1-2. Busana naki Yesu abya omwa ngitsi?

OKWA kiro kiwe ky’erighunzerera hano okwa kihugho, Yesu abya omwa ngitsi. Abandu babi babya ibakayamwitha. Aliwe eribya iniakay’ithibawa sikyo kisa ekyaleka Yesu iniahangya-hangya. Inianzire kutsibu Thatha wiwe kandi inianzire erimutsemesya. Yesu abya asi ngoku amakangania obuthaleghulha omwa kirengesyo ekikalire eky’abya iniakayabana, angawathikirye omw’ihamya erina lya Yehova. Yesu kandi inianzire abandu, kandi iniasi ngoku amaha wethu w’eribyaho kera na kera aseghemere okw’iyo eribya muthaleghulha erihika okwa lhuholho.

² Nomwakine indi Yesu abya omwa birengekanio binene, abya inianayowire buholho. Mwabwira abigha biwe athi: “Ngabaha obuholho bwaghe.” (Yn. 14:27) Abya “n’obuholho bwa Nyamuhanga,” erithekana n’erihumulikana ebikalethawa busana n’omundu eribya n’engolongana y’obughuli na Yehova. Obuholho obo mubwaleka Yesu iniabya inianathekene omwa menge n’omwa muthima.​—Fil. 4:6, 7.

3. Thukendi lebyaki omo mwatsi ono?

³ Okw’ithwe sihali oyukendi syalhaba omwa biri ng’ebya Yesu alhabamu, aliwe abosi abakwamire Yesu bakendi syabana ebitsibu. (Mt. 16:24, 25; Yn. 15:20) Kandi nga Yesu, thukendibya ithunemubana ebikalyambaya. Thwanga kolhaki nuku sithuhanga-hangaye kutsibu kikaleka thukabulha obuholho? Thulebaye ebindu bisathu ebya Yesu akolha omwa mubiiri wiwe okwa kihugho n’erilhangira ngoku thwanga mugherererya thukabana ebitsibu.

4. Wun’ibukire 1 Abanya Tesalonika 5:17, iha eby’erileberyako birebe ebikakanganaya ngoku Yesu mwasaba kutsibu ekiro ky’erighunzerera eky’engebe yiwe okwa kihugho.

⁴ Soma 1 Abanya Tesalonika 5:17. Yesu mwasaba kutsibu ekiro kyosi ky’erighunzerera ly’engebe yiwe okwa kihugho. Abere akangania abigha ngoku bang’ibuka olhuholho lhwiwe, mwasabira omuggati n’evini. (1 Kor. 11:23-25) Bathe balhua ahabya omukonga w’Erikyuruka, mwasaba haghuma n’abigha biwe. (Yn. 17:1-26) Iyo n’abigha babere bahika e Getesemane erithumbi eryo, mwasaba ngendo nyingyi. (Mt. 26:36-39, 42, 44) Kandi n’ebinywe by’erighunzerera ebya Yesu abugha akathwa omuka, abya musabe. (Lk. 23:46) Omwa musabe, Yesu mwabwira Yehova ebyosi ebya ghenda bikabya ekiro ky’erighunzerera ekyo.

5. Ni kyahi ekya tsekaya obuthubaha bw’abakwenda?

⁵ Ekighuma okwa byathokesaya Yesu eriyiyinia lyabya iry’eriyikethera Thatha wiwe omwa musabe. Aliwe abakwenda ibo, mubalemwa eriyitsingirira omwa musabe erithumbi eryo. Ekyo mukyaleka ibubaha endambi y’erilengwako yikahika. (Mt. 26:40, 41, 43, 45, 56) Thukendi sighalha bathaleghulha omwa bitsibu ithunalya gherereraya Yesu n’erisaba “butsira eriumbya.” Ni byahi ebya thwanga hira omwa misabe yethu?

