1. Ni kyahi ekya thukaligha?

 ITHWE ng’abandu ba Yehova, thunasi ngoku athwanzire kandi kw’anzire ithwatsemera engebe eyuwene. (Abar. 8:35-39) Kandi thukaligha ngoku mughulhu wosi emisingyi ye Biblia yikathughasira thwamaghendera kuyo. (Isa. 48:17, 18) Kandi ibbwa thwamabana ebitsibu ebya thuthayitsulirye?

2. Ni bitsibu byahi ebya thwangabana, kandi ebitsibu ng’ebyo byangana leka ithwayibulya thuthiki?

² Abaghombe ba Yehova abosi bakabana ebitsibu. Ng’eky’erileberyako, omuhughu anganathuponesya omo nzira ndebe. Thwangana lhwalha obulhwere obwanga leka ithuthakolha bingyi omwa mubiiri wa Yehova. Thwangana bana ebitsibu ebikalire ebikasa busana n’ekitsinduli. Kutse thwangan’endereribwa busana n’ebya thw’ikirirye. Thwamabana ebitsibu ng’ebyo, ithwangana yibulya: ‘Busana naki eki ikyanyibyako? Mbwino nasobirye? Mbwino eki kikakanganaya kithi Yehova syakinyitsumulha?’ Wunewathayowa wuthya? Kyamabya ikwa kiri kithya, isiwahwa amani. Abangyi b’okwa baghombe ba Yehova babiribya n’eriyowa ng’eryo.—Esy. 22:1, 2; Hab. 1:2, 3.

3. Thwang’ighaki omwa Esyonyimbo 34:19?

³ Soma Esyonyimbo 34:19. Thuthalebya esyonzumwa ngulhu-ngulhu ibiri esiri omwa lhwimbo olhu: (1) Abathunganene bakabana ebitsibu. (2) Yehova akathulhamaya omwa bitsibu byethu. Akathulhamaya athi? Enzira nguma ly’erithuwathikya eribya n’amalengekania awatholere okwa ngebe omo mughulhu mubi ono. Nomwakine indi Yehova akathulhaghanisaya athi ithukendi bana etseme omw’imukolera, syalibugha athi ni buthekwa-buthekwa indi thukendibya omwa ngebe eyithemo bitsibu lino. (Isa. 66:14) Akathuhiramo omuhwa w’erihira  amalengekania wethu oko buthuku obukasa—obuthuku obwa thukendi syabya omwa ngebe eyo anzire ithwatsemera kera na kera. (2 Kor. 4:16-18) Thunalindirire ekyo, akathuwathikaya eribya ithunemughenderaho obuli kiro.—Eki. 3:22-24.

4. Thukendi kania okuki omo mwatsi ono?

⁴ Thukanaye okwa bya thwang’ighira okwa by’erileberyako by’abaramya ba Yehova abathaleghulha, ab’omwa buthuku bwe Biblia n’ab’omwa buthuku bwethu. Ngoku thukendi lhangira, thwangana bana ebitsibu ebya thuthayitsulirye. Aliwe thwamayikethera Yehova, isyendi lemwa erithuwathikya. (Esy. 55:22) Thukakania okwa by’erileberyako ebi, yibulhaye: ‘Nangakolireki kunabya omwa mibere ng’eyo? Eby’erileberyako ebi bikaghumaya bithi eriyikethera lyaghe omu Yehova? Ni masomo wahi agho nangaghenderako?’

5. Ni bitsibu byahi ebya Yakobo abana busana na Labani? (Lebaya ekisasani ky’okwa kidipa.)

⁵ Abaghombe ba Yehova ab’omwa buthuku bwe Biblia mubabana ebitsibu ebya bathabya bayitsulirye. Thalengekania oku Yakobo. Thatha wiwe mwamubwira athi ayathahaye oko bali ba Labani, omuhughu oyukirirye, kandi mwakakasibwa ngoku Yehova angamutsumwire kutsibu. (Enz. 28:1-4) Neryo Yakobo mwakolha ekitholere. Mwalhua e Kanana amaghenda ewa Labani, oyuwabya awithe bali babiri—Lea na Rakeli. Yakobo mwanza mwali wa Labani omulere, ya Rakeli, kandi mwaligha erikolera thatha wa Rakeli myaka musanju athali amuthahya. (Enz. 29:18) Aliwe emyatsi muyithabya ngoku Yakobo aby’alengekenie. Labani mwamutheba amamuha mwali wiwe omukulhu, ya Lea. Labani mwalighira Yakobo erithahya Rakeli enyuma w’ewiki alithahirye Lea, aliwe inianalyamukolera eyindi myaka musanju. (Enz. 29:25-27) Kandi Labani mwakangania Yakobo y’obuthe bulingirirania akakolongana nayu. Omwa byosi, Labani mwabendekerya Yakobo habw’emyaka 20!—Enz. 31:41, 42.

