OMWATSI W’ERIGHA 19
Thwanga Ghumya Thuthi Erikirirya Lyethu Omo Mulhaghe wa Yehova ow’Ekihugho Kihya-kihya?
“[Yehova] amabugha, isyendi syakolhakyo kwehi?”—EMIG. 23:19.
OLHWIMBO 142 Eryamakirira Amaha Wethu
EBIKENDI KANIBWAKO a
1-2. Thutholere ithwabya ithunemukolhaki thunemulindirira ekihugho kihya-kihya?
THUKALHANGIRA omulhaghe wa Yehova ow’erisubya omo mwanya w’omughulhu mubi ono mw’ekihugho kihya-kihya ekithunganene mwa w’obughuli. (2 Pet. 3:13) Nomwakine indi sithwasi ekihugho kihya-kihya nga kikendi syasa mughulhu wahi, obwema bukakanganaya ngoku sithukiri b’erilinda mughulhu muuli.—Mt. 24:32-34, 36; Emib. 1:7.
2 Thunalindirire ekyo, mbulha thwamaghunza omo kwenene mwa buthuku bungahi, ithwe bosi thukayithagha erighumya erikirirya lyethu omo mulhaghe oyo. Busana naki? Kundi nibya n’erikirirya erighumire lyangana tseka. Erithwalira haghuma, omukwenda Paulo mwakania okw’ithendibya n’erikirirya ‘ng’ebibi ebikathuhamba.’ (Ebr. 12:1) Eritheya erikirirya lyethu okw’itseka, thukayithagha eribya ithunemulebya obwema obukakanganaya ngoku ekihugho kihya-kihya kikisiya ikyasa.—Ebr. 11:1.
3. Thukendi kania okuki omo mwatsi ono?
3 Omo mwatsi ono, thukendi kania oko syonzira isathu esyo thwanga ghumiryamo erikirirya lyethu omo mulhaghe wa Yehova ow’ekihugho kihya-kihya: (1) omw’ighanirya oko ndongolya, (2) omw’ilengekania oko maaka wa Yehova, na (3) omw’ikolesya obuthuku bwethu omo mibiiri y’obunyakirimu. Neryo thukendi lebya ngoko omwatsi ogho Yehova aha Habakuki akaghumaya erikirirya lyethu munabwire. Aliwe thuthatsuka erilebya emibere mirebe eyo thwangabya ithunemo lino eyikayithagha erikirirya erighumire omo mulhaghe w’ekihugho kihya-kihya ekikayasa.
EMIBERE EYIKAYITHAGHA ERIKIRIRYA ERIGHUMIRE
4. N’ithwamu lyahi erikayithagha erikirirya erighumire?
4 Obuli kiro thukakolha erithwamu erikayithagha erikirirya erighumire. Ng’eky’erileberyako, thukathwamu bikahika okwa banywani bethu, eby’eriyitsemesya, esukuru, obutheke, abaana, n’emibiiri y’ekihugho. Thukakolha ndeke thukayibulya: ‘Mbwino ebya ngathwamu binemukangania ku nganasi ngoku omughulhu mubi ono ni w’akathuku kake kandi ngoku ekihugho kihya-kihya kya Nyamuhanga kikisiya ikyasuba omo mwanya wagho? Kutse mbwino erithwamu lyaghe liri ng’ery’abakalengekanaya bathi olhuholho y’enduli y’obuli mwatsi?’ (Mt. 6:19, 20; Lk. 12:16-21) Ithukendi thwamu ndeke thwamaghumya erikirirya lyethu ngoku ekihugho kihya-kihya kiri hakuhi.
5-6. Busana naki thukayithagha erikirirya erighumire omo mughulhu w’obulighe? Iha eky’erileberyako.