6. Erikirirya likendi thuwathikya lithi erisighalha ithune buholho?

⁶ Thwanganasaba Yehova ‘akanyaye erikirirya lyethu.’ (Lk. 17:5; Yn. 14:1) Thukayithagha erikirirya kundi Sitani akalenga okwa bosi abakwamire Yesu. (Lk. 22:31) Erikirirya likendi thuwathikya lithi erisighalha ithune buholho nibya n’omughulhu thukabana ebitsibu ekindi  omwa kindi? Thukendibya thwabirikolha ebyosi ebya thwanga thoka erighumira ekitsibu, erikirirya likendi leka ithwasigha emyatsi y’omwa byalha bya Yehova. Busana n’eriyikethera ngoku yuwasi ndeke eky’erikolha, thukayowa buholho omwa malengekania n’omwa muthima.​—1 Pet. 5:6, 7.

7. Ebya Robert akabugha byamakweghesyaki?

⁷ Erisaba likaleka ithwabya ithunathekene nomuthwangabana ebitsibu ebiri bithi. Eky’erileberyako ni Robert, omusyakulhu w’ekithunga omuthaleghulha oyuli omwa myaka ye 80. Akabugha athi: “Erihano eriri omu Abanya Filipi 4:6, 7 lyabirinyiwathikya omwa bitsibu bingyi omwa ngebe yaghe. Nabiribana ebitsibu by’esyosente. Kandi habw’akathuku kake munanabya isingakikolha ng’omusyakulhu.” Ni kyahi eky’abiriwathikya Robert erisighalha inianathekene omwa muthima? Akabugha athi: “Ngabya inganatsuka erihangya-hangya, ngasaba. Ng’ikirirye indi ngabya ing’ongera erisaba kutsibu, na buholho bungaho.”

8. Ngoku kiri omu Yoane 8:29, ni yindi nzumwa yahi eyaleka Yesu iniayowa buholho?

⁸ Soma Yoane 8:29. Nibya n’omughulhu abya akendereribwa, Yesu abya inianathekene omwa muthima kundi abya inianasi ngoku akaleka Thatha wiwe iniatsema. Mwasighalha mwowa, n’omughulhu kyabya kikalire. Abya anzire Thatha wiwe kandi ekikulhu omwa ngebe yiwe iry’erikolha erisonda lya Yehova. Athalyasa okwa kihugho, abya “mukoli mukulhu” wa Nyamuhanga. (Emi. 8:30) Kandi iniane okwa kihugho, mwakangania omuhwa omw’ikangirirya abandi oku Thatha wiwe. (Mt. 6:9;  Yn. 5:17) Omubiiri oyo mwamulethera etseme nene.​—Yn. 4:34-36.

9. Eriyihwerya omwa mubiiri w’erithulira kyanga thuwathikya kithi eriyowa buholho?

⁹ Thwangana gherererya Yesu omw’owa Yehova ‘n’omw’ikanyirira [erikolha bingyi] omwa mubiiri w’Omukama.’ (1 Kor. 15:58) Thwamayihwerya omwa mubiiri w’erithulira, ithukendi thoka eribya n’amalengekania awatholere okwa bitsibu byethu. (Emib. 18:5) Ng’eky’erileberyako, abo thukabana omw’ithulira mughulhu mungyi bakabya n’ebitsibu ebilengire ebyethu. Aliwe, bakabya babirigha erianza Yehova n’erighendera okw’ihabulha liwe, esyongebe syabu sikuwana kandi etseme yabu iyongera. Thukabya thukalhangira ekyo kikabya, thuk’ongera erisika ngoku Yehova akendi thutsomana. Kandi eriminya ekyo likaleka ithwasighalha ithune buholho. Mwali wethu oyo omwa ngebe yiwe yosi abiriyowa nga syatholere, n’eribya omwa ngebe y’eriyinuwa abiriyilhangirira ekyo. Akabugha athi: “Namayihwerya omw’ithulira, ngayowa inabirithekana omwa birengekanio n’eritsema. Ngalengekanaya kiri kithya kundi omughulhu indi omw’ithulira, ngayowa ingali hakuhi-kuhi na Yehova.”

