1. Soborera emibere eyabyaho Yesu akakolha ekithiko-thiko kiwe ky’erimbere.

 THATHERA akasasani k’ebyabya Yesu akatsuka erithulira okw’ihwererera ly’omwaka wa 29 E.K. Yesu na mama wiwe Maria, n’abaghuma b’okwa bigha biwe mubakokibwa okwa bugheni bw’eriherukya e Kana, ekyalu ekyabya endatha w’etawuni yabu Yesu e Nazareti. Kilhangirikire Maria aby’akawathikya okw’itsomana abagheni kundi abya munywani w’esyofamile esilhuire mw’abaghole. Aliwe oko bugheni obo, mukwabuthuka ekitsibu ekyanga hemwire kutsibu abaghole n’esyofamile syabu—evini muyahwa. b Obundi abagheni mubabya bangyi kwilhaba ngoku babya balengekenie. Aho n’aho Maria mwaghenda eyiri mughalha wiwe n’eribugha athi: “Sibawithe binyu.” (Yn. 2:1-3) Yesu mwakolhaki? Ekindu ekithe kya buli kiro—mwakolha ekithiko-thiko ky’erihindulha amaghetse ‘mw’ebinyu [evini] ebyuwene.’—Yn. 2:9, 10.

2-3. (a) Yesu mwakolesya athi amaaka wiwe w’erikolha ebithiko-thiko? (b) Omwatsi ono akendi thughasira athi?

² Yesu angakolire n’ebindi bithiko-thiko bingyi akakolha omubiiri wiwe w’erithulira. c Mwakolesya amaaka wiwe w’erikolha ebithiko-thiko eriwathikya esyongumi sy’abandu. Ng’eky’erileberyako, omwa bibiri bisa by’okwa bithiko-thiko biwe—erilisya abalhume 5000 n’enyuma waho abalhume 4000—abosi haghuma bangabya ibabya abandu abalhabire oku 27,000  thwamahirako abakali n’abaana ababyaho. (Mt. 14:15-21; 15:32-38) Omwa byosi bibiri, mwalhamya n’abalhwere bangyi. (Mt. 14:14; 15:30, 31) Thathera akasasani esyondeko sy’abandu nga mubasweka bungahi Yesu akabalhamya n’eribalisya!

³ Munabwire thwangan’igha bingyi oko bithiko-thiko bya Yesu. Omo mwatsi ono, thukendi kania oko masomo malebe awakaghumaya erikirirya agho ebithiko-thiko ebyo byanga thweghesya. Neryo ithwalebya ngoku thwanga gherererya omubere wa Yesu ow’eriyikehya n’erikwira abandi b’obulighe eyo akanganaya akakolha ebithiko-thiko.

4. Thukaghasirawa thuthi omwa masomo agho thuk’igha oko bithiko-thiko bya Yesu?

⁴ Ebithiko-thiko bya Yesu sibirisubulira okw’ithukangirirya amasomo awakaghumaya erikirirya awahambire okw’iyo musa aliwe n’awahambire oku Thatha wiwe. Kundi nibya, amaaka wiwe w’erikolha ebithiko-thiko alhua oku Yehova. Emibiri 10:38 hakathubwira hathi: “Nyamuhanga m’uthulira [oku Yesu] omulimu abuyirire n’obuthoki. Yesu mwalendera ehosi akakolha ebibuya, n’erilhamya abosi abanubibawa na Sitani, kusangwa Nyamuhanga abya haghuma nayu.” Kandi wibuke ngoku omwa byosi ebya Yesu abugha n’erikolha—imwamune n’ebithiko-thiko eby’akolha—mwakangania ndeke-ndeke amalengekania n’eriyowa lya Thatha wiwe. (Yn. 14:9) Thulebaye amasomo asathu agho thwang’ighira oko bithiko-thiko bya Yesu.