6. Ni bindi bitsibu byahi ebya Yakobo aghumira?

⁶ Yakobo mwaghumira ebindi bitsibu. Aby’awithe efamile nene, aliwe baghalha biwe isibali kolongana mughulhu wosi. Nibya mubaghulya mughalha wabu ya Yozefu omwa bukobe. Baghalha ba Yakobo babiri ya Simeoni na Lawi, mubaletha ekihemu okwa famile yabu n’erikinia erina lya Yehova. Eryongera okw’ebyo, mukali wa Yakobo omwanze, ya Rakeli, mwaholha akabutha omwana wiwe owakabiri. Kandi busana n’enzalha nene, Yakobo mwabya w’erihumira e Misiri omwa myaka yiwe y’obukulhu.—Enz. 34:30; 35:16-19; 37:28; 45:9-11, 28.

7. Yehova mwakangania athi ya Yakobo kw’anamusimire?

⁷ Nomwanabana ebyosi ebi, erikirirya lya Yakobo omu Yehova n’omwa milhaghe Yiwe mulithahwa. Busana n’ekyo, Yehova mwakangania Yakobo kw’anamusimire. Ngahathya, Labani nomwanabya muthebya, Yehova mwatsumulha Yakobo kinyamubiri. Kandi thalengekania Yakobo ng’atholere eribya imwasima Yehova ya bungahi akathasyabya haghuma na Yozefu—omughalha oyo abya iniabirilengekania athi abiriholha! Obunywani bwa hakuhi obo Yakobo aby’awithe na Yehova mubwaleka iniathoka erighumira ebitsibu. (Enz. 30:43; 32:9, 10; 46:28-30) Thwamabya ithune n’obunywani bwa hakuhi na Yehova, nethu ithwangana thoka erighumira ebitsibu ebikasa isithuyitsulirye.

8. Omwami Dawudi aby’anzire erikolhaki?

⁸ Omwami Dawudi abya isyangakolha obuli kindu eky’abya akalengekania erikolha omwa mubiiri wa Yehova. Ng’eky’erileberyako, Dawudi aby’anzire kutsibu erihimbira Nyamuhanga wiwe y’ehekalu. Mwabwira omuminyereri Natana y’eriyisunza liwe eryo. Natana mwamusubirya athi: “Wukole ebyosi ebiri omo  muthima wawu; kusangwa Nyamuhanga ali haghuma nawu.” (1 Emy. 17:1, 2) Wukalhuaho iwalhangira ngoku ebinywe ebyo mubyahumulikania Dawudi. Obundi mwalhuaho iniayitheghekera eritsuka omubiiri munene oyu.

9. Dawudi mwakolhaki akowa omwatsi owakaponesaya?

⁹ Aliwe buthuku buke enyuma waho, omuminyereri wa Yehova mwasubulha n’omwatsi owakaponesaya. “Oko kiro ekyo kisa-kisa,” Yehova mwabwira Natana athi Dawudi si yukendi himba ehekalu; omwakanya k’ekyo, omughuma w’okwa baghalha biwe yuwangakolire ekyo. (1 Emy. 17:3, 4, 11, 12) Dawudi mwakolhaki akowa omwatsi oyu? Mwahindulha ekilhubirirwa kiwe. Mwahira amalengekania okw’isorokya esyosente n’eby’erikolesya ebya mughalha wiwe Solomona angayithaghire busana n’omubiiri oyu.—1 Emy. 29:1-5.

10. Yehova mwatsumulha athi Dawudi?

¹⁰ Dawudi abere abiribwirwa ngoku si yukendi himba ehekalu, aho n’aho Yehova mwakolha nayu endaghane. Yehova mwalhaghanisya Dawudi athi omughuma w’okwa b’olhubutho lhwiwe angathabere kera na kera. (2 Sam. 7:16) Omo kihugho kihya-kihya, thathera akasasani Dawudi ng’akendi syatsema bungahi akaminya ngoku anemutsemera engebe ahisi sy’erithabalha ly’Emyaka Rukumi eya Yesu, Omwami oyulhuire omwa lhubutho lhwiwe! Omwatsi oyu akathuwathikaya erilhangira ngoku nibya nomuthwangalemwa erikolha ebyosi ebya thulhue thulengekenie erikolera Yehova, Nyamuhanga wethu anganathuha eyindi mighisa eya thuthalengekenie.

