1. Ni byahi ebya Yehova akalhangira omwa bandu biwe?

YEHOVA NYAMUHANGA “akatsemera abandu biwe.” (Esy. 149:4) Eki ka kikathutsemesaya kutsibu! Yehova akalhangira emibere yethu mibuya; akalhangira ngoku thwanganabya bandu babuya, kandi ngoku thwangana yithunda okw’iyo. Thwamasighalha bathaleghulha okw’iyo, nayu iniakendi yithunda okw’ithwe kera na kera!​—Yn. 6:44.

2. Busana naki abandi kikabakalira eriligha ngoku Yehova abanzire?

² Abandi ibangana bugha bathi, ‘Nganasi ngoku Yehova anzire abandu biwe ng’egurupu, aliwe nangakakasya indi ngoku naghe ahabwaghe akanyilhangira mwa w’obughuli?’ Ni kyahi ekyangaleka omundu iniabulya ekibulyo ekyo? Oksana, * oyuwabana ebitsibu iniakine mulere akabugha athi: “Munatsema kutsibu ingabatizibwa kandi ingatsuka obutemburi. Aliwe enyuma w’emyaka 15, munayowa nabi kutsibu busana n’ebya nyibyako kera. Munaghunzerera indi Yehova syakinyanzire kandi singakitholere olhwanzo lhwiwe.” Yua, mwali wethu omutemburi nayo oyuwabana ebitsibu iniakine mulere akabugha athi: “Munayihayo oku Yehova kundi ngabya nganzire erimutsemesya. Aliwe ingakyasi indi syanganyanza nahake.”

3. Omo mwatsi ono thukendikania okuki?

³ Ng’abali bethu abathaleghulha abothwamabirikaniako, nawu wanzire Yehova ya kutsibu aliwe kandi iwabya iwangana thika-thikira olhwanzo olho akuwithire. Busana naki wutholere iwaligha ngoku kwenene akutsomene? Kandi ni byahi ebyanga kuwathikya wukalengekania wuthi Yehova syakwanzire? Thulebaye eby’erisubirya okwa bibulyo ebi.

4. Busana naki ni ky’akabi erithika-thikira olhwanzo olhwa Yehova athuwithire?

⁴ Olhwanzo lhuwithe amaaka manene. Thwamabya ithunalighire ngoku Yehova athwanzire kandi kw’akathuwathikaya, ithukendibya n’omuhwa w’erimukolera n’omuthima wosi nomuhangabya ebitsibu. Aliwe, thwamathika-thikira olhwanzo olho Nyamuhanga athuwithire, ‘amaaka wethu iniakendi keha.’ (Emi. 24:10, NWT) Kandi thwamahwa amani n’eriyowa Nyamuhanga nga syathwanzire, ithukendi lemwa erighana ebithegho bya Sitani.​—Efe. 6:16.

5. Erithika-thikira olhwanzo lhwa Nyamuhanga kyabirihamba kithi okwa bandi?

⁵ Abandi Bakristayo abathaleghulha ab’omwa buthuku bwethu babiritseka bunyakirimu busana n’erithika-thika. Omusyakulhu w’ekithunga oyukahulhawamo James akabugha athi: “Nomwakine indi nabya ingakolera okwa Beteli n’omwa kithunga ekikakolesaya owundi mubughe, iningabulha kwenene Yehova ng’anemuligha ebyo ngamukolera. Buthuku bughuma munanayibulya Yehova ng’akanahulikirira emisabe yaghe.” Eva, nayu oyuli omwa mubiiri w’omughulhu wosi akabugha athi: “Munaminya ngoku erithika-thikira olhwanzo lhwa Yehova ni ky’akabi kundi erikolha ekyo kyangana hamba nabi okwa byosi wukakolera Yehova. Eki kikahamba okwa muhwa owawuwithire emyatsi y’obunyakirimu n’erikughunzako etseme ey’erikolera Yehova.” Michael, omutemburi w’omughulhu wosi kandi musyakulhu w’ekithunga akabugha athi: “Wamathendi ligha ngoku Nyamuhanga akwanzire iwukendi yisununulha okw’iyo.”

