OMWATSI W’ERIGHA 18
Muhimbangane Okwa Mihindano
“Thughaniraye ngoku thwang’ibukania . . . thusikanaye.”—EBR. 10:24, 25.
OLHWIMBO 88 Nyikangiriraye Esyonzira Syawu
EBIKENDI KANIBWAKO a
1. Busana naki thukasubiraya oko mihindano?
BUSANA naki thukahindana okwa mihindano? Ekikulhu kutsibu ly’eripipa Yehova. (Esy. 26:12; 111:1) Kandi thukahindana okwa mihindano nuku thuhimbangane omo mighulhu eyikalire eno. (1 Tes. 5:11) Thukabya thukasumba ebyalha n’erisubirya, thukakolha ebyosi bibiri ebi.
2. Ni highisa hyahi ehya thuwithe ehy’erisubirya okwa mihindano yethu?
2 Obuli wiki, thukabya ithunawithe ehighisa hy’erisubirya okwa mihindano yethu. Ng’eky’erileberyako, okwa syowikendi, thwangana sangira omw’Igha ly’Akaleberyo ery’ekithunga. Okwa mihindano yethu ey’ahakathi-kathi k’ewiki, thwangana subirya okw’Isekulya Ndeke Amasako, Erigha lye Biblia ery’Ekithunga, n’okwa bindi bitsweka ebirimo erikanirania.
3. Ni bitsibu byahi ebya thwanga bana, kandi Abaebrania 10:24, 25 hanga thuwathikya hathi?
3 Ithwe bosi thwanzire eripipa Yehova n’erihimba abaramya balikyethu. Aliwe thwangana bana ebitsibu thukasubirya. Thwanganakwa engitsi y’erisubirya kutse ithwanganabya ithwanzire kutsibu erisubirya, aliwe ithuthasombolhwa mughulhu wosi ngoku thulhue thwanzire. Thwanga ghumira thuthi ebitsibu ebi? Thwangana bana eky’erisubirya omwa baruha eyo mukwenda Paulo ahandikira Abaebrania. Abere akakania oko mughaso w’erihindana haghuma, mwabugha athi thutholere ithwahira omuwatho ‘okw’isikania [erihimbana].’ (Soma Abaebrania 10:24, 25.) Thwamaminya ngoku abandi bahulikiriri bangana himbwa nibya n’omwa binywe bike eby’erikangania erikirirya lyethu, ithukendi lhangira ku kitholere eriyihayo erisubirya. Kandi thwamathendi sombolhwa mughulhu wosi, ithwangana tsema kundi abandi omwa kithunga bakendi bana akaghisa ak’erisubirya.—1 Pet. 3:8.
4. Ni nzumwa syahi isathu esyo thukendi kaniako omo mwatsi ono?
4 Omo mwatsi ono, thukendi tsuka erilebya nga thwanga himbana thuthi omo kithunga ekiri mw’abandu bake omuli bake abakasubiraya. Neryo, thukendi lebya ngoku thwanga himbana omo kithunga ekiri mw’abandu banene omuli abangyi abakasumba bakanza erisubirya. Erighunzerera, thukendi kania oko syonzira esyo thwang’uwaniryamo ebya thukabugha thukasubirya nuku bihimbe ndeke abandi.
MUHIMBANE OMO KITHUNGA EKIRI MW’ABANDU BAKE
5. Thwanga himbana thuthi omo kithunga ky’abandu bake?
5 Omo kithunga ekiri mw’abandu bake kutse egurupu, simulibya abandu bangyi abangasubirya abo oyukasondolha angasombolha. Okwa bundi buthuku, anganayithagha erilinda eribana oyukayihayo erisubirya. Emihindano iyangan’itha bulhundu—ekyo sikirihimba. Wanga kolhaki? Ibya iwunayitheghekire erisumba mughulhu wosi. Omw’ikolha ekyo, iwanganahira omo bandi mw’omuhwa w’eryongera erisangira omo mihindano.
6-7. Thwanga kehya thuthi engitsi yosi-yosi eya thuwithe okw’isubirya?
