1. Ngoku kiri omu Abanya Efeso 6:10-13, enguma y’okwa nzira ngulhu-ngulhu esya Yehova akathutsomaniramu ni yahi? Soborera.

ENGUMA y’okwa syonzira ngulhu-ngulhu esya Yehova akakanganirayamu kw’athutsomene ithwe ng’abaghombe biwe ly’erithuwathikya erirwanisya esyonzighu syethu. Esyonzighu syethu ngulhu ni Sitani n’esyombinga. Yehova akathubwira okwa nzighu esi, kandi akathuha ebya thukayithagha erisirwanisya. (Soma Abanya Efeso 6:10-13.) Thwamaligha obuwathikya bwa Yehova n’erimuyikethera kutsibu, ithwanganathoka erilhwa na Diabolo. Ithwanganathunga erisika eriri ng’eryo mukwenda Paulo abya nalyo. Mwahandika athi: “Nyamuhanga amabya ali okwa lhuhandi lhwethu, nindi oyo wangasyalhwa nethu kwehi?”​—Abar. 8:31.

2. Thukendi lebyaki omo mwatsi ono?

² Ithwe ng’Abakristayo b’okwenene, sithuli hweraya amalengekania wethu oku Sitani n’esyombinga siwe. Thukahwerayagho okw’igha oku Yehova n’erimukolera. (Esy. 25:5) Aliwe, thukayithagha ithwaminya esyonzira esyo Sitani akakolesaya. Busana naki? Nuku syathulhabe ahisi erithukinda. (2 Kor. 2:11) Omo mwatsi ono, thukendi lebya enzira ngulhu eya Sitani n’esyombinga siwe bakalengesaya eritheberyamu abandu. Kandi thukendi lhangira ngoku thwanga thoka erilhwa nabu n’erisinga.

3-4. (a) Eby’obukumu niki? (b) Abandu bikirirye bungahi eby’obukumu?

³ Enzira ngulhu eyo Sitani n’esyombinga bakalengeserayamu erithebya abandu by’eby’obukumu. Abakakolha eby’obukumu bakayithwalha ng’abasi kutse ng’abawithe amaaka awathe wa  buli kiro. Ng’eky’erileberyako, abandi bakabugha bathi bangana thoka eriminya eby’obuthuku bw’embere omw’ilhaghulha kutse erilhaghulirya esyongununu. Abandi bangana yikolha ng’abakakanaya n’abaholi. Abandi bakakolha obuthahwa bw’ekibindi kutse emajiki, kandi bangana lengesya erighusa okwa mundu kw’erirengo. *

⁴ Abandu bikirirye bungahi eby’obukumu? Erisekulya eryakolhawa omwa bihugho 18 omwa Latin America n’omwa Caribbean mulyakangania ngoku ekimu kya kasathu eky’abandu bikirirye omwa majiki, obuthahwa bw’ekibindi, kutse obulhoyi, kandi n’abandi hakuhi bangaha nabo bikirirye bathi kithokekene erikanirania n’emirimu. Erindi sekulya mulyakolhwa omwa bihugho 18 omwa Afirika. Namu, okwa babulibawa, abanene bababugha bathi bikirirye eby’obuthahwa. Ni kwenene, ahosi-hosi aho thwangabya ithwikere, thutholere ithwayitheya okwa by’obukumu. Kundi ibbwa nibya, Sitani anzire erithebya “ekihugho kyosi.”​—Erib. 12:9.

5. Yehova akayowa athi okwa by’obukumu?

⁵ Yehova ni “Nyamuhanga w’ekwenene.” (Esy. 31:5) Neryo akayowa athi okwa by’obukumu? Abiponire kutsibu! Yehova mwabwira Abaisraeli athi: ‘Simusyebanika ko mundu oyukalhabaya mughalha wiwe kutse mwali wiwe omo muliro, n’oyukakolha obukumu, oyukalhaghuliraya ebithu, kutse omukumu, kutse omulhoyi, kutse omusaki, kutse oyukakanaya n’abalimu, n’oyukabirikira abaholi. Kusangwa omundundi oyukakolha emyatsi eyi ni nye oko Mwami Mukulhu.’ (Ebi. 18:10-12) Abakristayo sibali ahisi sy’Emighambo eyo Yehova aha Abaisraeli. Aliwe, thunasi ngoku amalengekania wiwe okwa by’obukumu syali athahinduka.​—Mal. 3:6.