11. Abakristayo b’omwa kighana ky’erimbere mubatsumulhwa bathi nomwakine indi Obwami mubuthasa ngoku babya balengekenie? (Emibiri 6:7)

¹¹ Abakristayo ab’omwa kighana ky’erimbere mubabana ebitsibu ebya bathabya bayitsulirye. Ng’eky’erileberyako, babya balindirire kutsibu Obwami bwa Nyamuhanga eryasa, aliwe sibabya basi nga bukendyasa mughulhu wahi. (Emib. 1:6, 7) Neryo mubakolhaki? Mubayihwerya omwa mubiiri w’erithulira. Engulhu yuwene yabere yinemulhandaghana, mubayilhangirira obwema obulhangirikire obukakanganaya ngoku Yehova anemutsumulha akaghalha kabu.—Soma Emibiri 6:7.

12. Abakristayo b’omwa kighana ky’erimbere mubakolhaki hakabya enzalha?

¹² Buthuku bughuma, muhabya enzalha nene “omo kihugho kyosi.” (Emib. 11:28) Abakristayo b’omwa kighana ky’erimbere nabo muyabahikako. Mbwino wangana thera akasasani enzalha nene eyi nga yitholere eribya imuyabahambako yithi? Ahathe erithika-thika emithwe y’eka mubabulha nga bakendi banira bathi ab’eka yabu b’eky’erirya. Kandi ibbwa abalere ababya bakathegheka erikolha bingyi omwa mubiiri wa Yehova? Mbwino bangabya imubalengekania bathi batsuke erilinda? Nomuhanabya emibere eyi, Abakristayo mubaghenda-ghendania nayo. Mubalholha embere erithulira omwa nzira yosi-yosi eyo bangathoka, kandi ibanatsemire ibakaha balikyabo abe Yudea okwa bya bawitheko.—Emib. 11:29, 30.

13. Ni mighisa yahi eyo Abakristayo abo babana omwa buthuku bw’enzalha?

¹³ Ni mighisa yahi eyo Abakristayo abo babana omwa buthuku bw’enzalha? Abawathikibawa mubayilhangirira obuwathikya bwa Yehova. (Mt. 6:31-33) Batholere eribya imubongera eribya bughuma n’abikirirya balikyabo abasa bawathikaya. Kandi abahayo kutse abasangira omo mubiiri w’eriwathikya mubabana etseme y’erihithya. (Emib. 20:35) Yehova mwatsumulha abosi bakaghenda-ghendania n’emibere eyabyaho.

14. Ni byahi ebyabya oku Barnaba n’omukwenda Paulo, kandi mumwalhwiririraki? (Emibiri 14:21, 22)

¹⁴ Mughulhu mungyi Abakristayo ab’omwa kighana ky’erimbere ibakendereribawa, okwa  bundi buthuku isibayitsulirye. Thalengekania oko kyabya oku Barnaba n’omukwenda Paulo ibanemuthulira omo kitsweka ekye Listra. Okw’itsuka, ababahulikirira mubabathangirira ndeke. Aliwe enyuma waho, abahakani “mubabindulha emithima y’abandu,” kandi abaghuma b’okwa bandu iban’abo mubaswirya Paulo y’omo mabwe n’erimusigha hakuhi n’eriholha. (Emib. 14:19) Barnaba na Paulo mubalholha embere erithulira ehandi. Ni byahi ebyalhwiririramo? “Mubayira abigha bangyi,” kandi ebya babugha n’eky’erileberyako kyabo mubyaghumya balikyabo. (Soma Emibiri 14:21, 22.) Abangyi mubaghasirwa kundi Barnaba na Paulo mubathabikyako bak’endereribwa kitsumbukirania. Thwamathendi bikyako omo mubiiri ogho Yehova abiribugha athi thukole, ithukendi tsumulhwa.