6 Kandi ibbwa erisubirya lyamabya irikakwitha engitsi? Abanene babiriyowa bathya. Nomwabine, erithoka ndeke erihimba balikyethu, busana naki iwuthasondya esyonzira sy’erikeheryamo engitsi yawu ey’erisubirya? Wanga kolha ekyo kya wuthi?
7 Ikyanganabya kibuya erithasyalebya amaghuma w’okwa menge awahulhukibawa omo myatsi yakera ey’Akaleberyo. b Ng’eky’erileberyako, thegheka ndeke. (Emi. 21:5) Wukabya wukongera eriyitheghererya ndeke omwatsi, kwa kikanakwolhobera kithya eriyihayo erisubirya. N’ekindi, subiraya omo bikuhi. (Emi. 15:23; 17:27) Erisubirya omo bikuhi sikirikwitha engitsi nene. Erisubirya omwa bikuhi, obundi ery’ebinywe bike, lyangan’olhobera balikyethu eriyitheghererya kwilhaba erisubirya biri-biri ebirimo esyonzumwa nyingyi. Erisubirya omo bikuhi omo binywe byawu, kikakanganaya ku wabirithegheka ndeke kandi ku wabiriyitheghererya ndeke omwatsi.
8. Yehova akalhangira athi akaghalha ako thukahiraho?
8 Kandi ibbwa wamalengesya amaghuma w’okwa menge aya aliwe iwabya iwukinakwire engitsi y’erisubirya mirundi nga y’eyo? Yikethere ngoku Yehova akendi sima akaghalha kawu ak’erikolha ngoku wanga thoka. (Lk. 21:1-4) Erihiraho akaghalha sikirimanyisaya kithi wuyibbune. (Fil. 4:5) Sombolha eky’erikolha, hiraho ekilhubirirwa ky’erikolhakyo, kandi saba erihebwa erithekana. Okw’itsuka, ekilhubirirwa ekyo kyanganabya in’isubirya ngendo nguma omwa bikuhi.
MUHIMBANE OMO KITHUNGA EKIRI MW’ABANDU BANENE
9. Ni kitsibu kyahi ekyanga banika omo bithunga by’abandu banene?
9 Omo kithunga kyenyu mwamabya imuli abathuliri banene, iwanganabya n’ekitsibu ekiri mbaghane. Obundi balikyethu banene bakayihayo erisubirya ikyaleka iwuthasombolhwa mughulhu wosi. Ng’eky’erileberyako, mughulhu wosi Danielle akatsemera erisubirya omwa mihindano. c Akalhangiralyo ng’ekitsweka ky’okw’iramya liwe, enzira y’erihimbiramo abandi, kandi ng’enzira y’erighumiryamo erikirirya liwe omwa bya Biblia yikakangiriraya. Aliwe abere akahumira omo kithunga ekiri mw’abandu banene, isyali sombolhawa mughulhu wosi—oko bundi buthuku omuhindano owosi iniakanahwamo isyathasombolhwa. Mwabugha athi: “Munayiponera. Munayowa nganabiriherya olhusunzo. Kyamabya ngendo nyingyi, iwangana tsuka eribulha nga bakakighenderera.”
10. Thwang’ongera thuthi ehighisa hyethu hy’erisubirya?
10 Wunewathayowa nga Danielle? Kyamabya ikwakiri kithya, iwangana lengwako, iwabikyako n’erithwamu eribya wukahulikirira buyira. Aliwe isiwaleka erisubirya. Wanga kolhaki? Ikyanganabya kibuya erithegheka eby’erisubirya binene obuli muhindano. Neryo wamathendi sombolhwa okw’itsuka, iwukendibya iwunawithe ehighisa hingyi hy’erisubirya emihindano yinemulholha embere. Wukathegheka Erigha ly’Akaleberyo, lengekanaya obuli nungu nga yikahamba yithi oko muthwe w’omwatsi. Wamakolha ekyo, iwangana bana ekya wanga bugha oko mwatsi. Eryongera okw’ekyo, iwangana thegheka eky’erisubirya oko syonungu esikakanaya oko kwenene y’omwakathi eyikalire erisoborera. (1 Kor. 2:10) Busana naki? Kundi ihanganabya bake abakayihayo erisubirya okwa kitsweka ekyo. Kandi ibbwa n’enyuma w’erighendera okwa menge ayo, iwalhangira ihalhaba emihindano nga y’eyo isiwathahebwa akaghisa k’erisubirya? Iwanganahika oko yukendi sondolha emihindano yitheyatsuka n’erimubwira ekibulyo ekya wanzire iwasubiryako.