5. Ni kyahi ekyaleka Yesu iniakolha ebithiko-thiko? (Matayo 20:30-34)

⁵ Ery’erimbere, Yesu na Thatha wiwe bathwanzire kutsibu. Iniane okwa kihugho, Yesu mwakangania obunene bw’olhwanzo olhw’awithire abandu omw’ikolesya amaaka wiwe w’erikolha ebithiko-thiko eriwathikya abakaghalhawa. Buthuku bughuma, abalhume babiri esyondimethime mubamusaba obuwathikya. (Soma Matayo 20:30-34.) Lhangira ngoku Yesu “mwakwirabo obulighe” neryo amabalhamya. Omubere w’erikwira abandi b’obulighe bunene ng’oyo, ekindu ekikakanganaya olhwanzo, nagho mwaleka Yesu inialisya abakwire enzalha n’erilhamya omuhagha. (Mt. 15:32; Mk. 1:41) Thwangana yikethera ngoku Yehova, Nyamuhanga “w’omuthima w’erighanyira [erikwira abandi b’obulighe],” na Mughalha wiwe bathwanzire kutsibu kandi bakayowa nabi thukaghalhwa. (Lk. 1:78; 1 Pet. 5:7) Ka batholere eribya ibakakandira kutsibu erighunzaho ebitsibu byosi ebikaghalhaya abandu!

6. Ni maaka wahi agho Nyamuhanga abiriha Yesu?

⁶ Eryakabiri, Nyamuhanga abiriha Yesu y’amaaka w’erighunzaho ebitsibu byosi by’abandu. Erilhabira omwa bithiko-thiko biwe, Yesu mwakangania amaaka wiwe w’erikinda ebitsibu ebyo thuthe thwanga ghunzaho ahabwethu. Ng’eky’erileberyako, awithe amaaka w’erithuboholha okwa nzuko y’ebitsibu by’abandu—ekibi ekyo thwabirisighalya n’ebikalhwiriramo, amalhwere n’olhuholho. (Mt. 9:1-6; Abar. 5:12, 18, 19) Ebithiko-thiko biwe mubyakangania ngoku anganalhamya “obuli musindo” w’endwalha nibya n’erilhubukya abaholi. (Mt. 4:23; Yn. 11:43, 44) Kandi awithe amaaka w’erithulerya ebihunga ebikalire n’erikinda ebirimu bibi. (Mk. 4:37-39; Lk. 8:2) Ka kikahumulikanaya eriminya ngoku Yehova abiriha Mughalha wiwe y’amaaka ng’aya!

7-8. (a) Ebithiko-thiko bya Yesu bikathuha eriyikethera lyahi? (b) Ni kithiko-thiko kyahi ekya wulindirire omo kihugho kihya-kihya?

⁷ Eryakasathu, thwangana yikethera ndeke ngoku emighisa ey’obuthuku obukasa ahisi sy’Obwami bwa Nyamuhanga yikendi syabererera. Ebithiko-thiko ebya Yesu akolha iniane  oko kihugho ng’omundu bikathukanganaya eby’akendi syakolha omwa buswire iyo ng’Omwami w’elhubulha ow’Obwami bwa Nyamuhanga. Thuthalebya ebya thukisiya ithwayilhangirira omwa buthabali bwa Kristo. Thukendi syabya n’amaghalha awahikene, kundi akendi syalhusyaho obuli ndwalha n’obulema ebyabiryaghalya abandu. (Isa. 33:24; 35:5, 6; Erib. 21:3, 4) Sithwendi syaswakwa enzalha kutse eriaghalhwa busana n’ebitsinduli. (Isa. 25:6; Mk. 4:41) Thukendi syatsema kutsibu thukathangirira abanze bethu bakalhua omwa “amasinda” w’eryibuka. (Yn. 5:28, 29) Kutsibu-tsibu, ni kithiko-thiko kyahi ekya wulindirire omo kihugho kihya-kihya?