15. Wuk’ighaki okwa ky’erileberyako kya Mughalha Wethu A. H. Macmillan?

¹⁵ Omo myaka eyakolhaya oko 1914, abandu ba Yehova babya ibanawithe ebya balindirire kutsibu. Thalengekania okwa ky’erileberyako kya Mughalha Wethu A. H. Macmillan. Ng’abandi bangyi oko buthuku obo, Mughalha Wethu Macmillan aby’akalengekania athi akisiya iniahebwa olhuhembo lhwiwe olhw’erighenda elhubulha. Omo mukania ogho alhabaya Okwomwenda 1914, mwabugha athi: “Obundi oyu w’omukania ow’abandu bosi ow’erighunzerera ogho ngendi lhabya.” Nomwabine, oyo mwathabya mukania wiwe w’erighunzerera. Enyuma waho, Mughalha Wethu Macmillan mwahandika athi: “Obundi abandi omw’ithwe balhue bakaharabana kutsibu omw’ilengekania bathi thukendi lhuaho ithwaghenda elhubulha.” Mwongerako athi: “Ekya thwanga kolire lyabya iry’eriyihwerya omo mubiiri w’Omukama.” Kandi kwenene Mughalha Wethu Macmillan mwakolha ekyo. Aby’awithe omuhwa omo mubiiri w’erithulira. Aby’awithe olhusunzo lhw’erihumulikania balikyethu bangyi ababya omo ngomo busana n’erithendibya na lhuhandi omo by’ekipolitiki. Kandi iniakahindana buthaleghulha nibya n’omwa myaka yiwe y’obukulhu. Mughalha Wethu Macmillan mwaghasirwa athi busana n’erikolesya ndeke obuthuku biwe anemulinda olhuhembo lhwiwe? Buthuku buke iniakisiya iniaholha omo 1966, mwahandika athi: “Namunabwire erikirirya lyaghe likinaghumire nga kera.” Aya ka ni malengekania awuwene kutsibu agho ithwe bosi thwangabya nagho—kwilhabirirya thwamabya ithwamabirighunza buthuku ithunemughumira ekitsibu kwilhaba ngoku thulhue thulengekenie.—Ebr. 13:7.

16. Ni kitsibu kyahi ekyahika oku Herbert Jennings na mukali wiwe isibayitsulirye? (Yakobo 4:14)

¹⁶ Abangyi b’okwa bandu ba Yehova bakabana ebitsibu by’amaghalha ebya bathayitsulirye. Ng’eky’erileberyako, omw’iyikaniako liwe, Mughalha Wethu Herbert Jennings b mwasoborera ngoku iyo na mukali wiwe babya ibabiritsemera olhusunzo lhwabu ng’abamisyonare e Ghana. Aliwe endambi muyahika, bamamupimamo obulhwere obukahamba nabi kutsibu okw’iyowa. Omw’ikolesya ebinywe ebiri omu Yakobo 4:14, Mughalha Wethu Jennings mwakania okwa mibere mihyaka eyo babyamo “‘ng’engyakya’ eyo bathabya bayitsulirye.” (Soma.) Mwahandika athi: “Muthwabya n’amalengekania awatholere, muthwathegheka erilhua e Ghana n’erisighania banywani bethu bangyi ab’okwa ndungu erisuba e Canada [eriyathambirwa].” Yehova mwawathikya Mughalha Wethu Jennings na mukali wiwe erilholha embere erimukolera buthaleghulha nomubanabya bawithe ekitsibu ekyo.

17. Eky’erileberyako kya Mughalha Wethu Jennings mukyaghasira kithi balikyethu?

 ¹⁷ Ebya Mughalha Wethu Jennings abugha ahathe eribisirira omw’iyikaniako liwe mubyahamba oko bandi kwa kutsibu. Mwali wethu mughuma mwahandika athi: “Nabya isindi nathahambwako indya kutsibu ngoku nahambawako ingasoma omwatsi oyu. . . . Erisoma oko mibere Mughalha Wethu Jennings asighanaya olhusunzo lhwiwe eriyathambirwa mukyangwathikya eribya n’amalengekania awatholere oko mibere eya ngalimo.” N’owundi mughalha wethu mwahandika athi: “Enyuma w’erikolha ng’omusyakulhu w’ekithunga ahabw’emyaka ikumi, munabya w’erileka olhusunzo lhwaghe busana n’erilhwalha obulhwere bw’obwongo erighana. Eriyowa inabirilemwa kutsibu mukyaleka ingayiponera kutsibu eribya isinangathasyasoma emyatsi y’eriyikaniako. . . . Aliwe erighumisirizya lya Mughalha Wethu Jennings mulyanyihumulikania.” Eki kikathwibukaya ngoku thwamaghumira ebitsibu ebikasa isithuyitsulirye, ithwangana himba abandi. Nibya engebe nomuyangaghana eribya ngoku thulhue thulengekenie, paka thwanganabya eky’erileberyako ekilhangirikire eky’erikirirya n’eriyiyinia.—1 Pet. 5:9.

