1-2. Kyanga thokekana kithi erikwama olhughobe lhwa Yesu? Iha eky’erileberyako.

THATHERA akasasani iwune omwa gurupu y’abandu imunemulhaba omwa musithu munene kutsibu. Omusondoli oyuwasigho ndeke anemubasondolha. Anemughenda, ebisandu biwe ibyaghenda bikasighalha enyuma. Endambi iyahika imwabya isimwanga thasyamulhangira! Aliwe imwabya isimukwire buba. Omwakanya k’ekyo, iwe n’abandi imwatholya ebisandu biwe!

² Nethu ng’Abakristayo ab’okwenene, thuli nga bakaghenda omo musithu munene oyu​—ekihugho kibi kino. Eky’obutseme, Yehova abirithuha Omusondoli oyuhikene​—Mughalha wiwe Yesu Kristo, oyo wabirithusighira olhughobe olho thwanga kwama. (1 Pet. 2:21) Hano Petero akalinganisaya Yesu ng’omusondoli. Ng’omusondoli oyuli omwa ky’erileberyako ekiri ahighulhu, Yesu abirithusighira olhughobe olho thwanga kwama. Thulebaye ebibulyo bisathu ebihambire okw’eki: Kikamanyisayaki erikwama olhughobe lhwa Yesu? Busana naki ithwalhukwama? Thwanga lhukwama thuthi?

3. Kikamanyisayaki erikwama olhughobe lhw’omundu?

³ Kikamanyisayaki erikwama olhughobe lhw’omundu? Omo Biblia, ekinywe “erilendera” na “ebisandu” hakanayira ibyamanyisya ebyo mundu akakolha omo ngebe yiwe. (Enz. 6:9; Emi. 4:26) Eky’erileberyako ekyo mundu akahiraho kyangana linganisibwa n’olhughobe, kutse ebisandu ebyo akasigha enyuma anemughenda. Neryo erikwama olhughobe lhw’omundu kikamanyisaya erikwama eky’erileberyako kiwe, ni bugha ambu erimugherererya.

4. Kikamanyisayaki erikwama olhughobe lhwa Yesu?

⁴ Neryo kwesi, kikamanyisayaki erikwama olhughobe lhwa  Yesu? Omo bikuhi, kikamanyisaya erigherererya eky’erileberyako kiwe. Omw’isako erihirikirire omwatsi wethu, omukwenda Petero kutsibu-tsibu akakanaya okwa ky’erileberyako ekyuwene kya Yesu eky’eriyiyinia akaghalhwa; aliwe, hane esindi nzira nyingyi esyo thwanga gherereryamu Yesu. (1 Pet. 2:18-25) Omo kwenene, engebe ya Yesu eyosi​—ebyosi ebyo abugha n’erikolha​—ni ky’erileberyako ekyo thwanga kwama.

5. Abandu abathahikene kwenene ibanakwama eky’erileberyako kya Yesu ekihikene? Soborera.

⁵ Ithwe bandu abathahikene, kwenene ithwanakwama eky’erileberyako kya Yesu? Ee. Wibuke, sithwangathoka erikwama olhughobe lhwa Yesu kikumi okwa kikumi. Aliwe thwamalengaho ngoku thwanga thoka, ithwe ng’abandu abathahikene, ithukendibya ithwamaghendera okwa binywe by’omukwenda Yoane bino: “Lendera ngoku Kristo alendera.”​—1 Yn. 2:6.

6-7. Busana naki ithwabugha thuthi erikwama olhughobe lhwa Yesu kikendi thuthunda hakuhi na Yehova?

⁶ Erikwama olhughobe lhwa Yesu kikendi thuthunda hakuhi na Yehova. Busana naki ithwabugha thuthya? Eky’erimbere, Yesu mwathuhiriraho eky’erileberyako ekyuwene ngoku thwangabya omo ngebe eyikatsemesaya Nyamuhanga. (Yn. 8:29) Neryo omw’ikwama olhughobe lhwa Yesu thukatsemesaya Yehova. Kandi thwangana yikethera ngoku Thatha wethu w’elhubulha akendi yithunda hakuhi n’abakalengaho kutsibu eribya banywani biwe.​—Yak. 4:8.