⁸ Abere akakolha ebithiko-thiko, Yesu mwakangania eriyikehya linene n’erikwira abandi b’obulighe—emibere eyo thutholere ithwagherererya. Thulebaye eby’erileberyako bibiri, omw’itsuka n’omwatsi w’obugheni bw’eriherukya, e Kana.

9. Ni kyahi ekyaleka Yesu iniakolha ekithiko-thiko okwa bugheni bw’eriherukya, e Kana? (Yoane 2:6-10)

⁹ Soma Yoane 2:6-10. Evini yabere yikahwera okwa bandu okwa bugheni bw’eriherukya, mbwino bwabya buthekwa-buthekwa indi Yesu ayire eky’erikolha? Eyihi. Sihabya obuminyereri obwalhaghulha buthi Masiya angakolire ekithiko-thiko ky’erikolha evini. Aliwe thathera akasasani nga wangayowa wuthi eby’erinywa byamahwa okwa bugheni bwawu bw’eriherukya. Yesu angabya imwakwira ab’okwa baghole b’obulighe na kwilhabirirya abaghole, neryo mwanza eribalhusya kw’ekihemu. Neryo  ngoku kinakanganibwe okw’itsuka, mwakolha ekithiko-thiko. Mwahindulha amaghetse—esyolita nga 390—mw’evini eyuwene. Obundi angabya imwakolha evini yosi eyo nuku eyindi yibye iyanganasaka yanakolesibwa enyuma waho kutse erighulibwa nuku yiwathikaye abaghole. Abatheke abahyaka aba ka batholere eribya imubasima kutsibu!

10. Ni myatsi nga yahi mikulhu eyikanibweko omwa buuli eyiri omu Yoane sura 2? (Lebaya n’ekisasani.)

¹⁰ Thuthalebya emyatsi mirebe mikulhu eyikanibweko omwa buuli eyiri omu Yoane esura 2. Muwukanalhangira ngoku Yesu s’iyo wusulhaya omwa malegha mw’amaghetse? Omwakanya k’eriyikangania, mwabwira abaghombe athi busulhaye omwa malegha mw’amaghetse. (Omulhondo 6, 7) Kandi abere abirihindulha amaghetse mwa vini, Yesu iyuwene-wene mwathathwalira kuyo kw’omukama w’eriherukya. Omwakanya k’ekyo, mwabwira abaghombe athi n’ibo bakole ekyo. (Omulhondo 8) Ahathe erithika-thika, Yesu mwath’imya ekikopo ky’evini n’erikisumbira embere sy’abagheni, n’eriyihalhamba athi, ‘Murozaye okwa vini eyo namabirikolha!’

11. Thwang’ighaki okwa kithiko-thiko kya Yesu?

¹¹ Thwang’ighaki okwa kithiko-thiko kya Yesu eky’erihindulha amaghetse mwa vini? Thuk’igha erisomo erihambire okw’iyikehya. Yesu mwathayihalhamba busana n’ekithiko-thiko eki; kandi nibya, syali athayihalhamba busana n’ebyo abirithakolha. Omwakanya k’ekyo, omw’iyikehya kandi mughulhu wosi iniakasubuliraya Thatha wiwe y’olhukengerwa n’erisima eryosi. (Yn. 5:19, 30; 8:28) Thwamagherererya Yesu omw’ilholha embere eriyikehya, isithwendi yihalhamba busana n’ebya thukathoka. Mbulha ni kyahi ekyo thwanga kolha omwa mubiiri wa Yehova, sithutholere thukayihalhambirakyo, aliwe ithwayihalhamba busana na Nyamuhanga oyo thuwithe olhusunzo lhw’erikolera. (Yer. 9:23, 24) Kwesi thumuhe olhukengerwa olhumutholere. Kundi nibya, ni kibuya kyahi ekya thwanga thoka ahathe obuwathikya bwa Yehova?—1 Kor. 1:26-31.

