Eky’obulighe, nabere ingahika omwa myaka y’obulengwa, obughuma bwaghe na Yehova mubwatsuka erikeha. Abangasoma nabu ibakabya ngabawithe obwiranda bunene, neryo munayighomba obwiranda obo. Munayowa ebilhaghiro bya babuthi n’ebihano by’Ekikristayo nga ni muheke, n’emibiiri y’obunyakirimu nga yikalire. Nomwakine indi isindithika-thikira eribyaho lya Yehova, munatsuka eriyowa isingakimene ndeke bunyakirimu.

Kandi ibbwa, mundanza erisebebera, neryo munabya ingane muthulira ighuma-ghuma. Iningabya ingaghenda omw’ithulira, iningabya isingayitheghekire, neryo ikikanyikalira eritsuka omukania kutse erilholha embere nagho. Ekyo mukyaleka erithulira lyaghe iryabya ly’ewetse-wetse n’etseme yamabulha, ekindu ekyaleka in’ongera eripona erithulira. Iningayibulhaya, ‘Omundu angathoka athi erithulira ewiki omwa yindi, n’okwezi omwa kundi?’

Nabere nahikya emyaka 17, munanza eriyisondolha. Neryo munathwamu eriboha ebyaghe, namayilhuira eka, namaghenda e Australia. Ababuthi baghe mubayowa nabi bakalhangira ingaghenda. Mubayibulha-bulha, aliwe ibanemulengekania  bathi ngendi lholha embere n’endegheka yaghe y’obunyakirimu.

E Australia, mun’ongera erisebebera bunyakirimu. Munatsuka eribya ingabulha okwa mihindano. Munanywana abalere, nabu ng’ingye, ibakabya ibanemughenda okwa mihindano kandi ibanemuyanywa obwabu n’eriyahotholera omwa syodisiko. Ngabya ingasubya ameso w’enyuma, ngalhangira ngoku ekisandu kighuma kyabya omo kwenene n’ekindi omo kihugho, aliwe omo kwenene isindiyowa indi nganawithe aho ngali.

Enyuma w’emyaka ng’ibiri, munabana dada mughuma oyo wathaminya kw’amabirileka ingatsuka erilengekania okwa ngebe yaghe nga yikalholhahi. Thwabya badada bathano abahuru omwa nyumba nguma, neryo muthwakokya omulebererya w’omuthimbo na mukali wiwe ya Tamara, eribya nethu habw’ewiki nguma. Mwira wiwe iniakabya inianemukolha okwa emyatsi y’ekithunga, Tamara nayu inianemusatha nethu n’eriseka haghuma nethu. Ekyo, mukyanyitsemesya. Iniatsomene abandu kandi ikyolhobire erikania nayu. Munasweka ingalhangira omundu w’obunyakirimu bungaha akabya iniangana tsanga nethu.

Tamara iniawithe omuhwa munene. Olhwanzo olho abya awithire ekwenene n’omubiiri w’erithulira ilhukasighalira abandi. Ikikamutsemesaya erikolera Yehova n’omuthima wosi, aliwe ingye isingatsemire habw’erikolha bike omwa mubiiri wa Yehova. Emibere yiwe n’etseme yiwe y’okwenene mubyanyihambako kutsibu. Eky’erileberyako kiwe mukyanyibukya ekwenene ngulhu eno: Yehova anzire ithwe bosi ithwamukolera “n’eriyisyandira” kandi “n’obutseme.”—Esy. 100:2.

Munanza etseme eyiri ng’eya Tamara, aliwe eribana etseme eyo, mukyanyiyithaghisya erikolha ndeke esyombinduka. Mukyathwalha buthuku, aliwe erighunzerera munatsuka lyolho-lyolho. Munatsuka eribya ingayitheghekera erithulira, n’eribya inganemukolha obutemburi bw’obuwathikya. Eki mukyanyighunza mw’obuba kandi nam’ongera erisika. Nabere nganemw’ongera erikolesya e Biblia  omw’ithulira, n’etseme yaghe y’erithulira ku yan’ongera yithya. Buthuku buke-buke, namatsuka erikolha obutemburi bw’obuwathikya obuli kwezi.

Munatsuka erinywana ab’olhulengo lhwosi ab’imene ndeke omo kwenene kandi abakatsemera erikolera Yehova. Eky’erileberyako kyabu ekyuwene mukyanyiwathikya erithasyalebya ebilhubirirwa byaghe n’eribya n’endegheka eyuwene ey’obunyakirimu. Munatsuka eritsemera kutsibu omubiiri w’erithulira, n’erighunzerera munatsuka erikolha ng’omutemburi w’omughulhu wosi. Omo myaka yosi eyo, nimonabya ngathekene n’eritsema n’eriyowa buholho omwa kithunga.

Enyuma w’omwaka mughuma, munabana Alex, omundu w’olhukeri, oyuli mw’okwenene, kandi oyuwanzire Yehova n’omubiiri w’erithulira. Abya inianemukolha ng’omughombe muwathikya kandi iniamabirighunza myaka mukagha inianemukolha obutemburi. Kandi Alex abya inianakolere ahali obuyithawa e Malawi habw’obuthuku bulebe. Eyo mwakolha n’abamisyonare abamubera ky’erileberyako ekyuwene kandi abalholha embere erimuhira mw’omuhwa w’erihira emyatsi y’Obwami y’embere.

