwa tawuni ye Coffs Harbour, e New South Wales. Ababuthi baghe n’ababuthi ba mama waghe mubaligha esyongangirirya sy’egurupu y’Abengereza n’Abaisraeli. Ingye, mughalha wethu omulere, mwali wethu omukulhu, n’abandi baana ba mwali  wobu mama waghe n’abanyokolhume, ithw’ikirirye thuthi Nyamuhanga anzire abandu abalhuire omwa Bengereza. Mungathalighirana n’ekyo, kandi munayowa nga ngali haali oku Nyamuhanga. Inganawithe myaka 14, munathimba omwa bisomo muthina-muthina, imwamuli Ekipira, Ekibbabtisti, n’Ekiduvente. Aliwe mubathanyiwathikya eriminya Nyamuhanga.

Enyuma waho eka yethu muyahumira e Sydney, eyo nasanga Winston, iniane omwa kihumuro. Ngoku analyabugha, erikanirania lyethu okwa by’edini mulyaleka iyo iniatsuka erigha n’Abema ba Yehova. Enyuma waho, esyobaruha esy’abya akanyithumira isikabya mw’emilhondo! Omo kwenene, erimbere munasagha​—nibya n’erihithana. Omwa lyolho-lyolho, munaminya ngoku eby’akanyihandikira bitholere eribya iye kwenene eyihambire oku Nyamuhanga.

Omwa 1962, munahumira e Adelaide eribya hakuhi na Winston. Mwanyisonderya omulhume na mukali wiwe Abema ba Yehova abo nang’ikalha nabu​—Thomas na Janice Sloman​—ababya bamisani e Papua New Guinea. Mubanyikangania olhukeri lhunene; ngabya ngawithe emyaka 18 buyira, kandi mubanyiwathikya kutsibu bunyakirimu. Neryo naghe munatsukiraho erigha Ekinywe kya Nyamuhanga, kandi munalhua inaligha ku nabiribana ekwenene. Ingye na Winston thwabere thwabiringira omwa butheke, ku thwanabya thwatsukire thuthya omubiiri mubuyanga ow’eriyihayo​—omubiiri owabiryongera erisima lyethu busana n’elulu eyo thwabya ithwabiribana, nomuhane ebitsibu.

Winston, thubwire okwa ngebe y’erimbere-mbere omwa mubiiri wa Yehova.

Isithuli thwaghunza buthuku bunene omwa butheke, Yehova mwatsukiraho erithukyungulira omwanya w’erikolha bingyi. (1 Kor. 16:9) Omwanya w’erimbere akyungulhawa na Mughalha wethu Jack Porter, oyuwabya mulebererya w’omuthimbo omwa kithunga kyethu. (Lino thukakolha haghuma okwa Komiti y’Ekyaghanda ky’Omuthahulha kye Australasia.) Jack na mukali wiwe, Roslyn, mubathuhira mw’omuhwa w’erikolha obutemburi bw’omughulhu wosi​—olhusunzo olhwa thwakolha habw’emyaka ithano. Inganawithe myaka 29, ingye na Pam muthwahebwa omubiiri w’erikolha obulebererya bw’omuthimbo okwa Bizinga bye South Pacific, ebyabya byabere omw’isi sy’omuthahulha we Fiji okwa buthuku obo. Ebizinga ebyo byabya American Samoa, Samoa, Kiribati, Nauru, Niue, Tokelau, Tonga, Tuvalu, na Vanuatu.

Obuthuku obo, abandu ab’okwa bindi bizinga ebiri haali, ibakasagha Abema ba Yehova, neryo ithutholere eribya bolho n’eribya n’amenge. (Mt. 10:16) Ebithunga ini bike-bike, n’ebindi isibyanga thoka erithubanira ah’erikesya. Neryo ithukasaba abandu omwa kitsweka ekyo erithulighira eribya nabu, nabu mughulhu mungyi ibakathukanganaya olhukeri.

Winston, wanzire kutsibu omubiiri w’erihindulha. Ni kyahi ekyaleka iwanzagho?

Obuthuku thwatsuka erikolera okwa bizinga bye Tonga, balikyethu b’eyo ibawithe esyotrakit n’ehitabu hike omwa mubughe we Tonga. Omw’ithulira, ibakakolesaya ekitabu ky’Olhusungu ekya The Truth That Leads to Eternal Life erigha n’abandu. Neryo omwa sukuru y’amayenga ani ey’abasyakulhu, abasyakulhu basathu ab’eyo abo Olhusungu lhwabu lhwabya lhuke mubaligha erihindulha ekitabu Truth omwa mubughe we Tonga. Pam mwahandika ebinywe, neryo thwamabithuma okwa kyaghanda kye Amerika eriyaprintingwa. Omubiiri wosi mwaghunza mayenga munani. Nomwakine indi erihindulha siryabya lyuwene kutsibu, ekitabu ekyo mukyawathikya abangyi abakabugha e Tonga erigha ekwenene. Ingye na Pam sithuli bahinduli, aliwe ekya thwalhabamu eki mukyaleka ithwanza n’eritsomana omubiiri oyu.