⁷ Ekyakabiri, Yesu mwagherererya Thatha wiwe ndeke-ndeke. Ky’ekyaleka Yesu iniabya iniangana bugha athi: “Oyo wamanyilhangira iniabirilhangira Thatha.” (Yn. 14:9) Thukabya thukagherererya emibere ya Yesu n’emibere athwaliramu abandi​—ng’eky’erileberyako, akakwira omuhagha y’obulighe, akatsomana  omukali oyuwabya alhwere obulhwere obukalire, akakwira ababya ibabiriholerwa b’obulighe​—nethu thukabya ithwamagherererya Yehova. (Mk. 1:40, 41; 5:25-34; Yn. 11:33-35) Thukabya thukongera erigherererya Yehova, kwa thukanongera thuthya eriyithunda hakuhi nayu.

8. Soborera ekikaleka erikwama olhughobe lhwa Yesu ikyathuwathikya erikinda ekihugho.

⁸ Erikwama olhughobe lhwa Yesu kikaleka ekihugho kibi kino ikithathulengemerya. Omw’ithumbi liwe ery’erighunzerera okwa kihugho, Yesu mwabugha athi: “Nabirikinda ekihugho.” (Yn. 16:33) Amanyisaya athi abirighana erighendera okwa malengekania, ebilhubirirwa, n’emikolere y’ekihugho kino. Yesu mwathibirirwa enzumwa eyaleka iniathumwa okwa kihugho​—eriyira erina lya Yehova mwa libuyirire. Kandi ibbwa ithwe? Omo kihugho kino, muli bindu bingyi ebyanga thulengemerya. Aliwe nethu nga Yesu, thwamahira amalengekania w’okw’ikolha erisonda lya Yehova, nethu ithukendi kinda ekihugho kino.​—1 Yn. 5:5.

9. Thutholere ithwakolhaki eribya ithune omo nzira eyikakolhaya oko ngebe y’erikotha?

⁹ Erikwama olhughobe lhwa Yesu kikakolhaya oko ngebe y’erikotha. Omulhwana w’ebindu abere akabulya ng’angakolhaki eribana engebe y’erikotha, Yesu mwamusubirya athi: “Wase wunyikwame.” (Mt. 19:16-21) Oko bandi Bayuda abaghana erikirirya ngoku Yesu ya Kristo, Yesu mwababwira athi: “Esyombuli syaghe . . . sikanyikwama. Naghe ngahasyo engebe y’erikotha.” (Yn. 10:24-29) Oku Nikodemo, omughuma w’okwa b’omw’Ibughiro oyuwanza eriminya bingyi okwa syongangirirya sya Yesu, Yesu mwabugha athi ‘abakamwikiriraya’ bakendisyabya “n’engebe y’erikotha.” (Yn. 3:16) Thukikiriraya Yesu omw’ighendera okwa by’abugha n’erikolha akakangirirya. Thwamakolha ekyo, ithukendibya ithune omo nzira eyikakolhaya oko ngebe y’erikotha.​—Mt. 7:14.

10. “Eriminya” Yesu ya ndeke mwamuliki? (Yoane 17:3)

¹⁰ Thutholere ithwatsuka eriminya Yesu imuthwathoka erikwama olhughobe lhwiwe. (Soma Yoane 17:3.) “Eriminya” Yesu ni kindu ekya thutholere ithwalholha embere erikolha. Thutholere ithwamuminya ndeke​—erigha okwa mibere yiwe, amalengekania wiwe, n’eby’akaghenderako. Mbulha thwamaghunza omo kwenene mwa buthuku bungahi, thutholere ithwalholha embere eriminya Yehova na Mughalha wiwe.

11. Ebitabu bbini by’Enjiri muliki?

¹¹ Erithuwathikya eriminya Mughalha wiwe, omo lhwanzo, Yehova mwahira ebitabu bbini by’Enjiri omwa Kinywe kiwe. Ebitabu by’Enjiri ebi muli ebihambire oko ngebe ya Yesu n’omubiiri wiwe w’erithulira. Ebitabu ebi bikathubwira okwa bya Yesu abugha, ibyathukangania eby’akolha, n’erithubisulira eriyowa liwe. Ebitabu bbini ebi bikathuwathikaya erighanirya  ndeke okwa ky’erileberyako kya Yesu. (Ebr. 12:3) Ni bugha ambu, muli olhughobe olho Yesu asigha. Neryo omw’igha ebitabu by’Enjiri ebi, thwangana minya Yesu ya ndeke-ndeke. Busana n’ekyo, thwangana kwama olhughobe lhwiwe.

12. Thwanga ghasirwa thuthi ndeke omwa bitabu by’Enjiri?

¹² Erithoka erighasirwa ndeke omo bitabu by’Enjiri, sithutholere thukasubulira okw’ibisoma lisa. Thutholere ithwahiraho obuthuku obw’eribigha ndeke n’eribighaniryako buuli. (Thasyalebaya na Yosua 1:8.) Thukanaye okwa bindu bibiri ebyanga thuwathikya erighanirya okwa bitabu by’Enjiri ebi n’erighendera okwa bya thukasomamu.