6. Thutholere ithwakolhaki thwamatsuka erithika-thikira olhwanzo lhwa Nyamuhanga?

⁶ Ebyalholirweko ebi bikakanganaya ngoku eriyowa Yehova nga syathwanzire kyangana tsandya kutsibu obunyakirimu bwethu. Aliwe thwanga kolhaki thwamatsuka erithika-thikira olhwanzo olho Nyamuhanga athuwithire? Thutholere ithwayihalyomo aho n’aho! Saba Yehova akuwathikaye erisubya omwa mwanya w’amalengekania awathatholere ‘mw’obuholho bwa Nyamuhanga obukatheghaya omuthima n’amaghanirya wawu.’ (Esy. 139:23; Fil. 4:6, 7) Kandi wibuke, siwe musa. Abandi balikyethu abathaleghulha banemurwanisya amalengekania awathatholere. Nibya n’abaghombe ba Yehova abakera mubanarwanisya amalengekania ng’ayo. Thalengekania okwa bya thwang’ighira okwa ky’erileberyako ky’omukwenda Paulo.

7. Ni bitsibu byahi ebya Paulo abana?

⁷ Mbwino nawu hakanayira iwayowa iwabirilithoherwa busana n’esyongwamirwa nyingyi, erilemwa eriberererya esyosi? Kyamabya ikwakiri kithya, iwukendi yitheghererya Paulo. Mwahangya-hangya busana n’ebithunga ebyosi. (2 Kor. 11:23-28) Wunawithe amalhwere awathelhama awakakughunzako etseme? Paulo mwabana endwalha y’omubiri eyithelhama, kandi mwayibulha-bulha kundi aby’anzire inialhama. (2 Kor. 12:7-10) Ebisobyo byawu bikanaleka iwahwa amani? Ihakanayira Paulo nayu iniayowa athya. Mwayahulhamo “mundu w’obulighe” kundi iniakabera amalhwa, erirwanisya obuthahikana bwiwe.​—Abar. 7:21-24.

8. Ni byahi ebya wathikaya Paulo erighumira ebitsibu biwe?

⁸ Nomwakine indi Paulo mwabana ebitsibu muthina-muthina n’eribya omwa mibere eyikaghunza amani, mwalholha embere erikolera Yehova. Ni kyahi ekyamuthokesaya erikolha ekyo? Nomwakine indi abya inianasi erilemererwa liwe, aby’awithe erikirirya linene omwa ndongolya. Abya inianasi ngoku Yesu abirilhaghanisya athi ‘oyukamwikiriraya abye n’engebe y’erikotha.’ (Yn. 3:16; Abar. 6:23) Ahathe erithika-thika, Paulo abya mughuma w’okwa babya bikirirye omwa ndongolya. Aby’alighire ndeke-ndeke ngoku Yehova anayitheghekire erighanyira nibya n’ababirikolha amalholho awakalire bamayisubamo.​—Esy. 86:5.

9. Ebinywe bya Paulo ebiri omwa Abanya Galatia 2:20 bikathweghesayaki?

⁹ Kandi Paulo aby’ikirirye omo maaka w’olhwanzo lhwa Nyamuhanga olhwakanganibawa erilhabira omu Kristo. (Soma Abanya Galatia 2:20.) Thalebya ebinywe ebikahumulikanaya ebiri okw’ighunzerera ly’omulhondo oyo. Paulo mwabugha athi: ‘Omughalha wa Nyamuhanga, mwanyanza, n’eriyiha busana naghe.’ Paulo mwathathika-thikira olhwanzo lhwa Nyamuhanga, eribya ng’oyukabugha athi, ‘Nanganalhangira ekikaleka Yehova inianza balikyethu, aliwe ingye sindi lengekanaya indi inianyanza.’ Paulo mw’ibukya Abanya Roma athi: ‘Omughulhu thwabya ithukine bakolha-nabi, Kristo mwathuholera.’ (Abar. 5:8) Olhwanzo lhwa Nyamuhanga silhuwithe lhubibi!

