Erilhahirya lyabirisoborerwa “ng’eribugha, kutse eriyilhagha erikolha ekindu, mughulhu mungyi omw’ahulha Nyamuhanga . . . ng’omulhangiri.” Lyangana kolhwa omw’ibugha kutse omw’ihandika.

Abandi ibangana lengekania bathi ni kibi erilhahirya kundi Yesu mwabugha athi: “Siwulhahiraye nahake . . . Nikwa eribugha lyenyu libye, egha, egha, kutse eyihi, eyihi! Ebilengire ebi ni by’omubi.” (Mt. 5:33-37) Ni kwenene, Yesu abya inianasi ngoku omwa Mighambo ya Musa mwanabya erilhahirya lirebe kandi ngoku abaghombe ba Nyamuhanga abathaleghulha mubanalhahirya. (Enz. 14:22, 23; Eri. 22:10, 11) Kandi abya inianasi ngoku Yehova nayu mwanalhahirya. (Ebr. 6:13-17) Neryo Yesu angabya isyamanyisaya athi isithwalhahiraya. Omwakanya k’ekyo, aby’akakunga okw’ilhahirya okwa hithenayo kutse ebithawithe mughaso. Thutholere ithwalhangira eriberererya ebinywe byethu ng’olhukwamirwa olhubuyirire. Thutholere ithwamanyisya ebyo thukabugha.

Neryo, ni kyahi ekyo wangakolha bamabugha ambu wulhahiraye? Eky’erimbere, lhangira wuthi wukendi kolha ekya wukayalhahirayako. Wamabya isiwendi kikolha, ni kibuya erithendi lhahirya. Ekinywe kya Nyamuhanga kikathukunga kithi: “Lyuwene isiwalhaghaki, kwilhaba erilhagha n’erithendi thuhalyo.” (Omu. 5:5) N’ekindi, lebaya emisingyi ye Biblia eyihambire okw’ilhahirya, neryo kolha erikwamana n’obunyamuthima-thima bwawu obukangiriribwe. Emighuma y’okwa misingyi eyiseghemere okwa Masako eyi y’eyahi?

Erindi ilhahirya lihambene n’erisonda lya Nyamuhanga. Ng’eky’erileberyako, Abema ba Yehova bakayilhagha bakingira omwa butheke. Eriyilhagha eri ni mulingo w’erilhahirya. Omulhume n’omukali bakayilhagha embere sya Nyamuhanga n’abalhangiri bathi bakendyanzana, eritsomanangana, erisikania kandi ngoku bakendi kolha ekyo “omwa buthuku bw’eribyaho [lyabu].” (Abandi abakingira omwa butheke bangana ghana eribugha ebinywe ebyonyine-nyine ebi, aliwe bakabya ibabiriyilhagha embere sya Nyamuhanga.) Neryo bakahulhawamo omulhume n’omukali abathahenie, n’obutheke bwabu ni bw’eribyaho omwa ngebe yabu yosi. (Enz. 2:24; 1 Kor. 7:39) Endegheka eyi yihikire, yitholere, kandi yihambene n’erisonda lya Nyamuhanga.

Erindi ilhahirya sirihambene n’erisonda lya Nyamuhanga. Omukristayo w’okwenene syanga kolha erilhahirya ng’ery’erianza erilhwira okwa kihugho kyabu kutse eriyighana erikirirya liwe omu Nyamuhanga. Erikolha ekyo ikikendithwa ebihano bya Nyamuhanga. Abakristayo ‘si b’ekihugho,’ neryo sithwanga yingirya omo myatsi n’amalhwa wakyo.​—Yn. 15:19; Isa. 2:4; Yak. 1:27.

 Erindi ilhahirya ni mwatsi w’obunyamuthima-thima. Hanganayira ithwayithagha erilebya ndeke erilhahirya omw’ilengekania okw’ihabulha lya Yesu ‘ery’eriliha Kaisari ebindu bya Kaisari, n’eriliha Nyamuhanga ebindu bya Nyamuhanga.’​—Lk. 20:25.

Ng’eky’erileberyako, thubughe thuthi Omukristayo inianza eribya ndulhani y’ekihugho kirebe kutse erihebwa epasipoti neryo iniaminya ngoku kikendi muyithaghisya eritsuka erilhahirya. Omwa kihugho ekyo erilhahirya ng’eryo lyamabya eriri mw’erikolha ebilhangirikire ku bikathwa ebihano bya Nyamuhanga, obunyamuthima-thima bwiwe obukangiriribwe ne Biblia isibwendi mulighira. Aliwe egavumente iyangana mulighira erihindulha ebinywe by’erilhahirya eryo nuku obunyamuthima-thima bwiwe bumulighire erilhahirya.

Erilhahirya omwa binywe ebyabirihindulhwa ebyo kyangana hambangana n’omusingyi owali omwa Abanya Roma 13:1, owakabugha athi: “Obuli mundu akenge abathabali b’ekihugho.” Neryo Omukristayo iniangana thwamu athi sikibi erilhahirya erikolha ekindu ekya Nyamuhanga akalighira.

Kandi obunyamuthima-thima buwithe ekya bukakolha wamasabwa erikolesya ekindu kutse akaminyikalho kalebe wukalhahirya. Abaroma bakera n’Abasukuti ibakalhahiraya omwa miyali yabu, erisaba obuthoki bwa nyamuhanga w’olhuhi ng’enzira ey’erikangania obuyiketherwa bw’omundu. Abagiriki ibakasumbira ebyalha by’endatha bakalhahirya. Neryo aho ibakabya ibamakangania ngoku hane ow’obuthoki oyukalhangira ebya bakabugha n’erikolha kandi oyo abandu bawithe erisyalhuthonda embere siwe.

Aliwe ibbwa, omughombe wa Yehova syangalhahirya omw’ikolesya akaminyikalho kosi-kosi k’erihanga akahambangene n’eriramya ly’amabehi. Neryo ibbwa ekoti y’ebilhaghiro yamabugha yithi wuhire ebyalha by’okwa Biblia n’erilhahirya okwa kindu ekinahikire? Okw’ekyo, iwangana thwamu erikikolha kundi Amasako akathubwira okwa bathaleghulha abalhahiraya omw’ikolesya akaminyikalho kalebe. (Enz. 24:2, 3, 9; 47:29-31) Ni kikulhu eryibuka ngoku wamakolha erilhahirya ng’eryo, wukabya iwamayilhagha embere sya Nyamuhanga ngoku wukendi bugha okwenene. Wutholere iwabya iwunayitheghekire erisubirya eby’okwenene okwa buli kibulyo ekyo wanga bulibwa.

Kundi thukalhangira obughuma bwethu na Yehova mwa bw’obughuli, thutholere ithwalebya ndeke erilhahirya lyosi-lyosi eryo thukasabawa erikolha, nuku thulhangire thuthi siryendi tsandya obunyamuthima-thima bwethu kutse erithwa emisingyi ye Biblia. Wamathwamu erilhahirya, wutholere iwalhangira wuthi wukaliberereraya.​—1 Pet. 2:12.