11. Ebiri omwa Abanya Filipi 2:4, bikathuhiramo omuhwa w’erikolhaki?
11 Soma Abanya Filipi 2:4. Omw’isondolibwa n’omulimu, omukwenda Paulo mwahira omwa Bakristayo mw’omuhwa w’eritsomana ebiyithawa by’abandi. Thwanga ghendera thuthi okw’ihabulha eryo omwa mihindano? Omw’ibuka ngoku abandi, nabu ng’ithwe banzire erisangira muyo.
Ngoku wukanalighira abandi erisangira omo mukania, lighira abandi basubiraye (Lebaya enungu 12)
12. Ni nzira yahi eyuwene ey’erihimbiramo abandi oko mihindano? (Lebaya n’ekisasani.)
12 Thakilengekaniako omo nzira eno. Wamabya iwunemukanirania n’abanywani bawu, iwunemwendi yighangira omukania? Eyihi nahake! Iwukendianza nabu basangire omo mukania. Kuthya, oko mihindano, thwanzire n’abangyi ibabana akaghisa k’erisubirya ngoku kyanga thokekana. Erithwalira haghuma, enzira eyuwene kutsibu ey’erihimbiramo balikyethu ly’eribaha akaghisa k’erikanganiryamo erikirirya lyabu. (1 Kor. 10:24) Thulebaye ekyo nga thwanga kikolha thuthi.
13. Thwangaha thuthi abangyi b’akaghisa k’erisubirya?
13 Thwangana subirya omo bikuhi, ni bugha ambu eriha abangyi b’endambi y’erisubirya. Abasyakulhu n’abandi bathuliri abasi bingyi, banganabya eky’erileberyako. Nibya n’omughulhu wukasubiraya omo bikuhi, yihighule okw’ikania oko syonzumwa nyingyi. Wamabugha ebyosi ebiri omo nungu, abandi isibendi thasyabana eby’eribugha. Ng’eky’erileberyako, omo nungu eno muli amenge abiri, subiraya omwa bikuhi kandi yihighule okw’ibugha esyonzumwa nyingyi. Wamabya w’erimbere erisombolhwa erisubirya oko nungu eno, busana naki iwuthakania oko nguma y’okwa syonzumwa esi?
Ni ndambi yahi eya thwanga thwamu erithendi sumba ebyalha? (Lebaya enungu 14) f
14. Ni kyahi ekyanga thuwathikya erithwamu nga thusumbe mirundi mingahi? (Lebaya n’ekisasani.)
14 Kolesaya obuyitheghererya wukathwamu nga wukendi subirya mirundi mingahi. Thwamabera erisumba ebyalha, ithwangana leka oyukasondolha iniabera erithusombolha nibya n’abandi isibali babana n’akaghisa k’erisombolhwa. Eki ikyangana ghunza abandi b’amani aw’erisumba.—Omu. 3:7.
15. (a) Thwanga kolhaki thwamathendi sombolhwa? (b) Abakasondolha banga kangania bathi ku batsomene obuli mundu? (Lebaya akasanduko “ Wamabya Iwukasondolha.”)
15 Abathuliri banene bamasumba ebyalha ithwangana ghana erisubirya kutsibu ngoku thulhue thwanzire. Hanganayira, oyukasondolha iniathathusombolha nahake. Ekyo ikyangana ponesya, aliwe sithutholere thukahithana thwamathendi sombolhwa.—Omu. 7:9.
16. Thwanga himba thuthi abandi abakasubiraya omwa mihindano?
16 Wamathendi sombolhwa ngoku wulhue wanzire, busana naki iwuthahulikirira ndeke abandi bakasubirya neryo wukabasima emihindano yikahwa? Balikyenyu ibakendi himbwa wukabasima ngoku bangahimbirwe wukasubirya. (Emi. 10:21) Erisima abandi ni yindi nzira ey’erihimbanganiramo.