Pam, engebe okwa bizinga yabya yithi mbaghane okwa ngebe eye Australia?

Yabya mbaghane kutsibu! Omwa yindi myanya imuli emibu minene, ekihuhania n’ekithuthu, esyombeba, amalhwere, n’okwa bundi buthuku ebyalya bike. Nomwabine, ibukabya buk’ira, ikikatsemesaya erisamalira engetse ithune omwa fale  yethu​—erina ly’enyumba ye Polynesia omwa Samoa eyisakere omwa bunyatsi eyithawithe esyombimbo. Ihakanayira okwezi ikwakolerya kutsibu, ithwabya ithwanganalhangira emithi y’esyokokonati, n’ekyakakalha ky’okwezi ikyaleka engetse iyakangabasania. Emighulhu eyuwene ng’eyo iyikaleka ithwaghanirya n’erisaba, ithwalengekania okwa bibuya butsira okwa bithuwene.

Muthwanza abaana, ababya bakathutsemesya n’erianza eriminya bingyi bakalhangira abasungu. Ithune e Niue, akalhwana kaghuma mukathulha okwa kuboko kwa Winston okuli obweya n’eribugha kathi, “Ebyeya byawu byuwene.” Omwa kwenene, kangabya ikabya isikali kathalhangira amaboko awali kw’obweya ng’aya kandi sikabya k’asi ng’akangabwahulha kathi!

Ithukakwa obulighe thukalhangira emibere ey’obunakwa eyo bandu babyamu. Ekihugho kyabu ikyuwene aliwe eby’emithambirire ibighanire kandi isibawithe amaghetse w’erinywa awakaghunza. Aliwe, balikyethu isibatsomene ebyo. Ibanabeghere engebe eyo. Ibatsemire eribya n’eka yabu, ah’eriramirya, n’akaghisa k’eripipa Yehova. Eky’erileberyako kyabu mukyathuwathikya erihwerya amalengekania okwa ky’omughaso munene n’eribya n’engebe nyolho.

Pam, ihakanayira iwayisonderya amaghetse n’eriyitsumbira ebyalya omwa mibere mihyaka. Ekyo muwakithoka wuthi?

Ngasima thatha waghe. Mwanyikangirirya bindu bingyi by’omughaso, ng’erikolha amahigha w’ehihya n’eritsumbirayo kandi ngoku wangabyaho okwa hindu hike. Thwabere thukaghenda e Kiribati, muthwikalha omwa kanyumba kake akasakere omwa bunyatsi, n’ahisi ibahiraho ebibwe by’amarijani, n’olhuhimbo ilhukolirwe omwa milonge. Erithoka eritsumba, munathakulha omwa nyumba mw’ekyuna erikolha amahigha n’erikolesya ebikuku by’esyokokonati ng’esyongwe. Eribana amaghetse, iningaghenda n’abandi bakali ahali ekyuna ekiri mw’amaghetse. Erithoka eritheha amaghetse, ibakakolesaya omuthi w’esyofiti mukagha owabohereko akakoba okwa muthwe-muthwe wawu. Neryo okwa kakoba ako ibaboherako ak’erithehamu. Omw’isubungukana, obuli mukali iniakakaghusamu neryo aho n’aho iniatheha amaghetse. Akandu k’erithehamu ikakawamu n’eryusulha. Munalengekania indi ni kyolho​—erihika aho naghe nathehera. Munakaghusamu mirundi mingyi, aliwe ikakawa okwa maghetse n’erileletha! Obuli mundu abere abirighunza eriseka, omukali mughuma mwanyiwathikya. Mughulhu mungyi abandu ibakawathikaya kandi ini b’olhukeri.

Inywe bosi mumwanza omubiiri wenyu okwa bizinga. Mwangana thubwira ebyalholirweko ebyo muthendi syibirirwa?

Winston: Mukyanathuthwalira buthuku eribeghera mibere mirebe. Ng’eky’erileberyako, balikyethu ibakabya bakathuha ebyalya, ibakathuha ebyosi ebyo bawithe. Erimbere, isithwasi ku thutholere eribasakirya. Neryo ithukalya ebyosi ebyo babirithulethera! Neryo thwabere thwabiriminya ngoku emibere yiri, muthwabya thukabasakirya. Omwa byosi ebyo, balikyethu ibakathuyitheghereraya. Kandi ibakatsema kutsibu erithulholhako enyuma w’amezi mukagha kutse manene okw’aho thukababungira omwa mubiiri w’omuthimbo. Mbaghane n’abalikyethu ab’eyo, in’ithwe bandi Bema abo balikyethu bakalholhako abathe omwa kithunga kyabu.