6. (a) Sitani akakolesaya athi eby’obukumu eriaghalya abandu? (b) Erikwamana na Omugambuli 9:5, ekwenene eyihambire okwa mibere ya baholi ni yahi?

⁶ Yehova akathukunga okwa by’obukumu kundi anasi ngoku Sitani akabikolesaya eriaghalya abandu. Sitani akakolesaya eby’obukumu erikulha-kulhania amabehi​—imwamuli amabehi aw’eribugha indi abaholi baneho omwa mwanya mulebe. (Soma Omugambuli 9:5.) Kandi Sitani akakolesaya eby’obukumu eryubahisya abandu n’eribalhusya oku Yehova. Ekilhubirirwa kiwe kiri kithi abandu abakakolha eby’obukumu bakendi yikethera emirimu mibi omwakanya ka Yehova.

7. Ni byahi ebya Yehova akathubwira?

⁷ Ngoku thunalyalhangira, Yehova akathubwira ebya thutholere ithwaminya nuku thwanga yitheya okw’ithebibwa na Sitani n’esyombinga. Thulebaye ebindu birebe ebya thwanga kolha erilhwa na Sitani n’esyombinga.

8. (a) Enzira ngulhu y’erirwanisiryamu emirimu mibi ni yahi? (b) Esyonyimbo 146:4 hakabisulha hathi amabehi wa Sitani awahambire okwa baholi?

⁸ Soma Ekinywe kya Nyamuhanga n’erikighaniryako. Eyi ya nzira ngulhu eyathukaghaniramu amabehi agho mirimu mibi yikakulha-kulhanaya. Ekinywe kya Nyamuhanga kiri ng’omuyali owathwire owangana bisulha amabehi agho Sitani akakulha-kulhanaya. (Efe. 6:17) Ng’eky’erileberyako, Ekinywe kya Nyamuhanga kikabisulha amabehi aw’eribugha indi abaholi bangana kanirania n’abaliho.  (Soma Esyonyimbo 146:4.) Kandi kikathwibukaya ngoku Yehova musa yuwanga minya eby’omwa buthuku bw’embere. (Isa. 45:21; 46:10) Thwamasoma Ekinywe kya Nyamuhanga n’erikighaniryako mughulhu wosi, ithukendi thoka erighana n’eripona amabehi agho mirimu mibi yanzire ithwikirirya.

9. Ni bindu byahi eby’obukumu ebya thukayihighulhako?

⁹ Ghanira ighuma ekyosi-kyosi ekihambene n’eby’obukumu. Ithwe ng’Abakristayo ab’okwenene, si thuli sangira omwa by’obukumu ebyosi-byosi. Ng’eky’erileberyako, sithulighenda okwa bakumu kutse erilengaho erikanirania n’abaholi omwa nzira yosi-yosi. Ngoku kikanibweko omo mwatsi ow’ahanyuma, thukayihighulha okwa bikakolhawa omundu akaholha ebiseghemere okwa nyikirirya eyikabugha yithi abaholi bakabya ibaneho omo mwanya mulebe. Kandi sithuli kolesaya abalhaghuli erianza eriminya ebikendi syabya embere. (Isa. 8:19) Thunasi ngoku ebindu byosi ng’ebi ni by’akabi kandi ngoku byangana leka ithwakolongana na Sitani n’esyombinga.

10-11. (a) Ni byahi ebyo bandi bakolha omwa kighonye ky’erimbere bak’igha ekwenene? (b) Erikwamana na 1 Abanya Korinto 10:21, busana naki thutholere ithwagherererya eky’erileberyako ky’Abakristayo ab’omwa kighonye ky’erimbere, kandi thwanga kolha ekyo kya thuthi?

¹⁰ Yilhusayeko ebindu ebihambangene n’eby’obukumu. Abandi bandu omwa Efeso ababyaho omwa kighonye ky’erimbere ibakasangira omwa by’obukumu. Babere bak’igha ekwenene, mubakolha esyombinduka esikalire kutsibu. “N’abangyi b’okwa bakumu mubaletha ebitabu byabu, mubahisiryabyo omwa meso w’abandu bosi.” (Emib. 19:19) Abandu abo mubakolha ekyosi-kyosi ekya banga thoka erighana emirimu mibi. Ebitabu byabu by’obukumu byabya by’obughuli bunene. Aliwe omwakanya k’erihithya ebitabu ebyo kutse eribighulya, mubabithimya. Mubatsomana eritsemesya Yehova kwilhaba obughuli bw’ebitabu ebyo.