10. Ebya Brenda akabugha byamakweghesyaki?

¹⁰ Thalengekania okwa ky’erileberyako kya mwali wethu oyukahulhawamo Brenda. Iyo na mwali wabu balhwere obulhwere obukalire. Brenda syalithoka erighenda neryo akakolesaya akaggali k’abalema kandi syawithe kaghalha. Akathulira nyumba okwa nyumba amathoka, aliwe kutsibu-tsibu akathulira omw’ihandika esyobaruha. Akabugha athi: “Nabere nabiriminya ngoku obulhwere bwaghe sibwanga lhama omwa mughulhu ono, munathoka erihwerya amenge okwa mubiiri waghe w’erithulira. Omwa kwenene, erithulira, likaleka ingathaghanirya okwa malighe waghe. Omwakanya k’ekyo ngahweraya amalengekania okw’iwathikya abo ngabana omwa bulhambu bw’ekithunga kyethu. Kandi omughulhu indi omw’ithulira ngalengekanaya okwa maha waghe w’obuthuku obukasa.”

11-13. (a) Abakwenda n’abandi mubakangania bathi ku ni banywani ba Yesu ab’okwenene? (b) Banywani ba Yesu mubaleka iniayowa athi?

¹¹ Omw’ithulira lya Yesu eryosi, abakwenda bathaleghulha mubakangania ku ni banywani biwe ab’okwenene. Mubabya ng’abanywani abo e Biblia yikabugha yithi: “Hali omwira oyukamathana n’omundu kwilhaba mughalha wabu.” (Emi. 18:24) Yesu inianzire abanywani ng’abo. Omw’ithulira liwe lyosi, muhathabya mughalha wabu-wabu oyuwamw’ikiriraya. (Yn. 7:3-5) Muhanayira abahughu biwe bamalengekania bathi abiribya musire. (Mk. 3:21) Mbaghane n’ekyo, erithumbi ly’erighunzerera athali aholha, Yesu mwabwira abakwenda biwe abathaleghulha athi: “Inywe muli ababirinyihanganira omw’irengwako lyaghe.”​—Lk. 22:28.

¹² Abakwenda ibakanaponesaya Yesu, aliwe isyalihanda omunwe w’okwa bisobyo byabu kandi mwalhangira ku bamw’ikirirye. (Mt. 26:40; Mk. 10:13, 14; Yn. 6:66-69) Erithumbi ly’erighunzerera nabu athal’ithibwa, Yesu mwabwira abalhume bathaleghulha aba athi: “Ngabahulhamo bira, kusangwa nabiribamanyisya emyatsi yosi eyo ngowa oku Thatha waghe.” (Yn. 15:15) Ahathe erithika-thika, banywani ba Yesu ibakamughumaya kutsibu. Obuwathikya obwa bamuha omw’ithulira liwe mubwaleka Yesu iniatsema kutsibu.​—Lk. 10:17, 21.

¹³ Eryongera okwa bakwenda, Yesu abya inianawithe abandi banywani, abalhume n’abakali, abamuwathikaya omw’ithulira n’omwa sindi nzira. Abandi mubamukokya ewabu okw’irya. (Lk. 10:38-42; Yn. 12:1, 2) Abandi  mubaghenda nayu n’erisangira nayu ebyo bawithe. (Lk. 8:3) Yesu aby’awithe abanywani abuwene kundi nayu abya munywani wabu mubuya. Mwabakolera ebindu ebyuwene kandi isyali bayithaghako ebyo bathe banga thoka. Yesu abya ahikene, aliwe mwasima obuwathikya bw’abanywani biwe abathahikene. Kandi ahathe erithika-thika, mubamuwathikya eribya inianayowire buholho omwa muthima.

14-15. Thwanga bana thuthi abanywani babuya, kandi banga thuwathikya bathi?