13. Wanga kolhaki eribya nga wunalhangire emyatsi eyiri omwa bitabu by’Enjiri yikabya?

¹³ Eky’erimbere, ibya nga wunalhangire ebiri omwa bitabu by’Enjiri bikabya. Kolesaya amaaka wawu w’erighanirya eribya nga wunalhangire, eriowa, n’eribya nga wanabyaho bikabya. Erikuwathikya erikolha ekyo, sekulhaya omwa bitabu ebya ekithunga kya Yehova kikathuha. Minya omwatsi owosi, ni bugha ambu, ebya tsuka eribya n’ebyakwamako. Sondaya eyindi myatsi eyikasoborera emyatsi eyihambire oko bandu n’emibere eyo babyamo. Lebaya omwatsi owawuk’igha omwa Njiri nguma ng’ahambene athi n’owali omwa yindi Njiri. Hakanayira omughuma w’okwa bahandiki by’Enjiri iniathondogholha ebindi ebyangaleka iwayitheghererya ndeke n’owundi iniabisigha.

14-15. Thwanga kolhaki erithoka erighendera oko myatsi eyiri omwa bitabu by’Enjiri?

¹⁴ Ekyakabiri, ghendera okwa myatsi eyiri omwa bitabu by’Enjiri. (Yn. 13:17) Neryo wukendibya wabiriyeghesya ndeke ebiri omwa Njiri, yibulhaye: ‘Mbwino omo mwatsi oyu mune erisomo eryo nanga ghenderako omo ngebe yaghe? Nanga kolesya indi omwatsi oyu eriwathikya abandi?’ Lengaho erilengekania okwa mundu mulebe, neryo okwa buthuku obutholere, omo lhwanzo n’omwa menge iwamubwira okwa bya wam’igha.

 ¹⁵ Thulebaye eky’erileberyako ngoku thwanga kolesya ebindu bibiri ebi. Thukendi lebya omwatsi owahambire okwa mukwakali omwera oyo Yesu alhangira omwa hekalu.

16. Soborera ebyabya ebiri omu Mariko 12:41.

¹⁶ Ibya nga wunalhangire bikabya. (Soma Mariko 12:41.) Thera akasasani k’ebyabya. Ni Nisani 11, 33 E.K.​—ihakisiya biro bike Yesu iniaholha. Hakuhi ekiro kyosi kyamabirihwa Yesu iniane mukangirirya omo hekalu. Abakulhu b’edini balhue ibanemumuhakanisya. Ahanyumaho, abaghuma b’okw’ibo balhue ibabirithika-thikira obuthoki bwiwe. Abandi bamamubulya ebibulyo ebyo bakalengekania bathi syendi thoka erisubirya. (Mk. 11:27-33; 12:13-34) Neryo Yesu iniane omo hekalu, akalhua aho alhue imene, neryo amaseghera ahandi. Aho​—obundi omo mwanya owakahulhawamo Ekibugha ky’Abakali​—akabya iniangana lhangira ehisanduku ehy’erihiramo esyosente ehiri okwa na lhuhimbo lhw’ekibugha. Akikalha ahisi n’eritsuka erisamalira ngoku abandu bakathoghongeraya omo hisanduko ehyo. Akalhangira abagaga bangyi bakathogheryamo ebinusu bingyi. Obundi syali hali kutsibu okwa hisanduku neryo anowire ebinusu bikabughanganako.

17. Omukwakali omwera oyukanibweko omu Mariko 12:42 mwakolhaki?

¹⁷ Soma Mariko 12:42. Enyuma w’akathambi kake, Yesu akalhangira omukali. Ini mukwakali kandi mwera. (Lk. 21:2) Engebe yimukalire kutsibu; obundi kimukalire eribana n’ebiyithawa biwe. Aliwe, akaghenda ahali akaghuma k’okwa hisanduko kandi omo bubiso-biso akathogherayamo ehinusu hibiri hike-hike, obundi sihiri bughanganako hikathoghera omwa kasanduko. Yesu akaminya ebyo amathogheryamu​—esyolepta ibiri, ehinusu ehike-hike ehyabya hikakolesibwa oko buthuku obo. Esyosente esyo sisyangaghulha n’ekiswiri kighuma, akanyonyi kake ak’erirya akabya k’ebbeyi nyike kutsibu.