18. Ngoku kikanganibwe omwa bisasani, thwang’ighaki oko ky’erileberyako ky’omukwakali e Nigeria?

¹⁸ Emihitho ng’ekihunzo ky’ekorona [COVID-19] byabirihamba nabi oko bangyi b’okwa bandu ba Yehova. Ng’eky’erileberyako, omukwakali e Nigeria aby’asighere n’othwalya thuke. Engyakya nguma, mwali wiwe mwamubulya nga bakendiryaki babiritsumba ekikopo kyabu kighuma eky’omutsele ekyo basighere nakyo. Mwali wethu oyo mwabwira mwali wiwe athi sibakiwithe kasente kosi-kosi kutse ebyalya aliwe athi batholere ibagherererya omukwakali we Zarefati—batsumbe ehyalya ehisighereho n’eriyikethera ighuma Yehova. (1 Bam. 17:8-16) Babere bathebatsuka erilengekania okwa kya bakendirya erithungyi ly’ekiro ekyo, mubahebwa akasiko erilhua oko balikyabo. Omw’akasiko ako mwabya ebyalya ebyangana ghunza ebiro ebilhabire oko wiki  ibiri. Mwali wethu mwabugha athi syabya asi ngoku Yehova anahulikirire ndeke ebyo abya iniamabiribwira mwali wiwe. Omo kwenene, thwamayikethera Yehova, ebitsibu ebikasa isithuyitsulirye ibyangana leka ithwayithunda hakuhi nayu.—1 Pet. 5:6, 7.

19. Ni endereribwa lyahi erya Aleksey Yershov aghumira?

¹⁹ Omo myaka eya lino-lino, abangyi b’okwa balikyethu babirighumira eriendereribwa eryo bangabya isibabya bayitsulirye. Thuthalengekania oku Mughalha Wethu Aleksey Yershov, oyuwikere e Russia. Abandu ba Yehova omo kihugho eki babya ibanawithe obwiranda oko lhulengo lhulebe omughulhu Mughalha Wethu Yershov abatizibawa omwa 1994. Aliwe omo myaka eyakwamako, emibere muyahinduka omwa Russia. Omo 2020, oku wa Mughalha Wethu Yershov mukwathahirirwa n’erisekulibwa n’ebingyi by’okwa bindu biwe mubyahambwa. Mezi malebe enyuma waho, egavumente muyamuhirako emisango ng’engoli y’ebibi. Emyatsi eryongera erikalha, emisango eyo yabya busana n’esyovidiyo esyo mundu oyuwabya iniamabirighunza obuthuku obulhabire oko mwaka inianemuyiringirirania ng’oyuwanzire erigha e Biblia aby’akahamba. Eri ka lyabya ighoberya!

20. Mughalha Wethu Yershov abirighumya athi obughuma bwiwe na Yehova?

²⁰ Mbwino hane ekibuya kyosi-kyosi ekyabirilhwiririra omw’endereribwa lya Mughalha Wethu Yershov? Ee. Obughuma bwiwe na Yehova bwabiryongera erighuma. Akabugha athi: “Ingye na mukali waghe thwabiryongera erisaba haghuma mughulhu wosi. Munaminya ngoku sinangathoka erisikira emibere eyi ahathe obuwathikya bwa Yehova.” Akongerako athi: “Eriyeghesya likanyiwathikaya erirwanisya erihwa amani. Ngaghaniraya oko by’erileberyako by’abaghombe abathaleghulha abakera. Omwa Biblia muli myatsi mingyi eyikakanganaya ngoku ni kikulhu erilholha embere erithekana n’eriyikethera Yehova.”

21. Thwam’ighaki omo mwatsi ono?

²¹ Thwam’ighaki omo mwatsi ono? Omo mughulhu mubi ono thukabana ebitsibu ebya thuthayitsulirye. Nomwabine, mughulhu wosi Yehova akawathikaya abaghombe biwe bamamuyikethera. Ngoku kiri omw’isako erihirikirire omwatsi ono, “omundu oyuthunganene akaghalhawa omo malighe mangyi, nikwa Omwami Mukulhu akamulhamaya omo wosi.” (Esy. 34:19) Kwesi thulhole embere erihwerya amalengekania wethu okwa maaka wa Yehova aw’erithuwathikya, butsira oko bitsibu byethu. Neryo ng’omukwenda Paulo, ithwangana bugha thuthi: “Omo byosi ngwithe akaghalha busana n’oyukamba amaaka.”—Fil. 4:13, NWT.