5 Kandi thukabana ebitsibu ebikayithagha erikirirya erighumire. Thwanganabana eriendereribwa, obulhwere obuthelhama, kutse ebindi bindu ebyangana leka ithwahwa amani. Okw’itsuka, ithwangana thoka erighumira ekitsibu. Aliwe kyamathendihwaho—ngoku mughulhu mungyi ebitsibu bikanabya—ithukendi yithagha erikirirya erighumire nuku thuyiyinaye n’erilholha embere erikolera Yehova ithunatsemire.—Abar. 12:12; 1 Pet. 1:6, 7.
6 Omughulhu thuwithe ekitsibu, ithwangana yowa ekihugho kihya-kihya kya Yehova nga sikyendi syasa. Mbwino eki kikamanyisaya kithi erikirirya lyethu lyabiritseka? Kwabithe bithya. Thalengekania oko ky’erileberyako kino. Embulha yamawa habw’esyowiki nga sy’esyo, ithwangana yowa omwisi nga syendi syakolha. Nomwabine omwisi akakolha. Kuthya, omughulhu thuhwere amani kutsibu, ithwangana yowa ekihugho kihya-kihya nga sikyendi syasa. Aliwe erikirirya lyethu lyamabya irinaghumire, thukaminya ngoku emilhaghe ya Nyamuhanga yikendi syabererera. (Esy. 94:3, 14, 15; Ebr. 6:17-19) Thunayikethere ekyo, thwangana lholha embere erihira eriramya lya Yehova ly’embere.
7. Ni malengekania wahi agho thutholere ithwayitheyako?
7 Thulebaye ekindi ekikayithagha erikirirya erighumire—omubiiri w’erithulira. Abandu banene abathukathulira bakayowa bathi “engulhu yuwene” eyihambire oko kihugho kihya-kihya kya Nyamuhanga ekikayasa ni kindu ekithe kyangabya. (Mt. 24:14; Eze. 33:32) Sithwanganza erilighira amalengekania wabu aw’erithika-thika ng’ayo akathuhambako. Eriyitheya okw’ekyo, thutholere ithwabya ithunemughumya erikirirya lyethu. Thulebaye esyonzira isathu esyathwanga koleramo ekyo.
GHANIRAYA OKO NDONGOLYA
8-9. Erighanirya oko ndongolya kyangahamba kithi okw’ikirirya lyethu?
8 Enzira nguma eyathwanga ghumiryamo erikirirya lyethu ly’erighanirya oko ndongolya. Endongolya yikathukakasaya ngoku emilhaghe ya Nyamuhanga yikendi syabererera. Thukabya thukalengekania ndeke okwa kyaleka endongolya iyahebwa n’ebya yithaghisibawa, thukaghumaya erikirirya lyethu ngoku omulhaghe wa Nyamuhanga ow’engebe y’erikotha omo kihugho ekyuwene akendi syabererera. Busana naki ithwabugha thuthya?
9 Ni byahi ebya yithaghisibawa endongolya erihebwayo? Yehova mwathuma Mughalha wiwe mwanzwa, akambere, munywani wiwe w’okwa ndungu erilhua elhubulha erisyabuthwa ng’omundu oyuhikene. Iniane oko kihugho, Yesu mwaghumira ebitsibu by’emisindo yosi. Neryo mwaghalhwa n’eriholha olhuholho olhukalhuma. Yehova ka mwahayo ekindu ky’obughuli bunene! Nyamuhanga wethu w’olhwanzo syangalighire Mughalha wiwe eriaghalhwa n’eriholha habw’erithathuha engebe eyuwene aliwe ey’akathuku kake buyira. (Yn. 3:16; 1 Pet. 1:18, 19) Kundi abirithuha ekindu ky’obughuli bunene, Yehova akendi syalhangira athi engebe y’erikotha omo kihugho kihya-kihya yikabererera.