ESINDI NZIRA ESY’ERIHIMBANGANIRAMO
17. (a) Ababuthi bangawathikya bathi abaana babu erithegheka eby’erisubirya erikwamana n’emyaka yabu? (b) Ngoku kiri omo vidiyo, ni biika byahi bbini ebyanga thuwathikya erithegheka eby’erisubirya? (Lebaya n’omwatsi ahikwa.)
17 Ni yindi nzira yahi eya thwanga himbanganiramo oko mihindano yethu? Wamabya iwuli mubuthi, wathikaya abaana bawu erithegheka eby’erisubirya erikwamana n’emyaka yabu. (Mt. 21:16) Oko bundi buthuku, emyatsi eyikalire ng’ebitsibu by’obutheke, kutse emyatsi y’eby’esyongeso, yikakanibawako oko mihindano, aliwe, hanganabya enungu kutse ibiri esyo omwana angana subiryako. Kandi muwathikaye abaana benyu eriyitheghererya ekikaleka ibabya isibanga sombolhwa obul’isumba. Erisoborera eki kyanganaleka ibathayiponera abandi bakasombolhwa butsira ibo.—1 Tim. 6:18. d
18. Thwanga yihighulha thuthi okw’iyikaniako kutsibu thukasubirya? (Emisyo 27:2)
18 Ithwe bosi thwangana thegheka eby’erisubirya ebikahumulikanaya ebikaha Yehova y’olhukengerwa kandi ebikahimba Abakristayo balikyethu. (Emi. 25:11) Nomwakine indi hanganayira ithwaha ekyalholirweko kyethu omo bikuhi, thutholere ithwayihighulha okw’iyikaniako bingyi. (Soma Emisyo 27:2; 2 Kor. 10:18) Omwakanya k’ekyo, thukalengaho eribya ithunahirire omuwatho oku Yehova, Ekinywe kiwe, n’abandu biwe ng’ekithunga. (Erib. 4:11) Ni kwenene, ekibulyo ky’enungu kyamabya ikikathuyithaghako eriyikaniako, kihikire erikolha ekyo. Eky’erileberyako ky’eki, kine omo nungu eyikakwamako omo mwatsi ono.
19. (a) Ni kyahi ekyanga lhwiririra omw’itsomana abosi ababirihindana? (Abanya Roma 1:11, 12) (b) Iwe ni kyahi ekya wukatsemera bikahika okw’isubirya omo mihindano?
19 Nomwakine indi sihali ebilhaghiro ebihambire okw’isubirya, omwa mihindano ithwe bosi thwangana lengaho erisubirya ebikahimba. Eki kyangana manyisya erisubirya mirundi nga y’eyo. Kutse ikyangana manyisya eritsemera ehighisa ehyo thuwithe ehy’erisubirya n’eritsema kundi abandi balikyethu nabu ng’ithwe bakasima olhusunzo lhw’erisubirya omwa mihindano. Omw’ihira omuwatho okw’itsomana ebiyithawa by’abandi balikyethu omwa mihindano, ithwe bosi ithwangana ‘sikania emithima.’—Soma Abanya Roma 1:11, 12.
OLHWIMBO 93 Tsumulha Erihindana Lyethu Haghuma
a Thukahimbangana thukasubirya okwa mihindano. Aliwe, abandi bakanakwa engitsi y’erisubirya. Abandi bakatsemera erisubirya aliwe ibanza bathi basombolhawe obuli ndambi. Omwa mibere eyi, thwanga kangania thuthi ku thutsomene abandi nuku ithwe bosi thuhimbawe. Kandi thwanga subirya thuthi ebikendi hira omo balikyethu mw’omuhwa w’erikangania olhwanzo n’emibiiri eyuwene? Omwatsi ono akendi soborera.
b Eribana awandi menge, lebaya Akaleberyo ak’Okwokubanza 2019, olhup. 8-13, ne Watchtower ey’Okwomwenda 1, 2003, olhup. 19-22.
c Erina lyabirihindulhwa.
d Lebaya evidiyo okwa jw.org eya Wubye Munywani wa Yehova—Thegheka eky’Erisubirya.
f ERISOBORERA EKISASANI: Omwa kithunga ekiri mw’abandu banene, mughalha wethu oyuwabirisubirya akaha abandi balikyethu b’akaghisa k’erisubirya omwa mihindano.