Omo 2003, munaherukira Alex, kandi eritsukana naho thwabirilholha embere omo mubiiri w’omughulhu wosi. Thwabirigha bindu bingyi ebyuwene, kandi Yehova abirithutsumulha omo nzira nyingyi.

Omo 2009, muthwathumwa ng’abamisyonare e Timor-Leste, akahugho kake k’okwa bizinga bye Indonesia. Muthwasweka, thwamatsema, aliwe kandi ithunemuyibulha-bulha. Enyuma w’amezi athano, muthwahika e Dili omuyi mukulhu w’eyo.

Erihuma eryo mulyathuyithaghisya erikolha esyombinduka. Muthwabya b’eribeghera ekalikya mbyaka, omubughe, ebyalya, n’emibere y’engebe. Omw’ithulira mw’eyo, ithukasangayo ababirihambwako  nabi busana n’obunakwa bunene, eby’esukuru erighana, n’erinubibwa. Kandi muthwabana abangyi ababiribana ebitsibu by’ekinyamubiri n’omw’iyowa busana n’esyonyuhi n’eby’obwithi. *

Omubiiri w’erithulira iniuwene kutsibu! Ng’eky’erileberyako, kiro kighuma muthwabana omusika ow’emyaka 13 oyuli omwa bulighe oyukahulhawamo Maria. * Habya ihamathalhaba myaka mike mama wiwe aliholire, kandi isyalilholha oku thatha wiwe kwa lhuba-lhuba. Ng’abandi baana b’olhulengo lhwiwe, Maria nayu isyasi eky’angakolha omo ngebe yiwe. Ng’ibuka kiro kighuma akambwira eriyowa liwe inianemulira. Aliwe, mwindayitheghererya ndeke ebyo kabugha kundi nabya isindinaminya ndeke omubughe wiwe. Munasaba Yehova indi angwathikaye ngamuhumulikanaye, neryo munatsuka erimusomera amasako awakamusubaya omuthima w’omo nda. Enyuma w’emyaka mike, munalhangira ngoku ekwenene yirikuhindulha emibere, emyambalire, n’engebe yiwe. Mwabatizibwa kandi lino awithe abigha biwe be Biblia abo ak’eghesaya. Munabwire, Maria awithe eka nene y’obunyakirimu kandi akayowa inianzibirwe.

Yehova anemutsumulha omubiiri w’erithulira e Timor-Leste. Nomwakine indi hamathalhaba myaka ikumi misa abangyi b’okwa bathuliri balibatizibirwe, abangyi bakakolha ng’abatemburi, abaghombe abawathikya, kutse abasyakulhu. Abandi bakakolera okwa ofisi y’erihinduliramo n’eriwathikya omw’ihulhukya ebyalya by’obunyakirimu omwa mibughe yeyo. Kikanyitsemesaya ingalhangira bakimba okwa mihindano, ibanasenyenyirye, n’erilhangira erikulha-kulhana lyabu ly’obunyakirimu.

Engebe ye Timor-Leste yabya mbaghane kutsibu oko ye Australia, aliwe ini ngebe ey’etseme nene. Ihakanayira ibathusoka omwa bbasi eyiswire mw’abandu imune n’ebikwara n’ebindi bindu by’erirya ebyo bakiha omwa kathali. Okwa bindi biro, ithukanasondolha omwigha we Biblia omwa kanyumba kake akali mw’ekihuhania kandi akalimo kithuthu n’oburofu n’esyongoko isinemulhaba-lhaba. Nomuthwanabana ebyosi ebyo, iningabya inganemuyibwira indi, ‘Engebe eno yikatsemesaya!’

Ngabya ingasubya ameso w’enyuma, ngasima ababuthi baghe eribya imubakolha ekyosi-kyosi ekyo bangathoka erinyikangirirya oku Yehova n’erinyiwathikya, nibya n’omwa bulengwa bwaghe obukalire. Emisyo 22:6 habirinyiberererako. Mama na Thatha bakathuyisyethera ingye na Alex; bakatsema bakalhangira ngoku Yehova anemuthukolesya. Eritsuka 2016 thunemukolha ng’abalebererya b’omuthimbo omwa bulhambu bw’ekyaghanda kye Australasia.

Kikalire eriligha ngoku buthuku bulebe enyuma munanabya isinganzire omubiiri w’erithulira. Lino nganzire omubiiri w’erithulira! Ngabiriminya ngoku omwa ngebe nomumwangabya ameruka n’amandaghalha, etseme y’ekwenene yikasa omw’ikolera Nyamuhanga n’omuthima wosi. Omo kwenene, emyaka 18 eyathwamabirighunza ingye na Alex ithunemukolera Yehova y’emyaka eyikanyitsemesaya kutsibu omo ngebe yaghe. Lino ngayitheghereraya okwenene kw’eby’omuhandiki w’esyonyimbo Dawudi abwira Yehova: “Abosi abakakusaghirako batseme, bayitsangure ebiro byosi. . . . Kandi abakakwanza basyakutsemerako.”—Esy. 5:11.