10. Ebiri omwa Abanya Roma 8:38, 39 bikathweghesayaki?

¹⁰ Soma Abanya Roma 8:38, 39. Ahathe erithika-thika, Paulo abya iniabiriligha ndeke ngoku olhwanzo lhwa Nyamuhanga lhuwithe amaaka manene. Mwahandika athi sihali “ekyanga thoka erithughabulha oko lhwanzo lhwa Nyamuhanga.” Mwaminya ngoku Yehova mwaghumisirizya  akakolongana n’Abaisraeli. Kandi abya inianasi ngoku Yehova abirimukangania olhukogho. Omwa bikuhi, ithwangana bugha thuthi Paulo abya iniakabugha athi, ‘Kundi Yehova mwathuma Mughalha wiwe eriholha busana naghe, mbwino hane ekyangaleka ingathika-thikira olhwanzo lhwiwe?’​—Abar. 8:32.

11. Nomwakine indi Paulo mwakolha ebibi ng’ebiri omu 1 Timoteo 1:12-15, busana naki aby’akakasirye ngoku Nyamuhanga amwanzire?

¹¹ Soma 1 Timoteo 1:12-15. Ebya Paulo akolha kera bitholere eribya ibyanabya bikamulyambya. Mwayikaniako athi indi mukolha-nabi “kwilhaba abosi,” kandi ekyo sikiriswekaya! Paulo abere athali abana eriminya ly’okwenene, iniakendereraya Abakristayo omwa miyi yosi, erihira abandi b’omwa ngomo n’erihamya okw’ithibwa ly’abandi. (Emib. 26:10, 11) Thalengekania Paulo ng’angayowire athi alyabana Omukristayo omulere oyo ababuthi biwe bithibawa omwa hamuli yiwe? Paulo mwayikubya bwomo, aliwe abya inianasi ngoku syanga hindulha ebyabya kera. Mwaligha ngoku Kristo mwaholha busana nayu, kandi inianasikire mwahandika athi: “Nyiri ngoku nyine busana n’olhukogho lhwa Nyamuhanga.” (1 Kor. 15:3, 10) Thuk’ighaki? Ligha ngoku Kristo mwaholha busana nawu kandi ngoku mwakuhiriraho enzira y’eribya n’obughuma obuwene, obwa hakuhi na Yehova. (Emib. 3:19) Ekikulhu embere sya Yehova by’ebya thukakolha lino n’ebya thukendi syakolha obuthuku obukasa, butsira ebisobyo ebyo thwakolha kera, mbulha thwabikolha ithune Bema kutse eyihi.​—Isa. 1:18.

12. Ebinywe ebiri omu 1 Yoane 3:19, 20 byanga thuwathikya bithi thwamayowa nga sithuwithe mughaso kutse nga sithwanzibirwe?

¹² Wamalengekania ngoku Yesu mwaholha busana n’ebibi byawu, iwangana bugha wuthi, ‘Ngayowa isingatholere ekyo.’ Busana naki wangana yowa wuthya? Omuthima wethu owathahikene anganathutheba, ithwalengekania  nga sithuwithe mughaso kutse nga sithwanzibirwe. (Soma 1 Yoane 3:19, 20.) Okwa buthuku ng’obo, thutholere ithw’ibuka ngoku “Nyamuhanga ni mukulhu alengire emithima yethu.” Olhwanzo lhwa Thatha wethu w’elhubulha n’erighanyira liwe bilengire kutsibu amalengekania awathatholere awangasa omwa mithima yethu. Thutholere ithwayilhusyamo erithika-thika n’eriligha ngoku Yehova athwanzire. Erikolha ekyo, thutholere ithwayeghesya Ekinywe kiwe mughulhu wosi, ithwasaba buthumbya, n’erihindana mughulhu wosi n’abandu biwe abathaleghulha. Busana naki ni kikulhu erikolha ebindu ebyo?

13. Erigha Ekinywa kya Nyamuhanga lyanga thuwathikya lithi? (Lebaya n’akasanduku “ Ngoku Ekinywe kya Nyamuhanga Kikabawathikaya.”)

¹³ Igha Ekinywe kya Nyamuhanga buli kiro, neryo wukendilhangira ndeke emibere mibuya ya Yehova. Wukendi lhangira ngoku akutsomene kutsibu. Erighanirya oko mwatsi mulebe omwa Kinywe kya Nyamuhanga obuli kiro, kikendi leka iwathoka erilengekania ndeke kundi kikendi kuhabulha, erihengulha amalengekania n’esyongumbu syawu nyibi. (2 Tim. 3:16) Omusyakulhu oyukahulhawamo Kevin oyuwarwanisaya amalengekania w’eriyowa nga syatholere, akabugha athi: “Erisoma Esyonyimbo 103 n’erisighaniryako kyabirinyiwathikya erihindulha amalengekania waghe n’eriminya amalengekania agho Yehova anyiwitheko.” Eva, oyothulyakanayako, akabugha athi: “Ngawunzerera ekiro omw’ighanirya okwa malengekania wa Yehova. Eki kikaleka ingayowa buholho omwa muthima kandi kikahimba erikirirya lyaghe.”