¹¹ Thwanga gherererya thuthi eky’erileberyako  ky’Abakristayo ab’omwa kighonye ky’erimbere abo? Ikikendibya ky’amenge eriyilhusyako ekyosi-kyosi ekihambangene n’oby’obukumu. Ebi mwamuli esyohirizi, ebisambu, kutse ebindi bindu ebyo bandu bakambalha kutse eribya nabyo bakanza eriyitheya okwa kabi kutse emirimu mibi.​—Soma 1 Abanya Korinto 10:21.

12. Ni bibulyo byahi ebya thutholere ithwayibulya okwa by’eriyitsemesya byethu?

¹² Lebaya ndeke eby’eriyitsemesya byawu. Yibulhaye: ‘Nganasoma ebitabu, esyogazeti, kutse emyatsi okwa Intaneti ebihambire okwa by’obukumu? Kandi ibbwa emiziki eyanga hulikirira n’esyondegheka sye tivi esyanga lebaya, kutse emisathu y’esyovidiyo? Ebyanga yitsemesayamu bine mw’eby’obukumu? Mbwino muli ebindu nga ebitsokya, ebirimu, kutse ebithiki-thiki? Mbwino bikakanganaya emajiki, erilhogha, kutse erilhaghirira nga si biwithe kabi?’ Aliwe, si bugha indi eby’eriyitsemesya ebyosi ebirimo esyonganikyo n’ebithe byathabya byangabya bihambene n’obukumu. Wukalebya eby’eriyitsemesya byawu, ithwamu erisombolha ebyanga kuwathikya eribya haali okwa kyosi-kyosi ekikaponesaya Yehova. Thwanzire erilengaho eribya “n’obunyamuthima-thima bubuya” embere sya Nyamuhanga.​—Emib. 24:16. *

13. Ni kyahi ekya thwanzire ithwayihighulhako?

¹³ Yihighule okw’ikania okwa myatsi eyihambire okwa by’esyombinga. Erikwamana n’eki, thutholere ithwagherererya eky’erileberyako kya Yesu. (1 Pet. 2:21) Yesu athali asa okwa kihugho, abya ikere elhubulha, kandi abya inianasi bingyi ebihambire oku Sitani n’esyombinga. Aliwe isyali kanaya okwa bya emirimu  mibi eyo yabirikolha. Yesu abya anzire eribya mwema wa Yehova, butsira eribya oyukalhalhanaya ebya Sitani. Thwangana gherererya Yesu omw’ithendi lhalhania emyatsi eyihambire okwa syombinga. Aliwe, thukakanganaya omwa bya thukabugha ngoku thukasisimulhawa omwa ‘binywe bibuya ebikabya omo muthima’ wethu, ni bugha ambu, ekwenene.​—Esy. 45:1.

14-15. (a) Busana naki si thutholere thuk’ubaha emirimu mibi? (b) Ni bwema bwahi obukakanganaya ngoku Yehova anemutheya abandu biwe munabwire?

¹⁴ Isiwubaha emirimu mibi. Omwa kihugho ekithahikene kino, ebindu bibi byangana thubyako. Esyo aksidenti, amalhwere, kutse nibya n’olhuholho byanganasa kitsumbukirania. Aliwe sithutholere thukalengekania thuthi emirimu eyithelhangirawa y’eyamathukolya byoko. E Biblia yikabugha yithi “endambi n’ebikawa kitsumbukirania” byanganahika okwa buli mundu. (Omu. 9:11, NW) Yehova abirikangania ngoku awithe obuthoki bunene kutsibu kwilhaba esyombinga. Ng’eky’erileberyako, Nyamuhanga mwathalighira Sitani eritha Yobu. (Yobu 2:6) Omwa buthuku bwa Musa, Yehova mwakangania amaaka wiwe okwa bakumu be Misiri. (Eri. 8:18; 9:11) Busana n’obuthoki bwa Yehova, Yesu oyuwabya iniabirihamibwa mwakangania obuthoki bwiwe oku Sitani n’esyombinga akabaghusa okwa kihugho erilhua elhubulha. Kandi omwa buthuku obuthe bwahali, bakendi ghuswa omwa buhya, isibangathasya kolha okwa mundu wosi-wosi kw’akabi.​—Erib. 12:9; 20:2, 3.