LENGEKANAYA OKO MAAKA WA YEHOVA
10. Ngoku kiri omo Abanya Efeso 3:20, ni byahi ebya Yehova akathoka erikolha?
10 Enzira eyakabiri eyathwanga ghumiryamo erikirirya lyethu ly’erilengekania oko maaka wa Yehova. Awithe amaaka w’eriberererya obuli mulhaghe wiwe. Ni kwenene, abanene bakalengekanaya bathi engebe ya kera na kera omo kihugho kihya si yendisyabya. Aliwe mughulhu wosi Yehova akalhaghanisaya ebindu ebyo bandu bathe banga berererya. Kundi nibya iyo ni Nyamuhanga Omuthoki w’Ebyosi. (Yobu 42:2; Mk. 10:27) Mbwino ithwanalengekania thuthi iniayilhagha erikolha ebindu ebya buli kiro?—Soma Abanya Efeso 3:20.
11. Iha eky’erileberyako kighuma eky’okwa milhaghe ya Nyamuhanga eyithe ya buli kiro. (Lebaya akasanduko “ Emilhaghe Mirebe Eyithe ya Buli Kiro Eyabererera.”)
11 Thulebaye ebighuma by’okwa bindu ebikabya nga sibyanga thokekana ebya Yehova alhaghanisaya abandu biwe kera. Mwabwira Abrahamu na Sara athi banga buthire omughalha omo myaka yabu y’obukulhu. (Enz. 17:15-17) Kandi mwabwira Abrahamu athi ab’olhubutho lhwiwe banga hebirwe ekihugho kye Kanana. Omo myaka mingyi eyo ab’olhubutho lhwa Abrahamu, Abaisraeli, baghunza omo bukobe mwe Misiri, omulhaghe oyo atholere eribya imwabya nga syanga bererera. Aliwe mwabererera. Enyuma waho, Yehova mwabugha athi omukekulhu Elizabeti angabuthire omwana. Kandi mwabwira Maria omumbesa oyuthe wathabana mulhume athi angabuthire Mughalha Wiwe, oyo Yehova abya iniabirilhaghulha erihika liwe esyongumi sy’emyaka kera omw’irima lye Edeni—owundi mulhaghe owabererera!—Enz. 3:15.
12. Ebiri omu Yosua 23:14 n’omu Isaya 55:10, 11 bikathukakasayaki oko maaka wa Yehova?
12 Thukaghumaya erikirirya lyethu omo maaka wa Yehova aw’eriletha ekihugho kihya-kihya omw’ilengekania okwa ky’eribya iniasibwe ng’oyukaberereraya emilhaghe yiwe. (Soma Yosua 23:14; Isaya 55:10, 11.) Ekyo kikaleka ithwayitheghekera ndeke eriwathikya abandi erilhangira ngoku omulhaghe w’ekihugho kihya-kihya si bilhotho, si binyambwirwa. Bikahika okwa lhubulha lhuhya-lhuhya n’ekihugho kihya-kihya, Yehova iyuwene-wene mwabugha athi: “Ebinywe ebi ni by’eriyikethera n’eby’ekwenene.”—Erib. 21:1, 5.
YIHWERAYE OMO MIBIIRI Y’OBUNYAKIRIMU
EMIHINDANO Y’EKITHUNGA
Obuli kighuma ky’okwa mibiiri y’obunyakirimu eyi kyanga ghumya kithi erikirirya lyawu? (Lebaya enungu 13)
13. Emihindano y’ekithunga yikaghumaya yithi erikirirya lyethu? Soborera.
13 Enzira eyakasathu eya thwanga ghumiryamo erikirirya lyethu ly’erikolesya obuthuku bwethu omwa mibiiri y’obunyakirimu. Ng’eky’erileberyako, thulebaye ngoku thukaghasirawa omo mihindano yethu. Anna, oyuwabirighunza myaka mingyi omwa mibiiri muthina-muthina ey’omughulhu wosi, akabugha athi: “Emihindano yikaleka erikirirya lyaghe iryabya irinaghumire. Embuyi nomuyangabya isiyiwithe amaaka w’erikangirirya ndeke kutse isiyathakangirirya ekindu kihyaka, mughulhu mungyi ngabya inabiriowa ekindu ekikendi leka ingayitheghererya ndeke ekwenene ye Biblia, kandi ekikendi ghumya erikirirya lyaghe.” b Kandi ahathe erithika-thika thukasima erisubirya ly’abalikyethu erikahimba erikirirya.—Abar. 1:11, 12; 10:17.