¹⁴ Abanywani abuwene bakendi leka ithwabya ithune bathaleghulha oku Yehova. Enzira mbuya ey’eribaniramu abanywani babuya nawu ly’eribya munywani mubuya. (Mt. 7:12) Ng’eky’erileberyako, e Biblia yikathuhira mw’omuhwa w’erikolesya obuthuku n’akaghalha kethu eriwathikya abandi, kutsibu-tsibu “abera.” (Efe. 4:28) Mbwino wangana lengekania okwa mundu mulebe omwa kithunga kyenyu oyo wanga wathikya? Omuthuliri oyuthe wanga thoka erighenda amanza erighulha ekindu kirebe wangana yamughulirakyo? Mbwino wanganaha balikyethu b’eky’erirya bamabya ibawithe ekitsibu ky’esyosente? Wamabya iwunasi erikolesya omuthahulha wethu owe jw.org^® ne JW Library^® app, mbwino wangana wathikya abandi omwa kithunga kyenyu erithoka eribana eby’obughuli ebiriko? Thwamakolha kutsibu eriwathikya abandi, ithukendyongera eritsema.​—Emib. 20:35.

¹⁵ Abanywani abathukabana bakendi thusighika thukabana ebitsibu, erithuwathikya eribya ithunathekene omwa muthima. Ngoku Elihu ahulikirira Yobu akakania okwa bitsibu biwe, banywani bethu bakathuwathikaya  omw’ithuhulikirira ndeke thukababwira eriyowa lyethu. (Yobu 32:4) Isithwalengekanaya thuthi banywani bethu bakendi thuthwiramu, aliwe ni ky’amenge ithwe erihulikirira erihabulha lyabu eriseghemere okwa Biblia. (Emi. 15:22) Kandi ngoku Omwami Dawudi aligha obuwathikya bw’abanywani biwe omw’iyikehya, emiyiheko siyitholere yikaleka thukaghana obuwathikya obwa banywani bethu bakathuha omughulhu thuli omwa buyithawa. (2 Sam. 17:27-29) Omo kwenene, abanywani ng’abo ni kihembo erilhua oku Yehova.​—Yak. 1:17.

16. Erikwamana na Abanya Filipi 4:6, 7, ni nzira yahi nyisa eyo thwangabaniramu obuholho? Soborera.

¹⁶ Soma Abanya Filipi 4:6, 7. Busana naki amasako akathubwira athi thwangana thunga obuholho obwa Yehova akaha “omw’isi wa Kristo Yesu”? Kundi ithukendi bana obuholho obwa kera na kera omwa malengekania n’omw’iyowa ithunalya yitheghereraya olhukwamirwa olhwa Yesu awithe omwa kighendererwa kya Yehova n’erimwikirirya. Ng’eky’erileberyako, erilhabira omwa kihongwa ky’embanulho ya Yesu, ebibi byethu ebyosi byangana ghanyirwa. (1 Yn. 2:12) Eki ka kikathuhumulikanaya! Iyo ng’Omwami w’Obwami bwa Nyamuhanga, Yesu akendi syaghunzaho eriaghalhwa lyosi erya Sitani n’ekihugho kiwe bakathulethera. (Isa. 65:17; 1 Yn. 3:8; Erib. 21:3, 4) Eki ka kikathuha amaha mabuyanga! Nomwakine indi Yesu abirithuha omubiiri owakalire, ane haghuma nethu, erithusighika omwa biro by’enyuma-nyuma eby’omughulhu ono. (Mt. 28:19, 20) Ekyo ka kikathuha obuthubaha bunene! Erithekana, amaha, n’obuthubaha​—ni bindu by’omughaso ebyo thukayithagha eribya buholho omwa malengekania.

17. (a) Omukristayo angabya athi iniane n’obuholho omwa muthima? (b) Ngoku kiri omu Yoane 16:33, ni kyahi ekya thwanga thoka erikolha?

¹⁷ Neryo kwesi, wangabya wuthi buholho omwa malengekania wukabana ebitsibu ebikalire? Ekyo ikikendi thokekana omw’ikolha ebya Yesu akolha. Eky’erimbere, saba, kandi buthumbya. Ekyakabiri, owa Yehova n’erithulira n’omuhwa, nibya n’omughulhu kikalire. N’ekyakasathu, yikethere abanywani bawu omwa bitsibu. Neryo obuholho bwa Nyamuhanga bukendi theya amalengekania n’omuthima wawu. Nawu nga Yesu, wukendi kinda ekitsibu kyosi-kyosi.​—Soma Yoane 16:33.