12. Ni yindi nzira yahi eya thwanga gherereryamo eriyikehya lya Yesu? Iha eky’erileberyako.

¹² Thulebaye eyindi nzira eyo thwanga gherereryamo eriyikehya lya Yesu. Thalengekania oku kino: Omusyakulhu iniaghunza ndambi nene inianemuwathikya omughombe omuwathikya omulere erithegheka omukania wiwe w’abandu bosi ow’erimbere. Busana n’ekyo, mughalha wethu omulere oyo inialhabya omukania owakahimba, kandi ekithunga kyosi ikyatsemeragho. Emihindano yikahwamo, omundu mulebe iniahika oko musyakulhu w’ekithunga oyo n’eribugha athi: ‘Mughalha wethu nanga mwakaha omukania owuwene kutsibu, kwabithe?’ Mbwino omusyakulhu oyo anatholere iniabugha athi: ‘Kwabine bithya, aliwe munaghunzire ndambi nene ingamuwathikya.’ Kutse omw’iyikehya syanga bugha athi: ‘Kwabine bithya. Ngamuyisyethera.’ Thwamabya ithunayikehirye, isithwendi yipipa busana n’ebibuya ebyo thukakolera abandi. Thukatsema thukaminya ngoku Yehova akalhangira ebya thukakolha mwa by’obughuli. (Thasyalebaya na Matayo 6:2-4; Ebr. 13:16) Ahathe erithika-thika, thukatsemesaya Yehova thukagherererya Yesu omw’ibya abakayikehaya.—1 Pet. 5:6.

13. Ni kyahi ekyo Yesu alhangira hakuhi n’omuyi we Naina, kandi mwakolhaki? (Luka 7:11-15)

¹³ Soma Luka 7:11-15. Thalengekania okwa kyabya eki ihamabirilhaba myaka ng’ibiri Yesu alitsukire omubiiri w’erithulira. Abya iniabirighenda e Naina, etawuni ye Galilaya eyiri hakuhi ne Sunemu, eyo omuminyereri Elisa alhubukaya mughalha w’omukali myaka nga 900  enyuma. (2 Bam. 4:32-37) Yesu abere ahika okwa lhukyo lhw’omuyi, mwalhangira abakayatsika bakalhua omwa muyi. Ekyabya ekyo ikik’itha obulighe—omukwakali abya iniabiriholerwa omwana wiwe mughuma musa. Aliwe mama oyuli omo bulighe oyo syabya iyuwene; endeko nene erilhua omwa muyi yabya iyine nayu. Yesu mwimania abakayatsika neryo amakolera mama oyuli omwa bulighe y’ekindu ekithendi syibiriranwa—erilhubukya mughalha wiwe! Oyu ni mughuma w’okwa basathu abo Yesu alhubukaya abakanibweko kutsibu-tsibu omwa bitabu by’Enjiri.

14. Ni myatsi nga yahi mikulhu eyikanibweko omwa buuli eyiri omu Luka sura 7? (Lebaya n’ekisasani.)

¹⁴ Thulebaye emyatsi mirebe mikulhu eyikanibweko omwa buuli eyiri omu Luka sura 7. Muwukanalhangira ngoku Yesu abere ‘alholha’ oku mama oyuli omwa bulighe “mwamughanyira [mwamukwira obulighe]”? (Omulhondo 13) Neryo, eby’alhangira—obundi omukali inianemulira inianakwamire ekinda kya mughalha wiwe—mubyaleka iniakwira omukali oyo y’obulighe. Yesu mwathakwama kyakwira mama oyo y’obulighe; mwakikangania. Ahathe erithika-thika, Yesu mwakania n’omukali omwa mulenge owakahumulikanaya, n’erimubwira athi: “Siwulire.” Neryo Yesu mwayira eky’akakolha. Mwalhubukya omughalha oyo kandi “mwamuhererya nyinya wiwe.”—Omulhondo 14, 15.