OMUBIIRI W’ERITHULIRA
Obuli kighuma ky’okwa mibiiri y’obunyakirimu eyi kyanga ghumya kithi erikirirya lyawu? (Lebaya enungu 14)
14. Omubiiri w’erithulira akaghumaya athi erikirirya lyethu?
14 Kandi thukaghumaya erikirirya lyethu thukasangira omo mubiiri w’erithulira. (Ebr. 10:23) Barbara, oyuwamabirighunza myaka eyilhabire omu 70 inianemukolera Yehova, akabugha athi: “Mughulhu wosi omubiiri w’erithulira akaghumaya erikirirya lyaghe. Ngabya ingongera eribwira abandi oko milhaghe ya Yehova mibuyanga, erikirirya lyaghe kwa likanongera lithya erighuma.”
ERIYEGHESYA
Obuli kighuma ky’okwa mibiiri y’obunyakirimu eyi kyanga ghumya kithi erikirirya lyawu? (Lebaya enungu 15)
15. Eriyeghesya likaghumaya lithi erikirirya lyethu? (Lebaya n’ebisasani.)
15 Thulebaye owundi mubiiri w’obunyakirimu owakaghumaya erikirirya lyethu: eriyeghesya. Susan akalhangira ini kibuya eribya n’endegheka y’eriyeghesya. Akabugha athi: “Kyasande, ngayeghesaya Erigha ly’Akaleberyo ery’ewiki eyikakwamako. Kyabbalaza na Kyakabiri, ngathegheka emihindano ey’ahakathi-kathi k’ewiki. Ebiro ebyamasighalhayo, ngayeghesaya.” Omw’ikwama-kwamania endegheka yiwe y’eriyeghesya, Susan akalholha embere erihimba erikirirya liwe. Irene, oyuwamabirikolera oko kyaghanda kikulhu ahabw’emyaka mingyi, abirilhangira ngoku eriyeghesya oko maminyereri we Biblia kikaghumaya erikirirya. Akabugha athi: “Kikanyiswekaya eriminya ngoku nibya n’ehindu kike-hike omo maminyereri wa Yehova hinemubererera.” c
“SIKENDI SYAHIKA KWENENE”
16. Busana naki erikakasya erya Yehova aha Habakuki likathughasira munabwire? (Abaebrania 10:36, 37)
16 Abandi b’okwa baghombe ba Yehova babirighunza buthuku buuli ibanemulinda erihwaho ly’omughulhu mubi ono. Oko malengekania w’abandu, eribererera ly’emilhaghe ya Nyamuhanga lyanganabya nga lyamamalha. Yehova mwakania okw’iyowa eryo akakakasya omuminyereri Habakuki athi: “Kusangwa esyonzoli sikine busana n’omughulhu atheghekawa, nasyo sikanguha erihika oko nduli yasyo, nasyo sisyendi syabiha; n’omo syangalinda, wulindesyo; kusangwa sikendi syahika kwenene, sisyendi syamalha.” (Hab. 2:3) Mbwino erikakasya erya Nyamuhanga aha lyabya ly’erighasira Habakuki musa? Kutse mbwino ebinywe Biwe bikanathughasira munabwire? Omw’isondolibwa n’omulimu, omukwenda Paulo mwakolesya ebinywe ebyo okw’Abakristayo, abakalindirira ekihugho kihya-kihya. (Soma Abaebrania 10:36, 37.) Kwesi, omulhaghe w’erilhamibwa lyethu nomwangabya ngamasibayo, thwangana yikethera ngoku ‘akendi syahika kwenene, syendisyamalha.’