18. Ngoku kiri omu Mariko 12:43, 44, Yesu mwabugha athiki okwa bya omukwakali ahayo?

¹⁸ Soma Mariko 12:43, 44. Yesu akatsemera omukwakali oyu. Neryo akabirikira abigha biwe n’eribakangya omukwakali n’eribugha athi: “Omukwakali oyu amahira . . . mo bingyi kwilhaba bandi bosi.” Neryo akasoborera athi: “Abandi [kwilhabirirya abaghuda] bosi mubakahiramo busana n’ebindu byabu bingyi, nikwa iyo omo bwera bwiwe mwakahiramo ebyosi awithe, mwakaha ebyosi alhue awithe ebyo angalire.” Omukwakali muthaleghulha oyu abere akahayo akasente akosi ako aby’awitheko, abya iniamahira engebe yiwe omo byalha bya Yehova.​—Esy. 26:3.

19. N’isomo lyahi likulhu eryo thuk’igha omo binywe bya Yesu ebihambire oko mukwakali omwera?

¹⁹ Ghendera oko mwatsi oyu omo ngebe yawu. Yibulhaye, ‘N’isomo lyahi eryo nang’igha omo binywe bya Yesu ebihambire oko mukwakali omwera?’ Thalengekania okwa mukwakali oyo. Ahathe erithika-thika, abya iniananzire eriha Yehova ya bingyi. Aliwe, mwakolha ekyo angathoka; mwaha Yehova ekyosi eky’awitheko n’omuthima wosi. Kandi Yesu mwaminya ngoku ebya mukwakali ahayo byabya by’obughuli embere sya Thatha wiwe. Hano, thuk’ighaho erisomo likulhu: Yehova akatsemera ekyosi-kyosi ekya thwanga thoka​—erimukolera erilhua oko muthima kandi n’omuthima wethu wosi. (Mt. 22:37; Kol. 3:23) Yehova akatsema akalhangira thukamukolera ngoku thwanga thoka! Omusingyi oyo akahamba okwa buthuku n’akaghalha ebya thukahiraho omw’iramya lyethu, imwamune n’omubiiri w’erithulira n’emihindano.

20. Wanga ghendera wuthi okw’isomo eriri omo mwatsi owahambire okwa mukwakali? Iha eky’erileberyako.

 ²⁰ Wanga ghendera wuthi okw’isomo eriri omo mwatsi owahambire oko mukwakali? Lengaho erilengekania okwa bandu balebe abanga yithagha erighumibwa ngoku akaghalha ako bakahiraho kakatsemesaya Yehova. Ng’eky’erileberyako, mbwino wunasi mwali wethu oyukulire omo myaka oyukayowa nabi kutse eriyowa nga syawithe mughaso busana n’eribya isyakiwithe amaghalha kutse akaghalha ak’erithulira ngoku abya akakolha kera? Kutse wangana lengekania oku mughalha wethu oyuwithe obulhwere obukalhuma kandi obuthelhama oyuwabirihwa amani busana n’eribya isyakighenda okwa buli mihindano? Wathikaya abandu ng’abo omw’ibabwira ebinywe bibuya ebikahimba. (Efe. 4:29) Babwire okw’isomo erikahimba eryo wam’igha omo mwatsi owahambire oko mukwakali omwera. Ebinywe byawu ebikahimba byangana bakakasya ngoku Yehova akatsema thukamuha ekyosi-kyosi erilhua okwa muthima. (Emi. 15:23; 1 Tes. 5:11) Wamasima abandi busana n’eriha Yehova ekya bangathoka erilhua okwa muthima​—nomukyangabya kike​—wukabya iwamakwama olhughobe lhwa Yesu.

21. Wamathwamu erikolhaki?

²¹ Thukasima kutsibu busana n’emyatsi eyiri omwa bitabu by’Enjiri eyikakanaya bingyi okwa bihambire okwa ngebe ya Yesu, eyikathuthokesaya erimugherererya, n’erikwama olhughobe lhwiwe! Omw’iyeghesya lyawu kutse omw’Iramya ly’Eka, busana naki iwuthayeghesya emyatsi eyiri omo bitabu by’Enjiri? Ambi ithwibuka ngoku erithoka erighasirwa ndeke omw’iyeghesya ng’eryo, thutholere ithwabya nga thunalhangire emyatsi yikabya n’erighendera kuyo omo ngebe yethu. Eryongera okw’igherererya ebya Yesu akolha, thutholere ithwahulikirira eby’abugha. Omo mwatsi owakakwamako, thukendi syaminya ebya thwang’igha omo binywe bya Yesu eby’erighunzerera iniane okwa kihugho.