15. Thwang’ighaki oko kithiko-thiko kya Yesu?

¹⁵ Thwang’ighaki okwa kithiko-thiko kya Yesu eky’erilhubukya mughalha w’omukwakali? Thuk’igha erisomo ery’erikwira ababiriholerwa b’obulighe. Ni kwenene, sithwanga lhubukya abaholi, ngoku Yesu akolha. Aliwe nga Yesu, thwangana kulha-kulhania omubere w’erikwira ababiriholerwa b’obulighe omw’iyitheghererya emibere eyo balimo. Thwanganayira ekyo thukakolha erikangania ku thukabakwira obulighe omw’ibugha n’erikolha ebyo thwanga thoka eribawathikya n’eribahumulikania. d (Emi. 17:17; 2 Kor. 1:3, 4; 1 Pet. 3:8) Nibya n’ebinywe bike n’ehiminyikalho hike byangana wathikya.

16. Ngoku kikanganibwe omwa kisasani, wam’ighaki okwa kyalholirweko kya mama oyuwabya imwanamaholerwa mwali wiwe?

 ¹⁶ Thulebaye ekyalholirweko. Myaka mirebe enyuma ibanemwimba olhwimbo omwa mihindano, mwali wethu mwalhangira mama okwa kindi kithumbi inianemulira. Olhwimbo olho ilhukakanaya oko maha w’erilhubuka, kandi mama oyo abya imwanamaholerwa mwali wiwe. Habw’eriminya ekyo, mwali wethu oyo mwalhuaho iniaghenda ahali mama oyo, amamuhambako, neryo bamaghunzerera olhwimbo olho lhwa haghuma. Enyuma waho mama oyo mwabugha athi: “Munayilhangirira olhwanzo lhunene lhw’abalikyethu.” Mwatsema kutsibu habw’eribya imwaghenda okwa mihindano. Mwabugha athi: “Okwa Kisenge ky’Obwami, yathukabanira obuwathikya.” Thwangana yikethera ngoku Yehova nibya akalhangira n’eritsemera n’ehindu hike-hike ehyathukakolha erikangania ku thukakwira ababiriholerwa “ababbunikire omo muthima” b’obulighe.—Esy. 147:3.

17. Thwam’ighaki omo mwatsi ono?

¹⁷ Thwangana ghasirwa omw’iyeghesya okwa myatsi eyiri omwa bitabu by’Enjiri eyihambire okwa bithiko-thiko bya Yesu. Yikathweghesaya ngoku Yehova na Yesu bathwanzire kutsibu, ngoku Yesu awithe amaaka w’erighunzaho ebitsibu byosi by’abandu, kandi ngoku thwanga yikethera ighuma emighisa y’Obwami eyiri hakuhi. Thukendibya thunemuyithendya oko myatsi eyo, ithwangana ghanirya okwa syonzira esyo thwanga gherereryamo emibere ya Yesu. Busana naki iwuthayihiraho endegheka y’eriyeghesya kutse ey’Eriramya ly’Eka eyikahira omuwatho okwa bindi bithiko-thiko bya Yesu? Lebaya nga ni masomo wahi agho wang’igha kandi bwira kugho kw’abandi. Thalengekania okw’ikanirania erikahimba eryo mwanga thunga!—Abar. 1:11, 12.

18. Thukendi syakania okuki omo mwatsi owakakwamako?

¹⁸ Okw’ighunzerera ly’omubiiri wiwe w’erithulira, Yesu mwalhubukya omundu wakasathu okwa basathu abo iyo alhubukaya. Aliwe erilhubukya eri lyabya lya mbaghane—mwalhubukya munywani wiwe mwanzwa, kandi mwakolha eki omwa mibere eyithe ya buli kiro. Ni masomo wahi ogho thwang’igha omo mwatsi w’Enjiri awahambire okwa kithiko-thiko ekyo? Kandi thwanga ghumya thuthi erikirirya lyethu omwa maha w’erilhubuka? Omwatsi owakakwamako akendi syakania oko bibulyo ebyo.