Busana naki Yesu iniakisiya iniaholha mwasuba omo binywe bya Dawudi ebiri omwa Esyonyimbo 22:1?

Ebighuma by’okwa binywe eby’erighunzerera ebyo Yesu abugha iniakisiya iniaholha by’ebiri omu Matayo 27:46 na Mariko 15:34: “Nyamuhanga waghe, Nyamuhanga waghe, busana naki wukanyisighanaya kwehi?” Omw’ibugha ebi, Yesu mwaberererya ebinywe by’omwimbi Dawudi ebiri omwa Esyonyimbo 22:1. Neryo ikikendibya ikiwire erighunzerera thuthi Yesu asuba omwa binywe ebi kundi abya iniabirihwa amani kutse kundi erikirirya liwe mulyakeha habw’akathuku kake. Yesu abya inianasi enzumwa eyikendileka iniaholha, kandi abya inianayitheghekire eriholha. (Mt. 16:21; 20:28) Kandi abya inianasi ngoku akendibya akayaholha, Yehova angayithaghire erimulhusya “kw’ekikunda” kutse olhughuthu lhw’erimutheya. (Yobu 1:10) Neryo Yehova mwaleka Yesu akanganaye ndeke-ndeke ngoku angasighere muthaleghulha nomwangaholire olhuholho olhuli lhuthi.​—Mk. 14:35, 36.

Neryo ni kyahi ekyaleka Yesu iniabugha ebinywe ebiri omo lhwimbo olhu? Sithwanga bugha thuthi enzumwa y’eno, aliwe thuthayirilebya esyonzumwa ndebe obundi esyangabya isy’esyaleka. *

Omw’isuba omo binywe ebi, mbwino Yesu abya iniakakanganaya athi Yehova syendi yira eky’akakolha okwa lhuholho lhwiwe? Yesu aby’atholere eriliha endongolya ahathe buwathikya bwa Yehova. Aby’atholere “eriholha busana n’abandu abosi.”​—Ebr. 2:9.

 Omw’isuba omo binywe bike by’olhwimbo olho, mbwino Yesu aby’anzire abandi ibalengekania okwa byosi ebiri omwa lhwimbo olho? Omwa biro ebyo, kyabya kya buli kiro Abayuda erihambira ebingyi ebiri omwa kitabu ky’esyonyimbo by’omwa muthwe. Ibakabya bamowa omulhondo mughuma w’omwa syonyimbo, ibakalhuaho ib’ibuka ebiri omwa lhwimbo olhwosi. Eki kyamabya iky’ekyabya omwa malengekania wa Yesu, neryo imwawathikya Abayuda ababya bakamukwama eryibuka amaminyereri mangyi awabya omwa lhwimbo olhu awahambire okwa lhuholho lhwiwe. (Esy. 22:7, 8, 15, 16, 18, 24) Kandi, emilhondo y’erighunzerera omwa lhwimbo olhu, yikapipa Yehova n’erimukaniako ng’Omwami okwa kihugho kyosi.​—Esy. 22:27-31.

Omw’isuba omo binywe bya Dawudi ebi, mbwino Yesu abya akakangania kw’athe kw’olhubanza? Yesu athali ithibwa, ab’omw’Ibuyiro babya ibabirimuthondesya n’eribugha bathi syali kw’olhubanza lhw’eritsuma Nyamuhanga. (Mt. 26:65, 66) Ab’omw’Ibuyiro mubalhuaho ib’ikalha omwakathi k’ekiro omo n’erikania okwa lhubanza olho isibathaghendera okwa bilhaghiro. (Mt. 26:59; Mk. 14:56-59) Omw’isuba omo binywe ebi n’eribibugha mwa kibulyo ekitheko erisubirya, Yesu angabya iniabya akakangania ngoku syathakolha kibi kandi ku sihali nzumwa eyangaleka in’ithibwa.

Mbwino kandi Yesu abya iniali kw’ibukya abandi ngoku nomwakine indi Dawudi, omuhandiki w’olhwimbo olhu, mwanalighirwa eriaghalhwa, mukithamanyisya kithi Yehova abya isyakilighire Dawudi? Ekibulyo kya Dawudi sikirimanyisaya kithi abya isyakiwithe erikirirya. Enyuma w’eribulya ekibulyo ekyo, mwalholha embere erikangania kw’ayikethere amaaka wa Yehova w’erilhamya, kandi Yehova mwalholha embere erimutsumulha. (Esy. 22:23, 24, 27) Kuthya, nomwakine indi Yesu, “Omughalha wa Dawudi,” abya inianemwaghalhwa okwa muthi w’amaghali, eki sikirimanyisaya kithi Yehova abya isyakimulighire.​—Mt. 21:9.

Mbwino omo binywe ebyo, Yesu abya iniakakanganaya kw’ali omwa bulighe bunene kundi Yehova abya w’erimulhusyako obutheya nuku akangaye obuthaleghulha bwiwe? Okw’itsuka sikyabya kighendererwa kya Yehova Mughalha wiwe eriaghalhwa n’eriholha. Ekyo mukyayithaghisibwa Adamu na Eva ibamabirikangania obuthowa. Yesu mwathakolha kibi, aliwe mwayithagha eriaghalhwa n’eriholha nuku asubiraye ebibulyo ebyo Sitani abya iniabirihanganiaho kuthya n’erihayo endongolya eriliha ekya Adamu aheraya. (Mk. 8:31; 1 Pet. 2:21-24) Eki kyangabererere Yehova inianalyaleka eritheya Yesu okwa buthuku obu lero omwa ngebe yiwe habw’akathambi kake.

Mbwino Yesu aby’akanza eriwathikya abakamukwama erighanirya okwa nzumwa eyamaleka Yehova iniamulighira eriholha omwa mibere eyi? * Yesu abya inianasi ngoku olhuholho olhuli ng’olhu olhw’erikwa ng’engoli y’ebibi okwa muthi w’amaghali lhwanga ponesirye abangyi. (1 Kor. 1:23) Abakamukwama ku baghanirya okwa kyamaleka iniaholha, bangaminyire ekya lhuholho olho lhukamanyisaya. (Gal. 3:13, 14) Neryo bangamulhangire ng’Omulhamya butsira ng’engoli y’ebibi.

Mbulha ni nzumwa yahi eyaleka Yesu iniasuba omo binywe ebi, mwaminya ngoku ebyo alhabamo abya iniakakolha erisonda lya Yehova. Buthuku buke alisubire omo binywe ebiri omwa lhwimbo olhu, Yesu mwabugha athi: “Byamahwa!” (Yn. 19:30; Lk. 22:37) Kwesi, Yehova erileka eritheya Yesu ahabw’akathuku kake, mukyaleka Yesu iniaberererya ndeke ebyosi ebyaleka iniathumwa okwa kihugho. Kandi mukyaleka iniaberererya ebyosi ebyabya bimuhambireko ebiri “omwa mighambo ya Musa n’ebitabu by’abaminyereri n’omwa syonyimbo.”​—Lk. 24:44.