¹⁵ Thuwithe obwema bunene obukakanganaya ngoku Yehova akatheghaya abandu biwe munabwire. Thalengekania oku kino: Thukathulira n’erikangirirya ekwenene omwa kihugho kyosi. (Mt. 28:19, 20) Omw’ikolha ekyo, thukabisulha emibiiri mibi ya Diabolo. Omo kwenene, Sitani kwabya iniangana thoka, iniakend’imania omubiiri wethu, aliwe syanga thoka. Neryo sithutholere thuk’ubaha emirimu mibi. Thunasi ngoku “ameso w’Omwami Mukulhu akalhaba-lhaba omwa kihugho kyosi eriyikangya mo w’amaaka busana n’ab’omuthima ahikene okw’iyo.” (2 Emy. 16:9) Thwamabya ithune bathaleghulha oku Yehova, esyombinga sisyanga thukolhako ekyanga lema Nyamuhanga erighunzaho.

16-17. Iha eky’erileberyako ekikakanganaya ngoku kikayithagha obuthubaha erirwanisya emirimu mibi.

¹⁶ Kikayithagha obuthubaha erirwanisya emirimu mibi, kutsibu-tsibu omughulhu abanywani kutse abahughu bakathuhakanisaya. Aliwe Yehova akatsumulha abakakanganaya obuthubaha ng’obo. Lengekanaya okwa ky’erileberyako kya mwali wethu ya Erica, oyuwikere e Ghana. Erica abya awithe emyaka 21 akaligha erigha e Biblia. Iyo ng’omwana w’omuthahwa w’ekibindi, iniatholere erisangira omwa mirwa ey’obukumu eyiri mw’erirya esyonyama esiryahererawa esyonyamuhanga sya thatha wiwe. Erica abere akaghana, ab’eka yabu mubakilhangira nga ni thendisikya esyonyamuhanga esyo. Ab’eka eyo mubalengekania bathi esyonyamuhanga sikendi basuyira omwa malhwere w’obwongo n’aw’omubiri.

¹⁷ Ab’eka ya Erica mubalengaho erimukaka erighondera emirwa eyo, aliwe mwaghana, nomwakine indi eki kyangalekire iniathibithwako. Abema ba Yehova muthina-muthina mubaligha er’ikalha nayu. Omwa nzira eyo, Yehova mwatsumulha Erica omw’imuha erihiika lihyaka​—abaramya balikyethu ababya babere baghalha babu na bali babu. (Mk. 10:29, 30) Nomwakine indi abahughu biwe mubamughana kandi nibya n’erihisya ebindu biwe, Erica mwasighalha muthaleghulha oku Yehova, amabatizibwa, nalino ni mutemburi w’omughulhu wosi. Syali ubaha esyombinga. Kandi busana n’eka yabu, Erica akabugha athi, “Ngasaba buli kiro indi ambi ab’eka yethu basyabana omughisa w’eriminya Yehova n’erithunga obwiranda obukasa busana n’erikolera Nyamuhanga w’olhwanzo.”

18. Ni mighisa yahi eyathukabana omw’iyikethera Yehova?

¹⁸ Si bugha indi ithwe bosi erikirirya lyethu likendi lengwako omwa nzira eyo. Aliwe, ithwe bosi thukayithagha eriyikethera Yehova n’erirwanisya emirimu mibi. Thwamakolha ekyo, ithukendi bana emighisa mingyi, kandi ithwayihighulha okw’ithebibwa omwa mabehi wa Sitani. Kandi, isithwendi lighira amabehi wa Sitani akathulemesya erikolera Yehova. Ekikulhu okwa byosi, ithukendi ghumya obunywani bwethu na Yehova. Omwigha Yakobo mwahandika athi: “Mwolhobe embere sya Nyamuhanga. Mulhwe na Sitani, nayu akendi syabasagha. Muyithunde hakuhi na Nyamuhanga, nayu akendi yithunda hakuhi nenyu.”​—Yak. 4:7, 8.