Kandi ithwe eribabungira ikikaha obwema obuwene eyo bikere. Abandu bangyi omwa byalu ibakalengekanaya bathi balikyethu bayipika-pikira edini eyi. Neryo abandu babere bakalhangira omuthumwa na mukali wiwe bakabungira balikyethu, mubathasweka buyira aliwe kandi mubatsema.

Pam: Ekighuma ky’okwa bya ngathendisyibirirwa ky’ekyabya e Kiribati, eyabya ekithunga ekirimu balikyethu bake. Omusyakulhu mughuma musa oyo babya bawithe, ya Itinikai Matera, mwakolha ngoku angathoka erithutsomana kutsibu. Kiro kighuma mwasa n’ekibo imuli eriya lighuma. Mwabugha athi: “Ni lyenyu.” Obuthuku obo ithwe eribana eriya ly’engoko ini kindu ky’embaghane kutsibu. Ekindu kike ekyo mukyahamba okwa mithima yethu kwa kutsibu.

 Enyuma w’emyaka mirebe, Pam, muwalhwako enda. Ni kyahi ekya kuwathikaya erighuma?

Ingye na Winston ithune omwa South Pacific, munabya mukule omwa 1973. Muthwathwamu erisuba e Australia, n’enyuma w’amezi ani obukule mubwalhuamu. Winston nayu mwakwa obulighe kundi abya mwana wethu ithwe bosi. Obulhumi bwaghe mubwaghenda bukakeha, aliwe mubwahwa ndeke thukabana omwatsi omwa Watchtower ey’Okwakani 15, 2009. Omwatsi owa: “Hane Amaha w’Erilhubuka oko Mwana Oyukaholera Omwanda?” ahisi sy’omuthwe “Ebibulyo Erilhua Omwa Basomi.” Omwatsi oyo mwathukakasya ngoku ebyosi biri omwa byalha bya Yehova oyukakolha ekihikire mughulhu wosi. Akendi syaghunzaho obulhumi bwosi obwa thwabiribana busana n’eribya omwa kihugho kibi kino akasondolha omo lhwanzo Mughalha wiwe ‘eriherya emibiiri ya Sitani.’ (1 Yn. 3:8) Omwatsi oyo kandi mwaleka ithwathasyongera erisima “elulu” ey’obughuli eyo thuwithe ng’abandu ba Yehova! Thwangabere hayi ku thuthabya n’amaha w’Obwami?

Obukule bwabere bwabirilhuamu, kandi muthwatsuka omubiiri w’omughulhu wosi. Habw’amezi malebe muthwakolera okwa Beteli ye Australia n’erighunzerera thwamathasyatsuka omubiiri w’omuthimbo. Omwa 1981, ithwamabirikolha habw’emyaka ini omwa byalu bye New South Wales ne Sydney, muthwabirikirwa okwa Beteli ye Australia, ngoku yabya yikahulhwa ebiro ebyo, na lino yathukinakolera.

Winston, ebya walhabamu okwa bizinga bye South Pacific mubyana kuwathikya omwa mubiiri wawu w’erikolha ng’omughuma w’okwa Komiti y’ekyaghanda ky’omuthahulha ekye Australasia?

Ee, omwa nzira nyingyi. Eky’erimbere, e Australia muyasabwa erilebererya e American Samoa ne Samoa. Neryo ne Beteli ye New Zealand muyahirwa haghuma ne ye Australia. Lino, obulhambu bw’ekyaghanda kye Australasia mwamuli e Australia, American Samoa ne Samoa, e Cook Islands, New Zealand, Niue, Timor-Leste, Tokelau, ne Tonga​—ebingyi by’omw’ibyo nabirithunga olhusunzo lhw’eribibungira ng’omuthumwa erilhua okwa kyaghanda. Ebya nalhabamu ingakolha haghuma na baghalha bethu na bali bethu b’okwa bizinga byabirinyiwathikya ingabakolera okwa kyaghanda ky’omuthahulha.

Ingaghunzerera, ngendi bugha nyithi ingye na Pam thwabiriminya ngoku si babakulhu basa abakasondekanaya Nyamuhanga, ngoku thwabiriyilhangirira. N’abalere banzire ‘elulu y’obughuli bunene’ eyo​—abandi omw’eka nomubangaghana erikangania erianzisibwa. (2 Bam. 5:2, 3; 2 Emy. 34:1-3) Omo kwenene, Yehova ni Nyamuhanga w’olhwanzo oyuwanzire abosi, abalere n’abakulhu erisyabana engebe!

Ingye na Pam thwabere thukatsuka erisondya Nyamuhanga emyaka eyilhabire oku 50, sithwabya thwasi erisondekania eryo nga likendi thukolyahi. Ahathe erithika-thika ekwenene y’Obwami yiri ng’elulu ey’obughuli bunene kutsibu! Thwabirithwamu eryamakirira n’akaghalha kethu kosi elulu ey’obughuli eyo!