17. Mwali wethu mughuma mwaghendera athi okw’ihabulha eryo Yehova aha Habakuki?
17 Abaghombe ba Yehova bangyi babirighendera okw’ihabulha lya Yehova ‘ery’erilinda’—nibya ahabw’emyaka. Ng’eky’erileberyako, Louise, atsuka erikolera Yehova omo 1939. Akabugha athi: “Oko buthuku obo, iningalengekanaya indi e Harmagedoni yikendyasa isindi naghunza esiniya. Ekyo mukithabya. Ahabw’emyaka, munalhangira ini kibuya erisoma ebyo ngahulhamo ‘emyatsi y’erilinda’—emyatsi ye Biblia eyihambire oku Noa, Abrahamu, Yozefu, n’abandi ababya b’erilinda ahabw’obuthuku buuli imubahebwa olhuhembo olho Yehova abalhagha. Ingye n’abandi eribya ithunalindire, kyabirileka ithwaligha ngoku kwenene ekihugho kihya-kihya kiri hakuhi.” Abandi bangyi ababirikolera Yehova ahabw’omughulhu muuli bakalighirana n’ekyo!
18. Erisamalira ebihangikwa lyanga ghumya lithi erikirirya lyethu omo kihugho kihya ekikayasa?
18 Ni kwenene, ekihugho kihya-kihya sikirikyasa. Aliwe thalengekania okwa bighuma by’okwa bindu ebiri hano—esyongununu, emithi, ebisoro, n’abandu. Sihali oyuwanga thika-thikira eribyaho ly’ebindu ebi, nomwakine indi hanabya obuthuku omughulhu byabya isibiriho. Biriho lino kundi Yehova mwabihangika. (Enz. 1:1, 26, 27) Nyamuhanga wethu kandi abiriyilhagha eriletha ekihugho kihya-kihya. Akendi syaberererya omulhaghe oyo. Omo kihugho kihya-kihya, abandu bakendi syatsemera engebe eya kera na kera ibane n’amaghalha awahikene. Oko buthuku obwa Nyamuhanga abirihiraho, ekihugho kihya-kihya kikendi syabyaho ngoku ebiri omo buhangwa bineho munabwire.—Isa. 65:17; Erib. 21:3, 4.
19. Wanga ghumya wuthi erikirirya lyawu?
19 Wunalindirire ekyo, kolesaya obuli kaghisa erighumya erikirirya lyawu. Mughulhu wosi sima endongolya. Lengekanaya oko maaka wa Yehova. Yihweraye omo mibiiri y’obunyakirimu. Omw’ikolha ekyo, iwanganabya mughuma w’okwa “bikiriraya n’eriyiyinia n’eriangirira ebyo Nyamuhanga alhagha.”—Ebr. 6:11, 12; Abar. 5:5.
OLHWIMBO 139 Yilhangire Iwune Omwa Kihugho Kihya-kihya
a Abangyi munabwire sib’ikirirye omo mulhaghe we Biblia ow’ekihugho kihya-kihya. Bakalengekanaya bathi ni bilhotho, olhughano buyira, ekindu ekithe kyangabya. Aliwe thuyikethere ngoku emilhaghe ya Yehova eyosi yikendi syabererera. Nomwabine bithya, eribya ithune n’erikirirya, thutholere ithwalholha embere erighumyalyo. Thuthi? Omwatsi ono akendi soborera.
b Awandi mena abirihindulhwa.
c Emyatsi mingyi eyihambire oko maminyereri we Biblia yangana banika ahisi sy’omwatsi “Prophecy” omo Watch Tower Publications Index. Ng’eky’erileberyako, lebaya omwatsi “Ebya Yehova Akalhaghulha Bikabererera” omo Watchtower ey’Okwokubanza 1, 2008.