14. Erisaba lyanga thuwathikya lithi?

¹⁴ Saba buthumbya. (1 Tes. 5:17) Obunywani obukamathire buseghemere okw’ikanirania mughulhu wosi kandi erilhua okwa muthima. Kwabine bithya n’okwa bunywani bwethu na Yehova. Thukabya thukamubwira omo misabe eriyowa lyethu, amalengekania, n’ebikathulyambaya, thukakanganaya ngoku thumuyikethere kandi ngoku thunasi kw’athwanzire. (Esy. 94:17-19; 1 Yn. 5:14, 15) Yua, oyothulyakanayako, akabugha athi: “Ngabya ingasaba, sindikwama kyathondogholha lisa ebyabere ekiro ekyo. Ngabwira Yehova y’ebyosi ebiri okwa muthima n’eriyowa lyaghe. Lyolho-lyolho, ngabiriyilhangirira Yehova nga Thatha oyutsomene abaana biwe butsira ng’omubbosi ow’ekampuni ndebe.”​—Lebaya akasanduku “ Wune Wakisoma?”

15. Yehova akakanganaya athi kw’athutsomene?

¹⁵ Ibya n’abanywani abathaleghulha; ni kihembo erilhua oku Yehova. (Yak. 1:17) Thatha wethu w’elhubulha akakanganaya kw’athutsomene omw’ithuha erihiika ly’obunyakirimu erya baghalha bethu na bali bethu abakathukanganaya olhwanzo “emighulhu yosi.”  (Emi. 17:17) Omo baruha yiwe okwa Banya Kolosai, Paulo mwahulha Abakristayo balebe abamusighika, eribakaniako ng’abamuhumulikanaya kutsibu. (Kol. 4:10, 11) Na Kristo Yesu nayu mwayithagha obuwathikya bw’abanywani biwe​—abamalaika n’abandu​—kandi mwasima obuwathikya obo.​—Lk. 22:28, 43.

16. Abanywani abathaleghulha banga thuwathikya bathi eriyithunda hakuhi na Yehova?

¹⁶ Mbwino wunemughasirwa ndeke omwa kihembo ekya Yehova akathuha eky’abanywani abathaleghulha? Eribwira omunywani oyukulire bunyakirimu ebikathulyambaya si bulemwa; bwanganabya butheya. Thalengekania okwa kya mughalha wethu James oyothulyakanayako akabugha: “Erinywana Abakristayo abakulire bunyakirimu kyabirinyiwathikya. Amalengekania awathatholere akabya akanyibulisya obuholho, omw’ighumisirizya, abanywani b’obughuli aba bakanyihulikirira n’erinyibukya ngoku banyanzire. Erilhabira omw’ibo, ngalhangira ngoku Yehova anyanzire kandi kw’anyitsomene.” Ka ni kikulhu erilholha embere erinywana kutsibu balikyethu!

17-18. Nindi oyo thutholere ithwahulikirira, kandi busana naki?

¹⁷ Sitani anzire ithwalemwa erikolha ekihikire. Anzire ithw’ikirirya thuthi Yehova syathwanzire, thuthi sithutholere erilhamibwa. Aliwe ngoku thwabirilhangira, ekyo sikihikire nahake.

¹⁸ Yehova akwanzire. Wuli w’obughuli embere siwe. Wamamwowa iwukendibya omo lhwanzo lhwiwe kera na kera, nga Yesu. (Yn. 15:10) Neryo isiwahulikirira Sitani kutse omuthima wawu owakakutsweba. Omwakanya k’ekyo, hulikirira Yehova oyukasamalira ebibuya omwa buli mughuma w’okw’ithwe. Ligha ndeke-ndeke ngoku Yehova “akatsemera abandu biwe,” nawu imwawune!